...

ქუთაისის ქართულ-ამერიკულმა სკოლა „პროგრესმა" დიდი ინტერესი გამოხატა  ფონდი „სოხუმის" ფორუმ-თეატრის  მიმართ. ეს წარმოდგენის დაწყების პირველივე წუთებიდან იგრძნობოდა. მოსწავლეები და პედაგოგები აქტიურად ჩაერთნენ თამაშში, ისე, როგორც ამას ფორუმ-თეატრის  სპეციფიკა მოითხოვს. მოსწავლეებმა თავიანთი მოსაზრებები გამოხატეს კითხვარებში, რომლებიც დაურიგდათ. ანი ასათიანი: „ძალიან მომწონს მსგავსი წარმოდგენები, რომლებიც ნათლად გამოკვეთენ ადამიანებს შორის ურთიერთდამოკიდებულების  პრობლემებს." გიორგი შავგულიძე: „საინტერესოა, უცხოა მსგავსი ფორმა და, რაც მთავარია, შემეცნებითია ჩვენს ასაკში, რადგან ფორუმ-თეატრში ყველაფერი ბუნებრივად არის წარმოსახული." მოსწავლეების ამ შეფასებებიდან ჩანს, რომ წარმოდგენამ თავისი მისია შეასრულა.   პროექტი ხორციელდება: გერმანიის ორგანიზაცია EED-ს, ეკლესიათა განვითარების სამსახურის მხარდაჭერით.

ფონდი „სოხუმის" წარმომადგენლები შეხვდნენ ქუთაისის ორ კოლექტიურ ცენტრში (ელექტროტექნიკური ლიცეუმი და „ანკომი") მცხოვრებ დევნილებს. ეს იყო დასკვნითი შეხვედრა, რომელზეც შეკრებილთ მიეწოდათ ინფორმაცია განსახლებასთან დაკავშირებულ საკითხებზე. მათ მიიღეს პასუხი რამდენიმე შეკითხვაზე, რომელთა გარკვევა განსაკუთრებით აინტერესებდათ. დევნილებმა გამოხატეს კმაყოფილება ფონდ „სოხუმთან" თანამშრომლობით და იმედი გამოთქვეს, რომ ეს საქმიანი ურთიერთობები მომავალშიც აქტიურად გაგრძელდება.    პროექტი ხორციელდება საერთაშორისო ორგანიზაცია "შერიგების რესურსების” (დიდი ბრიტანეთი) მხარდაჭერით.

60-მდე მოსწავლე დაესწრო ფონდი „სოხუმის" ფორუმ-თეატრის  წარმოდგენას სენაკის მეშვიდე საჯარო სკოლაში. მაყურებელთა უმეტესობა ჩაება დისკუსიაში. ძირითადად, გოგონები აქტიურობდნენ. ისინი თავად ასრულებდნენ სხვადასხვა როლს და ეძებდნენ გამოსავალს შექმნილი პრობლემური სიტუაციებიდან. ნარკომანიის თემაზე შექმნილმა მინისპექტაკლმა ვაჟებიც ააფორიაქა. ისინიც ჩაერთნენ თამაშში და დისკუსიაში. „ეს ძალიან საინტერესო ხელოვნებაა, რომელიც ნათლად წარმოგვიდგენს თაობის პრობლემას", - აღნიშნა ერთ-ერთმა აქტიურმა მაყურებელმა კახა გიორგობიანმა.   პროექტი ხორციელდება: გერმანიის ორგანიზაცია EED-ს, ეკლესიათა განვითარების სამსახურის მხარდაჭერით.

თექვსმეტიდან თვრამეტი მარტის ჩათვლით  ფონდ „სოხუმში" ჩატარდა ლიდერ გოგონათა  პირველი ტრენინგი, რომლის თემა იყო: „ეფექტური ლიდერობა" („ლიდერობა და კომუნიკაცია", „ლიდერი და ჯგუფი", „ლიდერის გენდერული თავისებურებანი", „ კონფლიქტი და  კონფლიქტის მართვა"). 19 ახალგაზრდა ტრენინგის სამივე დღეს მუშაობის პროცესში აქტიურად ჩაერთო. ტრენინგის დასასრულს ფიდბეკმა აჩვენა, რომ გუნდურმა მუშაობამ ახლგაზრდებს თვითდაჯერებულობა შემატა. გოგონებს ტრენინგმა მისცა სტიმული, გახდნენ უფრო დამოუკიდებლები, იზრუნონ საკუთარი უფლებების დასაცავად: - ვშიშობდი, რომ გუნდში მუშაობას ვერ შევძლებდი. მწვრთნელების მიერ შექმნილმა სამუშაო გარემომ და გოგონების უშუალობამ ეს კომპლექსი დამაძლევინა. - ვგრძნობ დადებითი ენერგიის მოზღვავებას, რაც ძალას მმატებს იმისათვის, რომ დავაფიქსირო საკუთარი აზრი, შეხედულებები და ბრმად არ დავემორჩილო სხვათა გადადწყვეტილებებს. -ტრენინგის თითოეულმა დღემ გვიჩვენა, როგორ გავიზარდეთ, - ამბობენ გოგონები.      პროექტი ხორციელდება შვედეთის ქალთა ორგანიზაცია „ქალები ქალებისათვის" (KVINNA TILL KVINNA) მხარდაჭერით.

გრძელდება შეხვედრები დასავლეთ საქართველოს ოთხ რეგიონში გენდერული თანასწორობისა და დემოკრატიული პროცესების მხარდაჭერის მიზნით-  პროექტის  „ამომრჩეველ ქალთა ლიგის აქტიურობის გაზრდა ადგილობრივ ხელისუფლებასთან დიალოგისა და 2012 წლის საპარლამენტო არჩევნებისათვის მოსამზადებლად" ფარგლებში.  ფონდი „სოხუმის" წარმომადგენლები შეხვდნენ ქალაქ წყალტუბოს ადგილობრივი ხელისუფლების წარმომადგენლებს: ზაზა მეტრეველს (საკრებულოს თავმჯდომარის მოადგილე) და კახა ბიბილეიშვილს (სოციალურ საკითხთა კომისიის თავმჯდომარე). შეხვედრის მიზანი იყო ადგილობრივ ხელისუფლებასა და ფონდ „სოხუმს" შორის თანამშრომლობის გაფართოება. ადგილობრივმა ხელისუფლებამ მხარი დაუჭირა ამომრჩეველ ქალთა კლუბის ადვოკატირების ჯგუფის ინიციატივას წყალტუბოში მცხოვრები 5 ღვაწლმოსილი პედაგოგისათვის  ერთჯერადი თანხის ( 200-200 ლარის ოდენობით) გამოყოფის შესახებ. ფონდი „სოხუმის" წარმომადგენელმა წყალტუბოს საკრებულოს თანადგომისათვის მადლობის წერილი გადასცა. აღნიშნულიდან გამომდინარე, ორივე მხარე თვლის, რომ სამოქალქო საზოგადოებასა და ადგილობრივ ხელისუფლებას შორის თანამშრომლობა აუცილებელია.   პროექტი ხორციელდება დემოკრატიის ნაციონალური ფონდის(ვაშინგტონი) მიერ (NED)

ადამიანის უფლებათა დაცვის კავშირის შენობაში შეკრებილმა ამომრჩეველ ქალთა კლუბის წევრმა ოცდახუთმა ქალბატონმა ქალთა საერთაშორისო სოლიდარობის დღისადმი მიძღვნილ აქცია-მრგვალ მაგიდაში მიიღო მონაწილეობა. აქცენტი გაკეთდა იმაზე, თუ რაოდენ მნიშვნელოვანია ერთიანობა ქალთა უფლებების დაცვისათვის, ძალადობისა და ტრეფიკინგის  წინააღმდეგ ბრძოლაში.  კლუბის აქტიურმა წევრებმა აქცია-მრგვალ მაგიდაზე ქალთა დღესთან დაკავშირებით მომზადებული ოთხი თემა წარმოადგინეს: „8 მარტის დაარსების ისტორია" (ირმა კახიძე), „ქალთა მოძრაობის ისტორია საქართველოში" (მანანა როყვა), „ როგორ აღნიშნავენ ქალები  8 მარტს საქართველოში" (თამილა ქათამაძე),   „ქალი" (თეო ჯაში). აღნიშნულმა თემებმა მსმენელთა დიდი ინტერესი გამოიწვია.

ქუთაისის ამომრჩეველ ქალთა კლუბის წევრები და ფონდი „სოხუმის" თანამშრომლები შეიკრიბნენ,  რათა კიდევ ერთხელ გამოეხატათ თავიანთი სოლიდარობა მთელი მსოფლიოს ქალთა უფლებებისა და გენდერული სამართლიანობის დაცვის მიმართ. კლუბის აქტიური წევრები - ნატა თოდუა, ანჟელა ჩიხლაძე და გულნარა ლაკერბაია  აქციის მონაწილეებს ქალთა საერთაშორისო დღესა და საქართველოში ქალთა მოძრაობასთან დაკავშირებულ თემებზე ესაუბრნენ. - ქალთა სოლიდარობის დღეს განსაკუთრებული განწყობით ვხვდები. მიმაჩნია, რომ  ყველა ქალმა უნდა იბრძოლოს საკუთარი უფლებების დასაცავად. ქალბატონებს წარმატებებს ვუსურვებ პირად თუ საზოგადოებრივ ცხოვრებაში! - მანანა კიკაბიძე, ამომრჩეველ ქალთა კლუბის, ასევე ქუთაისის საკრებულოს წევრი. -ქალბატონებო! დაე, თქვენი სიცოცხლე სითბოთი, სიკეთით და სიხარულით იყოს გაჯერებული,  სიყვარულით გეცხოვროთ!- კლუბის აქტიური წევრი ნატა თოდუა. აქცია-მრგვალი მაგიდა ადგილობრივმა ტელეკომპანია „რიონმა" გააშუქა.

ქალთა სოლიდარობის საერთაშორისო დღე - 8 მარტი ოზურგეთშიც  უჩვეულოდ აღინიშნა. ამომრჩეველ ქალთა კლუბის ოცდაშვიდმა წევრმა ქალთა უფლებების დაცვისა და ადვოკატირების მხარდაჭერა აქცია - მრგვალი მაგიდის სახით გამოხატა. კლუბის აქტიურმა წევრებმა წიკითხეს მოხსენებები ქალთა მსოფლიო სოლიდარობისა და საქართველოში ქალთა მოძრაობის თემებზრე: „8 მარტის დაარსების ისტორია"  (ქეთევან ქადიეშვილი (თემა გამდიდრებული იყო ფოტო-მასალით), „ ქალთა მოძრაობის ისტორია საქართველოში" (ნინო ნიკოლაიშვილი), „როგორ აღნიშნავენ  ქალთა დღეს საქართველოში" -( მარინა კიპაროიძე).

ქალთა სოლიდარობის საერთაშორისო დღეს - 8 მარტს ამომრჩეველ ქალთა კლუბის ოცდახუთი  წევრი ქალთა საკითხებზე თემების განხილვით შეხვდა. „8 მარტი - ისტორია და დღევანდელობა" (ნატო ბიგვავა );  „მსოფლიოს ლიდერი ქალბატონები" (გულნაზ ღადუა); „როგორ აღნიშნავენ ქალები 8 მარტს საქართველოში" (დოდო ღადუა).  შეხვედრაზე აქცენტი ქალთა სოლიდარობაზე გაკეთდა. აღინიშნა, რომ 8  მარტს, მსოფლიოს ყველა ქალი კიდევ ერთხელ უცხადებს პროტესტს ქალთა უფლებების დარღვევასა და ქალთა მიმართ ძალადობას! აღნიშნული ღონისძიებით ადგილობრივი პრესაც დაინტერესდა.

ზუსტად 3 საათზე ხონის ქალთა მხარდაჭერის ცენტრის აქტივისტები და ქალთა კლუბის წევრები შეუერთდნენ ფონდი „სოხუმის" მიერ   ქალთა საერთაშორისო სოლიდარობის დღის - 8 მარტისადმი მიძღვნილ აქციას-მრგვალ მაგიდას, სადაც  ქალთა  საერთაშორისო დღისა და ქალთა მოძრაობის ისტორიასთან დაკავშირებული მოხსენებები წაიკითხეს ლელა ლომიძემ, ელისო ჯიქიამ და შუშანა მირცხულავამ. აღნიშნული დღის ისტორიულ მნიშვნელობას კიდევ ერთხელ გაესვა ხაზი. ძალიან საინტერესო იყო აქტივისტების მიერ ჩატარებული გამოკითხვის - „რას ნიშნავს 8 მარტი ქალებისათვის და როგორ აღნიშნავენ ისინი მას ?", - შედეგები.

ქალთა სოლიდარობის დღის - 8 მარტისადმი მიძღვნილ ერთობლივ აქცია-მრგვალ მაგიდაში ფოთის ქალთა მხარდაჭერის ცენტრისა და ამომრჩეველ ქალთა კლუბის  ოცდაჩვიდმეტმა ქალბატონმა მიიღო მონაწილეობა. აქტიურმა ქალბატონებმა ანა კვარაცხელიამ, ნელი და დარეჯან უნგიაძეებმა მსოფლიოს (მათ შორის საქართველოს) ქალთა მოძრაობასთან დაკავშირებით მოხსენებები გააკეთეს. აქციაში  ჩაერთნენ  ახალგაზრდა ლიდერთა სკოლის გოგონები. "სასიამოვნოა, რომ კიდევ ერთხელ მოგვეცა საშუალება, დაგვეფიქსირებინა ჩვენი პოზიცია, გაგვეზიარებინა ერთმანეთისთვის შეხედულებები..."