ერთ პატარა სოფელში არის ბიჭუნა, რომელიც მთელი ცხოვრება სტრესში იზრდებოდა. დიდი ოჯახი ჰქონდა, მაგრამ ძმებთანაც ვერ ახერხებდა ურთიერთობას. ჩაკეტილობა მისთვის თითქოს დამცავ კედლად იქცა, რომლის მიღმაც თავის ტკივილს და ემოციებს მალავდა.
ერთ დღეს ბიჭუნა, მისი დედა და ძმები ქალთა ფონდი „სოხუმის“ სარეაბილიტაციო ცენტრში მოხვდნენ.
დედასთან და სხვა ქალებთან მუშაობდნენ ფსიქოლოგი, სოციალური მუშაკი, იურისტი, ბიჭუნა კი დიდ დროს ატარებდა პედაგოგთან.
არასრულწლოვნებთან მუშაობის ასისტენტი-პედაგოგი ანა ლომიძე იხსენებს: „პირველივე შეხვედრაზე თვალში მომხვდა მისი დუმილი და სევდიანი თვალები. პატარა ნაბიჯებით დავიწყეთ, მცირედიდან. ვთამაშობდით, ვმეცადინეობდით, ვხატავდით. სხვადასხვა აქტივობის შედეგად მასში ცნობისმოყვარეობამ გაიღვიძა. ძმებთან კომუნიკაცია დაიწყო. ორკვირიანი სარეაბილიტაციო პროგრამის დასრულების შემდეგ უკვე აქტიური, ძლიერი და თავდაჯერებული იყო. წინ ახალი გამოცდა ელოდა - სასკოლო ოლიმპიადა. ადრე უარს იტყოდა მონაწილეობაზე, ახლა კი ბიჭი ჩაერთო და პირველი ადგილიც აიღო. ეს დიდი გამარჯვება იყო მისთვის.
ეს ისტორია ერთ-ერთია მრავალთაგან, რაც ჩვენთან ხდება არასრულწლოვნებთან მუშაობის დროს. ყველა ბავშვი, რომელიც აქ მოდის, გადაწყვეტს, რომ არასდროს დაუბრუნდება წარსულს, სადაც დედასთან ერთად ისიც მსხვერპლი იყო. სარეაბილიტაციო ცენტრში დაბადებული გამარჯვება ახალი წარმატებების საწინდარი ხდება.
პროექტი ხორციელდება ორგანიზაცია Brot für die Welt - Evangelischer
Entwicklungsdienst მხარდაჭერით (გერმანია)
ქრისტინა ქუთათელაძე გაგრიდან დევნილია, ამჟამად წყალტუბოში, პატარა მწვანე ქალაქში ცხოვრობს. წყალტუბოს წმინდა გაბრიელ ეპისკოპოსის სახელობის მართლმადიდებლურ სკოლა-გიმნაზიასა და №4 საჯარო სკოლაში კომპიუტერული ტექნოლოგიების მასწავლებლად მუშაობს. მე-8 კლასიდან არასამთავრობო სექტორთან მჭიდროდ ურთიერთობს.
აქტიური საქმიანობისა და წარმატების ისტორიაზე თავად ქრისტინა გვესაუბრება:
„წლების წინ ფონდი „სოხუმის“ ტრენინგზე ბენეფიციარის სტატუსით მივედი. ახლა მათ მიერ განხორციელებულ არა ერთ პროექტში ვმონაწილეობ, წყალტუბოს ქალთა საინიციატივო ქსელის კოორდინატორი ვარ. აქტიურ ქალებთან ერთად კვლევის შედეგად გამოვლენილი პრობლემების იდენტიფიცირებასა და ადვოკატირებას ვახდენ. ფონდმა „სოხუმმა“ სწორი გზა გვიჩვენა, თუ როგორ უნდა მოვახერხოთ საკუთარი უფლებების დაცვა დემოკრატიულ პრინციპებზე დაყრდნობით. ორგანიზაცია მუდმივად ცდილობს ქალების გაძლიერებას. ასევე ვარ ქალთა ურთიერთდახმარების ჯგუფების ტრენერი, ქალებს ტექნიკური უნარ-ჩვევების გაუმჯობესებაში ვეხმარებით.
8 მარტი ქალთა ფონდი „სოხუმის“ დაბადების დღე და ჩვენი პოზიტიური, საჭირო და გაბედული საქმიანობის დღესასწაულია. ჩვენი ორგანიზაცია 27 წლის გახდა და ამ წლების განმავლობაში ბევრი ქალის ცხოვრება შეცვალა.
ქალთა ფონდმა „სოხუმმა“ დაბადების დღე Boutique Hotel Argo-ში აღნიშნა.
შეკრებილებმა ნახეს თამარ მშვენიერაძის და მარიამ ჯაჭვაძის ფილმი „ანას პროცესი“. შემდეგ იყო დისკუსია და დიალოგი შემოქმედებით ჯგუფთან.
დანარჩენი ისე წარიმართა, როგორც დაბადების დღეს შეეფერება:
იყო მოგონებები - ფონდი „სოხუმის“ წარმატების ისტორიები, 27 წლის გუნდის საკადრო გალერეა.
იყო მილოცვები...
და ბოლოს ქალთა ფონდი „სოხუმის“ თავმჯდომარემ ალლამ გამახარიამ გაჭრა სადღესასწაულო ტორტი წარწერით: ერთად - 27 წელი.
დიდი ისტორიის და გამოცდილების მქონე ორგანიზაცია აქტიურად განაგრძობს მუშაობას არჩეული მიმართულებების მიხედვით.
პროექტი ხორციელდება ორგანიზაცია Brot für die Welt - Evangelischer
Entwicklungsdienst მხარდაჭერით (გერმანია)
2023 წლის საანგარიშო შეხვედრა ქალთა ფონდი „სოხუმის“ დამფუძნებელმა ალლა გამახარიამ იმ წლების და წარსულის გახსენებით დაიწყო, რომელმაც 26 წლის მანძილზე, ჩვენი მოღვაწეობის წარმატება განაპირობა
დღეს ქალთა ფონდი ,,სოხუმი" ერთ-ერთი ავტორიტეტული ორგანიზაციაა არასამთავრობო სექტორში. ის მუშაობს 10 მუნიციპალიტეტში და აქვს წარმომადგენლობა თბილისში.
შემაჯამებელ შეხვედრაზე წლის მანძილზე სხვადასხვა მიმართულებით გაწეული საქმიანობის ანგარიში წარმოადგინეს: ეკატერინე გამახარიამ, ლელა ჯალაღონიამ, ნინო ჭაბუკიანმა, ხათუნა გოგუამ, თეა თორინავამ, ემა კამკიამ, თეა გოლეთიანმა, მერი გელაშვილმა, გურანდა გვანცელაძემ, ლალი გახარიამ და თამარ კუხალაშვილმა.
ამ გამოსვლებმა კიდევ ერთხელ დაგვარწმუნა, როგორი ნაყოფიერი და შედეგიანია ჩვენი აქტიური მუშაობა ქალებთან, ახალგაზრდებთან, სხვადასხვა უწყებასთან...
16-დღიანი გლობალური კამპანიის ფარგლებში დაიწყო და დეკემბრის ბოლომდე გრძელდება ახალგაზრდების აქტივობები.
10 მუნიციპალიტეტში დღემდე 1000-მდე ახალგაზრდამ მიიღო მონაწილეობა თემატურ დისკუსიებში, ტრენინგებში, გამოფენებში, ქუჩის აქციებსა და პერფორმანსებში, რომლებიც ძალადობის წინააღმდეგ ბრძოლას და პრევენციას ეხებოდა.
„უმთავრესი, რაც წელს გამოიკვეთა, არის ადგილობრივი თვითმმართველობების, განათლების რესურსცენტრების, ახალგაზრდული დეპარტამენტების, სკოლის დირექციების, პედაგოგების და მშობლების განსაკუთრებული პარტნიორობა ჩვენს კამპანიაში. ჩვენმა კონსტრუქციულმა და შედეგიანმა ნაბიჯებმა განაპირობა მთავარი - ნდობა: რომ ყველაფერი, რასაც ვაკეთებთ, ახალგაზრდების სწორ განათლებას ემსახურება,“ - აღნიშნა ახალგაზრდებთან მუშაობის ასისტენტმა ნინო ჭაბუკიანმა.
კამპანიაში ახალგაზრდების მნიშვნელოვან წვლილზე საუბრობენ ტრენერები, რომლებიც 10 მუნიციპალიტეტის ახალგაზრდობის გაძლიერების ცენტრებში ატარებენ ტრენინგებს:
ერთი დღით ადრე გახსნა ქალთა ფონდმა „სოხუმმა“ საერთაშორისო საინფორმაციო კამპანია „16 აქტიური დღე ქალთა მიმართ ძალადობის წინააღმდეგ“.
24 ნოემბერი. საღამოს 7 საათი.
ქუთაისი, რამაზ შენგელიას სახელობის სტადიონი - შენგელია არენა.
მატჩი ქუთაისის „ტორპედოსა“ და თბილისის „დინამოს“ შორის.
და... ყველაზე უჩვეულო და განსაკუთრებული:
ფეხბურთელები გამოვიდნენ თეთრი მაისურებით, რომელზეც ეწერა ჩვენი კამპანიის სლოგანი: „დაარღვიე დუმილი! აღკვეთე ძალადობა!“
ფეხბურთელებმა ეს სლოგანი დიდი ბანერის სახითაც გამოიტანეს.
ქუთაისის „ტორპედო“ ადრეც იყო 16-დღიანი კამპანიის სახე - 2003 წელს და 2013 წელს.
2003 წელს აქციაც გაიმართა სტადიონზე, თბილისის „დინამოსთან“ მატჩის წინ. მაშინ გრძელი თეთრი ლენტი შემოატარეს სტადიონზე ფეხბურთელებმა წარწერით: „ძალადობა ბოროტებაა! გავერთიანდეთ ქალთა მიმართ ძალადობის წინააღმდეგ!“
იმ დროისთვის ეს საკმაოდ სერიოზული განაცხადი და უჩვეულო აქცია იყო!
ჩვენი და სხვა ორგანიზაციების ძალისხმევის შედეგად ალაპარაკდნენ, რომ ძალადობა სცდება ერთი ოჯახის პრობლემას და ბევრად მეტი მავნე შედეგი აქვს, ვიდრე გვგონია. პარლამენტმა სამი წლის შემდეგ, 2006 წელს მიიღო კანონი ოჯახში ძალადობის წინააღმდეგ...
„ერთი სული მაქვს ხოლმე, როდის მოვალ მეცადინეობაზე. ეპოქსიდზე ვმუშაობ, ვქსოვ. თიხასთან შეხება პირველი იყო და კარგად გამომივიდა“, - ამბობს რუსუდან გვეტაძე.
ირმა კლდიაშვილმა ფეისბუქზე ნახა მასწავლებლის მაკა ჯიშკარიანის შემოქმედება და ძალიან დაინტერესდა. კურსებზე შემოიტანა განაცხადი და, როგორც ამბობს, გაკვეთილებმა მოლოდინი გაამართლა.
თამუნა ნანავა ის გოგოა, ზამთარში, ფეისბუქზე ეზოს თოვლის ბაბუების „კონკურსის“ და ერთგვარი ბუმის დროს ქალი რომ „გამოძერწა“ თოვლისგან. დედა მხატვარია. თავადაც ნიჭიერია:
- ხელოვნების ყველა სფეროს ვაფასებ. ვქსოვ სათამაშოებს, რემონტიც მეხერხება, ხეზე კვეთაც მინდა დავიწყო. პოლიმერულ თიხაზე მუშაობა ვისწავლე, მთელი პროცესი მომწონს, განსაკუთრებით კესანების კეთება, თოჯინების დამზადება.
ასე ამბობდნენ კურსის მონაწილეები ცოტა ხნის წინ...
მარი ბედნიერი წავიდა ქალთა ფონდი „სოხუმის“ სარეაბილიტაციო ცენტრიდან. არასოდეს დაავიწყდება ფსიქოლოგის გაკვეთილები, ბავშვების გართობა პედაგოგთან ერთად, სოციალური მუშაკის და იურისტის რჩევები. და, რა თქმა უნდა, ურთიერთობა სხვა ქალებთან... ზღვა სიყვარული და სითბო მიმაქვსო, თქვა წასვლის წინ.
ლიკაც კმაყოფილია ფონდი „სოხუმის“ თანამშრომლებთან ურთიერთობით. ყველა, ვინც აქ ხვდება, სხვანაირი მიდის აქედან - უფრო ძლიერი, უფრო იმედიანი და ხალისიანი. ჰყავს ახალი მეგობრები, მხარდამჭერები...
ყველაზე მეტ დროს ქალებთან ია იაშვილი ატარებს, სარეაბილიტაციო ცენტრის ასისტენტი, ამ მყუდრო სახლის მთავარი დიასახლისი. საინტერესოა მისი დაკვირვებები:
„ყველაზე მეტად არაჰარმონიული ოჯახური ურთიერთობებით შვილები ზარალდებიან. ზოგს მამა საერთოდ არ ჰყავს, ან ჰყავს და მასთან უჭირს ურთიერთობა, სხვადასხვა ენაზე ლაპარაკობენ, ერთმანეთის არ ესმით. ზოგჯერ ვამჩნევ, რომ ბავშვი არ ჭამს, იმიტომ კი არა, რომ არ შია, არამედ არაფერი უნდა, სურვილები არ აქვს, სიხარული არ აქვს, არ ოცნებობს“.
„მინდა მოგიყვეთ არაჩვეულებრივი ქალბატონის შესახებ. მან მე ცხოვრების სხვა მხარე დამანახა - ვინ ვარ და ვინ მინდა ვიყო! ქალბატონო მანანა, თქვენ ჩემი უახლოესი მეგობარი გახდით. ძალიან მენატრება თქვენთან საუბრები, მადლობა თქვენთან გატარებული ყოველი დღისთვის!“ - ეკა ჯ.
ამ წერილის ადრესატია ჩვენი ფსიქოლოგი მანანა გოცირიძე, რომელიც ბევრს მუშაობს ქალებთან. პირისპირ შეხვედრების დროს. ინტერნეტით. მუშაობს 10 მუნიციპალიტეტის ქალთა მხარდაჭერის ცენტრებში, ფონდი „სოხუმის“ სათავო ოფისში, სარეაბილიტაციო ცენტრში. და მადლიერებაც ხშირად ისმის მისი მისამართით.
ქალების შეცვლილი ცხოვრება ფსიქოლოგისთვის მუშაობის დიდი სტიმულია.
