შეხვედრები ადგილობრივ თვითმმართველობასთან, აქცია, საინფორმაციო შეხვედრები ბენეფიციარებთან, ონლაინ ტრენინგი სამიზნე ბაღების მშობლებთან და აღმზრდელებთან - ეს სენაკის ქალთა მხარდაჭერის ცენტრი მცირე პროექტების აქტივობებია. ასე ჩაერთნენ ცენტრის წარმომადგენლები და ახალგაზრდა აქტივისტთა ჯგუფები 16-დღიან კამპანიაში ქალთა მიმართ ძალადობის წინააღმდეგ.

მონაწილეებს მიეწოდა ინფორმაცია კამპანიის შესახებ, აქცენტები დაისვა ქალთა მიმართ ძალადობის პრობლემის აქტუალობაზე, პრევენციაზე, მსხვერპლის დაცვაზე და საზოგადოების გაერთიანებაზე ძალადობის წინააღმდეგ.

ტოლერანტობის პრობლემა იყო ძირითადი თემა ონლაინ ჩართვების დროს ფახულანის (წალენჯიხის მუნიციპალიტეტი), გურიანთას (ოზურგეთის მუნიციპალიტეტი) და ხაჯალიას (ლანჩხუთის მუნიციპალიტეტი) ახალგაზრდული კლუბების წევრებთან. მოზარდები საუბრობდნენ რელიგიურ და ეთნიკურ საკითხებზე, გამოიკვეთა მათი შემწყნარებლური დამოკიდებულება. აღინიშნა, რომ ტოლერანტობის თემის განხილვა მოზარდებისთვის აუცილებელია, რადგან ტოლერანტობა ამცირებს ძალადობას.

„ოჯახური ძალადობის მსხვერპლთა დახმარების მუნიციპალური სერვისები და სამომავლო პერსპექტივები“ –  ამ თემაზე გაიმართა ონლაინ მრგვალი მაგიდა ფონდი „სოხუმისა“ და სამეგრელო-ზემო სვანეთის სამხარეო ადმინისტრაციის  თანამშრომლობით. მონაწილეობდნენ: ზუგდიდის, წალენჯიხის, მარტვილის, ფოთის, ხობის, სენაკის, ჩხოროწყუს, აბაშის, მესტიის ადგილობრივი თვითმმართველობის წარმომადგენლები.

- რა პროგრამებით პასუხობს თვითმმართველობა ოჯახში ძალადობის მსხვერპლთა დახმარების  კუთხით არსებულ გამოწვევებს; რა ცვლილებები ინერგება მომდევნო წლის ბიუჯეტში,  როგორია მზაობა ადგილობრივ დონეზე გენდერული პოლიტიკის გაძლიერების თვალსაზრისით - შეხვედრაზე, ძირითადად, ამ საკითხებზე გაკეთდა ფოკუსირება.

მონაწილეებმა კოვიდპანდემიით შექმნილ  პრობლემებზეც გააკეთეს აქცენტი და გამოწვევების საპასუხოდ რეაგირების კუთხით არსებული გამოცდილება გაუზიარეს ერთმანეთს.

აღინიშნა, თუ რამდენად მნიშვნელოვანია სამხარეო ადმინისტრაციის მხარდაჭერა მუნიციპალიტეტებს შორის თანამშრომლობის გაფართოების თვალსაზრისით.

შეხვედრას ფასილიტირებას უწევდა ფონდი „სოხუმის“ მონიტორინგის ჯგუფი.

თერჯოლაში აქტიური ონლაინ შეხვედრები მიმდინარეობს. სამოქალაქო საზოგადოების ორგანიზაციებთან მორიგ  შეხვედრაზე მოწვეული იყვნენ ახალგაზრდული და ქალთა საინიციატივო ჯგუფების წარმომადგენლები.

თერჯოლაში არასამთავრობო ორგანიზაციები ნაკლებად არიან წარმოდგენილნი, ამიტომ ახალი ორგანიზაციების შექმნას დიდი მნიშვნელობა აქვს. უკვე გამოცდილი ორგანიზაციები მენტორობას გაუწევენ ახალბედებს, დაეხმარებიან რეგისტრაციაში, წესდების შემუშავებაში, იურიდიული საკითხების მოგავრებაში.

პროექტის დასაწყისში დარეგისტრირდა ორგანიზაცია „ქალები საქართველოს მომავლისთვის“, ახლა კიდევ ორი ორგანიზაციაა ჩამოყალიბების პროცესში.

მუშაობა მიმდინარეობს პროექტის „გურიის, იმერეთისა და რაჭა-ლეჩხუმის სამოქალაქო საზოგადოების ორგანიზაციების საერთო ფორუმი საჯარო მმართველობის რეფორმის საგზაო რუკის მონიტორინგის მიზნით“ ფარგლებში.

წყალტუბოს, ხონის და ოზურგეთის ქალთა მხარდაჭერის ცენტრები პანდემიასთან დაკავშირებული რეგულაციების დაცვით აქტიურად ჩაერთენ ძალადობის წინააღმდეგ მიმართულ 16-დღიან კამპანიაში. მათ სხვადასხვა ღონისძიებით მოიცვეს ბენეფიციართა დიდი რაოდენობა. ჩატარდა შეხვედრები ადგილობრივ თვითმმართველობებთან, საინფორმაციო შეხვედრები, იურისტის და ფსიქოლოგის კონსულტაციები, მრგვალი მაგიდები, აქციები, მოწყვლად ჯგუფებს დაურიგდა ფონდი „სოხუმის“ დღის სარეაბილიტაციო ცენტრში შეკერილი პირბადეები.

გურიანთას (ოზურგეთის მუნიციპალიტეტი), კოკის (ზუგდიდის მუნიციპალიტეტი)  და ფოთის №4 საჯარო სკოლების კონფლიქტის მართვის ჯგუფის წევრებთან ონლაინ ვორკშოპები ჩატარდა თემაზე „კონფლიქტის შესაძლო შედეგები და კონფლიქტურ სიტუაციაში ქცევის სტილები“.

მონაწილეებისთვის ახალი და უცხო იყო ეს ინფორმაცია. მათ ისწავლეს, რას ნიშნავს მოგება-მოგება, მოგება-წაგება და წაგება-წაგება. შეხვედრების ბოლოს მოზარდებმა აღნიშნეს:

„თქვენ ისე გასაგებად გვიხსნით თემას, რომ გაუგებარი არაფერი რჩება“.

„სიხარულით ველოდები თქვენს მესიჯს, თუ როდის ჩაგვიტარდება შეხვედრა“.

„ძალიან მომწონს ეს გაკვეთილები. ვიცი, ეს ცოდნა აუცილებლად გამომადგება“.

სხვადასხვა აქტივობით შეუერთდნენ ფონდი „სოხუმის“ ქალთა საინიციატივო ჯგუფები 16-დღიან საერთაშორისო კამპანიას ქალთა მიმართ ძალადობის წინააღმდეგ.  „მშვიდობა შინ და მშვიდობა გარეთ“, „ქალთა მიმართ ძალადობა დანაშაულია“ -  ასეთი მესიჯები გააჟღერეს ფონდი „სოხუმის“ აქტივისტებმა კონფლიქტისპირა სოფლებთან (ხურჩა და ნაბაკევი - ზუგდიდისა და გალის მუნიციპალიტეტები) გამართულ აქციაში. გენდერული კუთხით არსებულ გამოწვევებზე ისაუბრეს  სოფელ ფახულანში (წალენჯიხის მუნიციპალიტეტი) გამართულ ონლაინ შეხვედრაზე და  პროტესტი ამ ფორმით გამოხატეს.

16-დღიან კამპანიაში ფახულანის (წალენჯიხის მუნიციპალიტეტი) ქალთა მხარდაჭერის ცენტრიც აქტიურად ჩაერთო - მცირე პროექტის „ჯანსაღი თაობისთვის“ აქტივობების მეშვეობით.

ამ დღეებში აქტიურად დაფიქსირდა ახალგაზრდების ხედვა ძალადობის პრობლემასთან დაკავშირებით, ჩატარდა ესეებისა და ნახატების კონკურსი, დარიგდა მრავალჯერადი მოხმარების პირბადეები მოწყვლადი ჯგუფებისათვის.  ასევე გაიმართა საინფორმაციო შეხვედრები ქალებთან, ვორკშოპები სამიზნე სკოლების მასწავლებლებთან და მშობლებთან.

თემა: ტოლერანტობის პრობლემა მოზარდებში. ამ საკითხზე იყო მსჯელობა ონლაინ ჩართვების დროს ოთხ ახალგაზრდულ კლუბთან (ფოთის 1-ლი, ქობულეთის მე-5, თერჯოლის მე-2 და სამტრედიის მუნიციპალიტეტის სოფელ ეწერის საჯარო სკოლები).

მონაწილეები აქტიურად ჩაერთნენ დისკუსიაში. ისაუბრეს ეთნიკურ, რელიგიურ და რასობრივ პრობლემებზე, შერეულ ოჯახებზე, საზოგადოების აგრესიაზე „განსხვავებულის“ მიმართ.

მოეწყო ერთგვარი გაცვლითი შეხვედრა - ქობულეთის და ფოთის ახალგაზრდული კლუბები „ერთმანეთს შეხვდნენ“ ონლაინ სივრცეში. საინტერესო იყო მონაწილეების მონაყოლი ამბები შემწყნარებლობაზე, სხვა ეროვნებისა და სარწმუნოების მოსწავლეების შესახებ. ასეთი შეხვედრები ბევრ რამეზე დააფიქრებს მოზარდებს და სასიკეთოდ ცვლის მათ დამოკიდებულებას აქტუალური პრობლემების მიმართ.