ხურჩა/კოკის (ზუგდიდის მუნიციპალიტეტი) ქალთა მხარდაჭერის ცენტრის მცირე პროექტის ფარგლებში აგვისტოს თვეში ჩატარდა საინფორმაციო შეხვედრა მერის წარმომადგენელთან სოფელ კახათში. ასევე საინფორმაციო შეხვედრა სოფელ კახათში და ორსანტიაში მცხოვრებ ქალბატონებთან.

შეხვედრებზე ისაუბრეს ქალთა მიმართ და ოჯახურ ძალადობაზე, გამომწვევ მიზეზებზე, შედეგებზე. შეკრებილები აქტიურად განიხილავდნენ თემას და კონკრეტულ ქეისებს.

„კანონის ქალთა მიმართ ძალადობის ან/და ოჯახში ძალადობის აღკვეთის, ძალადობის მსხვერპლთა დაცვისა და დახმარების შესახებ“ მონიტორინგის ჯგუფმა აგვისტოში ჩაატარა ჩაღრმავებული ინტერვიუ ძალადობის მსხვერპლთან და ქუთაისში არსებული თავშესაფრის ხელმძღვანელთან.

პარარელურად - სოციალურ მუშაკთა ჩართულობის ხარისხის გამოვლენის მიზნით ჩატარდა ფოკუს-ჯგუფები სენაკისა და ოზურგეთის მუნიციპალიტეტებში საზოგადოების, სამედიცინო სფეროს და სოციალური სააგენტოს წარმომადგენლების ჩართულობით.

შეხვედრებზე გაირკვა, რა მიმართულებითაა საჭირო მუშაობა კანონის დასახვეწად. დაფიქსირდა მოსაზრება, რომ პრობლემების მოგვარებასა და ლობირებაში მონაწილეები საყრდენად არასამთავრობო სექტორს მიიჩნევენ. 

ხურჩა/კოკის (ზუგდიდის მუნიციპალიტეტი) ქალთა მხარდაჭერის ცენტრმა საქველმოქმედო აქცია გამართა სოფელ კახათში მცხოვრები დევნილი სოციალურად დაუცველი ოჯახებისათვის. მათ დაურიგდათ სათამაშოები, ტანსაცმელი, ფეხსაცმელი, საოჯახო ნივთები.

შეხვედრები თემის წევრებთან  კონფლიქტური სიტუაციების იდენტიფიცირების მიზნით - ხურჩის (ზუგდიდის მუნიციპალიტეტი) ქალთა საინიციატივო ჯგუფი ამ მიმართულებით აქტიურად მუშაობს. საინიციატივო ჯგუფის წევრები სისტემატიურად ხვდებიან ადგილობრივი ხელისუფლების წარმომადგენლებს კონფლიქტური სიტუაციების გასანეიტრალებლად.  

საინიციატივო ჯგუფი ამ ეტაპზე მუშაობს პრობლემაზე, რომელიც სოფელ ხურჩის მოსახლეობისთვის საკმაოდ აქტუალურია და ტრანსპორტის გაუმართავ მუშაობას ეხება.

ძალადობისაგან დაცვის ეროვნული ქსელის ორგანიზებით, ფონდმა „სოხუმმა“, რომელიც ამ ქსელის წევრია, თავის ოფისში ჩაატარა ტრენინგი იმერეთის პრობაციის ბიუროს ოფიცრებისთვის. 

ქალთა მიმართ ძალადობის პრობლემის აქტუალობა, კანონის აღსრულების მექანიზმები. მსხვერპლთან და მოძალადესთან მუშაობის სპეციფიკა, პრობლემები, გამოწვევები, გამოსავლის გზები, - ტრენინგი, ძირითადად, ამ მიმართულებით წარიმართა.

მონაწილეები გაეცნენ  ქალთა მიმართ ძალადობის სკრინინგ-ინსტრუმენტის გზამკვლევს. იმუშავეს პრაქტიკულ სავარჯიშოზე, რაც მიზნად ისახავდა მსხვერპლის იდენტიფიცირებას სპეციალურად შემუშავებული კითხვარის მეშვეობით.

პრობაციის ბიუროს ოფიცრები მალე ჩაერთვებიან ქალი მსჯავრდებულების სკრინინგის პროგრამაში ძალადობის შემთხვევების გამოსავლენად, რაც  მსხვერპლთა მხარდაჭერას და მათ ფსიქო-სოციალურ რეაბილიტაციას ითვალისწინებს.   

სენაკში გაიმართა ფსიქოლოგის შეხვედრა ოჯახურ წყვილთან წყენისა და არარეალური მოლოდინების პრობლემის კუთხით, აგრეთვე - ინდივიდუალური თერაპია ახლობელი ადამიანის დაკარგვით გამოწვეული ტრავმის გამო.

ფსიქოლოგიური საკონსულტაციო შეხვედრები ჩატარდა ფოთშიც. ჯგუფურ შეხვედრაზე განიხილეს ფსიქოლოგიური პრესინგის თემა. ამას გარდა, ფსიქოლოგი შეხვდა ოჯახურ წყვილს - იმუშავეს ურთიერთობებში ემოციური უფლებებისა და მოვალეობების ტექნიკაზე. ჩატარდა აგრეთვე ინდივიდუალური კონსულტაცია დეპრესიის პრობლემასთან დაკავშირებით.

ფოთის ქალთა მხარდაჭერის ცენტრის პროექტის „ჰარმონიული გარემო პატარებისათვის“ ფარგლებში ჩატარდა საინფორმაციო შეხვედრა მე-16 ბაგა-ბაღის პედაგოგებთან და აღსაზრდელთა მშობლებთან. სექტემბერში გაიმართება  ტრენინგი. მასზე განხილული იქნება სხვადასხვა აქტუალური საკითხი, რომელიც ბავშვების სწორ აღზრდას და მათთვის ჰარმონიული გარემოს შექმნას შეუწყობს ხელს.

შეხვედრები მოსახლეობასთან, თანამშრომლობა ადგილობრივ ხელისუფლებასთან და მასმედიის წარმომადგენლებთან ხელს უწყობს კონფლიქტური სიტუაციების გამოვლენას და მათ მოგვარებას ადრეულ სტადიაში.

წყალტუბოს ქალთა საინიციატივო ჯგუფის მიერ იდენტიფიცირებული პრობლემა, რომელიც სასაფლაოს ტერიტორიაზე მაღალი ძაბვის ბოძის გამაგრებას ეხებოდა, უკვე გადაწყვეტილია.

ჯგუფის წევრები აქტიურად აგრძელებენ შეხვედრებს მოსახლეობასთან სხვა კონფლიქტური სიტუაციების გამოვლენისა და მოგვარების მიზნით.

წყალტუბოში, თერჯოლაში, ფოთში, ხონსა და განმუხურში (ზუგდიდის მუნიციპალიტეტი) ჩატარდა ახალგაზრდული კლუბების საინფორმაციო შეხვედრები აქტუალურ თემაზე „ოჯახში ძალადობის პრევენცია, დაცვის მექანიზმები, საზოგადოების როლი“.

აქტიური ჯგუფები თავიდანვე ჩაერთნენ მუშაობაში. გამოიკვეთა ლიდერები, რომლებმაც განიხილეს ოჯახური ძალადობის მიზეზები, ისაუბრეს სტერეოტიპებზე, რომლებიც აფერხებს პრევენციულ ღონისძიებებს ქალთა მიმართ ძალადობის წინააღმდეგ.

ახალგაზრდებმა მოიყვანეს მაგალითები საკუთარი ოჯახისა და ახლობლების ცხოვრებიდან. მეტად მნიშვნელოვანი ფაქტია, რომ ისინი რეალურად აღიქვამენ ძალადობის მასშტაბებს და პრევენციაზე ფიქრობენ.

„როცა ჩვენს შიგნით მიმდინარეობს კონფლიქტი, არ ვიცით, როგორ მოვიქცეთ. ხშირად აგრესია გარეთ გამოგვაქვს და იმ ადამიანებთან ვაფუჭებთ ურთიერთობას, რომლებიც ჩვენთვის ძალიან ახლობელია, - ასეთი შინაარსის რეპლიკები ჰქონდათ ახალგაზრდებს ვორკშოპებზე, სადაც განიხილეს პიროვნული კონფლიქტები და მისი მართვა.

მონაწილეები მიიჩნევენ, რომ აუცილებელია ინფორმირება კონფლიქტების მართვაზე, რადგან პიროვნული კონფლიქტები ნეგატიურად მოქმედებს ადამიანზე და ხელს უწყობს ოჯახში ძალადობის განვითარებას.

ვორკშოპები ჩატარდა წყალტუბოში, თერჯოლაში, ზუგდიდში, ხონსა და ფოთში. მასში 41-მა ახალგაზრდამ მიიღო მონაწილეობა.