...

16-დღიანი კამპანიის ბოლო დღეს ქუთაისში დაგეგმილი იყო ველოსიპედისტების  აქცია. უამინდობის გამო აქციამ სასურველი მასშტაბი ვერ მიიღო, თუმცა დავით აღმაშენებლის ქუჩაზე შეკრებილებმა (ფონდი „სოხუმის" თანამშრომლებმა და მათმა მხარდამჭერებმა) გამვლელთა ყურადღება მიიპყრეს სლოგანებით და თავიანთი დამოკიდებულებაც გამოხატეს ტელეკომპანია „რიონისათვის" მიცემულ ინტერვიუებში.

10 დეკემბერი - ადამიანთა უფლებების საერთაშორისო დღე და კამპანიის ბოლო დღეა. 

ფონდმა „სოხუმმა" კამპანიის დროს ჩატარებული 130-ზე მეტი ღონისძიებით ათასობით ადამიანს შეახსენა, რომ ქალთა მიმართ ძალადობა ადამიანის უფლებათა უხეში დარღვევაა და მას ერთიანი ძალისხმევით უნდა დავუპირისპირდეთ.

ქუთაისში ცენტრალურ მოედანსა და ბაზრის მიმდებარე ტერიტორიაზე ლიდერთა სკოლის პირველკურსელებმა და აქტივისტებმა ქალთა მიმართ ძალადობის წინააღმდეგ საერთაშორისო კამპანიის ფარგლებში აქცია ჩაატარეს.

აქტივისტები ორ ჯგუფად დაიყვნენ, ბუკლეტებსა და ცისფერ ბუშტებს  არა მარტო ქალებს, არამედ მამაკაცებსა და ბავშვებსაც ურიგებდნენ.

12 საათზე ფონდმა „სოხუმმა" პრეს-ბრიფინგი გამართა.

რეგიონული თუ რესპუბლიკური მასმედიის წარმომადგენლებისათვის გასაგები იყო ფონდში შეკრების მიზეზი, რადგან ჟურნალისტებმა მრავალწლიანი თანამშრომლობის შემდეგ კარგად იციან, რას ნიშნავს 25 ნოემბერი და 16 აქტიური დღე ქალთა მიმართ ძალადობის წინააღმდეგ.

შეკრებილთ გადაეცა კამპანიის ატრიბუტები და კალენდარული გეგმა. ყოველმა მათგანმა გამოთქვა სურვილი, რომ მონაწილეობას მიიღებს და გააშუქებს მედიაში სხვადასხვა ღონისძიებას.

აქცია ფონდი „სოხუმის" ამომრჩეველ ქალთა კლუბის ორგანიზატორობით ჩატარდა,  მაგრამ მან გააერთიანა ზუგდიდში მოქმედი ქალთა ორგანიზაციები: ასოციაცია „მერკური", „იმედი", სამეგრელოს გენდერული ქსელი, „სამეგრელო-მედეა".

მასში მონაწილეობა მიიღეს ზუგდიდის სასულიერო გიმნაზიის თანამშრომლებმა, ჟურნალისტებმა რადიო „ათინათიდან" და TV - მაესტროდან.

აქციას მხარი დაუჭირეს ევროკავშირის მონიტორინგის მისიამ,  ადამიანის უფლებათა დაცვის საერთაშორისო ორგანიზაციამ Human Rights Watch.

განსაკუთრებით მნიშვნელოვანი იყო შიდსით დაავადებულთა ფონდის მხარდაჭერა, რადგან 16-დღიანი კამპანიის ერთი დღე - 1 დეკემბერი შიდსთან ბრძოლის საერთაშორისო დღეა.

წყალტუბოში, ფონდი „სოხუმის" წარმომადგენლების მიერ აქცია ყოველწლიურად ტარდება.

ამჯერად  ქალაქის ცენტრალურ პარკში  დაიწყო სამ საათზე  და ერთი საათი გაგრძელდა.

აქციის მონაწილე იყო 30 მეტი ადამიანი - ამომრჩეველ ქალთა კლუბის წევრები, ლიდერთა სკოლის გოგონები და ის ქალბატონები, რომლებიც  ესწრებიან ქალთა მხარდაჭერის ცენტრში ჩატარებულ ღონისძიებებს.

აქციაზე მობრძანდნენ ადგილობრივი ხელისუფლებისა და პოლიციის წარმომადგენლები.

აქციის დროს დარიგებულმა საინფორმაციო მასალებმა (პოსტერი, ბუკლეტი, კალენდარი) და მოწოდებებმა - დააინტერესა არა მარტო ქალები, არამედ ახალგაზრდა მამაკაცებიც.

საერთაშორისო კამპანიას ქალთა მიმართ ძალადობის წინააღმდეგ ფოთიც აქტიურად გამოეხმაურა.

„ყოველი მესამე ქალი ძალადობის მსხვერპლია!"

„ქალს უფლება აქვს, იცხოვროს ძალადობის გარეშე!"

ამ მოწოდებებთან ერთად აქციის მონაწილე 25 ქალს ხელში ეჭირა პოსტერები ფონდი „სოხუმის" ტრადიციული სლოგანით „ძალადობა ბოროტებაა!"

აქციას შემოუერთდნენ გამვლელები, ადგილობრივი მუნიციპალიტეტის წარმომადგენლები.

აქციის ყველა მონაწილემ გაიზიარა კამპანიის არსი, რომ მსოფლიოში მშვიდობის დამყარება ოჯახში მშვიდობის დამყარებას უკავშირდება.

16-დღიანი კამპანიის პირველი დღე ხურჩის ქალთა მხარდაჭერის ცენტრშიც აქციით აღინიშნა. გალის რაიონის სოფელ ნაბაკევიდან ქალებმა ვერ შეძლეს გადმოსვლა, ამიტომ სოფლის ცენტრში მხოლოდ ხურჩელი ქალები შეიკრიბნენ.

თუმცა აქ ყველაზე მცირერიცხოვანი აქცია მოეწყო, მან მაინც მიაღწია მიზანს - განაგრძო ის მენტალური ცვლილებები, რომელთაც ფონდი „სოხუმის" ღონისძიებები უწყობს ხელს.

„ქალს უფლება აქვს, იცხოვროს ძალადობის გარეშე!" - ეს მოწოდება განსაკუთრებულ ძალას იძენს საზოგადოებაში, სადაც ქალი ხშირად ხდება ძალადობის მსხვერპლი. 

31 ოქტომბერი. მოსაღამოვდა. ქუთაისში, ფონდი „სოხუმის" სკვერში, რომელიც 25 ნოემბრის სახელს ატარებს, ქალები შეიკრიბნენ.

ყველას მწვანე ლენტი ეკეთა და ანთებული სანთელი ეჭირა. სანახაობა თითქოს რომანიტიკულს ჰგავდა, მაგრამ რომანტიკისაგან შორს იყო.  საერთაშორისო აქციის შინაარსი „არ არის ქალი - არ არის მშვიდობა!"

ერთ-ერთი მოწოდება ავღანელი ქალების მიმართ სოლიდარობას გამოხატავდა, რადგანაც მათ, როგორც ყველა ქალს, უფლება აქვთ, აქტიური მონაწილეობა მიიღონ მშვიდობიანი, დემოკრატიული სახელმწიფოს შენებაში.

აქცია 31 ოქტომბერს - გაეროს რეზოლუცია 1325-ის მიღების დღეს გაიმართა. რეზოლუციის მიღებიდან 11 წელი გავიდა, მაგრამ ქალთა პოტენციალი კვლავაც გამოუყენებელი რჩება პოლიტიკაში, სამშვიდობო პროცესებში...

„ავამოქმედოთ რეზოლუცია 1325 - მშვიდობისა და თანასწორობისათვის" - აქციის მეორე მოწოდება მესიჯია იმ ადამიანების მიმართ, ვინც ხელს უშლის ქალის ჩართვას საქვეყნო საქმეებში.

ერთსაათიანმა აქციამ მიიპყრო საზოგადოების ყურადღება. მნიშვნელოვანი იყო მისი რეზონანსი მასმედიის საშუალებით (რეპორტაჟები გადასცა ტელეკომპანია „რიონმა", პირველმა არხმა და „იმედმა", რადიო „თავისუფლებამ").  

31 ოქტომბერს აქცია ერთდროულად ჩატარდა წყალტუბოში, ხონში, ზუგდიდში, ოზურგეთში, ბათუმში, ხურჩაში, სენაკში, ფოთში.

თითქმის ყველგან წვიმდა, მაგრამ ქალები ერთი საათის განმავლობაში მაინც არ დაშლილან.

ორასამდე ქალმა კიდევ ერთხელ გამოხატა ერთსულოვანი მხარდაჭერა საერთაშორისო ქალთა მოძრაობისადმი, რომლის მთავარი მიზანია მშვიდობა და  თანასწორობა.  

26 ივლისს ფონდი „სოხუმის" წარმომადგენლები კიდევ ერთხელ ჩავიდნენ ვანის კურორტ „ამაღლებაში". მათ ხანძრის შედეგად დაზარალებული  აფხაზეთიდან დევნილი  12 ოჯახი მოინახულეს.  

დევნილებს ჰუმანიტარული დახმარების სახით გადაეცათ ტანსაცმელი, სათამაშოები, მსუბუქი საბნები, ჰიგიენის საშუალებები( საპონი, შამპუნი და სხვა). აღნიშნული  დახმარება დევნილთათვის  არასამთავრობო ორგანიზაცია - „WORLD VISION"-მა (ქუთაისის ფილიალი - დავით ჩხობაძე) გამოყო.

სააქციო საზოგადოება „ორგტექნიკამ" დაზარალებულ 12-ივე ოჯახს საჩუქრად გაუგზავნა სხვადასხვა სახეობის „კავკასიური ელიტური ჩაი".

დევნილები მადლიერებას გამოხატავენ იმ სამთავრობო თუ არასამთავრობო  სტრუქტურების მიმართ, რომელთაც დიდი ყურადღება და სითბო გამოიჩინეს(აფხაზეთის ავტონომიური რესპუბლიკის მთავრობა, სოროსის ფონდი  და ფონდი „სოხუმი", WORLD VISION).

აღსანიშნავია, რომ  ჯერ კიდევ უმძიმესია ხანძრის შედეგად დაზარალებულთა მდგომარეობა-ისინი დევნილ ოჯახებს აფარებენ თავს, რამდენიმე მათგანი ღამეს ღია ცის ქვეშ ათევს.

დევნილები, მიუხედავად მძიმე სოციალური ფონისა,  ხვალინდელი დღის იმედს არ კარგავენ: მათ უკვე დაათვალიერეს ფოთში დევნილთათვის აშენებული ბინები. ვარაუდობენ, რომ მათი განსახლება ფოთში უახლოეს მომავალში-აგვისტოს ბოლოდან დაიწყება.

25 ნოემბერს, ქალთა მიმართ ძალადობასთან ბრძოლის საერთაშორისო დღეს, ძალადობის წინააღმდეგ მიმართული 16 დღიანი საერთაშორისო - საინფორმაციო კამპანია დაიწყო.

 მიმდინარე წელს კამპანიის 20 წლისთავი აღინიშნება. კულტურულ ჰუმნიტარული ფონდი „სოხუმი" ყოველწლიურადაქტიურად მონაწილეობს საერთაშორისო კამპანიაში.

 კამპანიის ფარგლებში ქუთაისში, ზუგდიდში, ხობში, ხონში, წყალტუბოში, ფოთში, ოზურგეთში,სენაკში გაიმართა ქალთა მიმართ ძალადობის წინააღმდეგ მიმართული მდუმარე აქციები სლოგანით - „ძალადობა ბოროტებაა!"

ქუთაისი

 ქუთაისში აქცია ზუსტად 13 საათზე დაიწყო. ფონდმა „სოხუმმა" შეფობა აიღო ქუთაისის ცენტრში, თამარ მეფის ქუჩაზე მდებარე სკვერზე, რომელსაც ფონდის ინიციატივით „25 ნოემბრის სკვერი ეწოდა".

 კამპანიის ფარგლებში სწორედ ამ სკვერში გაიმართა მდუმარე აქცია, სადაც შეიკრიბნენ ფონდი „სოხუმის" თანამშრომლები, აქტივისტები, ლიდერი ქალები, მცირე მეწარმეები...

 თეთრ მაისურებში გამოწყობილი ქალთა დუმილი სლოგანებმა გაახმოვანა: „გავერთიანდეთ  ქალთა მიმართ ძალადობის წინააღმდეგ!" „წინ აღუდგეთ ძალადობას!" დარიგდა საინფორმაციო ფურცლები, კამპანიის ამსახველი პოსტერები.

აქციაზე იმყოფებოდნენ საზოგადოებრივი მაუწყებლის, „რიონის", „მეგა - TV-ს" გადამღები ჯგუფები, ბეჭდური მედიის წარმომადგენლები: გაზეთი „ PS ", „ახალი ქუთაისი" .

აქციამ მოქალაქეთა ყურადღება მალე მიიპყრო. ბევრი მათგანი კამპანიის ისტორიითაც დაინტერესდა.