15-16 აპრილს გაიმართა ფონდი „სოხუმის“ წარმომადგენლების საკოორდინაციო შეხვედრა პარტნიორი ორგანიზაციის წარმომადგენლებთან პროექტის „ნაადრევი კონფლიქტების პრევენცია - თეორია და პრაქტიკა“ ფარგლებში.

შეხვედრაში მონაწილეობა მიიღო დონორი ორგანიზაციის - Kvinna till Kvinna წარმომადგენელმა. განხილულ იქნა პროექტის შესრულებასთან დაკავშირებული საკითხები.

ფონდი „სოხუმის“ ქალთა  მხარდაჭერის ცენტრის იურიდიული მომსახურებით აპრილში სამმა ადამიანმა ისარგებლა. ერთმა ოზურგეთში  და ორმა - ქუთაისში.

მომართვა იყო ოჯახურ დავებსა და ოჯახური ძალადობის შემთხვევებზე. იურისტ კონსულტანტებმა მოამზადეს შესაბამისი დოკუმენტები და გაუწიეს კონსულტაციები. ისინი რეგულარულ მონიტორინგს აწარმოებენ ყველა შემთხვევაზე.

თანასწორობა და ძალადობა. კავშირი მათ შორის. რა ასაზრდოებს ძალადობას? რა მნიშვნელობა აქვს პრევენციულ მექანიზმებს? ამ საკითხებზე გაიმართა დისკუსიები ახალგაზრდული კლუბების საინფორმაციო შეხვედრებზე ნახახულევში (ხონის მუნიციპალიტეტი), ღვანკითში (თერჯოლის მუნიციპალიტეტი), ცხუნკურში (წყალტუბოს მუნიციპალიტეტი), ორსანტიაში (ზუგდიდის მუნიციპალიტეტი), ლესაში (ლანჩხუთის მუნიციპალიტეტი). დიდი იყო ინტერესი მოსწავლეების მხრიდან. აღმოჩნდა, რომ ღვანკითის სკოლის სამოქალაქო კლუბი „ნერგები“ საკმაოდ აქტიურია ამ კუთხით - მისმა წევრებმა ვიდეორგოლი მოამზადეს ბულინგზე და კონკურსში მეორე ადგილი დაიკავეს.

  

 

ფოთის, წყალტუბოსა და თერჯოლის სკოლებში ვაჟებთან ჩატარებული შეხვედრების დიდი ნაწილი დაეთმო საუბარს მამაკაცის როლზე ოჯახსა და  საზოგადოებაში. მონაწილეებმა იმსჯელეს, რამდენად კარგი დამცველები და პარტნიორები არიან მამაკაცები. მათ სხვადასხვა როლიც შეითავსეს, რომლებიც ეხებოდა კონფლიქტურ სიტუაციებს და მათ მოგვარებას.

დასავლეთ საქართველოს 9 მუნიციპალიტეტში მოქმედ ქალთა მხარდაჭერის ცენტრებში ყოველთვიურად ტარდება ძალადობის მონიტორინგი. შემდგომ ხდება მიღებული ინფორმაციის გადამისამართება ფონდი „სოხუმის“ იურისტთან და ფსიქოლოგთან.

აპრილში იდენტიფიცირებული იყო  ძალადობის 11 ქეისი - ძირითადად, ფსიქოლოგიური და ეკონომიკური ძალადობა, აგრეთვე ფიზიკური ძალადობის 2 შემთხვევა. 1 ქალს მიენიჭა ოჯახში ძალადობის მსხვერპლის სტატუსი, სამმა ქალმა მუშაობა განაგრძო ფსიქოლოგთან და ამდენივემ - იურისტთან.

25 აპრილს ტელეკომპანია „რიონის“ ეთერში ფონდი „სოხუმის“ მიერ ორგანიზებული გადაცემა გაიმართა,  რომელსაც ესწრებოდნენ პროექტის მონაწილეები, ბაღდათის და

ქუთაისის თვითმმართველობის წარმომადგენლები, გენდერული საბჭოების წევრები.

გადაცემის თემა იყო „გენდერული მიდგომები და გენდერული დღის წესრიგი მუნიციპალურ პოლიტიკაში“. საუბარი, ძირითადად, შეეხო ფონდი „სოხუმის“ მიერ შემუშავებული ადგილობრივი გენდერული პოლიტიკის სტრატეგიულ გზამკვლევს. ადგილობრივი თვითმმართველობის წარმომადგენლების პოზიცია ასეთია: ეს დოკუმენტი ძალიან სასარგებლოა, რადგან შეიცავს მეთოდოლოგიასაც და პრაქტიკულ რჩევებსაც, როგორ უნდა დაიწყოს სამუშაო, რა კითხვები უნდა დაუსვან საკუთარ თავს ადგილობრივმა მოხელეებმა, რა საკითხებს მიაქციონ მეტი ყურადღება, ვისთან ითანამშრომლონ.

აქცენტი გაკეთდა ბაღდათში გამართულ მრგვალ მაგიდაზე, ფონდ „სოხუმსა“ და ბაღდათის მუნიციპალიტეტს შორის გაფორმებულ მემორანდუმზე და თანამშრომლობის სამომავლო პერსპექტივებზე.

ტელეგადაცემა გაიმართა პროექტის „ვიშეგრადის ქვეყნების გამოცდილების შესწავლა ადგილობრივ დონეზე თანაბარი, ინკლუზიური და დემოკრატიული მმართველობის ადვოკატირებისთვის“ ფარგლებში.

პროექტი ხორციელდება ვიშეგრადის ფონდის მხარდაჭერით

 

  

„კანონის ქალთა მიმართ ძალადობის ან/და ოჯახში ძალადობის აღკვეთის, ძალადობის მსხვერპლთა დაცვისა და დახმარების შესახებ“ მონიტორიგის ფარგლებში აპრილში ჩატარდა შეხვედრები სხვადასხვა არასამეწარმეო იურიდიული პირების წარმომადგენლებთან ლანჩხუთში, წყალტუბოში, ფოთსა და თერჯოლაში. შეხვედრების მიზანია - ადგილობრივი ხელისუფლების ჩართულობის გარკვევა კანონის იმპლემენტაციაში (ძალადობის აღკვეთა, მსხვერპლის დახმარება, პრევენცია). გამოიკვეთა ამ სეგმენტის კონკრეტული საჭიროებები პრობლემაზე რეაგირებისთვის.  

„ჰარმონიული გარემო პატარებისათვის“ - ასე ჰქვია წყალტუბოს ქალთა მხარდაჭერის ცენტრის მცირე პროექტს, რომელიც ფონდი „სოხუმის“ და წყალტუბოს მუნიციპალიტეტის გენდერული თანასწორობის საბჭოს მხარდაჭერით ხორციელდება. 24 აპრილს პროექტით დაგეგმილი მესამე ტრენინგი ჩატარდა. მასში მონაწილეობდნენ წყალტუბოს მუნიციპალიტეტის საყულიის, გეგუთის, პატრიკეთის, ტყაჩირის, ოფშკვითის, ახალი საყულიის, გუმბრინის, ოფურჩხეთის, რიონისა და ცხუნკურის საბავშვო ბაღების მენეჯერები და პედაგოგები. ისინი გაეცნენ ინფორმაციებს გენდერზე, ძალადობაზე, ბულინგზე, გენდერულ სტერეოტიპებზე, პრევენციულ მექანიზმებზე. და, როგორც აღნიშნეს, ეს ცვლილებების დასაწყისია მათ აზროვნებაში, მიდგომებში, მოქმედებაში…

ფონდი „სოხუმის“ ქალთა მხარდაჭერის ცხრა ცენტრმა (ქუთაისი, წყალტუბო, ხონი, თერჯოლა, სენაკი, ფოთი, ზუგდიდი, ოზურგეთი, ლანჩხუთი) თავის მუნიციპალიტეტში ჩაატარა საინფორმაციო შეხვედრები ქალაქებისა და სოფლების მოსახლეობასთან, ქალებთან და ახალგაზრდებთან, დევნილთა კოლექტიურ ცენტრებში, საბავშვო ბაღის და სკოლის პედაგოგებთან, ადგილობრივი თვითმმართველობის წარმომადგენლებთან და გენდერული თანასწორობის საბჭოს წევრებთან.

შეხვედრებზე განხილული იყო შემდეგი თემები: კანონი ქალთა მიმართ/ოჯახში ძალადობის წინააღმდეგ; შემაკავებელი ორდერი, როგორც დამცავი მექანიზმი; ეროვნული სამოქმედო გეგმა; ძალადობის გავლენა ბავშვის ფსიქოემოციურ მდგომარეობაზე; პრევენციული ღონისძიებების აუცილებლობა.

ასეთი შეხვედრების შედეგად იზრდება მიმართვიანობა ქალთა მხარდაჭერის ცენტრებში და მოთხოვნა ფონდი „სოხუმის“ უფასო სერვისებზე - ძალადობის მსხვერპლის მხარდაჭერის კუთხით.

აპრილი აქტიური თვე იყო ფონდი „სოხუმის“ ფსიქოლოგის მუშაობაში. სხვადასხვა პრობლემაზე ინდივიდუალური ფსიქოთერაპიული კონსულტირება მიიღო ექვმა ადამიანმა, ხოლო 14-მა  – ტელეფონითა და სკაიპით. ფსიქოთერაპია გაიარეს ოჯახურმა წყვილებმა, იყო ასევე მუშაობა ტრავმებთან დაკავშირებით.