...

აპრილში ქუთაისის, ხონის, წყალტუბოს, სენაკის, ფოთისა და ხურჩის ქალთა მხარდაჭერის ცენტრებში ჩატარდა შეხვედრები იურისტებთან. შეხვედრების  თემა სხვადასხვა იყო - დევნილთა განსახლების პრობლემები და მისი თანამდევი მოვლენები; განქორწინება და ალიმენტი; სუიციდი მოზარდებში. შეხვედრების მიზანი -  დევნილებისთვის საჭირბოროტო საკითხებზე ინფორმაციის მიწოდება; მძიმე ყოველდღიურობით გამოწვეული პრობლემების მოგვარება.    ქალთა მხარდაჭერის ცენტრის იურისტების დახმარებით დევნილ მოსახლეობას სხვადასხვა სახის პრობლემა მოუგვარდა (წყალტუბოს სანატორიუმ „მეტალურგში"  ჩასახლებულ დევნილებს ელექტროენერგია არ მიეწოდებოდათ. იურისტის დახმარებით, პრობლემის მოგვარების პროცესში ჩაერთო სანატორიმის დირექტორი, რომელმაც სათანადო ორგანოებს მიმართა. პრობლემა გადაჭრილია). ხურჩის ცენტრის შეხვედრაზე მოზარდებს შორის სუიციდის საკითხი დაისვა. ითქვა, რომ  აღნიშნული თემა მსჯელობის საგანი შემთხვევით არ გამხდარა. კონფლიქტის ზონაში, ასევე მახლობელ სოფლებში, მოზარდებს შორის თვითმკვლელობის ფაქტებმა იმატა, რაც ადგილობრივ მცხოვრებთა სამართლიან შეშფოთებას იწვევს.  დევნილებმა გამოთქვეს აზრი, რომ ამ კუთხით მოზარდების მშობლებმა და ფსიქოლოგებმა განსაკუთრებულად უნდა იმუშაონ.

აპრილში ქუთაისის, ხონის, წყალტუბოს, სენაკის, ფოთისა და ხურჩის ქალთა მხარდაჭერის ცენტრებში ფსიქოლოგთან თითო შეხვედრა ჩატარდა.  შეხვედრებს  19-დან 58-წლამდე ასაკის ქალბატონები ესწრებოდნენ. შეხვედრების თემა - „ახლობლის დაკარგვით გამოწვეული ტკივილი და მასთან გამკლავება". ომგამოვლილ ადამიანებს ძალიან დიდი დრო სჭირდებათ ფსიქორეაბილიტაციისთვის.  ფსიქოლოგთან შეხვედრებზე ხშირად ისმის შეკითხვები იმაზე, თუ როგორ უნდა გაუმკლავდნენ ადამიანები ახლობლის დაკარგვით გამოწვეულ სტრესს. „მახლობლის დაკარგვა ძალიან მტკივნეული მომენტია. ხშირად გვხვდებიან ადამიანები, რომლებსაც მომხდარზე შესაბამისი რეაგირება უჭირთ.  სამწუხაროდ, ამ ფაქტს ვერ გავექცევით. ტრაგიკული მოვლენები და მძიმე განსაცდელი ადამიანის სულში ღრმა კვალს ტოვებს. ცხოვრებისეული ცვლილებების ცნობილ ჰოლმს-რეიხისეულ შკალაში, ახლობლების დაკარგვასთან დაკავშირებულ მოვლენებს  სტრესოგენულობის ხარისხით ლიდერული პოზიცია უჭირავს. სტრესული მდგომარეობის დაძლევაში, ფსიქოლოგის კონსულტაციებთან ერთად, ჯანსაღ საოჯახო გარემოს ენიჭება დიდი მნიშვნელობა". - განმარტავს ფსიქოლოგი.

ხონის, წყალტუბოს, ქუთაისის ქალთა მხარდაჭერის ცენტრებში ჩატარდა 6 ჯგუფური  საკონსულტაციო შეხვედრა ფსიქოლოგთან. შეხვედრებს ესწრებოდნენ 17-დან 55-წლამდე ასაკის აფხაზეთიდან დევნილი ქალბატონები. შეხვედრების თემა იყო „თანამედროვე ქალი - როგორი უნდა იყოს ის", ხოლო მიზანი -  ყოველდღიურობის ტვირთით დამძიმებული ქალების ფსიქოლოგიური კონსულტაციები. შეხვედრის მონაწილეებმა ისაუბრეს იმაზე, რომ დღეს ქალი ძალიან დატვირთულია, ხშირად მისთვის შეუფერებელ საქმეს ეჭიდება. მას ხშირად უწევს საკუთარი ძლიერების დამტკიცება;  ყოველდღიურობასთან ბრძოლაში ის კარგავს ქალურობას, იძენს მამაკაცურ თვისებებს.  „არ უნდა დავივიწყოთ, რომ ქალი ყველა დროში სინაზის, სიკეთისა და სიყვარულის სიმბოლო იყო. სწორედ ქალებს აქვთ, მამაკაცებისგან განსხვავებით, მეექვსე გრძნობა - ქალური ინტუიცია, რაც მათ დაბრკოლებების გადალახვაში ეხმარება. ქალს უნდა უყვარდეს, პატივს უნდა სცემდეს საკუთარ თავს. ქალებმა  უნდა იზრუნონ იმისათვის, რომ  ქალურობა არ დაკარგონ", - გვირჩევს ფსიქოლოგი.   პროექტი ხორციელდება: გერმანიის ორგანიზაცია EED-ს, ეკლესიათა განვითარების სამსახურის მხარდაჭერით.

შეხვედრებს ექიმ-რეპროდუქტოლოგებთან  სხვადასხვა ასაკობრივი ჯგუფის დევნილი ქალბატონები და გოგონები ესწრებოდნენ. ყურადღება გამახვილდა შემდეგ თემებზე: ძუძუთი კვება და მელოგინე ქალის ჰიგიენა მშობიარობის შემდეგ; ფიბრომა; ჩასახვის საწინააღმდეგო აბები და სხვა. რეპროდუქტოლოგებთან შეხვედრების აუცილებლობას ადასტურებს ის  ფაქტიც,რომ მორიგი კონსულტაციის შემდეგ, წყალტუბოს კოლექტიურ ცენტრში მცხოვრებ დევნილ ქალბატონს მკერდის დროული გამოკვლევა ჩაუტარდა.  ოქტომბერში ქალთა მხარდაჭერის ქუთაისის, წყალტუბოს, ხონის, სენაკის, ფოთისა და ხურჩის ცენტრებში რეპროდუქციული ჯანმრთელობის თემებზე ექვსი შეხვედრა ჩატარდა.   პროექტი ხორციელდება: გერმანიის ორგანიზაცია EED-ს, ეკლესიათა განვითარების სამსახურის მხარდაჭერით.

ფონდი „სოხუმის" იურისტების მიერ ჩატარებულ იურიდიულ კონსულტაციებში მონაწილეთა რიცხვი იზრდება, ჭარბობენ ახალგაზრდები. შეხვედრებზე განიხილეს პირადობის მოწმობისა და საქართველოს მოქალაქის პასპორტის დაჩქარებული წესით აღებასთან დაკავშირებულ საკითხები.  მონაწილეებმა კითხვებზე - რა დოკუმენტები უნდა დაერთოს  ერთჯერადი სამედიცინო დახმარების მსურველი დევნილის განცხადებას;  რა საბუთები უნდა წარადგინოს დევნილმა ქორწინების მოწმობის ხელმეორედ აღებისას-დამაჯერებელი პასუხები მიიღეს. საუბარი იყო, ასევე, ოჯახური ძალადობის ფაქტებზე. ქალებმა მიიღეს ინფორმაციები დამცავ და შემაკავებელ ორდერზე, მისი გაცემის წესებზე.   პროექტი ხორციელდება: გერმანიის ორგანიზაცია EED-ს, ეკლესიათა განვითარების სამსახურის მხარდაჭერით.

ივლისში „საზოგადოებრივ მისაღებს" ქუთაისის სატრაქტორო ქარხნის ადმინისტრაციულ შენობაში ჩასახლებულმა  დევნილმა ვ. ჩიქოვანმა მიმართა, რომლის ოჯახიც   მეათე (ბოლო) სართულზე ცხოვრობს. ძლიერმა ქარმა და წვიმებმა სახურავი( და მთლიანად ბინა) იმდენად დააზიანა, რომ ოჯახი, დროებით, იმავე ბინის მერვე სართულზე შეასახლეს. ამჟამად ბინის ოფიციალური მფლობელი ითხოვს მის დაცლას. დაზარალებული ოჯახი კი- საცხოვრებლად უვარგისი ბინის გარემონტებას. დევნილი მოქალაქის ვ.ჩიქოვანის თხოვნით, შედგენილ იქნა განცხადება საქართველოს ოკუპირებული ტერიტორიებიდან  იგპ-თა, ლტოლვილთა და განსახლების რეგიონული სამმართველოს უფროსის დ.აფციაურის სახელზე. „საზოგადოებრივი მისაღების" იურისტები ელოდებიან რეგიონული სამმართველოს ოფიციალურ პასუხს, შემდგომი სამართლებრივი რეაგირებისათვის. შეხვედრებზე აქტუალურია კითხვა: ადგილობრივ მოქალაქეებზე დაქორწინებული დევნილი ქალბატონების შვილებს, რომელთაც აქვთ დევნილის სტატუსი, გამოეყოფათ  თუ არა საცხოვრებელი ფართი? რეგიონულმა სამმართველომ, არსებული კანონმდებლობიდან გამომდინარე, დევნილებს განუმარტა: რომ საცხოვრებელი ფართით დაკმაყოფილდებიან მხოლოდ დევნილი ქალბატონები და არ მათი შვილები, მიუხედავად იმისა, რომ აქვთ დევნილის სტატუსი. ფონდი "სოხუმის” იურისტებთან შეხვედრების შედეგად, დევნილი მოქალაქეები  ბევრ საჭირბოროტო ყოფით საკითხს დადებითად აგვარებენ.

დემოკრატიის ნაციონალური ფონდის (აშშ) რეკომენდაციით, ფონდ „სოხუმის" წარმომადგენელი მონაწილეობდა დემოკრატიის საზოგადოებრიობის მაღალი დონის შეხვედრაში  „ახალგაზრდა ლიდერები დემოკრატიის მხარდასაჭერად: გამოწვევები და შესაძლებლობანი". შეხვედრა ორგანიზებული იყო  29-30 ივნისს ვილნიუსში (ლიტვაში), ახალგაზრდული ფორუმის ფარგლებში. მასში მონაწილეობდნენ  ახალგაზრდა ლიდერები, აქტივისტები, არასამთავრობო ორგანიზაციების  წარმომადგენლები მსოფლიოს სხვადასხვა ქვეყნიდან: უკრაინა, საქართველო, აშშ, რუსეთი, აზერბაიჯანი, სომხეთი, ვენესუელა, ბელორუსია. მოლდავეთი, ალბანეთი, ინდოეთი და სხვა. შეხვედრის ფარგლებში დემოკრატიის გაძლიერების თემაზე  ოთხი სესია ჩატარდა: როგორ უზრუნველვყოთ ახალგაზრდობის მონაწილეობა  დემოკრატიის ფორმირებაში; ახალგაზრდა  სამართალდამცავთა უფლებების დაცვა დახურულ საზოგადოებებში; ელექტრონული დემოკრატია: მესიჯის შემუშავება ახალი ტექნოლოგიების გამოყენებით;  დემოკრატიული დიპლომატია: ინსტრუმენტები დემოკრატებისათვის, ახალგაზრდა აქტივისტების მხარდასაჭერად. პანელისტებმა ძალიან საინტერესო მოხსენებები წარმოადგინეს, მონაწილეებს ჰქონდათ  თავიანთი აზრების გამოთქმის  შესაძლებლობა დემოკრატიული პროცესების მხარდასაჭერად. შეხვედრის დასასრულს მონაწილეებმა მიიღეს ახალგაზრდა ლიდერთა  დემოკრატიის ხაზით მოქმედების გეგმა, ასევე  გიმართა ვილნიუსის დეკლარციის ხელმოწერის ცერემონია. 1 ივლისს შეხვედრის  ყველა მონაწილე  მიიწვიეს  დემოკრატიის საზოგადოებრიობის  მინისტრთა მეექვსე კონფერენციაზე, რომელიც  ორგანიზებული იყო ვილნიუსის საგამოფენო ცენტრ ლიტეკსპოში. კონფერენციაში მონაწილეობდნენ  პოლიტიკოსები სხვადასხვა ქვეყნიდან, ლიტვის   პრეზიდენტი ქალბატონი  დალი  გრიბაუსკაიტე, აშშ სახელმწიფო მდივანი ჰილორი კლინტონი, ლიტვის საგარეო საქმეთა მინისტრი აუდრონიუს  აჟუბალისი, ევროკავშირის უმაღლესი წარმომადგენელი  საგარეო საქმეებში კეტრინ ეშტონი და სხვა. კონფერენციაზე მიღებულ იქნა ვილნიუსის დეკლარაცია, რომელიც ხაზს უსვამს დემოკრატიული საზოგადოებრიობის მოღვაწეობის გაძლიერების  აუცილებლობას  და მიესალმება  დემოკრატიაზე  გადასვლის პროცესში მყოფი ქვეყნებისათვის დახმარების გაწევის ინიციატივას. დოკუმენტში ხაზგასმულია ქვეყნების განზრახვა  დემოკრატიული   საზოგადოებრიობის  მოღვაწეობის  განმტკიცებაზე  ადვოკატირებისა  და დემოკრატიულ   ფასეულობათა დაცვისათვის ქვეყნებში, რომლებიც  დემოკრატიის საფრთხეს აწყდებიან;  პოლიტიკის კოორდინაცია და მოქმედებები დემოკრატიული მმართველობის ეფექტურობის ზრდისათვის. ლიტვის საგარეო საქმეთა მინისტრმა  აუდრონიუს  აჟუბალისმა  თავმჯდომარეობა გადასცა მონღოლეთის  საზოგადოებრიობას  და თქვა, რომ  ამ ორგანიზაციის თავმჯდომარეობის  ორი წლის მანძილზე, ლიტვამ ყველაფერი გააკეთა საზოგადოებრიობის მიზნების განსახორციელებლად  და  ყველა ქვეყანას, რომლებიც ლიტვას მხარს უჭერდნენ, მადლობა გადაუხადა.

ივნისში ქალთა მხარდაჭერის ექვსივე ცენტრში ჩატარდა შეხვედრები იურისტებთან. დევნილი  ქალბატონებისათვის იურიდიულ საკითხებთან დაკავშირებული კონსულტაციები ისევ აქტუალურია. შესაბამისად,  ქალთა მხარდაჭერის ცენტრებში იურისტებთან  შეხვედრებზე ყოველთვის ხალხმრავლობაა. დევნილები ითხოვენ  კონსულტაციებს შემდეგ თემებთან დაკავშირებით: კანონი ოჯახური ძალადობის შესახებ-დამცავი და შემაკავებელი ორდერი; განსახლებისა და განქორწინების საკითხები; ბავშვთა უფლებების დაცვა და სხვა.  შეხვედრებზე გამოითქვა აზრი, რომ იურისტთა კონსულტაციები ერთგვარი გზამკვლევის როლს თამაშობს დევნილ მოსახლეობაში.   პროექტი ხორციელდება: გერმანიის ორგანიზაცია EED-ს, ეკლესიათა განვითარების სამსახურის მხარდაჭერით.