...

ხურჩის ქალთა მხარდაჭერის ცენტრში 16-დღიანი კამპანიის ფარგლებში შედგა შეხვედრა ფსიქოლოგთან. შეხვედრას ესწრებოდა 17-დან 60-წლამდე ასაკის 18 ქალი. მონაწილეებმა მიიღეს  ინფორმაცია კამპანიასთან დაკავშირებით. შემდეგ ერთმა მონაწილემ შემოგვთავაზა მისი პირადი პრობლემის განხილვა, რაც მშობლებსა და შვილებს შორის კონფლიქტს ეხებოდა. საუბარმა იმდენად საინტერესო ხასიათი მიიღო, რომ შეხვედრის მონაწილეები წასვლას არ ჩქარობდნენ.  

შეკითხვაზე, რას აძლევთ მათ ფსიქოლოგთან შეხვედრები, პასუხი  ერთმნიშვნელოვანი იყო - ჩვენ დავიღალეთ ერთფეროვნებისაგან, თქვენთან ცოდნასაც ვიძენთ და განტვირთვასაც ვახერხებთ.

ლიდერთა სკოლის მოსწავლე ლიკა ბარამიამ 16-დღიანი საერთაშორისო კამპანიის ფარგლებში  სანატორიუმ „მედეას" საფეხბურთო მოედანზე ჩაატარა კონკურსი ასფალტზე ხატვაში. კონკურსის თემა იყო „სახლში მშვიდობიდან მსოფლიოში მშვიდობამდე", მასში  10-დან 18-წლამდე 14 მოსწავლე მონაწილეობდა. კონკურსის სამ გამარჯვებულს სხვადასხვა სახის პრიზი გადაეცა.

ფონდი „სოხუმის" წარმომადგენლები ელექტროტექნიკური ლიცეუმისა და „ანკომის" კოლექტიურ ცენტრებში ჩასახლებულ დევნილებთან შეხვედრა, მათი სოციალური და საყოფაცხოვრებო პირობების შესწავლას, დემოგრაფიული მაჩვენებლების დადგენასა და აქტიური ჯგუფების შერჩევას ითვალისწინებდა.

„შეხვედრების მიზანია, დახმარება გაეწიოთ დევნილებს თავიანთი პრობლემების ადვოკატირების მეთოდებისა და შესაძლებლობების შესწავლაში. კოლექტიური ცენტრების დევნილებს უნდა ჰქონდეთ ინფორმაცია ყველა იმ სამართლებლივი საკითხის გარშემო, რომელიც ეხება საცხოვრებელი ბინების რეაბილიტაციას ან ჩასახლებას," - ითქვა შეხვედრაზე.

დევნილებს მიეწოდათ ინფორმაცია განსახლების საკითხთან დაკავშირებით.

ლტოლვილთა და განსახლების სამინისტროს იმერეთის რეგიონული სამმართველოდან მიღებული ინფორმაციით, „ანკომს" ჰყავს კერძო მესაკუთრე, ამ ეტაპზე განსახლების ზუსტი თარიღი არ არის დადგენილი. რაც შეეხება ელექტროტექნიკურ ლიცეუმს, გარემონტდება და დევნილებს გადაეცემა.

დასასრულს დევნილებმა დასვეს შეკითხვები, რომელთა უმრავლესობასაც ადგილზე გაეცა პასუხი.

კოკის საჯარო სკოლის მეცხრე კლასის მოსწავლე ანა ხასიამ ჩაატარა საინფორმაციო შეხვედრა, რომელსაც ესწრებოდა ოცდახუთი დევნილი თუ ადგილობრივი ახალგაზრდა. მონაწილეებს მიეწოდათ ფონდი „სოხუმის" პრეს - რელიზი ქალთა მიმართ ძალადობის წინააღმდეგ 16 - დღიანი საერთაშორისო კამპანიის შესახებ. დაურიგდათ საინფორმაციო ბუკლეტები, კალენდრები, პოსტერები, წიგნები.

შეხვედრაზე 16-დღიან კამპანიასთან დაკავშირებით დაისვა შეკითხვები. გაიმართა დისკუსია, იმაზე თუ როგორ  აღმოიფხვრას საზოგადოებაში ძალადობა, როგორ  დავიცვათ თავი ძალადობისაგან.

შეხვედრაზე ახალგაზრდებმა აღნიშნეს, რომ მსგავსი ხასიათის შეხვედრები მათ ცნობიერებას დადებითად ცვლის.  

ძალადობის წინააღმდეგ 16-დღიანი კამპანიის ფარგლებში აფხაზეთის მეხუთე სკოლაში ასფალტზე ხატვის კონკურსი ჩატარდა. კონკურსში მეოთხე - მეათე კლასების 15 მოსწავლე მონაწილეობდა. ჟიურის წევრები უფროსკლასელებისაგან შეირჩნენ.

ძალადობის მიმართ  პროტესტის თემაზე შესრულებული ნახატების ძირითადი მესიჯები იყო: - ძალადობა ბოროტებაა, ახალგაზრდები ვირჩევთ მშვიდობიან - არაძალადობრივ გარემოს; რწმენით, სიყვარულით ვძლიოთ ძალადობას;

კონკურსის ბოლოს ყველა მონაწილეს სამახსოვრო საჩუქარი გადაეცა.

10 მონაწილე ერთი საათის განმავლობაში წერდა თხზულებებს. მათ იცოდნენ, რომ კონკურსი ქალთა მიმართ ძალადობის წინააღმდეგ კამპანიას ეძღვნებოდა.

კონკურსი აფხაზეთის ავტონომიური რესპუბლიკის მეექვსე საჯარო სკოლაში  ჩატარდა, შემდეგ კი ფონდ „სოხუმში" ჟიურიმ შეაფასა მონაწილეთა ნამუშევრები და გამარჯვებულები გამოავლინა.

პირველი ადგილი კონკურსში მონაწილე ერთადერთ ვაჟს, ლევან ბარათელს ერგო, მეორე - მარიამ არჯევანიძეს, მესამე - ლონდა კვანტალიანს.

მეორე დღეს გამარჯვებულებს წიგნები გადასცეს, ყველა მონაწილემ მცირე სამახსოვრო საჩუქარი მიიღო.

- კონკურსში მონაწილეობა ძალიან საინტერესო იყო ჩემთვის, - თქვა ფონდი „სოხუმის" ტელეჟურნალისტისთვის მიცემულ ინტერვიუში მარიამ არჯევანიძემ. - ძალადობას არავინ არ უნდა შეეგუოს, ყველაფერი უნდა გავაკეთოთ მშვიდობის მისაღწევად შინ და გარეთ.

16-დღიანი საერთაშორისო კამპანიის ფარგლებში ლიდერთა სკოლის მოსწავლე ნინო ფუტკარაძემ წყალტუბოს მეორე საბავშვო ბაღში საინფორმაციო შეხვედრა ჩაატარა.

შეხვედრას ბაგა-ბაღის თანამშრომლები და აღსაზრდელთა მშობლები ესწრებოდნენ.

ხონის ქალთა მხარდაჭერის ცენტრში ქალთა მიმართ ძალადობის წინააღმდეგ 16-დღიანი საერთაშორისო კამპანიის ფარგლებში ჩატარდა შეხვედრა ფსიქოლოგთან. შეხვედრას ესწრებოდა 22-დან 58-წლამდე  ასაკის აფხაზეთიდან დევნილი  19 ქალი.

თემა „ოჯახის არსი, მისი ფასეულობები და პრიორიტეტები" შეხვედრაში მონაწილე ქალებისათვის ახლობელი აღმოჩნდა  და საინტერესო დისკუსიაც გამოიწვია.

„თუ ერთმანეთი არ გვეყვარება, არ ვიცი, რატომ უნდა გავთხოვდე. მეუღლეები ერთმანეთს  ინტუიტიურად, უსიტყვოდ უნდა უგებდნენ - მაშინ იქნება ჰარმონია და ბავშვებიც ბედნიერები იქნებიან",- თქვა შეხვედრის ერთ - ერთმა მონაწილემ.

ქუთაისის პროფესიულ კოლეჯ „იბერიაში" 16-დღიანი კამპანიის ფარგლებში ჩატარებულ  შეხვედრას  სტუდენტები დაესწრნენ.

მათ მიეწოდათ ინფორმაცია ქალთა მიმართ ძალადობის წინააღმდეგ მიმართული საერთაშორისო კამპანიის შესახებ. სტუდენტებმა აღნიშნეს, რომ  ქალების მიმართ  გამოჩენილი ძალადობა ადამიანის უფლებათა  უხეში დარღვევაა.

შეხვედრის დასასრულს მონაწილეებს დაურიგდათ ფონდი „სოხუმის" მიერ მომზადებული საინფორმაციო ბუკლეტები, პოსტერები და ბროშურები.

ქუთაისში ცენტრალურ მოედანსა და ბაზრის მიმდებარე ტერიტორიაზე ლიდერთა სკოლის პირველკურსელებმა და აქტივისტებმა ქალთა მიმართ ძალადობის წინააღმდეგ საერთაშორისო კამპანიის ფარგლებში აქცია ჩაატარეს.

აქტივისტები ორ ჯგუფად დაიყვნენ, ბუკლეტებსა და ცისფერ ბუშტებს  არა მარტო ქალებს, არამედ მამაკაცებსა და ბავშვებსაც ურიგებდნენ.

კლუბის შეხვედრაზე აქცენტი  ქალთა მიმართ ძალადობის წინააღმდეგ 16-დღიან მსოფლიო კამპანიაზე გაკეთდა.

შეხვედრის მონაწილე ქალბატონებმა ადგილობრივ პრობლემებზე და მათი გადაჭრის გზებზე ისაუბრეს. ყველაზე აქტუალური მაინც ოჯახში ძალადობის პრობლემაა. ქალბატონმა მანანა შულაიამ აღნიშნა, რომ ოჯახში ძალადობას მძიმე სოციალურ-ეკონომიკური ფონი და  განათლების დაბალი დონე იწვევს, ქალთა უმრავლესობა საკუთარი უფლებების დაცვას ვერ ახერხებს.

აღნიშნული პრობლემების გადაჭრას ადვოკატირების ხუთკაციანი ჯგუფი ადგილობრივ თვითმმართველობასთან, მედიასა  თუ არასამთავრობო სექტორთან თანამშრომლობით აპირებს.

 დასასრულს ფონდი „სოხუმის" წარმომადგენელმა მირანდა გვანცელაძემ ლიდერი ქალების მონაცემთა ბაზის შექმნაზე ისაუბრა.

ლიდერთა სკოლის მოსწავლე ანა ყურაშვილმა ქალთა მიმართ ძალადობის წინააღმდეგ 16-დღიანი საერთაშორისო კამპანიის ფარგლებში  წყალტუბოს შვიდ სანატორიუმში („მედეა", „საქართველო", „თბილისი",    „ინტურისტი", „მეგობრობა", „აია", „კოლხეთი") ჩაატარა შეხვედრები.

მონაწილეებს დაურიგდათ პოსტერები და ბუკლეტები.

ნიკეას დევნილთა სკოლის მოსწავლეები 16-დღიან საერთაშორისო კამპანიაში ფონდ „სოხუმის" ფორუმ-თეატრის მინი-სცენებით ჩაერთნენ. მოსწავლეები ფორუმ -თეატრის წარმოდგენებით იმდენად დაინტერესდნენ, რომ ცდილობდნენ თავიანთი სიტყვა ეთქვათ, სცენის მსვლელობაზე, ან სულაც ფინალზე, გავლენა მოეხდინათ. მსჯელობდნენ იმაზე,  თუ როგორ შეძლებდნენ მსგავსი დაძაბული სიტუაციების განმუხტვას,  ძალადობისაგან თავის დაღწევას.  

„ასეთი სცენების ხილვა ხელს უწყობს ჩვენს სწრაფვას მშვიდობიანი - არაძალადობრივი ურთიერთობებისაკენ. თუ ოჯახებში არ იქნება ძალადობა, ვფიქრობთ, ჩვენი მომავალიც დაცული იქნება",- ასეთია მოსწავლეების აზრი.