ფონდი „სოხუმის“, ულტიპროფილური კლინიკა „უნიქალ მედის“ და ხონის დევნილთა საინიციატივო ჯგუფის მონაწილეობით, 31 მარტს ხონში დევნილთა დასახლებაში კლინიკა „უნიქალ მედიმ“ უფასო სამედიცინო აქცია ჩაატარა. აქციის მონაწილეებს და „უნიქალ მედის“ დამფუძნებლებს შეხვდა ქალაქ ხონის მერი ლადო ჯურხაძე.

აქციაში ათობით დევნილმა მიიღო სამედიცინო მომსახურება - ექიმების კონსულტაცია თუ ექოსკოპიური კვლევა.

28-30 მარტს ფონდი „სოხუმის“ ოფისში ჩატარდა ტრენინგი თემაზე „პროექტის წერა და დიზაინი“. მასში მონაწილეობდნენ თერჯოლის, ხონის და წყალტუბოს მუნიციპალიტეტის მერიის წარმომადგენლები, ქუთაისის, ზუგდიდის და წყალტუბოს ქალთა მხარდაჭერის ცენტრის მობილიზატორები. ტრენინგი ორგანიზებული იყო ფონდი „სოხუმის“ მიერ ხონის, წყალტუბოს და თერჯოლის მერიების თანადაფინანსებით. სამდღიანი მუშაობის შედეგად თითოეულმა მონაწილემ შეიმუშავა ინდივიდულური პროექტი. ტრენინგზე მიღებული ცოდნა დაეხმარება მონაწილეებს, მოიზიდონ დამატებითი ფინანსები პროექტების განხორციელებისთვის.

ფონდი „სოხუმი“ პროექტის „ვიშეგრადის (V4) ქვეყნების გამოცდილების შესწავლა ადგილობრივ დონეზე თანაბარი, ინკლუზიური და დემოკრატიული მმართველობის ადვოკატირებისათვის“ ფარგლებში აგრძელებს საინფორმაციო კამპანიას.

ტელეკომპანია „რიონის“ ეთერში გასული გადაცემის მიზანია საზოგადოების ინფორმირება პროექტის მსვლელობასა და მიღწეულ შედეგებზე.

ტელეგადაცემაში მონაწილეობდნენ: მერი გელაშვილი (პროექტის ერთ-ერთი შემსრულებელი), ლარისა შენგელია, ხათუნა გოგუა (ფონდი „სოხუმი“), ანჟელა ჩიხლაძე (მეწარმე ქალთა ფონდი) და ფიქრია ხაჭაპურიძე (ქუთაისის მუნიციპალიტეტის მერიის სოციალურ საკითხთა სამსახურის უფროსის მოადგილე, გენდერული თანასწორობის საბჭოს წევრი).

სტუდიაში შეკრებილებმა გამოცდილება გაუზიარეს მაყურებელს შემდეგ საკითხებზე: დეცენტრალიზაცია და ადგილობრივი თვითმმართველობა, მონაწილეობითი ბიუჯეტირება - როგორც საზოგადოებისა და თვითმმართველობის კიდევ უფრო დაახლოების ერთ-ერთი საშუალება.

პროექტი ხორციელდება ვიშეგრადის ფონდის მხარდაჭერით

27 მარტს ფონდი „სოხუმის“ წარმომადგენლებმა თერჯოლის მუნიციპალიტეტის საკრებულოში საინფორმაციო შეხვედრა გამართეს ადგილობრივი აქტიური სამოქალაქო ჯგუფების და ტყიბულისა და ბაღდათის გენდერულ პოლიტიკაზე პასუხისმგებელი პირების მონაწილეობით.

შეხვედრის მთავარი საკითხი იყო ფონდი „სოხუმის“ ადგილობრივი გენდერული სტრატეგიის დოკუმენტის ორიენტირები, რომელიც პროექტის დასასრულს წარედგინება საზოგადოებას, ადგილობრივ თვითმმართველობებს. შეხვედრის მონაწილეებმა  ფონდი „სოხუმის“ დაკვეთით ჩატარებული კვლევებისა და პროექტის  ფარგლებში ჩატარებული საქმიანობის  შესახებაც მოისმინეს ინფორმაცია. ისაუბრეს ადგილობრივ გენდერულ პოლიტიკაზე, პერსპექტივებსა და გამოწვევებზე. ყურადღება გამახვილდა მუნიციპალიტეტების გენდერულ პოლიტიკასა და გამოცდილებაზე, გენდერული თანასწორობის საბჭოების როლსა და ადგილობრივი თვითმმართველობის ჩართულობაზე. 

„მოხარული ვარ, რომ თერჯოლა ადგილობრივ გენდერულ სტრატეგიაზე დისკუსიას მასპინძლობს. მზად ვართ, აქტიურად ვიმუშაოთ გენდერული თანასწორობის საბჭოს ჩამოყალიბებისთვის,“ - აღნიშნა საკრებულოს თავმჯდომარემ ნინო ჯანელიძემ.

შეხვედრა გაიმართა პროექტის „ვიშეგრადის ქვეყნების გამოცდილების შესწავლა ადგილობრივ დონეზე თანაბარი, ინკლუზიური და დემოკრატიული მმართველობის ადვოკატირებისათვის“ ფარგლებში

პროექტი ხორციელდება ვიშეგრადის ფონდის მხარდაჭერით

მარტში ფსიქოლოგის საკონსულტაციო შეხვედრები გაიმართა 9 კოლექტიურ ცენტრში, დევნილთა კომპაქტურ დასახლებებში. მათში მონაწილეობა მიიღო 55 ბენეფიციარმა.

როგორც ყოველთვის, შეხვედრების შემდეგ იყო ინდივიდუალური კონსულტაციებიც. ინდივიდუალური რჩევები მიიღო 8 ბენეფიციარმა. ფსიქოლოგმა იმუშავა ერთ საოჯახო წყვილთან, 9 ადამიანთან - ოჯახში კრიზისულ ურთიერთობებზე. იყო 8 სატელეფონო ზარი და 4 კონსულტაცია სკაიპით. ყოველივე ეს ხელს უწყობს ბენეფიციართა ფსიქორეაბილიტაციას.

27 საინფორმაციო შეხვედრა ჩაატარეს ქალთა მხარდაჭერის ცენტრების მობილიზატორებმა ქუთაისის, ხონის, წყალტუბოს, თერჯოლის, სენაკის, ფოთის, ოზურგეთის, ლანჩხუთის და ზუგდიდის მუნიციპალიტეტებში - დევნილთა დასახლებებში, სოფლებსა და ქალაქებში. შეხვედრების თემა იყო გენდერული თანასწორობა, ქალთა უფლებები და ოჯახური ძალადობა. საინფორმაციო შეხვედრები ქალთა სოლიდარობის კვირეულს მიეძღვნა.

გრძელდება ხონის ქალთა მხარდაჭერის ცენტრის მცირე პროექტი. მარტში პროექტის  ფარგლებში ჩატარდა საინფორმაციო შეხვედრები მერის წარმომადგენლებთან ნახახულევსა და გოჩა ჯიხაიშში. პროექტი მიზნად ისახავს მოსწავლეების ინფორმირებულობას კონფლიქტებისა და ბულინგის პრევენციისათვის.

სენაკის ქალთა მხარდაჭერის ცენტრის მცირე პროექტის ფარგლებში ჩატარდა საინფორმაციო შეხვედრები სოფელ თეკლათის სამედიცინო პერსონალთან, სკოლის დირექტორთან და პედაგოგებთან. მონაწილეებს მიეწოდათ ინფორმაცია პროექტის მიზანსა და აქტივობებზე. შეხვედრების დროს განსაკუთრებული ყურადღება მიექცა ქალთა მიმართ და ოჯახში ძალადობის პრობლემას და ყოველი ჩვენგანის როლს პრევენციის პროცესში.

ფონდი „სოხუმის“ იურისტებმა მარტში 6 ინდივიდუალური კონსულტაცია ჩაატარეს. კონსულტაციები, ძირითადად, ეხებოდა ოჯახში ძალადობის და ოჯახურ კონფლიქტებს. მომართვა მოხდა ოზურგეთის, ლანჩხუთის, სენაკის და ქუთაისის ქალთა მხარდაჭერის ცენტრებიდან.

ყველაზე მნიშვნელოვანი ის არის, რომ ძალადობის ერთ მსხვერპლს დახმარება გაეწია  მსხვერპლის სტატუსის მოპოვებაში, რასაც შემდგომ სასამართლო პროცესზე  გამოიყენებს.

ფონდი „სოხუმის“ მობილიზატორები აქტიურად არიან ჩართულნი მუნიციპალიტეტის ცხოვრებაში. თვის განმავლობაში ისინი ესწრებოდნენ საკრებულოს სხდომებს, ეცნობოდნენ მუნიციპალიტეტში მიმდინარე სიახლეებს და შემდეგ აცნობდნენ ქალთა მხარდაჭერის ცენტრის ბენეფიციარებს. მათ 9 ქალაქში (ქუთაისი, წყალტუბო, ხონი, თერჯოლა, სენაკი, ფოთი, ზუგდიდი, ოზურგეთი და ლანჩხუთი) საინფორმაციო შეხვედრები ჩაატარეს ადგილობრივი თვითმმართველობის სხვადასხვა სამსახურის წარმომადგენლებთან და ესაუბრნენ ცენტრის სერვისებსა და აქტივობებზე.