- უკრაინელი ქალის ბავშვი ფოთიდან ქუთაისში ჩამოიყვანეს საავადმყოფოში. სანამ პატარა რეანიმაციაში იყო, დედა ჩვენს სარეაბილიტაციო ცენტრში ცხოვრობდა. ის დღეები ორივეზე ვზრუნავდით - დედაზეც და ბავშვზეც. ვიყიდეთ ყველაფერი, რაც ბავშვს დამატებით სჭირდებოდა: პამპერსი, საკვები, წამალი. ახლა ის უკვე გამოწერეს და თავს კარგად გრძნობს, - ამბობს სოფი წირღვავა, უკრაინელებთან მუშაობის ასისტენტი.
ქალთა ფონდმა „სოხუმმა“ კიდევ რამდენიმე ადამიანს გაუწია ასეთი სახის დახმარება: ორ ონკოდაავადებულს აუნაზღაურდა კვლევების თანხიდან 375 და 370 ლარი. ერთ ქალს დავეხმარეთ ქიმიოთერაპიის რეფერალური დაფინანსების მიღებაში.
კვლავინდებურად გრძელდება დახმარება ბინის დაქირავების (გაიცა 19 ოჯახზე) და კომუნალური გადასახადების კუთხით (ეს დახმარება მიიღო 5-მა ოჯახმა). განსაკუთრებული ყურადღება ენიჭება პროდუქტების გაცემას. ამ თვეში 20-მა ოჯახმა მიიღო სურსათი და ჰიგიენური საშუალებები.
ჩვენს საინფორმაციო ბაზას თებერვალში 15 ადამიანი დაემატა და უკვე 467 ადამიანია.
მონიტორინგის ჯგუფი შეისწავლის ადგილობრივი თვითმმართველობის მიერ განხორციელებული ქალთა მიმართ ძალადობის ან/და ოჯახში ძალადობის მსხვერპლთა გამოვლენის, მათი დაცვის, დახმარებისა და რეაბილიტაციის პრევენციული ღონისძიებების (ინსტრუმენტების) ეფექტიანობას.
თვითმმართველობის მუშაობის ეფექტიანობის გაზრდისთვის შემუშავდება რეკომენდაციები, რომლებიც განსაზღვრავს საჭირო სტრატეგიებს და ახალ მიდგომებს პრევენციული მექანიზმების გასაძლიერებლად.
თებერვალში ჩატარდა 15 ჩაღრმავებული ინტერვიუ და 3 ფოკუს-ჯგუფი პედაგოგებთან, ქალთა მხარდაჭერის ცენტრების მობილიზატორებთან, თვითმმართველობის წარმომადგენლებთან, ძალადობის მსხვერპლებთან და რეფერირების სხვადასხვა სუბიექტთან ადგილობრივ დონეზე.
პროექტი ხორციელდება ორგანიზაცია Brot für die Welt - Evangelischer
Entwicklungsdienst მხარდაჭერით (გერმანია)
საპროექტო აქტივობების ეფექტიანობის და მიღწევების შეფასებისთვის მონიტორინგის ჯგუფი აქტიურად ატარებს შიდა მონიტორინგს. ასევე მოხდება მიღებული გაკვეთილების იდენტიფიცირება, დასკვნების გამოტანა და შემუშავდება რეკომენდაციები საქმიანობის გაუმჯობესების მიზნით.
ონლიან ანკეტირებამ 10 სამიზნე მუნციპალიტეტში მოიცვა პროექტის პირდაპირი ბენეფიციარები. თვისებრივი ინფორმაციის მიღების მიზნით კი ჩატარდა 6 ჩაღმავებული ინტერვიუ და 4 ფოკუს-ჯგუფი, იყვნენ სამიზნე ქალაქების ინტერესთა ჯგუფების წარმომადგენლების მონაწილეობით.
მონიტორინგში ჩართულმა მონაწილეებმა ხაზი გაუსვეს ვებგვერდის https://sosfsokhumi.ge/ მნიშვნელობას. აღინიშნა, რომ ეს სერიოზული საინფორმაციო ბაზაა ოჯახში ძალადობის კუთხით და პრიორიტეტულად იქნა მიჩნეული მისი პოპულარიზაციის მასშტაბების გაზრდა.
პროექტი ხორციელდება გენდერული თანასწორობის ფონდის
მხარდაჭერით (კანადა)
ძვირფასო უკრაინელო ქალებო!
ერთი წელი გავიდა უკრაინაში ომის დაწყებიდან. ქალთა ფონდი „სოხუმი“ ისევ უდიდეს სოლიდარობასა და მხარდაჭერას უცხადებს უკრაინელ ქალებს და მათ ოჯახებს!
ამ ერთი წლის განმავლობაში, ჩვენ, რითაც შეგვეძლო ვეხმარებოდით და კვლავაც ვეხმარებით უკრაინას და ამ ქვეყნიდან ლტოლვილებს:
პირველ დღეებში ჩვენ შევაგროვეთ 10 000 ლარი და ამანათები გავაგზავნეთ.
8 მარტს ჩავატარეთ სოლიდარობის აქციები ქუთაისში და სხვა მუნიციპალიტეტებში.
გადავიღეთ ვიდეორგოლები.
დავეხმარეთ ოკუპირებული მელიტოპოლის ქალებს - გავუგზავნეთ მათ 55 800 გრივნა და მოხალისე ქალებმა თანაქალაქელებისთვის შეიძინეს საკვები და წამლები.
აპრილში, როცა უკრაინიდან პირველი ლტოლვილები გამოჩნდნენ საქართველოში, შევქმენით მხარდაჭერის ჯგუფი და დავიწყეთ მათი დახმარება.
სენაკის ქალთა საინიციატივო ჯგუფის წევრები აქტიურად აგრძელებენ იგპ თემებში შერჩეული პრობლემების ადვოკატირებას. ამ მიმართულებით გარკვეული პროგრესი უკვე არსებობს. მოგვარებულ პრობლემათა ჩამონათვალში გაჩნდა ახალი საკითხებიც - მაგალითად, საცხოვრებელი სახლების გადახურვა. პრობლემის მოგვარებაში ადგილობრივი თვითმმართველობის როლიც იკვეთება.
ქალთა ჯგუფის წევრები მონიტორინგს უწევენ ადვოკატირებულ საკითხებს, ინფორმაციებს ერთმანეთს უზიარებენ და სამოქმედო გეგმის შესაბამისად მოქმედებენ.
პროექტი ხორციელდება
გაეროს ქალთა ორგანიზაციის მხარდაჭერით
ფორუმ-თეატრი აქტიურად არის ჩართული ახალი წარმოდგენების სარეპეტიციო პროცესში. თებერვალში გამოსვლები გაიმართა ქუთაისში, ხონსა და სენაკში. სკოლის მოსწავლეებმა დიდი ინტერესით და აღფრთოვანებით ნახეს ყველა სცენა. იყო აქტიური ჩართულობა და დისკუსიები.
გრძელდება მუშაობა ფორუმ-თეატრის ახალ წარმოდგენებზე, ასევე მოხალისე მსახიობთა გუნდთან. დაიგეგმა ახალი ვიზიტები დასავლეთ საქართველოს მუნიციპალიტეტებში.
პროექტი ხორციელდება ორგანიზაცია Brot für die Welt - Evangelischer
Entwicklungsdienst მხარდაჭერით (გერმანია)
სენაკის ქალთა მხარდაჭერის ცენტრის მობილიზატორის, მზია ბიგვავას ინიციატივით ჩატარდა ორი ტრენინგი თემაზე „პოზიტიური მშობლობა“.
ტრენინგი ქალთა ფონდი „სოხუმის“ მიერ 10 მუნიციპალიტეტში ჩატარებული კვლევის - „ბავშვთა უფლებების დაცვის და მხარდაჭერის განყოფილებების ეფექტიანობის შეფასება და არსებული გამოწვევები“ - შედეგად გამოვლენილი საჭიროებების მიხედვით დაიგეგმა და მარტოხელა, ძალადობის მსხვერპლი და მრავალშვილიანი მშობლების აუდიტორია მოიცვა.
პოზიტიური მშობლობა ისეთი ქცევაა, როცა მშობელი შვილის მიმართ უპირობო სიყვარულს, ზრუნვას, მხარდაჭერას და პატივისცემას გამოხატავს.
როგორ უნდა განაწილდეს ოჯახის საჭიროებებზე თანხა ყველას ინტერესის გათვალისწინებით და ბავშვზე ძალადობის ან მისი უგულებელყოფის გარეშე - ამ და კიდევ ბევრ საჭირო თემაზე მიიღეს ინფორმაცია ტრენინგზე, რომელიც ქალთა ფონდ „სოხუმის“ ერთ-ერთი მნიშვნელოვანი აქტივობა იყო, როგორც სარეაბილიტაციო ცენტრის ბენეფიციარებთან უწყვეტი და განგრძობითი კავშირი.
პროექტი ხორციელდება ორგანიზაცია Brot für die Welt - Evangelischer
Entwicklungsdienst მხარდაჭერით (გერმანია)
ჩატარდა საინფორმაციო შეხვედრა ზუგდიდის ქალთა საინიციატივო ჯგუფის წევრებთან. ონლაინ ფორმატის მიუხედავად, შეხვედრა აქტიურად და მონაწილეთა მხრიდან გამოვლენილი ინტერესის ფონზე ჩატარდა.
მონაწილეებმა შეაფასეს ადვოკატირების პროცესის დინამიკა. განიხილეს, თუ რა საკითხები აისახა მუნიციპალიტეტის ბიუჯეტში და რა საჭიროებს დამატებით სამუშაოებს.
პროექტი ხორციელდება
გაეროს ქალთა ორგანიზაციის მხარდაჭერით
„ომით დაზარალებული ადამიანების მხარდაჭერისა და დახმარების საუკეთესო პრაქტიკა“ - ეს იყო ქალთა ფონდი „სოხუმის“ თანამშრომლებისთვის გამართული ტრენინგის თემა.
ტრენერმა ქეთი ვასაძემ მონაწილეებს მიაწოდა ინფორმაცია ევროპის საბჭოს მიერ შემუშავებული პროგრამის შესახებ და მისცა საშუალება, პრაქტიკული სავარჯიშოების საშუალებით ემსჯელათ გარკვეულ იდეებზე, ქმედებებსა და ადვოკატირების გზებზე, დაინტერესებული მხარეების ჩართულობით, რაც ხელს შეუწყობს ომით დაზარალებული ადამიანების უფრო ეფექტიან მხარდაჭერას.
მოყვანილ იქნა უამრავი პოზიტიური მაგალითი, თუ რა საქმიანობას ეწევა ფონდი „სოხუმი“ ამ ეტაპზე უკრაინელი ლტოლვილების დახმარების კუთხით და რა გარკვეული ნაბიჯების გადადგმა არის საჭირო სამომავლოდ, რათა მათ გაუადვილდეთ დასაქმება და ინტეგრაცია ადგილობრივ თემში.
პროექტი ხორციელდება გენდერული თანასწორობის ფონდის
მხარდაჭერით (კანადა)
ძალადობის ქეისების სწორი მართვა ქალთა მხარდაჭერის ცენტრების მნიშვნელოვანი მისიაა, რადგან ბენეფიციარებთან ნდობა იზრდება და ხელს უწყობს მომართვიანობის გაზრდას.
სენაკის, თერჯოლის და ჩოხატაურის ქალთა მხარდაჭერის ცენტრებში იდენტიფიცირებული ქეისების ეფექტიანი მართვის მიზნით, უკვე მოხდა მათი ანალიზი და შეფასება. ორი ბენეფიციარი გადამისამართდა სარეაბილიტაციო ცენტრში და ფსიქორეაბილიტაციის კურსს გადის, ხოლო დანარჩენებთან ფსიქოლოგი ინდივიდუალურად განაგრძობს მუშაობას.
პროექტი ხორციელდება ორგანიზაცია Brot für die Welt - Evangelischer
Entwicklungsdienst მხარდაჭერით (გერმანია)