საინტერესო შეჯიბრით დასრულდა ფოთის ქალთა მხარდაჭერის ცენტრის მცირე პროექტი. 8 ივნისს აფხაზეთის ავტონომიური რესპუბლიკის #21 სკოლაში გაიმართა შეჯიბრი ჭადრაკში და შაშის თამაში ამავე სკოლის უფროსკლასელებს შორის.

შეჯიბრის ჩატარება მიზნად ისახავდა ახალგაზრდებს შორის ჯანსაღი ცხოვრების წესის პოპულარიზაციას და ძალადობის შემცირებას. შეჯიბრის გამარჯვებულმა მონაწილეებმა  სიმბოლური საჩუქრები მიიღეს.

ყველა შეხვედრა დიალოგის ფორმატით წარიმართა. მონაწილეებს ჰქონდათ საკუთარი აზრის დაფიქსირების საშუალება. შეხვედრის დროს ნაჩვენები იყო ვიდეორგოლები, რომლებშიც ასახულია ძალადობის საკითხები და ემსახურება მონაწილეების მეტ ჩართულობას და ინფორმირებას. ვაჟებს მოსწონთ შეხვედრები და მიაჩნიათ, რომ არაფორმალურ განათლებას დიდი მნიშვნელობა აქვს.

მორიგი შეხვედრები გაიმართა ხონის (6 ივნისი), სენაკის (7 ივნისი)  და ქუთაისის (8 ივნისი) მუნიციპალიტეტის სკოლებში. შეხვედრები ხელს უწყობს ვაჟების ჩამოყალიბებას არამოძალადე პიროვნებებად. 

ფონდი „სოხუმის“ ორგანიზებით ქუთაისის საკრებულოს სხდომათა დარბაზში გაიმართა მრგვალი მაგიდა „გენდერული მიდგომების დანერგვა ადგილობრივ პოლიტიკაში.“ შეხვედრის მონაწილეთა შორის იყვნენ ადგილობრივი თვითმმართველობის  სხვადასხვა სამსახურის წარმომადგენლები, გენდერული თანასწორობის საბჭოს წევრები.

ფონდი „სოხუმის“ თანამშრომლებმა შეხვედრაზე წარმოადგინეს გენდერული პოლიტიკის სტრატეგიული გზამკვლევი. მონაწილეებმა იმსჯელეს, როგორ, რა მეთოდებით უნდა მოხდეს გენდერული მიდგომების დანერგვა ადგილობრივ დონეზე. რას ნიშნავს გენდერული აუდიტი, რას მოიაზრებს გენდერული ბიუჯეტი.

შეხვედრაზე აღინიშნა, რომ მუნიციპალიტეტში უკვე ინერგება გენდერული მიდგომები, ისაუბრეს გენდერული თანასწორობის საბჭოს ეფექტურ მუშაობაზე. მონაწილეების მხრიდან იყო შეკითხვები.

მრგვალი მაგიდა გაიმართა პროექტის „ვიშეგრადის გამოცდილების შესწავლა ადგილობრივ დონეზე თანაბარი, ინკლუზიური და დემოკრატიული მმართველობის ადვოკატირებისთვის“ ფარგლებში.

პროექტი ხორციელდება ვიშეგრადის ფონდის მხარდაჭერით

ფონდი „სოხუმის“ მასშტაბური თუ მცირე პროექტები ხელს უწყობს ძალადობის მსხვერპლი და კრიზისული ოჯახების წარმომადგენელი ქალების სოციალურ-ეკონომიკური მდგომარეობის გაუმჯობესებას.

ქალთა ხელშეწყობას ემსახურება პროექტი „გზა მომავლისაკენ“, რომლის ფარგლებში ქუთაისში, ფონდის ოფისში შეიქმნა ჭრა-კერვის კურსები. პროექტის მხარდამჭერია ქალთა საერთაშორისო ასოციაცია საქართველოში (IWAG). მისი მიზანია, ქალებს დაეხმაროს ახალი პროფესიული უნარ-ჩვევების ჩამოყალიბებში. პროექტის განხორციელების პირველივე თვეს მონაწილეები უკვე დამოუკიდებლად ასრულებენ სხვადასხვა სახის სამუშაოებს.

მორიგი შეხვედრები გაიმართა ვაჟებთან: ფოთის (1 ივნისი), წყალტუბოსა (4 ივნისი)  და ზუგდიდის (5ივნისი) მუნიციპალიტეტის სკოლებში.

შეხვედრების მიზანია მონაწილეებისთვის ძალადობის პრევენციის გზების გაცნობა და მათი ჩამოყალიბება არამოძალადე პიროვნებებად.

შეხვედრის დიდი ნაწილი დაეთმო ჯგუფურ სამუშაოებს და როლურ თამაშებს. როლური თამაშები ყოველთვის მონაწილეთა განსაკუთრებულ ინტერესს იწვევს. თამაშების დროს ისინი საკუთარ თავს აიგივებენ რეალურ ფაქტებთან. ეს საკმაოდ ეფექტურია, რათა ვაჟებმა უფრო კარგად გაიგონ ძალადობასთან დაკავშირებული პრობლემები. კოკის სკოლაში (ზუგდიდის მუნიციპალიტეტი) შეხვედრა ღია ცის ქვეშ ჩატარდა. ამან გაახალისა ბავშვები, რაც მათ აქტიურობაზე აისახა.

პროექტის „კონფლიქტების ადრეული პრევენცია, თეორია და პრაქტიკა“ ფარგლებში ქუთაისის, წყალტუბოს, ხურჩის (ზუგდიდის მუნიციპალიტეტი) ქალთა საინიციატივო  ჯგუფებმა საკუთარ თემებში მუშაობა დაიწყეს.

პირველი შეხვედრა ხურჩის ჯგუფთან გაიმართა. ჯგუფის წევრებმა პრობლემების იდენტიფიცირებაზე იმუშავეს. შეირჩა მათი თემისთვის ყველაზე აქტუალური პრობლემა.

- ვისთვის არის ეს პრობლემა მნიშვნელოვანი, ვის ინტერესებში შედის მისი გადაწყვეტა, ვინ არიან მომხრეები, მოწინააღმდეგეები, ვის რა გავლენის მოხდენა შეუძლია  -   საინიციატივო ჯგუფმა პრობლემის ანალიზზე იმ მეთოდებით იმუშავა, რომლებიც მათ სპეციალურ ტრენინგზე შეისწავლეს.

პრობლემის ანალიზი საშუალებას მისცემს მონაწილეებს, ეფექტურად იმუშაონ კონფლიქტური სიტუაციების ადრეულ პრევენციაზე.  

- ბულინგის თემა საკმაოდ აქტუალურია, მოზარდებს შორის გახშირებული კონფლიქტები გვარწმუნებს, რომ ამ საკითხის განხილვა აუცილებელია.

- ჩვენს სკოლაში ერთი პუტკუნა ბავშვია და ამის გამო ეზოში კალათბურთი არ ათამაშეს კლასელებმა. მაშინვე ჩავერიე და ავუხსენი, რომ ეს არასწორი საქციელია. ბევრმა არ იცის, რომ ეს ბულინგია და მისი ქცევა ძალადობაა.

ასეთი იყო იმ ახალგაზრდების პოზიციები, რომლებიც დისკუსიებში მონაწილეობდნენ. მათ გამოსავალზეც იმსჯელეს, რადგან მიიჩნევენ,  რომ ბულინგი სერიოზული პრობლემაა და აქტიურად უნდა განიხილებოდეს.

ახალგაზრდების აზრით, პრევენციაში მშობლები და პედაგოგებიც უნდა ჩაერთონ, რადგან ბულინგი ხშირად ოჯახში მიმდინარე კონფლიქტებს უკავშირდება.  

ვორკშოპები გაიმართა ფოთში, წყალტუბოში, ზუგდიდში.

„ტრეფიკინგის თემაზე ჩვენ არავინ გვესაუბრება, თუმცა გაზრდილი მიგრაციის პირობებში ყოველი ჩვენგანი შეიძლება გახდეს ტრეფიკინგის მსხვერპლი. ამიტომ ეს შეხვედრა მნიშვნელოვანია პრევენციის თვალსაზრისით“, - ასეთი იყო ახალგაზრდული კლუბების საინფორმაციო შეხვედრების მონაწილეთა საერთო მოსაზრება.

ტრეფიკინგი როგორც ძალადობის ფორმა, მისი მიზეზები, სტატისტიკა, ტრეფიკინგის მსხვერპლის პრობლემები, პრევენციული ზომები - ეს თემები აქტუალური და საინტერესო აღმოჩნდა ახალგაზრდებისთვის. მათ ნახეს თემატური ფილმი და აქტიურად ჩაერთნენ დისკუსიაში. საუბრობდნენ სოციალურ პრობლემებზე, მიგრაციაზე, დაცვის მექანიზმებზე, გამოსავალზე.

შეხვედრები ჩატარდა ფოთის, ცხუნკურის (წყალტუბოს მუნიციპალიტეტი) და განმუხურის (ზუგდიდის მუნიციპალიტეტი) ახალგაზრდებთან.

ხონის მუნიციპალიტეტის საკრებულოს სხდომათა დარბაზში ფონდი „სოხუმის“ ორგანიზებით მრგვალი მაგიდა გაიმართა თემაზე „გენდერული მიდგომების დანერგვა ადგილობრივ პოლიტიკაში (გენდერული მეინსტრიმინგი)“

შეხვედრას გენდერული საბჭოს წევრები, ადგილობრივი თვითმმართველობის და  არასამთავრობო ორგანიზაციების წარმომადგენლები  ესწრებოდნენ.

ღონისძიებაზე წარმოდგენილ იქნა ფონდი „სოხუმის“ მიერ შემუშავებული ადგილობრივი გენდერული პოლიტიკის სტრატეგიული გზამკვლევი. საუბარი შეეხო საკითხებს - რა სჭირდება გენდერული მიდგომების დანერგვას მუნიციპალიტეტებში,    რას ნიშნავს გენდერული ბიუჯეტი და რატომაა ის საჭირო.

ითქვა, რომ მუნიციპალიტეტს აქვს საკმაოდ კარგი წინაპირობა ამ მიმართულებით მუშაობისთვის: ადგილობრივი სოციალური სტრატეგია და სამოქმედო გეგმა. სოციალურად სენსიტიური პროგრამების დანერგვის ტენდენცია, ორიენტაცია საჭიროებათა გამოვლენის პრაქტიკასა და მოწყვლადი ჯგუფების საჭიროებებზე მორგებულ გრძელვადიან სერვისებზე, მოქალაქეთა ჩართულობის უზრუნველყოფა  - სწორედ ის საკითხებია, რაც გენდერულად ორიენტირებული პოლიტიკის ქვაკუთხედია.

მრგვალი მაგიდა გაიმართა პროექტის „ვიშეგრადის გამოცდილების შესწავლა ადგილობრივ დონეზე თანაბარი, ინკლუზიური და დემოკრატიული მმართველობის ადვოკატირებისთვის“ ფარგლებში.

პროექტი ხორციელდება ვიშეგრადის ფონდის მხარდაჭერით

პროექტის ფარგლებში ივნისის დასაწყისში ცენტრის აქტივისტებმა ჩაატარეს ორი საინფორმაციო შეხვედრა გენდერულ და ძალადობასთან დაკავშირებულ საკითხებზე. ამით დასრულდა სენაკის ქალთა მხარდაჭერის ცენტრის მცირე პროექტი.

სოფელ თეკლათის სკოლის უფროსკლასელებთან შეხვედრის დროს განსაკუთრებული აქცენტი გაკეთდა ბულინგზე, რომელიც დღეისათვის საკმაოდ აქტუალური პრობლემაა. სოფელ ნოსირის სკოლის მოსწავლეებთან კი გამოიკვეთა ოჯახური ძალადობის თემა.

სენაკის ქალთა მხარდაჭერის ცენტრის მცირე პროექტი, როგორც დაგეგმილი იყო, ხელს შეუწყობს აგრესიის შემცირებას ახალგაზრდებში და მათ ჩართვას ძალადობის პრევენციულ ღონისძიებებში.