როგორია ჩვენი სამიზნე ჯგუფების ოჯახების სტრუქტურა და სოციალური ნორმები, გენდერული ძალადობის ანატომია; როგორ შევძლოთ ოჯახური კონფლიქტების დროული   დიაგნოსტირება  და რისკების მინიმალიზება; როგორ მუშაობს პრაქტიკაში ოჯახში ძალადობის აღკვეთის მექანიზმები; როგორ მოვახდინოთ საზოგადოების ცნობიერების ტრანსფორმაცია: რა არის საინფორმაციო კამპანიების როლი ძალადობის პრევენციის/ძალადობის ფაქტებზე რეაგირების კუთხით.

ეს თემების არასრული ჩამონათვალია, რომლებზეც ფონდი „სოხუმის“ ტრენერებმა SOS ბავშვთა სოფლის ზუგდიდის მოტივირებულ, მაღალკვალიფიციურ ჯგუფთან სამდღიანი  ონლაინ-ტრენინგის ფორმატში იმუშავეს და სამომავლო გეგმებიც დასახეს.

14-17 აგვისტოს ბათუმში ფონდი „სოხუმის“ ორგანიზებით რაჭა-ლეჩხუმის და ქვემო სვანეთის ჯანდაცვის მუშაკებისათვის გაიმართა ტრენინგი შემდეგ თემებზე: ოჯახში ძალადობის მიზეზები, ბავშვის მიმართ ძალადობა, ფსიქოემოციური ასპექტები, ოჯახში ძალადობის პრევენცია, უწყებათა შორის თანამშრომლობა, სამართლებრივი მექანიზმები. განხილულ იქნა ყველა მნიშვნელოვანი საკითხი, რაც ხელს შეუწყობს ჯანდაცვის მუშაკების გაძლიერებას ძალადობის შემთხვევების მართვის, პრევენციის და რეაგირების მხრივ.

მუშაობა მიმდინარეობს პარტნიორული პროექტის „ოჯახში ძალადობის პრევენციის, მსხვერპლის მხარდაჭერის და მოძალადესთან თერაპიული მუშაობის სისტემის გაძლიერება“ ფარგლებში.

- როგორ გავაძლიეროთ ოჯახები, რათა თავიდან ავიცილოთ ძალადობა, გაუცხოება ოჯახის წევრებს შორის, რათა ყველა ბავშვი იზრდებოდეს სრულფასოვან, უსაფრთხო გარემოში, არსებული მენტალური დამოკიდებულებების ფონზე როგორ დავამსხვრიოთ სტერეოტიპები, რა შევცვალოთ და რა დავნერგოთ ბენეფიციარ მამაკაცებთან მუშაობის პროცესში; ვინ არიან ჩვენი პარტნიორები ამ საქმეში, ვისთან ვითანამშრომლოთ - ამ და სხვა საკითხებზე ფონდი „სოხუმის“ ტრენერთა ჯგუფმა ქუთაისის SOS ბავშვთა სოფელში ორდღიანი ტრენინგი ჩაატარა.

ტრენინგი ფონდ „სოხუმსა“ და ასოციაცია „საქართველოს SOS ბავშვთა სოფელს“ შორის თანამშრომლობის პირველი შემთხვევაა. მსგავსი ტიპის პარტნიორობა ხელს შეუწყობს ოჯახის გაძლიერების კომპონენტის გაფართოებას და ეფექტიანობას.

17-19 ივლისს ბორჯომში ჩატარდა ტრენინგი თემაზე „ოჯახის გაძლიერების სტრატეგია მუნიციპალური მომსახურების კონტექსტში“.

ტრენინგს ესწრებოდნენ ადგილობრივი თვითმმართველობის წარმომადგენლები დასავლეთ საქართველოს 11 მუნიციპალიტეტიდან (ქუთაისი, წყალტუბო, ხონი, სენაკი, ზუგდიდი, ფოთი, ოზურგეთი, ლანჩხუთი, თერჯოლა, წალენჯიხა, ქობულეთი).

მუნიციპალიტეტის წარმომადგენლებმა პრეზენტაციები გააკეთეს. ტრენინგზე განხილული იყო აქტუალური თემები, მათ შორის: სახელმწიფო სტრატეგია ქალთა მიმართ/ოჯახში ძალადობის წინააღმდეგ, თვითმმართველობის როლი და უფლებამოსილება, ადგილობრივი ელექტრონული სერვისები COVID-19-ის კრიზისის პირობებში, მუნიციპალური მომსახურების გაუმჯობესება და ოჯახების გაძლიერება.

ტრენინგზე შემუშავებული სტრატეგიები ხელს შეუწყობს ოჯახების გაძლიერებას.