...

ძალადობის წინააღმდეგ მიმართული 16-დღიანი საერთაშორისო კამპანიის ფარგლებში ქუთაისში ჩატარებული მრგვალი მაგიდის თემა იყო „შეზღუდული შესაძლებლობების მქონე ადამიანთა ინტეგრაცია საზოგადოებაში".

მრგვალ მაგიდას ესწრებოდნენ: სხვადასხვა უწყების წარმომადგენლები, სტუდენტები, მოსწავლეები. სულ ოცი მონაწილე.

მრგვალი მაგიდის მსვლელობისას გამოიკვეთა პრობლემები და შემუშავდა შესაბამისი რეკომენდაციები: მუშაობა საზოგადოების ცნობიერების ამაღლების მიზნით, სწორი ტერმინების გამოყენება, სხვადასხვა თაობის წარმომადგენლებისათვის ინფორმაციის მიწოდება, ტრენინგების ჩატარება.

9 დეკემბერს ხონის ქალთა მხარდაჭერის ცენტრში ჩატარდა მრგვალი მაგიდა თემაზე: „ოჯახში ძალადობისაგან დაცვის სახელმწიფო რეფერალური მექანიზმების პრინციპები და შესაძლებლობები”. შეხვედრას  ადგილობრივი თვითმმართველობის, სამართალდამცავი სტრუქტურების წარმომადგენლები, პედაგოგები და დევნილი ქალბატონები ესწრებოდნენ.

შეხვედრაზე გამოიკვეთა არჩეული თემის  აქტუალობა.  დაფიქსირდა კანონის არსებობის აუცილებლობა, რომელზე დაყრდნობითაც ადგილობრივ თვითმმართველობას შესაძლებლობა ექნება, დაეხმაროს მსხვერპლს.

  მრგვალი მაგიდის მონაწილეები ერთხმად აღნიშნავდნენ მუნიციპალური პროგრამების არსებობის აუცილებლობას მსხვერპლთა დასახმარებლად,  ასევე კვლევების ჩატარებას ძალადობრივი ფონის გასარკვევად.

„სოციალური სამსახურები, სანამ ვინმე არ მიმართავს, არ რეაგირებენ. მათგან მხოლოდ კონკრეტულ ფაქტზე რეაგირება კი არ უნდა ხდებოდეს, არამედ უნდა იმუშაონ პრევენციის კუთხით”.

"სოციალურმა მუშაკმა, რომელიც მოზარდებთან მუშაობს უნდა ითანამშრომლოს სკოლასთან.  მხოლოდ ინფორმაციის გაცვლით, კოორდინირებული ქმედებითაა შესაძლებელი პრობლემის მოგვარება”.

„საჭიროდ მივიჩნევთ ისეთი ცენტრების შექმნას, სადაც ოჯახის წევრებს შეუძლიათ კვალიფიციური კონსულტაციების მიღება".

მრგვალი მაგიდა არა მხოლოდ ინფორმაციის გაცვლის კუთხით, არამედ კომპეტენტური მოსაზრებებით იყო მნიშვნელოვანი და აშკარად ჩანდა  მონაწილეთა განწყობა -  უშუალოდ მიიღონ მონაწილეობა პრობლემის მოგვარებაში.

"კარი მომხვდა”...”აბაზანაში დავეცი”... - ეს ის შაბლონებია, რომლითაც ძალადობის მსხვერპლი "ხელს აფარებს” ხოლმე მოძალადეს.

როგორი მასშტაბები აქვს ოჯახში ძალადობას რეგიონში, როგორ ხდება პრობლემის დარეგულირება, რა სტრუქტურები არის ჩართული მსხვერპლისთვის დახმარების გაწევის, მოძალადის დასჯის, ძალადობის პრევენციის საკითხში. როგორ მუშაობს ძალადობასთან ბრძოლის სახელმწიფო რეფერალური მექანიზმები და რა კუთხით სჭირდება მათ დახვეწა.

ამ საკითხების ირგვლივ შედგა მსჯელობა ფოთში, ფონდი "სოხუმის” მიერ ორგანიზებული ქალთა მხარდაჭერის ცენტრში გამართულ მრგვალ მაგიდაზე, რომელსაც დევნილი ქალები, ადგილობრივი საკანონმდებლო და აღმასრულებელი ხელისუფლების, სოციალური სამსახურების წარმომადგენლები, პედაგოგები, იურისტები, ახალგაზრდების ჯგუფები ესწრებოდნენ.

ძალიან გულწრფელი საუბრების ფონზე გამოიკვეთა ის სუსტი რგოლები, რომლებიც ძალადობის მსხვერპლის დაცვის კუთხით არსებობს. კონკრეტული მაგალითები მოწმობენ, რომ აუცილებელია  სოციალური მუშაკებისათვის სამოქმედო არეალის გაზრდა, განსაკუთრებით ბავშვებისა და მოხუცების რეფერირების პროგრამების კუთხით; ხაზგასმულ იქნა ფსიქოლოგიური სამსახურების დანერგვის აუცილებლობა; გაჟღერდა ინიციატივა - შესაბამისმა ორგანიზაციებმა, სამინისტროსთან თანამშრომლობით, ხელი შეუწყონ სამართალდამცავი სტრუქტურების წარმომადგენელთა ტრენინგებს. დასახელდა შემთხვევები, რამაც ცხადი გახადა, რომ ზოგ შემთხვევაში ძალადობის მსხვერპლის მიმართვა არათუ უპასუხოდ დარჩა, არამედ ქილიკის საგანიც გახდა. ამავე დროს, ძალიან ხშირად, რიგი თანამშრომელი მაღალ კომპეტენციასა და საკითხის ღრმა ცოდნას ავლენს.

მრგვალი მაგიდის მონაწილეები ერთხმად აღნიშნავდნენ, რომ ამ კუთხით პატრულის მუშაობა უფრო მისასალმებელია, ვიდრე საუბნო პოლიციისა, რომელიც, როგორც წესი, ინფორმაციას ფლობს, მაგრამ შესაბამისად არ რეაგირებს. ითქვა ისიც, რომ ამ სტრუქტურების ეფექტურ მუშაობას სერიოზულად აბრკოლებს ძალადობის მსხვერპლთა თავშესაფრებისა და მოძალადეთა სარეაბილიტაციო ცენტრების არარსებობა. დაისვა ამ კუთხით სახელმწიფოს მხრიდან მეტი ქმედითობის აუცილებლობისა და საზოგადოებას, ადგილობრივ ხელისუფლებასა და რეფერალური მექანიზმების სუბიექტებს შორის მეტი კონტაქტის აუცილებლობის საკითხი.

პროექტი ხორციელდება: გერმანიის ორგანიზაცია EED-ს, ეკლესიათა განვითარების სამსახურის მხარდაჭერით.

ფონდ „სოხუმთან" თანამშრომლობის პროდუქტად აღიარეს წყალტუბოს ადგილობრივი ხელისუფლების ინიციატივა - სოციალურ საკითხებზე მომუშავე ჯგუფში გამოიყოს სპეციალისტი, რომელიც სპეციალურად  ძალადობის მსხვერპლთათვის შესაბამისი კონსულტაციების გაწევის კუთხით მომზადდება, ითანამშრომლებს სახელმწიფო რეფერალური მექანიზმის სუბიექტებთან, ამ საკითხის გადაწყვეტით დაინტერესებულ არასამთავრობო ორგანიზაციებთან.

24 ოქტომბერს, ქალაქ წყალტუბოში ფონდი „სოხუმის" მიერ ორგანიზებული კიდევ ერთი მრგვალი მაგიდა ჩატარდა  თემაზე - „ოჯახში ძალადობისაგან დაცვის სახელმწიფო რეფერალური მექანიზმები - პრინციპები და შესაძლებლობები". შეხვედრას ესწრებოდა დევნილი საზოგადოება, პედაგოგები, უფროსკლასელები, ჟურნალისტები, ადგილობრივი თვითმმართველობისა და სოციალური სააგენტოს წარმომადგენლები.

შეხვედრაზე გამოიკვეთა მოსაზრება, რომ ძალადობის პრობლემის მოგვარება წარმოუდგენელია სახელმწიფოს მიერ შესაბამისი ეფექტური მექანიზმების შექმნისა და დანერგვის  გარეშე.  აუცილებელია საზოგადოების ინფორმირება, რათა ადამიანებმა  სახელმწიფოს მიერ გამართული მექანიზმები პრაქტიკულად გამოიყენონ.

გამოიკვეთა სოციალური დაცვის ახალი შესაძლებლობები, სოციალური მუშაკების ინსტიტუტის დამკვიდრებისა და პოპულარიზაციის ტენდენცია, დაისახა თანამშრომლობის პერსპექტივებიც.     

პროექტი ხორციელდება: გერმანიის ორგანიზაცია EED-ს, ეკლესიათა განვითარების სამსახურის მხარდაჭერით.

29 სექტემბერს სენაკის ქალთა მხარდაჭერის ცენტრში ჩატარდა მრგვალი მაგიდა თემაზე: "ოჯახში ძალადობისაგან დაცვის სახელმწიფო რეფერალური მექანიზმების პრინციპები და შესაძლებლობები”. შეხვედრას  ადგილობრივი თვითმმართველობის, სოციალური სააგენტოსა და სამართალდამცავი სტრუქტურების წარმომადგენლები, პედაგოგები, მოქმედი ადვოკატები, ახალგაზრდები და დევნილი ქალბატონები ესწრებოდნენ.

შეხვედრაზე კიდევ ერთხელ გამოჩნდა არჩეული თემის  აქტუალობა. როგორც მრგვალ მაგიდაზე აღინიშნა,  ძალადობის პრობლემის მოგვარება წარმოუდგენელია სახელმწიფოს მიერ პრობლემის გადაჭრის ეფექტური მექანიზმების შექმნის, დანერგვისა და შესაბამისი ინფორმირების   გარეშე.

საზოგადოებისა და პრობლემის მოგვარებით დაკავებული სტრუქტურების თანამშრომლობის,| ინფორმაციის გაცვლის  აუცილებლობა; სახელმწიფოს მიერ არასამთავრობო სექტორის რესურსების მაქსიმალური გამოყენება; კვალიფიციური ტრენინგები პოლიციელთათვის; სამოქალაქო განათლების პროგრამაში რეფერალური მექანიზმების შესახებ ინფორმაციის შეტანა; სოციალური მუშაკების ინსტიტუტის პროპაგანდა - ეს არასრული ჩამონათვალია იმ წინადადებებისა, რომლებიც მრგვალ მაგიდაზე გაჟღერდა.

პროექტი ხორციელდება: გერმანიის ორგანიზაცია EED-ს, ეკლესიათა განვითარების სამსახურის მხარდაჭერით.

სექტემბერს, ამერიკის საელჩოს პროექტის „იგპ ქალთა ადგილობრივ საზოგადოებაში ინტეგრაციის ხელშეწყობა მათი ადგილობრივი ხელისუფლების საქმიანობის მონიტორინგში ჩართვის გზით"  ფარგლებში ფონდი „სოხუმის" მიერ ორგანიზებული კიდევ ერთი მრგვალი მაგიდა ჩატარდა, ამჯერად მონაწილეები  ხონის მუნიციპალიტეტის შენობაში შეიკრიბნენ.

დევნილი და ადგილობრივი საზოგადოების წარმომადგენლებს, ჟურნალისტებს, საკრებულოსა და გამგეობის წევრებს ფონდი „სოხუმის" მონიტორინგის ჯგუფის წევრებმა ჩატარებული სამუშაოს ანგარიში წარუდგინეს, რომელშიც თვითმმართველობის ბიუჯეტის განათლების, სოციალური და ჯანმრთელობის დაცვის პროგრამებში გენდერული ასპექტები განიხილეს.

მონიტორინგმა აჩვენა, რომ ხონის საზოგადოება სოციალური აქტიურობით არ გამოირჩევა, რაც შეეხება ადგილობრივი თვითმმართველობის წევრებს, მიუხედავად სურვილისა,  მოქალაქეებთან კონსტრუქციული დიალოგის პრაქტიკა ჯერ კიდევ აკლიათ, რისი აუცილებლობაც მონაწილეებმა აღიარეს.

გამოიკვეთა საერთო მოსაზრება, რომ  საქართველოს ყველა მოქალაქისთვის  ერთნაირი სასტარტო პირობები უფრო სამართლიანი იქნება. მაგალითად, თუ თბილისის მცხოვრებს  არ ექნება რაიმე სოციალური პრივილეგია-ხონის მცხოვრებთან შედარებით მხოლოდ იმის გამო, რომ თბილისის ბიუჯეტი უფრო მეტია, ვიდრე ხონისა.

გამოიხატა პოზიცია, რომ სოციალური სტრატეგია უნდა მოდიოდს ზევიდან. უნდა იყოს პოლიტიკური ნება.   თუმცა იქვე დასახელდა საკითხები, რომლებიც ნებისმიერი მწირი ბიუჯეტის შემთხვევაშიც კი საჭიროებს უცილობელ გადაწყვეტას,  მაგალითად-წყლის  პრობლემა, რომლის გადაჭრას, მიუხედავად საკითხის პერმანენტული ადვოკატირებისა, ამომრჩეველ ქალთა კლუბის წევრები ბოლომდე  ვერ ახერხებენ.

რაც შეეხება ფონდი „სოხუმის" მიერ ინიცირებული თანამშრომლობის  პრაქტიკას, დადებითად  შეფასდა.

ფონდი „სოხუმის" საკონფერენციო დარბაზში მრგვალი მაგიდის გარშემო დასავლეთ საქართველოს 7 ქალაქის (ქუთაისი, წყალტუბო, ხონი, ხობი, ბათუმი, ზუგდიდი, ოზურგეთი)  ამომრჩეველ ქალთა ლიგის წევრები შეიკრიბნენ.

ამომრჩეველ ქალთა ლიგის ერთწლიანი მუშაობა დადებითად შეფასდა. ჩატარებული  ვორკშოპების- ადვოკატირება და ლობირება, ლიდერი და მისი გუნდი, მოსალოდნელი ცვლილებები საარჩევნო კოდექსში-შედეგად  ქალთა აქტიურობის და ინფორმირებულობის დონე ამაღლდა. შეიქმნა ადვოკატირების ხუთკაციანი ჯგუფები, რომელთაც შეძლეს   ელექტროენერგიით, წყლით მომარაგებისა და სხვა საყოფაცხოვრებო    პრობლემების  ადგილობრივი თვითმმართველობის დონეზე გადაჭრა. გამოიცა საინფორმაციო კალენდარი, რომელიც ამომრჩეველ ქალთა ლიგის მუშაობას ასახავს. ჩატარდა ბევრი კულტურული თუ გაცვლითი ღონისძიება.

მონაწილეთა განსაკუთრებული ინტერესი გამოიწვია თემებმა-პოლიტიკური პარტიების წინასაარჩევნო სამზადისი,  კანონის გენდერული თანასწორობის შესახებ (სამოქმედო გეგმა) გაცნობა და ანალიზი.

დღის ბოლოს ჩატარდა ჯგუფური  სამუშაო-საპარლამენტო არჩევნები-პრობლემები და გადაჭრის გზები.

შეხვედრას ესწრებოდა ფონდი „სოხუმის" დონორი შვედური ორგანიზაციის - „Kvinna Till Kvinna"-ს წარმომადგენელი მარი ვირდე.

- მიხარია, რომ ვარ თქვენთან. დიდი ხანია ვთანამშრომლობთ ფონდ „სოხუმთან".  ჩვენი მიზანია, მეტი ქალი ლიდერი იყოს, რათა მსოფლიოში მივაღწიოთ მშვიდობას! ვგეგმავთ ვორკშოპებსა და ტრენინგებს ქალბატონებისათვის საქართველოს სხვდასხვა რეგიონში,-აღნიშნა მარი ვირდემ.

პროექტი ხორციელდება დემოკრატიის ნაციონალური ფონდის(ვაშინგტონი) მიერ (NED)

22 აგვისტოს  აშშ საელჩოს მიერ დაფინანსებული პროექტის „იგპ ქალთა ადგილობრივ საზოგადოებაში ინტეგრაციის ხელშეწყობა მათი ადგილობრივი ხელისუფლების საქმიანობის მონიტორინგში ჩართვის გზით" ფარგლებში ჩატარდა „მრგვალი მაგიდა" თემაზე - „თვითმმართველი ქალაქ ქუთაისის 2011 წლის ბიუჯეტის მონიტორინგის ანგარიში გენდერული ასპექტების  გათვალისწინებით (ჯანმრთელობის, სოციალური დაცვისა და განათლების სფეროებში)".

მრგვალ მაგიდას ფონდის მესვეურები, საკრებულოს სხვადასხვა სამსახურების წარმომადგენლები, აფხაზეთის მთავრობის წარმომადგენლობის ხელმძღვანელი, მონიტორინგის ჯგუფის წევრები, ჟურნალისტები, საზოგადოების წევრები დაესწრნენ.

მონიტორების მოკლე ანგარიშის შემდეგ  -  რა მიმართულებით ტარდებოდა მონიტორინგი, როგორი იყო გენდერული მიდგომები ამ კუთხით, რა გამოვლინდა ჩატარებული მუშაობის შედეგად, როგორი იყო სამოქალაქო პოზიციების შესწავლის შედეგები და უკუკავშირი - მოხდა აზრთა ურთიერთგაზიარება.

საკრებულოს წარმომადგენლებმა ისაუბრეს თავისი დამოკიდებულების შესახებ წარმოდგენილი რეკომენდაციებისადმი, შეეხნენ საკითხებს, რომელთა გადაწყვეტა სავსებით შესაძლებელია, დადგეს დღის წესრიგში; არის საკითხები, რომლებიც მხოლოდ ლობირების დონეზე შეიძლება იქნეს განხილული. ზოგი საკითხის მიზანშეწონილობას კი ისინი კატეგორიულად არ დაეთანხმნენ და საამისო  არგუმენტაციაც მოიყვანეს. (მაგალითად - მუნიციპალური საავადმყოფოს დაფინანსების საკითხი).

მრგვალი მაგიდის მონაწილეებმა ისაუბრეს იმ კონკრეტულ საკითხებზე, რომელთა გადაწყვეტაზეც დიდად არის დამოკიდებული ქალთა მდგომარეობის გაუმჯობესება. არ არსებობს გენდერულად ბოლომდე ნეიტრალური საკითხი და ის თანამშრომლობა, რომელიც პროექტის განხორციელების მანძილზე არსებობდა საკრებულოსა და ქალთა ფონდს შორის, არის საუკეთესო პრეცედენტი სახელისუფლებო და სამოქალაქო თანამშრომლობისა.

„რამდენიმე წელია, ქუთაისში არსებობს კარგი პრაქტიკა , რაც მდგომარეობს საკრებულოს ბიუჯეტის საზოგადოების ჩართვით ფორმირებაში. გარწმუნებთ, ჩვენ მაქსიმალურად ვცდილობთ მოქალაქეების ნების გათვალისწინებას. ყველანაირად ვეცდებით, დღეს გაჟღერებული ქალთა საზოგადოების დაკვეთა შესაძლებლობის ფარგლებში აისახოს საკრებულოს პროგრამებში", - ასეთი იყო საკრებულოს წარმომადგენლების პოზიცია.

ღონისძიების მიმართ დაინტერესება  რეგიონალურმა მედიასაშუალებებმაც გამოხატეს. თემას ვრცელი სიუჟეტი მიუძღვნა ტელეკომპანია „რიონმა".

პროექტი "იგპ ქალთა ადგილობრივ საზოგადოებაში ინტეგრაციის ხელშეწყობა ადგილობრივი ხელისუფლების საქმიანობის მონიტორინგში მათი ჩართვის გზით” (დაფინანსებულია საქართველოში აშშ საელჩოს მიერ) დამთავრების სტადიაშია.

თვითმმართველი ქ. ქუთაისის და წყალტუბოსა და ხონის მუნიციპალიტეტების 2011 წლის ბიუჯეტიდან გამომდინარე გაკეთდა ანალიზი გენდერული ასპექტების გათვალისწინებით სოციალური დაცვის, ჯანმრთელობისა და განათლების სფეროებში, მომზადდა ანგარიში და  გაკეთდა დასკვნები, შემუშავდა რეკომენდაციები. ანგარიში გადაეცა სამივე ქალაქის საკრებულოებს განხილვისათვის.

22 აგვისტოს იგეგმება მრგვალი მაგიდის ჩატარება საზოგადოების ფართო სპექტრის მონაწილეობით თვითმმართველი ქ. ქუთაისის საკრებულოს სხდომათა დარბაზში ანგარიშის საბოლოო განხილვისათვის.

აგვისტოში ასევე იგეგმება მრგვალი მაგიდის ჩატარება ქ. წყალტუბოსა და ხონის მუნიციპალიტეტებში.                

რას ეწოდება გენდერი, რა არის გენდერული თანასწორობა, როგორ იმოქმედა ოჯახურ კლიმატზე სოციალურ-პილიტიკური მდგომარეობის ცვლილებამ. ამ საკითხების გარშემო გაიმართა მრგვალი მაგიდა 20 დეკემბერს  სოფელ ხურჩაში(ზუგდიდის რაიონი), რომლის თემაც იყო: "გენდერული როლები და სოციალურ-კულტურული გარემო”.  შეხვედრას ესწრებოდნენ პედაგოგები, უფროსკლასელები, სამედიცინო სპექტრის წარმომადგენლები და  ქალბატონები ნაბაკევიდან, ხურჩიდან და კოკიდან.

დასაწყისში ფასილიტატორმა და ექსპერტებმა შეკრებილთ მიაწოდეს ინფორმაცია, რასაც მოყვა საინტერესო დისკუსია.

შეხვედრაზე გაიჟღერა მოსაზრებამ, რომ: "გენდერული სტერეოტიპი-"ქალი სუსტი არსებაა”, აქ, ამ რეგიონში კარგა ხანია დარღვეულია”.

შეხვედრა ძალიან საინტერესო და ნაყოფიერი გამოდგა. ეს თავად შეხვედრის მონაწილეების მიერ იქნა არნიშნული: "ყოვეთვის მოუთმენლად ველით თქვენთან შეხვედრას, ეს ჩვენთვის აუცილებელიცაა”.

როგორ ანაწილებენ ახალგაზრდები თავისუფალ დროს, რა სახის ღონისძიებები ტარდება ქალაქში, ადგილობრივ ბიუჯეტში არის თუ არა ჩადებული თანხები ახალგაზრდული პროგრამებისათვის- მსგავს საკითხებზე გაიმართა  მსჯელობა  ხონის ქალთა მხარდაჭერის ცენტრში გამართულ მრგვალი მაგიდის შეხვედრაზე, რომელიც ფონდის ლიდერ გოგონათა სკოლის მოსწავლეებმა მოაწყვეს. ესწრებოდნენ ხონის მუნიციპალიტეტის, საკრებულოს, გამგეობის წარმომადგენლები, პედაგოგები, მშობლები, სკოლის მოსწავლეები.

შეხვედრაზე გამოიკვეთა, რომ ახალგაზრდებში ნიჰილიზმი და უინიციატივობა შეიმჩნევა.

გამოიკვეთა, რომ სერიოზული პრობლემა გახდა სკოლებში მოსწავლეთა არ დასწრების საკითხი.  

ადგილობრივი თვითმმართველობის წარმომადგენლებმა მონაწილეებს გააცნეს ინფორმაცია, რომ არსებობს პროგრამები ახალგაზრდებისათვის: ინტელექტუალური შეჯიბრებები, ოლიამპიადები... ამიტომაც აუცილებელია მეტი ინიციატივა, მეტი იდეები სწორედ ახალგაზრდებისგან წამოვიდეს, რათა თავისუფალი დრო სწორად და ეფექტურად გაანაწილონ.   

ლიდერ გოგონათა სკოლის მოსწავლეებმა წყალტუბოში. ქალთა მხარდაჭერის ცენტრში მრგვალი მაგიდა ჩაატარეს.

- ახალგაზრდების დასაქმების საკითხი- ამ საკითხების ირგვლივ ცხარე დისკუსია გაიმართა. მონაწილეთა საერთო მოსაზრებით დასაქმების თვალსაზრისით საქართველოში რთული მდომარეობაა, წყალტუბოში მცხოვრები ახალგაზრდების დიდი ნაწილი ან თბილისშია წასული, ან საზღვარგარეთ. ანალოგიური სიტუაციაა დანარჩენ საქართველოში.

ყურადღება გამახვილდა პროფესიონალ კადრებზე. აღინიშნა, რომ მაღალი გადასახადების მიუხედავად ინსტიტუტები ვერ უზრუნველყოფენ სტუდენტების მაღალკვალიფიცირებულ მომზადებას. რის გამოც დასაქმებისას მეტი ყურადღება ეთმობა იმ ახალგაზრდებს, რომლებსაც განათლება საზღვარგარეთა აქვთ მიღებული.

შეხვედრას ესწრებოდნენ ევროკავშირის წარმომადგენლები.

მრგვალი მაგიდა გაშუქდა ტელეკომპანია „რიონის" მიერ.