ფონდი „სოხუმის“ დღის ცენტრში მუშაობა დაასრულა ჭრა-კერვის კურსმა. მონაწილეები დაეუფლნენ კერვის ტექნიკას, კარგად შეისწავლეს ყველა აუცილებელი ნიუანსი. შემაჯამებელ გაკვეთილზე წარმოდგენილი იყო მათი ნაშრომები, რომელთაც ჟიურის მოწონება დაიმსახურეს. მონაწილეთა თქმით, პროექტი დაეხმარა მათ, გამხდარიყვნენ უფრო მოტივირებულები. გაუჩნდათ სურვილი, რეალობად აქციონ საკუთარი იდეები, სამომავლოდ მცირე ბიზნესის წამოწყებასთან დაკავშირებით, რაც მათ ცხოვრებას მნიშვნელოვნად გააუმჯობესებს. 

პროექტის „ოჯახში ძალადობის თავიდან აცილების სისტემის მხარდაჭერა“ ფარგლებში ფონდი „სოხუმის“ დღის ცენტრში დასრულდა ორი ჯგუფის საბუღალტრო აღრიცხვის კურსი. ქალებმა გაიარეს შემდეგი საკითხები: ბუღალტრული აღრიცხვის თეორიული საფუძვლები საერთაშორისო სტანდარტებით, ბუღალტრული აღრიცხვის რეგულირება საქართველოში, საწარმოთა ორგანიზაციულ-სამართლებრივი ფორმები, საქართველოს კანონმდებლობა, აღრიცხვის მეთოდოლოგია, ორისის პროგრამა. ბოლო გაკვეთილზე ჩაუტარდათ შემაჯამებელი ტესტირება, რომელზეც ჯგუფებმა დადებითი შედეგები აჩვენეს. კურსდამთავრებულებს გადაეცა სერტიფიკატები. 

დასრულდა პოლიმერული თიხის გაკვეთილები ფონდი „სოხუმის“ დღის ცენტრში პროექტის „ოჯახში ძალადობის თავიდან აცილების სისტემის მხარდაჭერა“ ფარგლებში. მონაწილეებმა წარმოადგინეს საპროექტო პერიოდის განმავლობაში შექმნილი ნამუშევრები. მოკლედ ისაუბრეს თავიანთ თავზე, იმ შედეგებსა და შთაბეჭდილებებზე, რომლებიც დაუგროვდათ მუშაობის დროს როგორც პროფესიული განვითარების, ასევე პირადი ურთიერთობების კუთხით. პრეზენტაცია შთამბეჭდავი იყო და დიდი ინტერესი დაიმსახურა ფონდი „სოხუმის“ წარმომადგენლების მხრიდან.

ფონდი „სოხუმის“ ქალთა საინიციატივო ჯგუფებმა ჩაატარეს მონიტორინგი  ოჯახური ძალადობის თემაზ. მონიტორინგის მიზანია - GREWS (კონფლიქტის ადრეული პრევენციის გენდერულად ორიენტირებული სისტემა) გამოყენებით, საზოგადოებაში კონფლიქტის გამომწვევი რისკების იდენტიფიცირება და მინიმალიზება.

მონიტორინგის პირველი ეტაპი განხორციელდა 10 ოქტომბრიდან 25 ოქტომბრამდე.  გამოკითხვა ჩატარდა რაოდენობრივი და თვისებრივი კვლევის მეთოდების გამოყენებით: ანკეტირებით და ჩაღრმავებული ინტერვიუს ფორმატით. ინფორმაცია შეგროვდა წინასწარ შემუშავებული კითხვარებით.

მონიტორინგში მონაწილეობს 5 საველე მონიტორი. გამოკითხვა ჩატარდა ქუთაისში, წყალტუბოში და კონფლიქტისპირა სოფლებში: ხურჩა, კოკი, განმუხური, ორსანტია, შამგონა (ზუგდიდის მუნიციპალიტეტი) და ფახულანი, წყოუში (წალენჯიხის მუნიციპალიტეტი).

7 წლამდე ასაკის ბავშვთა ფსიქოლოგიური აღზრდის თავისებურებები - ამ თემაზე გაიმართა ჯგუფური შეხვედრები ფონდი „სოხუმის“ ფსიქოლოგთან სენაკის, ოზურგეთის, ლანჩხუთის და თერჯოლის მუნიციპალიტეტების საბავშვო ბაღების კოლექტივებთან.

ხონში, წყალტუბოსა და ქუთაისში გრძელდება მუშაობა კრიზისულ ოჯახებთან. მიმდინარეობს ინდივიდუალური ფსიქოთერაპიული კონსულტაციებიც. ფსიქოლოგის  მუშაობა  ხელს უწყობს ოჯახური ურთიერთობების მოგვარებას და ძალადობის პრევენციას.

ოქტომბერში სამობილიზაციო შეხვედრები ჩაატარეს სენაკის, ქუთაისის, ხონის,  ხურჩა/კოკის (ზუგდიდის მუნიციპალიტეტი) და ფახულანის (წალენჯიხის მუნიციპალიტეტი) ქალთა მხარდაჭერის ცენტრების მობილიზატორებმა.

შეხვედრების თემა იყო - სოფლად მცხოვრებ ქალთა საერთაშორისო დღე. ეს დღე  შეახსენებს საზოგადოებას, რამდენად ფასეულია ამ ქალების შრომა. სახელმწიფომ უნდა გააცნობიეროს, რომ სოციალურად და ეკონომიკურად აქტიური ქალი ბევრ სასიკეთოს მოუტანს როგორც თავის ოჯახს, ასევე მთელ საზოგადოებას. ამ თემასთან დაკავშირებით მოეწყო შეხვედრები ადგილობრივი თვითმმართველობების წარმომადგენლებთან, რათა მათთვის პრიორიტეტული გახდეს სოფლად მცხოვრები ქალებისა და გოგონების საჭიროებები. შეხვედრებზე დაისვა საკითხები, რომლებზეც ადვოკატირების ჯგუფებმა დაიწყეს მუშაობა.

ორი ღონისძიება გაიმართა ლანჩხუთის ქალთა მხარდაჭერის ცენტრის მცირე პროექტის ფარგლებში.

ერთი იყო შეხვედრა საბავშვო ბაღში  - ფონდი „სოხუმის“ იურისტის, ფსიქოლოგის და კონფლიქტოლოგის მონაწილეობით. შეკრებილები გაეცნენ რეფერირების პროგრამას. ისაუბრეს იმაზე, თუ როგორ უნდა გამოავლინონ ძალადობის რისკის ქვეშ მყოფი ბავშვი.

აგრეთვე ჩატარდა ტრენინგი, რომელსაც ესწრებოდნენ მერის წარმომადგენლები მუნიციპალიტეტის ხუთ თემში, სპეციალიტები და სოციალური მუშაკი. მათ მიიღეს ინფორმაციები ძალადობის ფაქტების გამოვლენისა და რეაგირების კუთხით.

ფონდმა „სოხუმმა“ დაასრულა მრგვალი მაგიდების ციკლი. ბოლო, მეცხრე ღონისძიება გაიმართა ლანჩხუთის მერიის სხდომათა დარბაზში. შეხვედრაზე მოწვეულნი იყვნენ ადგილობრივი თვითმმართველობის, სამედიცინო და საგანმანათლებლო სფეროს, პოლიციის, სოციალური მომსახურების სააგენტოს წარმომადგენლები.

შეხვედრა ქალთა მიმართ/ოჯახში ძალადობის თემას მიეძღვნა. აქტიური დისკუსიების ფონზე გაჟღერდა ადგილობრივი რეფერირების სუბიექტებს შორის კომუნიკაციის ნაკლებობა და შემუშავდა რეკომენდაციები თანამშრომლობის გაუმჯობესებისთვის.

კიდევ სამი ვორკშოპი ჩატარდა ოქტომბერში - ზედა სიმონეთის (თერჯოლის მუნიციპალიტეტი), ლიის (წალენჯიხის მუნიციპალიტეტი), მელაურის (სამტრედიის მუნიციპალიტეტი) საჯარო სკოლებში. თემა - კონფლიქტის გაჩენა და გამომწვევი მიზეზები.

ფონდი „სოხუმის“ კონფლიქტოლოგთან ერთად მოსწავლეებმა კონკრეტული დავალებები და როლური თამაშები შეასრულეს. ისინი აქტიურად ერთვებიან დისკუსიაში, სწავლობენ გუნდში მუშაობას. მათ აინტერესებთ ვორკშოპები, რადგან ბევრ სიახლეს იგებენ და პრაქტიკულ რჩევებსაც იღებენ.

აქტიურ ფაზაშია ფოთის ქალთა მხარდაჭერის ცენტრის პროექტი „ძალადობის ჯაჭვი“. კოლეჯ „ფაზისის“ საკონფერენციო დარბაზში ჩატარდა ქალთა კლუბის წევრების მიერ ორგანიზებული შეხვედრა. სამედიცინო დაწესებულებების, სამართალდამცავი ორგანოების, გენდერული საბჭოს და სხვა სფეროების წარმომადგენლებმა ისაუბრეს ოჯახში ძალადობის წარმოშობის მიზეზებსა და აღმოფხვრის გზებზე. ქალთა კლუბის წევრებმა ადგილობრივ თვითმმართველობას მიმართეს ინიციატივით, რომ მუნიციპალიტეტის სტრატეგიებსა და სამოქმედო გეგმაში აისახოს შესაბამისი საბიუჯეტო რესურსები და უზრუნველყოფილ იქნას ოჯახში ძალადობის მსხვერპლი ქალების დახმარება.

არტ-გალერეა 34-ში გაიმართა ფოთის დღის ცენტრის ბენეფიციართა ნახატების კონკურსი „ჩემი საოცნებო ოჯახი“. კონკურსმა აჩვენა, როგორია ბავშვების საოცნებო ოჯახი, რამდენად ახლოსაა ან შორდება რეალობას. 

ფოთის სამაუწყებლო კომპანია „მე-9 ტალღამ“ მოამზადა სიუჟეტი პროექტის „ძალადობის ჯაჭვის“ ფარგლებში ჩატარებული შეხვედრის შესახებ.  

https://nwbc.ge/2019/10/16/ძალადობის-ჯაჭვის-ფარგლე/?fbclid=IwAR3jD0kB-c6sArFlW713iPJ_20tG63hGZlrVXy38aAHE9kp_hH85Zad4tnA