ბაღდათის ადგილობრივი ორგანიზაციები სამთვიანი პროექტების განხორციელებას შეუდგნენ.

„სამოქალაქო სპექტრი თანასწორობა“ – ამ ორგანიზაციის პროექტია „მოქალაქეთა ინფორმირება საჯარო მმართველობის რეფორმის საგზაო რუკაზე“. ორგანიზაცია ცალკეულ ჯგუფებთან (შშმ პირები, სოციალურად დაუცველი მოსახლეობა, იძულებით გადაადგილებული პირები) ჩაატარებს შეხვედრებს, ვორკშოპებს, ტრენინგებს  და გააცნობს მათ მნიშვნელოვან საკითხებს: როგორ გამოიყენონ ელექტრონული რესურსები ადგილობრივ თვითმმართველობასთან ურთიერთობისთვის, როგორ მიიღონ საჯარო ინფორმაცია, როგორია საკრებულოს სხდომაზე დასწრების წესები, როგორ წარადგინონ რეკომენდაციები...

„თანასწორობა ახლა“ - ამ ორგანიზაციის პროექტს ეწოდება „მოსახლეობის მონაწილეობა ადგილობრივ დონეზე საჯარო მმართველობის რეფორმის დანერგვის პროცესში“. მისი მიზანია მარტოხელა მშობლების, მრავალშვილიანი დედების და პენსიონერების ინფორმირება იმის თაობაზე, თუ რა გავლენას მოახდენს მათზე საჯარო მმართველობის რეფორმა.

საპროექტო განაცხადები მომზადდა პროექტის „გურიის, იმერეთისა და რაჭა-ლეჩხუმის სამოქალაქო საზოგადოების ორგანიზაციების საერთო ფორუმი სახელმწიფო მმართველობის რეფორმის საგზაო რუკის მონიტორინგისთვის“ ფარგლებში.

პროექტი ხორციელდება ევროკავშირის მხარდაჭერით

კოვიდ-19-ის პანდემიამ ბევრი სიძნელე შეუქმნა ადამიანებს. ფონდი „სოხუმი“ ეცადა, ცოტათი მაინც შეემსუბუქებინა მათთვის პრობლემები და 10 მუნიციპალიტეტში ქალთა მხარდაჭერის ცენტრებმა საჭირო პროდუქტების ნაკრები გადასცა 400-მდე ოჯახს (სოციალურად დაუცველები, მრავალშვილიანი დედები, ძალადობის მსხვერპლი ქალები, შშმ პირები).

ამ დღეებში საქველმოქმედო აქციის მეორე ეტაპი განხორციელდა და დამატებით კიდევ სამ-სამ ოჯახს (სულ 30 ოჯახს) გაეწია დახმარება ქუთაისის, ხონის, წყალტუბოს, თერჯოლის, სენაკის, ფოთის, ზუგდიდის, წალენჯიხის, ოზურგეთისა და ლანჩხუთის მუნიციპალიტეტებში.

პრობლემები, რომელთა ადვოკატირება შესაძლებელია ადგილობრივ დონეზე - ამ საკითხებზე იმსჯელეს ქალებმა ქალთა საინიციატივო ჯგუფის მიერ  ორგანიზებულ შეხვედრაზე. მასში სოფელ ორსანტიის (ზუგდიდის მუნიციპალიტეტი)  წარმომადგენლები მონაწილეობდნენ. პროექტის მოდერატორი კი ონლაინ ჩაერთო.

მონაწილეების აზრით, სამოქალაქო საზოგადოება უფრო უნდა გააქტიურდეს, რათა თემში არსებული პრობლემები ადგილობრივი თვითმმართველობის წინაშე დაისვას და  შესაძლებელი გახდეს მათი ადვოკატირება და მოგვარება.

მეწარმე ქალთა ფონდის პარტნიორი ორგანიზაციების „ცაგერის ქალთა უფლებებისა და თანასწორობის ცენტრის“ და „აქტიური მოქალაქე - ანგარიშვალდებული ხელისუფლების“ წარმომადგენლების მიერ ცაგერში შეირჩა 14-კაციანი სამუშაო ჯგუფი, რომელშიც შედიან მუნიციპალიტეტის მერიის, საკრებულოს, ადგილობრივი სამოქალაქო საზოგადოების ირგანიზაციების, მასმედიის აქტიური სამოქალაქო პასუხისმგებლობის მქონე პირები.

17 ივნისს ცაგერის მუნიციპალიტეტში პირველი სამუშაო შეხვედრა გაიმართა მეწარმე ქალთა ფონდის თანამშრომელთა ჩართულობით. დამტკიცდა სამუშაო ჯგუფის შემადგენლობა. ჯგუფის წევრები გაეცნენ დებულებას, სამუშაო სტრატეგიას და სამოქმედო გეგმა-გრაფიკს.

პროექტი ხორციელდება კულტურულ ჰუმანიტარული ფონდი „სოხუმის“ (წამყვანი ორგანიზაცია), იმერეთის მეცნიერთა კავშირი „სპექტრის“ და მეწარმე ქალთა ფონდის მიერ.

მუშაობა მიმდინარეობს პროექტის „გურიის, იმერეთისა და რაჭა-ლეჩხუმის სამოქალაქო საზოგადოების ორგანიზაციების საერთო ფორუმი საჯარო მმართველობის რეფორმის საგზაო რუკის მონიტორინგის მიზნით“ ფარგლებში.

ქალთა მხარდაჭერის ცენტრებმა დაასრულეს მცირე პროექტების ერთი ციკლი. ახლა ისინი ახალი სამუშაოს დაწყებისთვის ემზადებიან. ამიტომაც მათთვის ცენტრების მობილიზატორებისთვის ჩატარდა ტრადიციული ტრენინგი თემაზე „პროექტის წერა და დიზაინი“. დისტანციური მუშაობის გამო საამისოდ ზუმის ინტერნეტ პლატფორმა გამოიყენეს.

მონაწილეებმა განიხილეს ქვეგრანტების გაცემის დებულება, რომლის მიხედვით მათ თავიანთი პროექტები უნდა შეიმუშავონ. ტრენინგზე მობილიზატორებმა მუნიციპალიტეტების მიხედვით შეარჩიეს პრობლემები და პროექტების სამუშაო ვერსიები მოამზადეს.

ჰარმონიული ურთიერთობა ოჯახის წევრებს შორის ძალადობის პრევენციისთვის - ამ თემას მიეძღვნა ონლაინ ჩართვები ფოთის 21-ე საჯარო სკოლის, მენჯის (სენაკის მუნიციპალიტეტი) და ლიას (წალენჯიხის მუნიციპალიტეტი) საჯარო სკოლების ახალგაზრდულ კლუბებთან.

სადისკუსიო თემა იმდენად აქტუალურია, რომ ახალგაზრდები დიდი ინტერესით ჩაერთნენ განხილვაში. ისინი საუბრობდნენ პრობლემებზე, რომლებიც განსაკუთრებული სიმწვავით დადგა პანდემიის პირობებში. მათი თქმით, ოჯახი ყველაზე დიდი საყრდენია... ერთ-ერთ შეხვედრაზე მოზარდებმა სიყვარული „აუხსნეს“ ოჯახის წევრებს, ხმამაღლა ამბობდნენ, როგორ უყვართ დედა, მამა, და, ძმა.. ეს ძალიან შთამბეჭდავი იყო. და როგორც თავად აღნიშნეს, ეს დღე დაუვიწყარი იქნება მათთვის.

კიდევ სამი ონლაინ შეხვედრა მოეწყო - ამჯერად ფახულანის მეორე საჯარო სკოლის (წალენჯიხის მუნიციპალიტეტი), ძევრის (თერჯოლის მუნიციპალიტეტი) და დვაბზუს (ოზურგეთის მუნიციპალიტეტი) საჯარო სკოლების კონფლიქტის მართვის ჯგუფის წევრებთან.

მოსწავლეებთან ერთად განხილულ იქნა ვიდეოგაკვეთილი თემაზე „კონფლიქტის მშვიდობიანად მოგვარების უნარები“, კონფლიქტურ სიტუაციაში ქცევის წესები...

მოსწავლეებს მიეცათ დავალება - დაწერონ, რა გავლენა იქონია მათზე პროექტმა,  კონფლიქტოლოგიის გაკვეთილებმა. კონფლიქტის მართვის ჯგუფის წევრების აქტივობა გამოჩნდება ფონდი „სოხუმის“ ფეისბუქგვერდზე   https://www.facebook.com/fsokhumi/

მიწის რეგისტრაციის საკითხი და მასთან დაკავშირებული ფასები,  სამუშაო ადგილების დაკარგვით გამოწვეული ინდივიდუალური პრობლემები, გალის ტერიტორიაზე დარჩენილი ახლობლების საკითხი, რომლებიც დღემდე ვერ ახერხებენ პენსიის აღებას - ამ და სხვა საკითხებზე ემოციურად იმსჯელეს ონლაინ შეხვედრაზე სოფელ შამგონაში (ზუგდიდის მუნიციპალიტეტი) მცხოვრებმა ქალებმა. ისინი ამ პრობლემების ადვოკატირებას ცდილობენ.

ხანგრძლივი ონლაინ მუშაობის შემდეგ დაიწყო ცოცხალი შეხვედრები. პირველი შეხვედრა ქობულეთში შედგა - ზღვის პირას. აქ პირველად მოეწყო ფსიქოლოგის შეხვედრა ქალებთან, რადგანაც ახლახან შეიქმნა ქალთა მხარდაჭერის ცენტრი. ასეთივე უჩვეულო შეხვედრები გაიმართა ხონის, წყალტუბოს, სენაკის და ხურჩის (ზუგდიდის მუნიციპალიტეტი) ქალთა მხარდაჭერის ცენტრებში. დისტანციურად, სათანადო რეგულაციების დაცვით. კიდევ ერთი შეხვედრა - ოღონდ ისევ ონლაინ - ჩატარდა ფახულანის (წალენჯიხის მუნიციპალიტეტი) ქალთა მხარდაჭერის ცენტრის ბენეფიციარებთან. ტრადიციის მიხედვით, იყო ინდივიდუალური შეხვედრებიც.

შეხვედრებზე ყველაზე აქტუალურ საკითხებზე საუბრობდნენ: სტრესთან ბრძოლა, ცვლილებებთან ადაპტირება, ოჯახური ურთიერთობების მოგვარება, რომ კამათი და კონფლიქტები ძალადობაში არ გადაიზარდოს. მუშაობდნენ ჰოლმსის შკალაზე სტრესული სიტუაციების მიხედვით. ქალებმა მადლიერება გამოხატეს ზრუნვისა და მხარდაჭერისთვის.

ორი პროექტის განხორციელება დაიწყო ხონის მუნიციპალიტეტში. განაცხადები მომზადდა პროექტის „გურიის, იმერეთისა და რაჭა-ლეჩხუმის სამოქალაქო საზოგადოების ორგანიზაციების საერთო ფორუმი სახელმწიფო მმართველობის რეფორმის საგზაო რუკის მონიტორინგისთვის“ ფარგლებში.

პროექტების სათაურიდან და მიზნებიდან ჩანს მათი მნიშვნელობა და აქტუალობა:

ა(ა)იპ ხონის განათლებისა და განვითარების ცენტრმა „ედელვაისმა“ მოამზადა ორთვიანი პროექტი „საზოგადოების ხმა თვითმმართველობაში“. პროექტი ინფორმაციას მისცემს მოსახლეობას იმის შესახებ, რა ხდება ადგილობრივ ხელისუფლებაში. იგეგმება ხონის მუნიციპალიტეტის „ცხელი ხაზის“ ამოქმედება, 12-ვე ადმინისტრაციულ ერთეულში განთავსდება საკონტაქტო ინფორმაციის შემცველი ბანერები (ვებგვერდი, ფეისბუქგვერდი, ელფოსტა, ცხელი ხაზის ნომერი).

ხონის დევნილთა საინიციატივო ჯგუფი ახორციელებს სამთვიან პროექტს „მეტი ჩართულობის უზრუნველსაყოფად ხელმისაწვდომობის გაზრდა მოქალაქეებისთვის“.  პროექტის მიხედვით, განახლდება მუნიციპალიტეტის ვებგვერდი, მუნიციპალიტეტის საქმიანობა გახდება უფრო გამჭვირვალე, მოსახლეობა აქტიურად ისარგებლებს მუნიციპალიტეტის ელექტრონული პლატფორმით, გაეცნობა ადგილობრივ პროგრამებს და გამოიყენებს მათ თავისი პრობლემების მოგვარებისთვის.

პროექტი ხორციელდება ევროკავშირის მხარდაჭერით