ცნობილია, რომ მოზარდობის პერიოდში ახალგაზრდებს უყალიბდებათ ქცევათა არქეტიპები, რომელთაც შეუძლია კრიტიკული გავლენა იქონიოს როგორც უშუალოდ მათ ცხოვრებაზე, ასევე მთლიანად საზოგადოებაზე. ამიტომ ფონდი „სოხუმი“ დიდ მნიშვნელობას ანიჭებს მათთან, განსაკუთრებით ვაჟებთან მუშაობას არაძალადობრივი ცნობიერების ფორმირების ხელშეწყობის კუთხით.
2021 წლის მარტიდან ახალგაზრდებთან მუშაობა ახალ ეტაპზე გადავიდა - 10 მუნიციპალიტეტის ადგილობრივ თვითმმართველობებთან დაიდო შეთანხმებები და ახალგაზრდულ დეპარტამენტებთან თანამშრომლობით შეიქმნა ახალგაზრდების გაძლიერების ცენტრები (სამტრედია, ბაღდათი, თერჯოლა, ვანი, ტყიბული, სენაკი, ზუგდიდი, წალენჯიხა, ჩოხატაური, ქობულეთი).
ფონდი „სოხუმის“ მიერ 2008 წლიდან დანერგილი ახალგაზრდული ფორუმ-თეატრის და ჩრდილების თეატრის ფარგლებში გამართული დისკუსიები ტოლერანტობის, აგრესიისა და ბულინგის გამოვლინებების მიმართ საზოგადოების შეურიგებლობას უწყობს ხელს და ამკვიდრებს თაობათა შორის პოზიტიური კომუნიკაციის პრაქტიკას.
2021 წლის ივნისში შეიქმნა თოჯინების თეატრი. პირველი წარმოდგენა დაიდგა ქართული ხალხური ზღაპრის „გვრიტის“ საფუძველზე და მისი მთავარი თემაა ტოლერანტობა, პრობლემის მოგვარება არაძალადობრივი გზით.
2021 წელს დასავლეთ საქართველოს 6 მუნიციპალიტეტში (ქუთაისი, ხონი, წყალტუბო, სენაკი, ზუგდიდი) შეიქმნა ახალგაზრდული საინიციატივო ჯგუფები, რომლებიც USAID-ს მხარდაჭერით ბევრ მნიშვნელოვან, სამშვიდობო ხასიათის აქტივობას ახორციელებენ.
ამ მიმართულებით ფონდ „სოხუმს“ გრძელვადიანი პარტნიორობა აქვს საერთაშორისო ორგანიზაციასთან Brot für die Welt.
სხვადასხვა დროს საქმიანობის მხარდამჭერები იყვნენ: HumanDoc foundation, Mama Cash, Nesehnutí, საფრანგეთის საელჩო საქართველოში, კანადის საელჩო თურქეთში, სომხეთის ორგანიზაცია „ქალები განვითარებისთვის“.