ფორუმ-თეატრმა ორი წარმოდგენა გამართა მაისში.

ლანჩხუთის ცენტრალურ პარკში აჩვენეს 5 სცენა. მაყურებლებისთვის უჩვეულო   იყო ასეთი ფორმით გამხელილი პრობლემები - დედა-შვილის ურთიერთობა, კონფლიქტები ოჯახში, მიგრაცია, ძალადობა...

სოფელ ზედა სიმონეთშიც (თერჯოლის მუნიციპალიტეტი) პირველად იყვნენ ახალგაზრდა მსახიობები. დისკუსიაში აქაც ინტერესით ჩაერთნენ მაყურებლები - მოსწავლეები და პედაგოგები. განსაკუთრებით აქტიურობდნენ ბიჭები.

გურიაშიც და იმერეთშიც თვალსაჩინო იყო, თუ რამდენად იმოქმედა თეატრალურმა სცენებმა მაყურებელზე და დააფიქრა ისინი.

კანონის „ქალთა მიმართ ძალადობის ან/და ოჯახში ძალადობის აღკვეთის, ძალადობის მსხვერპლთა დაცვისა და დახმარების შესახებ“ მონიტორინგის ფარგლებში მაისში კვლევის ობიექტი იყო ძალადობის მსხვერპლი 6 ქალი. ჩაღრმავებული ინტერვიუ მიზნად ისახავდა ინფორმაციის შეგროვებას: რამდენად ენდობიან ქალები სამართალდამცავ სტრუქტურებს, ეფექტურია თუ არა მათთან თანამშრომლობა უსაფრთხოების თვალსაზრისით, გამოკითხვის პროცესში რამდენად არის დაცული გენდერული ასპექტები, როგორია რეფერალურ სუბიექტებთან თანამშრომლობა.

ირკვევა, რომ მსხვერპლი ქალები ძალადობის შემთხვევაში, ძირითადად, სამართალდამცავ სტრუქტურებს მიმართავენ. აღნიშნავენ მათ პროფესიონალიზს, თუმცა მიანიშნებენ დაკითხვის პროცესში ქალი-გამომძიებლების აუცილებლობაზე.

სხვადასხვა მეთოდის გამოყენებით ჩატარდა ვორკშოპები ნიგვზიანის (ლანჩხუთის მუნიციპალიტეტი), ქვედა სიმონეთის (თერჯოლის მუნიციპალიტეტი) და ქუთაისის მე-15 საჯარო სკოლის მოსწავლეებთან.

მოსწავლეების შეფასებები ასეთია:

„შევიტყვე, როგორ მოვიქცე კონფლიქტურ სიტუაციებში“, „ხანდახან ბრაზი იმდენად მიტევს, რომ ვერ ვაკონტროლებ ემოციებს, მაგრამ ამ შეხვედრების შემდეგ უფრო მშვიდი გავხდი“, „გავიგე, რომ ცხელ გულზე არ მივიღო გადაწყვეტილება“, „ძალიან კარგია ასეთი სახის შეხვედრები. უკეთესია, უფრო ხშირად ვხვდებოდეთ ერთმანეთს“.

ტურნირი ჭადრაკში - ამ სპორტულ აქტივობას  უმასპინძლა თეკლათის (სენაკის მუნიციპალიტეტი) სკოლამ. შეჯიბრება თეკლათისა და ნოსირის სკოლებში შექმნილი საინიციატივო ჯგუფის წევრებმა ჩაატარეს. ასპარეზობის ბოლოს გამარჯვებულებს  სიმბოლური პრიზები გადაეცათ.

ამ ორი სკოლის პედაგოგებმა აღნიშნეს, რომ კარგია მსგავსი პრაქტიკის დანერგვა ახალგაზრდებში ჯანსაღი ცხოვრების პოპულარიზაციის მიზნით. ტურნირი ორგანიზებული იყო სენაკის ქალთა მხარდაჭერის ცენტრის მცირე პროექტის ფარგლებში.

მამაკაცის როლი ოჯახსა და საზოგადოებაში - ეს იყო ძირითადი სასაუბრო თემა ვაჟებთან გამართულ მორიგ შეხვედრებზე. მოზარდები საზოგადოების ნაწილად მიიჩნევენ თავს და ყურადღებას ამახვილებენ საკუთარ როლზეც... მათი აზრით, მამაკაცმა ოჯახი უნდა დაიცვას, მონაწილეობა მიიღოს ყველა პროცესში, მათ შორის - შვილების აღზრდაში. ასევეა საზოგადოებაშიც - ქალები და მამაკაცები თანაბარი უფლებებით უნდა სარგებლობდნენ და ხელი შეუწყონ ჰარმონიულ ურთიერთობებს, არაძალადობრივი გარემოს შექმნას.

მაისში შეხვედრები გაიმართა სენაკის (1 მაისი), ხონის (2 მაისი), ლანჩხუთის (3 მაისი), წყალტუბოს (6 მაისი), ფოთის (7 მაისი), ზუგდიდის (8 მაისი,) თერჯოლის (10 მაისი), ოზურგეთის (14 მაისი), ქუთაისის (15 მაისი) მუნიციპალიტეტებში. მუშაობა აქტიურად მიმდინარეობს ჯგუფებში, სადაც მხოლოდ ბიჭები არიან...

შეხვედრის თემა საკმაოდ აქტუალურია: ტოლერანტობის პრობლემა საზოგადოებაში.

ამიტომაც დიდი ინტერესით ჩაერთნენ ახალგაზრდები მუშაობაში, დისკუსიებში. დააფიქსირეს თავიანთი აზრი და ისაუბრეს პრობლემებზე, რომელთაც ყოველდღიურობაში აწყდებიან.

ახალგაზრდული კლუბის საინფორმაციო შეხვედრები ჩატარდა გურიანთის (ოზურგეთის მუნიციპალიტეტი), ნიგვზიანის (ლანჩხუთის მუნიციპალიტეტი) და ზედა სიმონეთის (თერჯოლის მუნიციპალიტეტი) საჯარო სკოლებში.

სოფელ გვიშტიბის (წყალტუბოს მუნიციპალიტეტი), სოფელ ორულუს (ზუგდიდის მუნიციპალიტეტი) და ოზურგეთის მე-4 საჯარო სკოლების მოსწავლეებმა ფონდი „სოხუმის“ კონფლიქტოლოგთან ერთად კონფლიქტურ სიტუაციებში ქცევის სტილზე იმსჯელეს. თვალსაჩინო პლაკატების, კონკრეტული მაგალითების მეშვეობით მათ გააანალიზეს სიტუაციები, შეიძინეს ახალი უნარ-ჩვევები.

 „გავიგე, როგორ შეიძლება კონფლიქტის მშვიდობიანი გზით მოგვარება,“ „გავეცანი „ოქროს წესს“, „მინდა, რომ მუშაობა გაგრძელდეს“, - ასე შეაფასეს  ვორკშოპები სხვადასხვა სკოლის მოსწავლეებმა.

კიდევ სამი საინფორმაციო შეხვედრა გაიმართა ახალგაზრდულ კლუბებში. ამჯერად - წყალტუბოს კერძო სკოლა „ოცნებაში“, ქუთაისის 33-ე და სოფელ ერგეტას (ზუგდიდის მუნიციპალიტეტი) საჯარო სკოლებში.

შეხვედრის თემამ - ტოლერანტობა - გააერთიანა მონაწილეები, თუმცა ყველა ჯგუფი განსხვავდებოდა ერთმანეთისაგან. რაც განსაკუთრებით უნდა ითქვას, კლუბების წევრ ახალგაზრდებს არ გააჩნიათ აგრესია. მათ გამოავლინეს დიდი ინტერესი თემის მიმართ. აღნიშნეს, რომ ტოლერანტობის დეფიციტი კონფლიქტებისა და ძალადობის საფუძველია. ამიტომ ასეთ შეხვედრებს და დისკუსიებს დიდი მნიშვნელობა აქვს.

კონფლიქტურ სიტუაციებში ქცევის სტილი და კონფლიქტის მშვიდობიანად მოგვარების უნარები - ეს იყო მოსწავლეებთან ჩატარებული ვორკშოპის თემა. სხვადასხვა მეთოდის გამოყენებამ მოსწავლეებისთვის თემა კიდევ უფრო საინტერესო გახადა.

ვორკშოპები ჩატარდა ქალაქ სენაკის კერძო სკოლა-ლიცეუმში, სოფელ კონტუათის (ხონის მუნიციპალიტეტი) და ქალაქ ფოთის №1 საჯარო სკოლებში.

მონაწილეებმა ბევრი რამ გაიგეს, მათ შორის: რას ნიშნავს ადამიანზე იარლიყის მიკვრა, ემოციების კონტროლის მნიშვნელობა, კონფლიქტის ესკალაციის სტადიები, პრობლემის გადაჭრა მოლაპარაკების გზით.

მათ აღნიშნეს, რომ ეს ცოდნა და უნარ-ჩვევები არა მარტო თვითონ გამოადგებათ, არამედ თანატოლებსაც გაუზიარებენ.

სენაკის (სოფელ თეკლათში), ხონის (სოფელ ნახახულევში) და ფოთის ახალგაზრდულ კლუბებში გაიმართა შეხვედრები ტოლერანტობის თემაზე.

მონაწილეთა ინტერესი დიდი იყო. ეს გამოიხატა აქტიურ დისკუსიებში, როლურ თამაშებში. ყველას ჰქონდა საკუთარი აზრის გამოთქმის საშუალება. კლუბის წევრები ამ თემაზე შეხვედრების ჩატარებას აპირებენ თანატოლებთან.