შეხვედრები (663)
შეხვედრები – ამ კატეგორიაში განთავსებულია ცნობები საინფორმაციო შეხვედრების შესახებ ფონდი „სოხუმის“ პროექტების ფარგლებში - შეხვედრები ბენეფიციარებთან, სახელმწიფო სტრუქტურების, ადგილობრივი და საერთაშორისო არასამთავრობო ორგანიზაციების წარმომადგენლებთან.
ქუთაისში, ქალთა სამიზნე ჯგუფთან გაიმართა ვორქშოპი თემაზე - „ადგილობრივ თემებში ოჯახში ქალთა მიმართ ძალადობის იდენტიფიცირება, მხარდაჭერა და რეაგირება“. შეხვედრას ესწრებოდა 10 ქალი და მას უძღვებოდა ჯგუფის ლიდერი ქალი.
ვორქშოპის ფარგლებში მონაწილეებმა დეტალურად განიხილეს ძალადობის სხვადასხვა ფორმა, მსხვერპლის ამოცნობის ნიშნები და ის გზები, როგორ შეიძლება თემში მხარდაჭერისა და რეაგირების მექანიზმების გაძლიერება. განსაკუთრებული ყურადღება დაეთმო იმას, რომ ძალადობაზე დუმილი არ უნდა გახდეს ნორმა და საზოგადოების პასუხისმგებლობაა, არ დარჩეს გულგრილი სხვისი ოჯახის პრობლემის მიმართ.
მონაწილეებმა შეხვედრა შეაფასეს როგორც ახალი, საჭირო და პრაქტიკული ცოდნის წყარო. მათი თქმით, მიღებული ინფორმაცია დაეხმარებათ უკეთ ამოიცნონ ძალადობის ნიშნები, სწორად იმოქმედონ მსგავს შემთხვევებში და საჭიროების შემთხვევაში მიმართონ შესაბამის მხარდაჭერის მექანიზმებს.
შეხვედრამ კიდევ ერთხელ გამოკვეთა, რომ ინფორმირებული ქალები და გაძლიერებული თემები ძალადობის პრევენციის მნიშვნელოვანი საფუძველია.
პროექტი ხორციელდება CISU-ის მხარდაჭერით
ზუგდიდის მუნიციპალიტეტში გაიმართა ვორკშოპი ქალთა ჯგუფთან თემაზე: - „ადგილობრივ თემებში ოჯახში ქალთა მიმართ ძალადობის იდენტიფიცირება, მხარდაჭერა და რეაგირება“.
შეხვედრა ინტერაქტიულ ფორმატში წარიმართა და მონაწილეებს შესაძლებლობა ჰქონდათ სიღრმისეულად განეხილათ ძალადობის სხვადასხვა ფორმები, ამოცნობის ნიშნები და რეაგირების მექანიზმები. განსაკუთრებული ყურადღება დაეთმო ტექნოლოგიების გამოყენებით ჩადენილ ძალადობას, იმ ახალ გამოწვევებს, რომლებიც თანამედროვე ციფრულ გარემოში ქალების უსაფრთხოებას უკავშირდება.
დისკუსიისას გამოიკვეთა, რომ ძალადობის წინააღმდეგ გადაწყვეტილების მიღება ხშირად რთულია, თუმცა ძალადობაზე დაფუძნებულ ურთიერთობაში ქალის გაძლიერება და მხარდაჭერა კრიტიკულად მნიშვნელოვანია. ასევე ხაზგასმით აღინიშნა, რომ ბავშვები არ უნდა იზრდებოდნენ ძალადობრივ გარემოში.
მონაწილეებმა ისაუბრეს ძალადობის იდენტიფიცირების სირთულეებზეც და აღნიშნეს, რომ მიუხედავად იმისა, რომ ძალადობა საბოლოოდ ხილული ხდება, ხშირ შემთხვევაში დახმარება დაგვიანებულია. სწორედ ამიტომ, პრევენცია, ინფორმირებულობა და დროული რეაგირება განსაკუთრებულ მნიშვნელობას იძენს.
შეხვედრის მონაწილეთა შეფასებით, მსგავსი აქტივობები მათთვის იმედისა და მხარდაჭერის განცდას აძლიერებს და ხელს უწყობს ქალთა გაძლიერებასა და ძალადობის პრევენციას ადგილობრივ თემებში.
პროექტი ხორციელდება CISU-ის მხარდაჭერით
Zoom-ის საშუალებით ჩატარდა ონლაინ შეხვედრა წყალტუბოსა და ქუთაისის მუნიციპალიტეტების 12 ქალის მონაწილეობით. შეხვედრას უძღვებოდნენ ქალთა ფონდი „სოხუმის“ წარმომადგენლები — ლელა შენგელია და ანჟელა ჩიხლაძე.
დისკუსიის მთავარი თემა იყო ტექნოლოგიებით ჩადენილი ძალადობა და ქალთა უსაფრთხოება ციფრულ სივრცეში. მონაწილეებმა ისაუბრეს ონლაინ გარემოში არსებულ გამოცდილებებსა და გამოწვევებზე, ასევე მიიღეს პრაქტიკული ინფორმაცია ძალადობის თანამედროვე ფორმების, მტკიცებულებების სწორად შეგროვებისა და სამართლებრივი მექანიზმების შესახებ.
მონაწილეებმა შეხვედრა შეაფასეს როგორც საჭირო და პრაქტიკული, განსაკუთრებით იმ ცოდნის გამო, რომელიც მათ საკუთარი უსაფრთხოების დაცვისა და დახმარების მიღების შესაძლებლობებზე მისცა.
შეხვედრამ კიდევ ერთხელ გაუსვა ხაზი ინფორმირებული და გაძლიერებული ქალების მნიშვნელობას უსაფრთხო ციფრული გარემოს შექმნასა და ძალადობის პრევენციაში.
პროექტი ხორციელდება WAVE Network-ის მხარდაჭერით
ქალთა ფონდი „სოხუმის“ ორგანიზებით Zoom პლატფორმის საშუალებით ჩატარდა ონლაინ ვორქშოპი ჩოხატაურისა და ვანის მუნიციპალიტეტების ახალგაზრდულ ჯგუფთან.
შეხვედრა მიეძღვნა ტექნოლოგიებით ჩადენილ ძალადობასა და ციფრულ უსაფრთხოებას. მონაწილეებმა მიიღეს პრაქტიკული ცოდნა პირადი მონაცემების დაცვაზე, ანგარიშების უსაფრთხოებაზე, კიბერჰიგიენასა და ონლაინ ძალადობის ამოცნობასა და რეაგირებაზე.
ვორქშოპს უძღვებოდნენ ფონდი „სოხუმის“ წარმომადგენლები ნინო ჭაბუკიანი და ლალი შენგელია. შეხვედრამ კიდევ ერთხელ გამოკვეთა, რომ ციფრული უსაფრთხოების ცოდნა და ღია დიალოგი ძალადობის პრევენციის მნიშვნელოვანი საფუძველია ახალგაზრდებში.
პროექტი ხორციელდება WAVE Network-ის მხარდაჭერით
2026 წლის 12 თებერვალს ქალთა ფონდი „სოხუმის“ ორგანიზებით, Zoom პლატფორმის საშუალებით, ონლაინ შეხვედრა ჩატარდა ხონისა და სენაკის მუნიციპალიტეტების ქალთა ჯგუფებთან.
შეხვედრის მთავარი თემა იყო ტექნოლოგიების გამოყენებით ჩადენილი ძალადობა და ციფრულ სივრცეში კონტროლისა და ზეწოლის ფორმები პარტნიორულ ურთიერთობებში. მონაწილეებმა ისაუბრეს ონლაინ გარემოში არსებულ გამოწვევებზე და იმ ზიანზე, რომელიც ხშირად შეუმჩნეველი რჩება.
განსაკუთრებული ყურადღება დაეთმო პრაქტიკულ საკითხებს — პირადი მონაცემების დაცვას, ანგარიშების უსაფრთხოებას, მტკიცებულებების შენახვას და საჭიროების შემთხვევაში დახმარების მიღების შესაძლებლობებს.
შეხვედრაზე მონაწილეებმა ხაზი გაუსვეს პრობლემის ამოცნობისა და ღიად საუბრის მნიშვნელობას, რაც ძალადობის პრევენციისა და უსაფრთხო გარემოს შექმნის მნიშვნელოვანი წინაპირობაა.
პროექტი ხორციელდება WAVE ქსელის მხარდაჭერით
ქალთა ფონდი „სოხუმის“ თანამშრომლებისთვის გაიმართა სამდღიანი ტრენინგი თემაზე — „ძალადობა, ტრავმაზე რეაგირება და ტრავმაზე ორიენტირებული პრაქტიკები“, რომელსაც უძღვებოდა პარტნიორი ორგანიზაციის, Danner-ის ტრენერი - კარენ ბოსენი. ტრენინგის მიზანი იყო ქალებთან მუშაობის კიდევ უფრო მგრძნობიარე, უსაფრთხო და პროფესიულ სტანდარტებზე დაფუძნებული მიდგომების განვითარება.
მონაწილეებმა განიხილეს გენდერული ნორმები და სტერეოტიპები, ძალადობის მრავალშრიანი ბუნება და სოციალური-ეკოლოგიური მოდელი. განსაკუთრებული ყურადღება დაეთმო ძალადობის სხვადასხვა ტიპის გააზრებას, იძულებითი კონტროლის მექანიზმებსა და იმ უხილავ ზიანს, რომელიც ფიზიკური კვალის გარეშეც აზიანებს ქალის უსაფრთხოებასა და თავისუფლებას.
ტრენინგის ფარგლებში დეტალურად განიხილეს ტრავმაზე რეაგირების ოთხი ძირითადი ფორმა - შებრძოლება, გაქცევა, გაყინვა და მაამებლობა - როგორც გადარჩენის ბუნებრივი მექანიზმები. ხაზი გაესვა იმას, რომ მხარდაჭერა უნდა ეფუძნებოდეს უსაფრთხოებას, ნდობასა და ქალის არჩევანის პატივისცემას, რათა დახმარება ახალი ტკივილის წყაროდ არ იქცეს.
მესამე დღე დაეთმო პრაქტიკულ ინსტრუმენტებსა და თვითზრუნვის მნიშვნელობას. მონაწილეებმა იმსჯელეს, როგორ მოუსმინონ ძალადობაგამოვლილ ქალებს განსჯის გარეშე, როგორ შეინარჩუნონ პროფესიული სიფრთხილე და ამავე დროს დაიცვან საკუთარი ემოციური რესურსი პროფესიული გადაწვისგან.
ტრენინგის დასრულებისას მონაწილეებს სერტიფიკატები გადაეცათ. მიღებული ცოდნა და უნარები დაეხმარება ფონდი „სოხუმის“ გუნდს, ქალების მხარდაჭერა კიდევ უფრო ტრავმაზე ორიენტირებული, თანაგრძნობაზე დაფუძნებული და უსაფრთხო გახადოს.
ფონდი „სოხუმი“ მადლობას უხდის პარტნიორ ორგანიზაცია Danner-სა და ტრენერ კარენ ბოსენს მნიშვნელოვანი გამოცდილებისა და მხარდაჭერისთვის.
პროექტი ხორციელდება CISU-ის მხარდაჭერით
წალენჯიხისა და ზუგდიდის მუნიციპალიტეტების გამყოფ ხაზთან მცხოვრები ახალგაზრდების მონაწილეობით გაიმართა შეხვედრა თემაზე — პარტნიორულ ურთიერთობებში ტექნოლოგიებით ჩადენილი ძალადობა. შეხვედრას უძღვებოდნენ ფასილიტატორები ემა კამკია და ფსიქოლოგი ეკა ქვაჩაკიძე.
შეხვედრაზე ახალგაზრდებთან ერთად განვიხილეთ, როგორ ვლინდება ძალადობა ციფრულ სივრცეში და როგორ შეიძლება ტექნოლოგიები იქცეს კონტროლისა და ზეწოლის ინსტრუმენტად. საუბარი შეეხო ციფრული ძალადობის ამოსაცნობ ნიშნებს, მის ფსიქო-ემოციურ და სოციალურ შედეგებს, ასევე სამართლებრივი დაცვისა და დახმარების არსებულ მექანიზმებს.
პრაქტიკულ ნაწილში მონაწილეებმა მიიღეს ინფორმაცია პირადი ანგარიშების დაცვის, ციფრული მტკიცებულებების სწორად შენახვისა და საჭიროების შემთხვევაში დახმარებისთვის მიმართვის გზების შესახებ.
მონაწილეებმა აღნიშნეს:
„ვფიქრობდი, ონლაინ კონტროლი უბრალოდ ეჭვიანობა იყო. ახლა მივხვდი, რომ ეს ძალადობის ფორმაა.“
„ყველაზე მნიშვნელოვანი იყო იმის ცოდნა, რომ დახმარების მიღება რეალურად შესაძლებელია.“
ამოიცანი. ისაუბრე. იმოქმედე.
გაეცანით გზამკვლევს - „პარტნიორულ ურთიერთობებში ტექნოლოგიებით ჩადენილი ძალადობა — ამოიცანი და დაიცავი თავი“.
პროექტი ხორციელდება WAVE ქსელის მხარდაჭერით
წალენჯიხისა და ზუგდიდის მუნიციპალიტეტების გამყოფ ხაზთან მცხოვრები ქალთა ჯგუფებისთვის ონლაინ შეხვედრა გაიმართა Zoom პლატფორმის საშუალებით. შეხვედრა განხორციელდა ქალთა ფონდი „სოხუმის“ ორგანიზებით და შეეხო ერთ-ერთ ყველაზე რთულ და ხშირად უხილავ თემას — პარტნიორულ ურთიერთობებში ტექნოლოგიებით ჩადენილ ძალადობას.
დისკუსიის დროს მონაწილეებმა იმსჯელეს, როგორ გრძელდება ძალადობა ციფრულ სივრცეში და როგორ შეიძლება ტექნოლოგიები იქცეს კონტროლისა და ზეწოლის ინსტრუმენტად. ქალებმა გააზიარეს ყოველდღიური გამოცდილებები, ის გამოწვევები, რომლებიც ონლაინ სივრცეში იშვიათადაა ხილული, თუმცა რეალურ ფსიქოლოგიურ და სოციალურ ზიანს იწვევს.
განსაკუთრებული ყურადღება დაეთმო პრაქტიკულ საკითხებს: პირადი ანგარიშების დაცვას, ციფრული მტკიცებულებების სწორად შენახვას და იმ სერვისებს, სადაც ქალებს დახმარების მიღება შეუძლიათ.
შეხვედრის ყველაზე მნიშვნელოვანი ნაწილი თავად მონაწილეთა გულწრფელი საუბრები აღმოჩნდა.
ერთ-ერთმა მონაწილემ აღნიშნა:
„სამწუხაროდ, რეგიონებსა და სოფლებში ამ საკითხს ხშირად სხვანაირად უყურებენ. სოციალური ქსელების პაროლებისა და საბანკო მონაცემების მეუღლეებისთვის გაზიარება ბევრისთვის ნორმად ითვლება. ძალიან მნიშვნელოვანია, რომ ამ თემაზე საუბარი დაიწყეთ.“
სხვა მონაწილემ ისაუბრა იმაზე, თუ რატომ რჩება ძალადობა ხშირად უთქმელი:
„ჩვენ ირგვლივ ონლაინ ძალადობის არაერთი შემთხვევაა, მაგრამ ქალები ვერ საუბრობენ — საზოგადოების მიმართ ნდობა ნაკლებია, გოგონებს კი ხშირად მშობლების მხარდაჭერის იმედი არ აქვთ. ყოფილა შემთხვევებიც, როცა გოგონამ თავისი გამოცდილება გაუზიარა ოჯახს და თავად დაადანაშაულეს. ასეთ დროს მოზარდი იკეტება და ემოციურ პრობლემებთან მარტო რჩება.“
დისკუსიამ აჩვენა, რომ პრობლემა მხოლოდ ქალებს არ ეხება:
„ონლაინ ძალადობა მხოლოდ ქალების საკითხი არ არის. ციფრულ სივრცეში ძალადობის მსხვერპლები ხშირად ახალგაზრდა ბიჭებიც ხდებიან.“
ამ შეხვედრამ კიდევ ერთხელ დაადასტურა, რომ პრობლემის აღიარება პირველი ნაბიჯია ცვლილებისკენ.
ამოიცანი. ისაუბრე. იმოქმედე.
გაეცანით გზამკვლევს - „პარტნიორულ ურთიერთობებში ტექნოლოგიებით ჩადენილი ძალადობა — ამოიცანი და დაიცავი თავი“
პროექტი ხორციელდება WAVE ქსელის მხარდაჭერით
გეგუთში, წყალტუბოს მუნიციპალიტეტის ქალების სამიზნე ჯგუფთან გაიმართა ვორკშოპი თემაზე — „ადგილობრივ თემებში ოჯახში ქალთა მიმართ ძალადობის იდენტიფიცირება, მხარდაჭერა და რეაგირება“. შეხვედრას უძღვებოდა ჯგუფის ლიდერი ქალი.
ვორკშოპის მიზანი იყო მონაწილეთა ინფორმირება ოჯახში ძალადობის ფორმების, ამოცნობის გზებისა და მსხვერპლთა მხარდასაჭერი სერვისების შესახებ. ყურადღება დაეთმო პრაქტიკულ მექანიზმებს, რომლებიც ქალებს ეხმარება როგორც საკუთარი თავის დაცვაში, ისე ძალადობის მსხვერპლი სხვა ქალების მხარდაჭერაში.
შეხვედრაზე ქალებმა ღიად ისაუბრეს საკუთარ დაკვირვებებზე. ბევრისთვის ახალი აღმოჩნდა, რომ ძალადობა მხოლოდ ფიზიკური ზიანით არ შემოიფარგლება და მას ეკონომიკური და ფსიქოლოგიური ფორმებიც აქვს.
მონაწილეთა შეფასებები:
- „პირველად გავიგე ეკონომიკური ძალადობის შესახებ.“
- „გავიგე, როგორ დავიცვა თავი და დავეხმარო სხვებს.“
- „მივხვდი, რომ ის, რასაც ნორმად მივიჩნევდი, ძალადობის ფორმებს შეიცავს.“
- „ბევრი ქალი ფსიქოლოგიურ ძალადობას ნორმალურად აღიქვამს.“
- „ასეთი ინფორმაციის ქონა ძალიან მნიშვნელოვანია.“
- „ეს თემები ყველასთან უნდა განიხილებოდეს — ქალებთან, მამაკაცებთან და ახალგაზრდებთან.“
- „გავიგეთ წყალტუბოს მერიის ადგილობრივი პროგრამის შესახებ.“
მონაწილეებმა აღნიშნეს, რომ ინფორმაციის ნაკლებობა კვლავ მთავარ ბარიერად რჩება, ბევრმა ქალმა არ იცის, სად და როგორ მიიღოს დახმარება, რაც დროულ რეაგირებას ართულებს.
პროექტი ხორციელდება CISU-ის მხარდაჭერით
სენაკში, ქალების ჯგუფთან გაიმართა ვორკშოპი თემაზე – „ადგილობრივ თემებში ოჯახში ქალთა მიმართ ძალადობის იდენტიფიცირება, მხარდაჭერა და რეაგირება“. შეხვედრა მიზნად ისახავდა მონაწილეთა ინფორმირებას ოჯახში ძალადობის არსის, მისი ფორმების, ასევე მსხვერპლთა მხარდასაჭერი სერვისებისა და რეაგირების მექანიზმების შესახებ.
ვორკშოპის ფარგლებში მონაწილეებმა იმსჯელეს იმ ფაქტორებზე, რომლებიც ხელს უშლის ძალადობის რისკის ქვეშ მყოფი ქალების ადრეულ იდენტიფიცირებას. ქალებმა აღნიშნეს, რომ ოჯახში ძალადობა ერთ-ერთ უმწვავეს პრობლემად რჩება და საჭიროებს სახელმწიფოს მხრიდან უფრო მეტ და ეფექტიან რესურსებს. მათი შეფასებით, არსებული სერვისები ხშირად არასაკმარისია ძალადობის შემთხვევებზე დროული და შედეგიანი რეაგირებისთვის.
განსაკუთრებული ყურადღება გამახვილდა საბავშვო ბაღებისა და სკოლების როლზე პრობლემის იდენტიფიცირების პროცესში. მონაწილეთა თქმით, ბავშვები ხშირად პირველები ასახავენ ოჯახურ კონფლიქტებს, თუმცა რეაგირება რთულდება მშობლების, განსაკუთრებით დედების მხრიდან წინააღმდეგობის გამო, რაც საბოლოოდ ძალადობის შემთხვევების დაფარვას უწყობს ხელს.
ვორკშოპის მონაწილეებმა ასევე აღნიშნეს, რომ იდენტიფიცირების პროცესს მნიშვნელოვნად აფერხებს მსხვერპლთა მხარდამჭერი სერვისების შესახებ ინფორმაციის ნაკლებობა. ბევრი ქალი არ ფლობს ინფორმაციას არსებული დახმარებების შესახებ და პრობლემის მარტო გადაჭრას ცდილობს, რაც ხშირ შემთხვევაში მძიმე შედეგებით სრულდება.
პროექტი ხორციელდება CISU-ის მხარდაჭერით
