დასრულდა „ონლაინ ხმის მრიცხველის - ამომჩევლის რჩევის აპლიკაცია“ 2021 წლის ადგილობრივი თვითმმართველობის არჩევნებისთვის ზუგდიდის მუნიციპალიტეტში პირველი ეტაპი.
აპლიკაციაში ასახული პასუხების თანახმად, მოსახლეობის 8️3%-ს მიაჩნია, რომ ზუგდიდის მუნიციპალიტეტში საჭიროა ელექტრონული მომსახურების გაუმჯობესება და ადგილობრივ ელექტრონულ პროგრამებსა და სერვისებზე მოსახლეობის ხელმისაწვდომობის გაზრდა. ამდენივეს აზრით, აუცილებელია სოფლებში არსებული ამბულატორიების ინფრასტრუქტურული, ტექნიკური და ადამიანური რესურსების საჭიროებების შეფასება და მათი სათანადო ფუნქციონირების უზრუნველყოფა. 8️0️% აფიქსირებს, რომ ადგილობრივი თვითმმართველობა უნდა ჩაერთოს რეგიონში COVID–19-ის პანდემიის პროფილაქტიკისა და მის შედეგებთან ბრძოლის საქმეში. 7️8% ფიქრობს, რომ ქალები პროპორციულად უნდა იყვნენ ჩართულნი ადგილობრივ მუნიციპალიტეტში მმართველ და გადაწყვეტილების მიმღებ თანამდებობებზე.
ზუგდიდის ამომრჩეველს კიდევ აქვს შესაძლებლობა, გაიგოს, რომელი პარტია დგას ყველაზე ახლოს მათ შეხედულებებთან და გააკეთოს გაცნობიერებული არჩევანი მეორე ტურშიც.
აპლიკაციას იპოვით აქ: http://onlinemricxveli.ge/vote/voting/2021-2/
პროექტი ხორციელდება ორგანიზაცია „ქალები ქალებისათვის“
(Kvinna till Kvinna) მხარდაჭერით (შვედეთი)
ადგილობრივი თვითმმართველობის არჩევნებისთვის ზუგდიდის მუნიციპალიტეტში ფონდმა „სოხუმმა“ დანერგა ევროპაში წარმატებული მოდელი - ონლაინ „ხმის მრიცხველი“ - ამომრჩევლის რჩევის აპლიკაცია წინასაარჩევნოდ ამომრჩეველთა ინფორმირების მიზნით.
ფონდი „სოხუმის“ თბილისის წარმომადგენლობა აქტიურად თანამშრომლობს პოლიტიკურ პარტიებთან. აპლიკაციის შევსებაში მონაწილეობა მიიღეს შემდეგმა პოლიტიკურმა სუბიექტებმა: „შალვა ნათელაშვილი - საქართველოს ლეიბორისტული პარტია“, „გირჩი - მეტი თავისუფლება“, „ლელო საქართველოსთვის“, „გიორგი ვაშაძე - სტრატეგია აღმაშენებელი“, „ევროპული საქართველო“, მპგ „ქართული ოცნება - დემოკრატიული საქართველო“, „ერთიანი ნაციონალური მოძრაობა“.
პროექტი ხორციელდება ორგანიზაცია „ქალები ქალებისათვის“
(Kvinna till Kvinna) მხარდაჭერით (შვედეთი)
- მოსახლეობამ თითქმის არ იცის, რა სახის მხარდაჭერა არსებობს ძალადობის მსხვერპლთათვის. რაც უფრო მეტად არის ქალი ამ საკითხებზე ინფორმირებული, მით უფრო ძლიერია ის.
- შეხვედრები აზრების და შეხედულებების გაზიარების საშუალებაა ჩვენთვის, ყველას სჭირდება მსგავსი სახის განტვირთვა, ვინ როგორ აგვარებს ოჯახურ კონფლიქტებს, ვის შეიძლება მიმართო - ეს ყველაზე მნიშვნელოვანი ინფორმაციაა.
ასეთი შეფასებები ჰქონდათ მონაწილეებს ქალთა მხარდაჭერის ცენტრებში გამართულ საინფორმაციო შეხვედრებზე, რომლებიც სენაკის, თერჯოლის, ბაღდათის, სამტრედიის და ზუგდიდის მუნიციპალიტეტებში ჩატარდა.
საინფორმაციო შეხვედრების შემდეგ რამდენიმე შემთხვევის იდენტიფიცირება მოხდა და რეაგირებისთვის ფსიქოლოგთან გადამისამართდა.
პროექტი ხორციელდება ორგანიზაცია Brot für die Welt - Evangelischer
Entwicklungsdienst მხარდაჭერით (გერმანია)
პროექტის დასასრულს გამოვიდა ბოლო, მეოთხე ანგარიში „საჯარო მმართველობის რეფორმის საგზაო რუკის (PAR) მონიტორინგი დასავლეთ საქართველოს 8 მუნიციპალიტეტში“. პუბლიკაცია მოამზადა ფონდმა „სოხუმმა“ იმერეთის მეცნიერთა კავშირ „სპექტრთან“ და მეწარმე ქალთა ფონდთან პარტნიორობით.
ხონის, ბაღდათის, თერჯოლის, ვანის, ოზურგეთის, ლანჩხუთის, ცაგერის და ამბროლაურის მუნიციპალიტეტებში მონიტორინგის შედეგად მოხდა ადგილობრივი ხელისუფლების საქმიანობის ეფექტიანობის, გამჭვირვალობის და ინკლუზიურობის შეფასება.
ბოლო ანგარიშში ნაჩვენებია, რა გაკეთდა წინა სამი მონიტორინგის შემდეგ, როგორ შესრულდა რეკომენდაციები, რა ცვლილებებია მიღწეული და როგორია პროგრესი მუნიციპალიტეტებში ელექტრონული მომსახურების გაუმჯობესების კუთხით.
მუშაობა მიმდინარეობს პროექტის „გურიის, იმერეთისა და რაჭა-ლეჩხუმის სამოქალაქო საზოგადოების ორგანიზაციების საერთო ფორუმი საჯარო მმართველობის რეფორმის საგზაო რუკის მონიტორინგის მიზნით“ ფარგლებში.
პროექტი ხორციელდება ევროკავშირის მხარდაჭერით
სექტემბერი განსაკუთრებით დატვირთული აღმოჩნდა ახალგაზრდული საინიციატივო ჯგუფებისთვის. ქვესაგრანტო პროგრამის ფარგლებში წყალტუბოს მე-4 სკოლაში არსებულმა ახალგაზრდულმა კლუბმა განახორციელა პროექტი „BRAIN-ROOM - ახალგაზრდული სივრცე საზოგადოების ინფორმირებისათვის“.
პროექტის მონაწილეებმა შეიმუშავეს თემატური ნახატი ბანერისთვის, რომელიც BRAIN-ROOM მთავარი ატრიბუტი უნდა გახდეს. პროექტის ფარგლებში ჩატარდა საინფორმაციო შეხვედრები. სტუმრები იყვნენ იყვნენ წყალტუბოს მუნიციპალიტეტის მერიისა და საკრებულოს წარმომადგენლები. ახალგაზრდებმა მოისმინეს ინფორმაციები ახალგაზრდულ პროგრამებზე, გენდერულ საკითხებზე, მერიის სოციალურ პოლიტიკაზე. ახალგაზრდული კლუბის ბაზაზე შეიქმნა ინფო-ჯგუფები, რომლებმაც მასტერკლასები ჩაატარეს უფროსი ასაკის ადამიანებთან ინტერნეტთან მუშაობის უნარებზე. საპროექტო აქტივობები დასრულდა, თუმცა დარჩა სადისკუსიო სივრცე BRAIN-ROOM, რომელიც ახალი სტუმრების მოლოდინშია.
პროექტი ხორციელდება USAID-ის მხარდაჭერით
წყალტუბოს ახალგაზრდულმა საინიციატივო ჯგუფმა ქვესაგრანტო კონკურსის ფარგლებში განახორციელა პროექტი „მდგრადი მოხმარება და წარმოება - ახალგაზრდები გაეროს მდგრადი განვითარების მიზნების ადგილობრივ დონეზე იმპლემენტაციისათვის“.
მომზადდა ბანერი, დაიბეჭდა თემატური კომიქსები ნაგვის ურნებზე გასაკრავად. კლუბის წევრებმა შეიძინეს საკანცელარიო ნივთები.
საპროექტო აქტივობებმა წარმატებით ჩაიარა. ჩატარდა ონლაინ გამოკითხვა, ტრენინგები, ვორკშოპები ნარჩენების მეორად გადამუშავებაზე. პროექტი დასრულდა აქციით: ნაგვის ურნებზე კლუბის წევრებმა გააკრეს თემატური კომიქსები.
მონაწილეები მიიჩნევენ, რომ ახალგაზრდული პროექტი ხელს შეუწყობს მუნიციპალიტეტში ეკოსანიტარული მდგომარეობის გაუმჯობესებას, ნარჩენების მოხმარების, მეორადი გადამუშავების წესებზე მოსახლეობის ინფორმირებას და ცნობიერების ამაღლებას.
პროექტი ხორციელდება USAID-ის მხარდაჭერით
„ინტერაქცია „სთრით არტის“ ენაზე“ - ასე დაარქვეს სენაკის ახალგაზრდული საინიციატივო ჯგუფის წევრებმა ქვეგრანტის ფარგლებში განხორციელებულ პროექტს და საზოგადოებასთან ურთიერთობისთვის ქუჩის ხელოვნების ფორმატი გამოიყენეს. ჯგუფის წევრებმა შეიმუშავეს თემატური მაკეტი, შეარჩიეს ფრაზები. შემდეგ იდეამ სენაკის მე-7 სკოლის კედელზე გადაინაცვლა. ახალგაზრდული მესიჯები მშვიდობის, ლიდერობის, განათლების, აქტივიზმის აუცილებლობისკენ მოგვიწოდებენ.
ახალგაზრდებმა ჩაატარეს საჯარო ლექცია, ვორკშოპები, მოიწვიეს სენაკის სხვადასხვა სკოლის მოსწავლეები.
- რა ვიცით თვითმმართველობაზე, მის სტრუქტურაზე, პროგრამებზე, ბიუჯეტზე, რას ნიშნავს დეცენტრალიზაცია - ეს საკითხები მოექცა მონაწილეთა ინტერესის სფეროში.
პროექტი დასრულდა, თუმცა ახალგაზრდები საზოგადოებასთან ინტერაქციას კედელზე დარჩენილი გზავნილებით გააგრძელებენ.
პროექტი ხორციელდება USAID-ის მხარდაჭერით
მომზადდა პუბლიკაცია „ქალებისა და ახალგაზრდების საჭიროებების შეფასება ადრეული გაფრთხილების გენდერზე ორიენტირებული სისტემის (GREWS) მიხედვით“. ეს არის 6 მუნიციპალიტეტში (ქუთაისი, ხონი, წყალტუბო, სენაკი, წალენჯიხა, ზუგდიდი) ჩატარებული კვლევის ანალიზი.
ეს სისტემა მნიშვნელოვანი ინსტრუმენტია საზოგადოებაში არსებულ პრობლემებზე ადრეული რეაგირების, ადამიანური უსაფრთხოების ხარისხის გაუმჯობესების თვალსაზრისით.
საჭიროებათა კვლევის მიზანია 6 მუნიციპალიტეტში ქალებისა და ახალგაზრდების წინაშე არსებული პრობლემების და გამოწვევების იდენტიფიცირება, პრიორიტეტული საკითხების გამოკვეთა და პრობლემების ადვოკატირება ადგილობრივ და ცენტრალურ დონეზე.
პროექტი ხორციელდება USAID-ის მხარდაჭერით
ქუთაისის ახალგაზრდული საინიციატივო ჯგუფის წევრებმა პროექტის „ახალგაზრდული ინიციატივები ჯანსაღი გარემოსთვის“ ფარგლებში ისაუბრეს პროექტის მიმდინარეობასთან დაკავშირებით. აღნიშნეს, რომ მზად აქვთ კლუბის ლოგო, შეუკვეთეს მაისურები, კეპები და აქტიურად განაგრძობენ მუშაობას გაწერილი აქტივობების შესასრულებლად.
ქალთა საინიციატივო ჯგუფი კი ონლაინ შეხვდა ქუთაისის მუნიციპალიტეტის ინფრასტრუქტურის განვითარების, კეთილმოწყობის და დასუფთავების სამსახურის ხელმძღვანელის მოადგილეს კარლო კუხიანიძეს. ჯგუფის წევრებმა კომპეტენტური პირისგან მიიღეს პასუხები მათთვის საინტერესო საკითებზე. მერიის წარმომადგენელი მათ რიგი საკითხების გადამოწმებას და შესაბამის სამსახურებთან შუამდგომლობას დაჰპირდა.
პროექტი ხორციელდება USAID-ის მხარდაჭერით
ხონის მუნიციპალიტეტის ქალთა საინიციატივო ჯგუფთან ჩატარდა ონლაინ შეხვედრა, რომელსაც მერიის წარმომადგენლები ესწრებოდნენ. ქალებმა მათგან მოისმინეს ინფორმაცია, თუ რა ეტაპზეა მათი განცხადება იმ პრობლემასთან დაკავშირებით, რომელსაც ადვოკატირებას უწევენ. მერიის წარმომადგენლების თქმით, საკითხი აქტუალურია და დადებითად გადაიჭრება.
ქალთა მეორე ჯგუფიც შეუდგა პრობლემის ადვოკატირებას. ისინი დევნილთა დასახლებაში ხეების შებელვას ითხოვენ. მათთან ჩატარებულ ონლაინ შეხვედრას მერის მოადგილე მანანა გოფოძე და მერიის წარმომადგენლები ესწრებოდნენ. იმედია, მერიის მხარდაჭერით მათ მიერ დასმული პრობლემა მალე მოგვარდება.
სექტემბერი განსაკუთრებული იყო ხონის ახალგაზრდული საინიციატივო ჯგუფისთვის. ისინი ქვეგრანტების პროგრამის ფარგლებში წარმატებით ახორციელებენ მცირე პროექტს „ჩვენ გვიყვარს აფხაზეთი“.
პროექტი ხორციელდება USAID-ის მხარდაჭერით