ქუთაისის ქალთა საინიციატივო ჯგუფმა საინტერესო საინფორმაციო შეხვედრა მოაწყო ქალაქის  მე-17 ბიბლიოთეკაში. შეხვედრა მიზნად ისახავდა თანამშრომლობას ადგილობრივ ხელისუფლებასთან პრობლემათა ადვოკატირებისთვის.

შეხვედრაზე მოწვეულნი იყვნენ ქალაქ ქუთაისის მუნიციპალიტეტის მერიის საბინაო ინფრასტრუქტურის მართვის და განვითარების სამსახურის უფროსი - ვლადიმერ ნაკაშიძე და ამავე სამსახურის მთავარი სპეციალისტი ლევან ბათიაშვილი.

დისკუსია აქტიურად წარიმართა. მონაწილეებმა სხვადასხვა პრობლემა წამოჭრეს. მოისმინეს კომპეტენტური ინფორმაცია და იმ პროგრამებს გაეცნენ, რომელთაც ადგილობრივი ხელისუფლება ინფრასტრუქტურული მიმართულებით ახორციელებს.

განსაკუთრებული სანახაობა შესთავაზა პატარებს ფონდი „სოხუმის“ ჩრდილების თეატრმა წყალტუბოს 1-ლ საჯარო სკოლაში. დაწყებითი კლასების 100-მდე მოსწავლე სიამოვნებით უყურებდა მუსიკალურ, ლამაზ ფერებში წამოდგენილ სპექტაკლს „პირიმზე“, რომელიც ფონდი „სოხუმის“ ექსკლუზივია - შეიქმნა ბავშვებისთვის თანასწორობის თემაზე.

წარმოდგენამ გაახალისა მაყურებელი. პედაგოგებმა აღნიშნეს, რომ ეს არის ორიგინალური, შემეცნებითი სპექტაკლი, რომელმაც ბავშვებს დაანახა მეგობრობის და თანასწორობის ძალა.

23 მაისს წყალტუბოს მუნიციპალიტეტის სხდომათა დარბაზში ქალთა საინიციატივო ჯგუფის ორგანიზებით საინფორმაციო შეხვედრა გაიმართა. შეხვედრას ესწრებოდნენ სხვადასხვა კოლექტიური ცენტრის წარმომადგენლები, ფონდი „სოხუმის“ აქტივისტები.

შეხვედრაზე მოწვეული იყო წყალტუბოს მუნიციპალიტეტის გამგეობის ჯანმრთელობისა და სოციალური დაცვის სამსახურის მთავარი სპეციალისტი ნარგიზა აბესაძე, რომელმაც  ადგილობრივ სოციალურ პროგრამებზე ისაუბრა.

მონაწილეთა მხრიდან არაერთი შეკითხვა დაისვა, როგორ იგეგმება ბიუჯეტში პროგრამები, რომელია პრიორიტეტული, როგორ ხდება მოქალაქეთა ინფორმირება ამ პროგრამებზე.

აღინიშნა, რომ მსგავსი ტიპის საინფორმაციო შეხვედრები მომდევნო თვეებშიც დაიგეგმოს, რაც გაზრდის კომუნიკაციის ხარისხს მოსახლეობასა და ადგილობრივ ხელისუფლებას შორის.

19 მაისს ქუთაისის ამომრჩეველ ქალთა კლუბის წევრებმა, საიას ქუთაისის ფილიალის ხელმძღვანელთან ერთად, საკონსტიტუციო ცვლილებებთან დაკავშირებულ საკითხებზე ისაუბრეს და საკუთარი წინადადებების საფუძველზე შეიმუშავეს რეკომენდაციები.

შეხვედრის მონაწილეებმა ასევე იმუშავეს კლუბის ძლიერ და სუსტ მხარეებზე, შესაძლებლობებსა და გამოწვევებზე.

პროექტი ხორციელდება აშშ საელჩოს მხარდაჭერით

ამომრჩეველ ქალთა კლუბის მორიგ სხდომაზე შეჯამდა კლუბის მუშაობა.  გამოიკვეთა ხელისშემშლელი ფაქტორები.  აქცენტი გაკეთდა კლუბის სამომავლო გეგმებზე.

შეხვედრის ერთ-ერთ მონაკვეთში იურისტმა კლუბის წევრებს გააცნო  ცვლილებები ქვეყნის კონსტუტუციაში, რამაც აქტიური დისკუსია გამოიწვია. დაფიქსირდა ამ ცვლილებების საჯაროდ განხილვის აუცილებლობა.

ბათუმის ამომრჩეველ ქალთა კლუბის წევრებმა, საიას ბათუმის ფილიალის იურისტთან ერთად, საკონსტიტუციო ცვლილებებთან დაკავშირებულ საკითხებზე ისაუბრეს. განიხილეს ცვლილებების დადებითი და უარყოფითი მხარეები. შეხვედრაზე ასევე გამოიკვეთა ადგილობრივი საკითხები, რომელთა ადვოკატირებაა საჭირო. დაისახა პრობლემების გადაჭრის გზები.

პროექტი ხორციელდება აშშ საელჩოს მხარდაჭერით

ამ ბოლო ხანებში დევნილთა შემწეობის რეფორმა განხილვის საგნად იქცა. სწორედ ამ თემას მიეძღვნა ფოკუს-ჯგუფი, რომელიც 17 მაისს ჩატარდა ხონში დევნილ ქალებთან. მონაწილეებმა გამოხატეს თავიანთი დამოკიდებულება რეფორმის მიმართ. აღნიშნეს, რომ რეფორმები ხელს უნდა უწყობდეს დევნილთა მეტ მხარდაჭერას, მათ განვითარებას და სოციალურ-ეკონომიკური პირობების გაუმჯობესებას და არა პირიქით.

შეხვედრა ჩატარდა ორგანიზაცია PIN-ის პროექტის „სოციალური დაცვის საკითხებზე მომუშავე არასამთავრობო ორგანიზაციების ჩართულობის გაძლიერება სტრატეგიულ დიალოგში საქართველოში“ ფარგლებში. დაფინანსებულია ევროკავშირის და ჩეხეთის საგარეო საქმეთა სამინისტროს მიერ.

1 მაისი - წყალტუბოს ქალთა მხარდაჭერის ცენტრში იურისტმა ჩაატარა იურიდიული საინფორმაციო-საკონსულტაციო შეხვედრა.

3 მაისი - ხურჩა/კოკის ქალთა მხარდაჭერის ცენტრმა მოაწყო  შეხვედრა იურისტთან სოფელ განმუხურის (ზუგდიდის მუნიციპალიტეტი) სკოლაში.

5 მაისი - შეხვედრა გაიმართა ფოთის ქალთა მხარდაჭერის ცენტრში.

11 მაისი - ქალები იურისტს შეხვდნენ სენაკის ქალთა მხარდაჭერის ცენტრში.

15 მაისი - ქუთაისის ქალთა მხარდაჭერის ცენტრის ინიციატივით შეხვედრა ორგანიზებულ იქნა  მე-17 ბიბლიოთეკაში.

16 მაისი -  ქალები იურიდიულ შეხვედრას დაესწრნენ ხონის ქალთა მხარდაჭერის ცენტრში.

შეხვედრებზე განიხილეს კანონი ოჯახში ძალადობის აღკვეთის, ოჯახში ძალადობის მსხვერპლთა დაცვისა და დახმარების შესახებ, საოჯახო სამართალი, ადამიანის უფლებები და თავისუფლებები. გაიცა ინდივიდუალური კონსულტაციები  სასოფლო-სამეურნეო მიწის რეგისტრაციის, მემკვიდრეობის მიღების, შრომითი მიგრაციის და სხვა საკითხებზე.

ხონის ქალთა მხარდაჭერის ცენტრში გაიმართა ჯგუფური ფსიქოლოგიური შეხვედრა კონფლიქტების თემაზე - მონაწილეობდა 10 ბენეფიციარი 22-დან 53 წლამდე. მონაწილეები მივიდნენ იმ დასკვნამდე, რომ მეუღლეს შენიშვნა ცალკე უნდა მისცე და გაარკვიო მისი ქცევის მიზეზები. კონფლიქტის მონაწილე თითქმის ყველა მხარე უგულებელყოფს ამ წესს და ურთიერთობებს ოჯახის ყველა წევრის თანდასწრებით არკვევს. აქედანაა ნეგატიური შედეგები - მათ მიმართ პატივისცემის შემცირება, ბავშვების ფსიქიკაზე გავლენა...

შეხვედრა სასარგებლო რჩევებით დასრულდა.

16 მაისს ხობის გამგეობის სააქტო დარბაზში ჩატარდა ამომრჩეველ ქალთა კლუბის მორიგი სხდომა. შეხვედრა მიეძღვნა საკონსტიტუციო ცვლილებებს, რომელთა საჯარო განხილვა ბოლო თვეში საკმაოდ რეზონანსული გახდა საქართველოს ქალაქებში. კლუბის აქტივისტების ზარით, მათ აქვთ უფლება და ვალდებულნიც არიან, ამ საკითხთან დაკავშირებით დააფიქსირონ თავიანთი პოზიცია და წარუდგინონ ხელისუფლების შესაბამის ორგანოებს.

პროექტი ხორციელდება აშშ საელჩოს მხარდაჭერით