...

ფონდი „სოხუმის" ოფისში ჩატარდა ორდღიანი ტრენინგი  თემაზე - „ადვოკატირება - სამოქალაქო ინტერესების დაცვის ეფექტური საშუალება". მასში მონაწილეობა  დასავლეთ საქართველოს რვა ქალაქის ამომრჩეველ ქალთა ლიგის ადვოკატირების ჯგუფების 24 წევრმა მიიღო. ტრენინგის მონაწილეთა შორის იყვნენ  სტუდენტები, პედაგოგები, ჟურნალისტები, საჯარო მოხელეები.

ტრენინგის პროგრამა მოიცავდა როგორც თეორიულ მასალას, ასევე პრაქტიკულ სავარჯიშოებს  ჯგუფებში.

მონაწილეები ადვოკატირების ცნებას, ეტაპებსა და ამ პროცესში განსახორციელებელი ეფექტური ქმედებების განსაზღვრის მეთოდებს გაეცნენ.

ქალაქების მიხედვით ჯგუფური მუშაობისას მონაწილეებმა დაასახელეს თითო პრობლემა და მის გადასაჭრელად სტრატეგია შეიმუშავეს. განსაკუთრებით საინტერესო იყო ჯგუფების პრეზენტაციების შემდეგ გამართული დისკუსიები.

ფონდი „სოხუმის" მიერ  ნიჟნი ნოვგოროდიდან მოწვეულმა პარა-ფსიქოლოგებმა სამდღიანი ტრენინგი - „პარა-სპეციალისტების მომზადება რეგიონებში მუშაობისათვის" -  ჩაატარეს. ტრენინგში ქალთა მხარდაჭერის 6 ცენტრის წარმომადგენლები მონაწილეობდნენ.

ტრენინგის მთავარი ამოცანა იყო ადგილობრივი პარა-სპეციალისტებისათვის  კონფლიქტის დარეგულირების უნარ-ჩვევების სწავლება, ურთიერთგაგების, პირველადი კონტაქტების უნარების განვითარება და ფორმირება.

 გაიმართა  ფსიქოლოგიური ტრენინგის თამაშები, სადაც ხელოვნური, მოთამაშეთა ინტერესების მაპროვოცირებელი კონფლიქტური სიტუაციები იქმნება.

ტრენინგზე განიხილეს შემდეგი თემები: ფსიქოლოგიური კონსულტირება, მითები ძალადობაზე, აქტიური მოსმენის ძირითადი ხერხები, კრიზისების ტიპები და მათზე  აქტიური რეაგირების გზები. 

ქუთაისში, სასტუმრო "იმერში” ლიდერთა სკოლის პირველი და მეორე კურსის მონაწილეებს ტრენინგი ჩაუტარდათ თემაზე "ორგანიზაციული განვითარება”.

ტრენინგი დაიწყო ლიდერ ქალებთან შეხვედრით.

 "ეფექტური კომუნიკაცია. კონფლიქტები გუნდში და მისი გადაჭრის გზები”, - ამ თემის განხილვის შემდეგ ახალგაზრდები ჩაუფიქრდნენ საკუთარ ჩვევებს და მათი გაუმჯობესების აუცილებლობაც დაინახეს.

"ტრენინგიდან მიღებული ინფორმაცია იმდენად კონკრეტული და ამომწურავი იყო, რომ შეკითხვის დასმა არც მჭირდებოდა”, "სამი დღის განმავლობაში მიღებული ცოდნა დამეხმარება, როგორც 16-დღიანი კამპანიის დროს დაგეგმილი ღონისძიებების კარგად ჩატარებაში, ასევე ყოველდღიურ ცხოვრებაში”,  - ასეთია პირველკურსელთა მოსაზრებები.  

არასამთავრობო ორგანიზაციის მისიას, ფუნქციებს, ამოცანებს და პროექტის წერის სტრუქტურას დიდი მონდომებით გაეცნენ დემოკრატიის კურსის მონაწილეები.

"ახალგაზრდული არასამთავრობო ორგანიზაციის შექმნის იდეა ჯერ კიდევ პირველ ტრენინგზე გაგვიჩნდა. ახლა მიღებული ცოდნა გამოგვადგება ჩვენი იდეის განხორციელებაში”, - ამბობენ გოგონები.

ტრენინგის მესამე დღეს ლიდერთა სკოლის ორივე კურსი ერთად შეიკრიბა, რათა ემსჯელათ კამპანიის დაგეგმვასა და ორგანიზაციაზე. შეხვედრა მეტად საინტერესო და ორიგინალური გამოდგა, რადგან გოგონებს ერთად მუშაობისა და გამოცდილების გაზიარების საშუალება მიეცათ.

პროექტი ხორციელდება შვედეთის ქალთა ორგანიზაცია „ქალები ქალებისათვის" (KVINNA TILL KVINNA) მხარდაჭერით.

- აღფრთოვანებულები მივდივართ საქართველოდან, ჩვენს მოსწავლეებს ვუამბობთ ნანახსა და განცდილზე, თუმცა ეს ყველაფერი თავად უნდა იგრძნო, - ამბობდნენ ბოლო დღეს რუსეთიდან ჩამოსული მასწავლებლები...

შთაბეჭდილებების საწყისი რუსეთ-საქართველოს საზღვარზე იყო. მერე - სტეფანწმინდა, ფასანაური, ექსკურსია თბილისში და ყველაზე ამაღელვებელი - გრიბოედოვის საფლავთან მიახლება მთაწმინდაზე.

სამმა დღემ უჩვეულოდ ბევრი რამ დაიტია: ზღვისპირას გატარებული ულამაზესი წუთები, ექსკურსიები ბათუმში, ქუთაისში, სათაფლიაში. და განსაკუთრებით შთამბეჭდავი - სტუმრობა ბაღდათში, ვლადიმერ მაიაკოვსკის სახლ-მუზეუმში.

ყველაზე მთავარი, რამაც რუსეთისა და საქართველოს რუსული ენის  24 მასწავლებელი შეკრიბა, იყო ქობულეთში ჩატარებული სამდღიანი სემინარი "შერიგების სასკოლო სამსახურები" (მწვრთნელი - რუსტემ მაკსუდოვი,  საზოგადოებრივი ცენტრის „სასამართლო-სამართლებრივი რეფორმა" პრეზიდენტი). მონაწილეები გაეცნენ კონფლიქტური სიტუაციების მოგვარების ახალ გზებს, მედიაციისა და შერიგების სასკოლო სამსახურის პრინციპებს. ერთმანეთს გაუზიარეს გამოცდილებები, ახლებურად შეხედეს სასწავლო პროცესს, მოსწავლეებს, კოლეგებს.

სემინარი არის ნაწილი პროექტისა „ცხოვრება მშვიდობით - მშვიდობიან გარემოში",  რომელსაც ახორციელებენ კავშირი „დონის ქალები" (რუსეთი) და კულტურულ-ჰუმანიტარული ფონდი „სოხუმი" (საქართველო). პროექტი ლოგიკური გაგრძელებაა  საქართველოსა და რუსეთის მშვიდობისმყოფელ ქალთა ალიანსის მონაწილეთა დიალოგისა, რომელიც დაიწყო თბილისში 2009 წლის დეკემბერში.

როგორც სემინარის ბოლოს აღინიშნა, მისი ყოველი მონაწილე ახალ შტრიხებს შესძენს პედაგოგიურ საქმიანობას. ისინი კმაყოფილნი დარჩნენ ახალი ინფორმაციების მიღებით, ცოდნის გამდიდრებით და ერთმანეთთან ურთიერთობით, რასაც დანატრებულნი არიან მასპინძლებიცა და რუსეთიდან ჩამოსული სტუმრებიც...

რაც ყველაზე მთავარია, სემინარის შედეგად შეიქმნა აქტიურ მშვიდობისმყოფელთა  ქალთა გუნდი, რომელიც ხელს შეუწყობს მომავალი თაობის მშვიდობიანი სულისკვეთებით აღზრდას.

ლიდერთა სკოლის ტრენინგები ფონდ „სოხუმში" სამი დღე გრძელდებოდა. „კონფლიქტი და ქალის როლი კონფლიქტში"-ტრენინგების ამ საერთო თემის  განხილვაში ლიდერთა სკოლის გოგონები აქტიურობდნენ.

- ქალს, მისთვის დამახასიათებელი დიპლომატიურობითა და შორსმჭვრეტელობით, შეუძლია კონფლიქტური სიტუაციის განმუხტვა;

-კონფლიქტი იმდენად ხშირი მოვლენაა ჩვენს რეალობაში, რომ უფრო მეტის გაგება გვსურს მის შესახებ, რათა მშვიდობიანად შევძლოთ გადაწყვეტა,-ამბობენ ტრენინგის მონაწილე გოგონები.

ლიდერთა სკოლის გოგონებმა სურვილი გამოთქვეს, ქართულ-აფხაზური კონფლიქტის მშვიდობიანი გზით დარეგულირების საკითხში საკუთარი  წვლილის შეტანისა.

ტრენინგებზე ყურადღება გამახვილდა პიროვნების ლიდერულ თვისებებზე. გოგონების აზრით, ურთიერთობებს პიროვნული თვისებები განაპირობებს. ლიდერს უნდა შეეძლოს საკუთარი თავის ხელში აყვანა, გრძნობების, ემოციების მართვა.

23-25 ივლისს ფონდი "სოხუმის” ახალგაზრდა ლიდერთა სკოლის დემოკრატიის კურსის წარმომადგენლებს საკრებულოში სემინარი ჩაუტარდათ. მწვრთნელები იყვნენ ადგილობრივი თვითმმართველობის წევრები, ქალთა პოლიტიკური რესურს ცენტრის ხელმძღვანელი.

სამდღიანი სემინარის განმავლობაში მონაწილეები გაეცნენ ადგილობრივი ხელისუფლების არსს, საქართველოს პოლიტიკურ სისტემას, პოლიტიკური პარტიებისა და სამოქალაქო საზოგადოების ურთიერთმიმართებას, ფემინიზმის ისტორიასა და ეტაპებს, ქალთა როლს პოლიტიკაში.

საკრებულოში ჩატარებულმა სემინარმა და ექსკურსიამ, შეხვედრამ საკრებულოს წევრებთან, ახალგაზრდა გოგონებს გაუმყარა სურვილი გახდნენ იდეალური ლიდერები, ზოგმა მათგანმა საკრებულოს თავმჯდომარის სავარძელიც მოირგო.

"მას, ვინც ჩაჯდება ამ სავარძელში, დიდი მომავალი ელოდება. გახსოვდეთ, განათლება და ინტელექტი საწინდარია ადგილობრივ თვითმმართველობაში მოსასვლელად და შემდგომი წინსვლისათვის”, - მიუთითა მათ საკრებულოს თავმჯდომარემ ამირან ხვადაგიანმა და გოგონებს საკრებულოში სტაჟირების გავლაც შესთავაზა.

ექსკურსიისას გოგონებს მიეცათ საშუალება გაცნობოდნენ სხვადასხვა სფეროში დასაქმებულთა საქმიანობას. მათთვის სამაგალითო ლიდერი ქალებიც აღმოაჩინეს და დაასკვნეს, რომ "უშუალობა - ერთ-ერთი საუკეტესო გზაა ადამიანთ გულებისაკენ”.

საარჩევნო უფლების გაცნობამ ახალგაზრდებს თვითდაჯერებულობა შემატა. დღეს ისინი თამამად ამბობენ, რომ მომავალ არჩევნებში სრულყოფილად გამოიყენებენ მიღებულ ინფორმაციას და დაიცავენ თავიანთ უფლებებს.

ტრენინგი - „ქალის თვალით დანახული მშვიდობიანი მომავალი" ქ.ბათუმში ჩატარდა. ტრენინგის მონაწილეები 16 ახალგაზრდა გოგონა - ფონდი „სოხუმის" დემოკრატიის სკოლის მოსწავლეები.

ტრენინგის დროს მონაწილეები ცდილობდნენ კრეატიული ინოვაციური ხერხების გამოყენებით - ხატვით, სკულპტურის შექმნით, როლური თამაშებით, არსებული სტერეოტიპების მსხვრევით და ახალი ტერმინების გამოყენებით გამოეხატათ ქალთა ხედვა მშვიდობიანი მომავლის მშენებლობაში.  

... ქალის როლი ძალიან მნიშვნელოვანია, ქალთა ხმა აუცილებლად უნდა ისმოდეს კონფლიქტის მშვიდობიანი დარეგულირების დროს. აუცილებელია რომ არ სამყაროში გვქონდეს ჩვენი ხედვა, ჩამოვაყალიბოთ  ისეთი მოდელი, რომელიც ჩვენვე შეგვიძლია განვახორციელოთ ოფიციალური თუ სახალხო დიპლომატიის პროცესში - აღინიშნა ტრენინგზე.

პროექტი ხორციელდება შვედეთის ქალთა ორგანიზაცია „ქალები ქალებისათვის" (KVINNA TILL KVINNA) მხარდაჭერით.

26-30 აპრილს გორში, ჩატარდა ტრენინგი სოციალური მეწარმეებისათვის, რომელშიც მონაწილეობდნენ დევნილთა საკითხებზე მომუშავე ორგანიზაციები აღმოსავლეთ და დასავლეთ საქართველოდან, მათ შორის ერთი ორგანიზაცია სომხეთიდან. ფონდ „სოხუმს" წარმოადგენდნენ ლელა ჯალაღონია და თეა თორინავა.

ტრენინგის ორგანიზატორი იყო ევრაზიის თანამშრომლობის ფონდი. ტრენერები იყვნენ პარტნიორი ორგანიზაცია -  ვიშეგრადის საერთაშორისო ფონდის წარმომადგენლები.

მონაწილეებმა მიიღეს პრაქტიკული და თეორიული ინფორმაციები სოციალური მეწარმეობის ცალკეული ასპექტების თაობაზე. მიღებული ინფორმაციისა და უნარ-ჩვევების გამოყენებით მომზადდა ბიზნეს-პროექტის მონახაზები. აღნიშნული საპროექტო მონახაზების საფუძველზე ორგანიზაციებს საშუალება ექნებათ მოამზადონ სრულყოფილი სოციალური ბიზნეს-პროექტები, რომელთა შესაძლო დაფინანსება განიხილება ევრაზიის თანამშრომლობის ფონდის მიერ საგანგებოდ გამოცხადებულ საგრანტო კონკურსში, რომელიც გამოცხადდება მაისის ბოლოს.