ჩატარებული საქმიანობის შეჯამებას მიეძღვნა ფოთის თვითდახმარების ჯგუფის შეხვედრა. შეფასდა პროექტის ფარგლებში მიღწეული შედეგები ქალთა გაძლიერების და თემში განხორციელებული ცვლილებების თვალსაზრისით.
განსაკუთრებული ყურადღება დაეთმო სამოქალაქო ინიციატივებს, რაც პროექტის ერთ-ერთი ყველაზე მნიშვნელოვანი ეტაპი იყო. აქტივობებმა არა მხოლოდ მოაგვარა თემის პრობლემები, არამედ სხვა ქალებსაც გაუჩინა ჩართულობის სურვილი.
თვითდახმარების ჯგუფის წევრებმა ერთმანეთს გაუზიარეს გამოცდილება და დადებითი ემოციები. აღნიშნეს, რომ პროექტში მონაწილეობამ გაზარდა მათი თავდაჯერებულობა, გააძლიერა გუნდური მუშაობის უნარები და მისცა შესაძლებლობა, აქტიურად ჩართულიყვნენ პრობლემების მოგვარების პროცესში.
თემში ჯერ კიდევ მრავალი საკითხია გადასაჭრელი. სწორედ ამიტომ, ისინი იყენებენ სამოქალაქო ჩართულობის სხვადასხვა მექანიზმს, აქტიურად თანამშრომლობენ ადგილობრივ თვითმმართველობასთან.
შეხვედრის დასასრულს მონაწილეებმა კიდევ ერთხელ გამოხატეს მადლიერება მხარდაჭერისათვის. ისინი იმედოვნებენ, რომ ჩვენს ორგანიზაციასთან თანამშრომლობა გაგრძელდება და კიდევ უფრო მეტი პოზიტიური ცვლილება მოხდება დევნილთა თემში.
პროექტს ახორციელებს არასამთავრობო ორგანიზაციების კოალიცია: იგპ ქალთა ასოციაცია „თანხმობა“, ქალთა საინფორმაციო ცენტრი და საქველმოქმედო ჰუმანიტარული ქალთა ფონდი „სოხუმი“.
ქალთა ურთიერთდახმარების ჯგუფის შეხვედრების ნაწილი ონლაინ გაიმართა. წალენჯიხის ჯგუფმა ონლაინ ისაუბრა მუშაობის მნიშვნელობაზე და აღნიშნა მხარდაჭერა, რომელსაც ფონდი „სოხუმი“ იჩენს ქალების მიმართ. შეხვედრის ერთი ნაწილი სწავლებას მიეძღვნა - ტრენერმა ქრისტინე ქუთათელაძემ წარმოადგინა პრეზენტაცია ხელოვნური ინტელექტის თემაზე და უპასუხა შეკითხვებს.
სენაკში ყურადღება გამახვილდა ქალთა სოლიდარობის თემაზე, ძალადობის პრობლემაზე და განსაკუთრებით - ციფრულ ძალადობაზე. შეხვედრის მონაწილეებს დაურიგდა ჩვენი გამოცემა „პარტნიორულ ურთიერთობებში ტექნოლოგიების გამოყენებით ჩადენილი ძალადობა – ამოიცანი და დაიცავი თავი“.
ქობულეთის და დანარჩენი ჯგუფების მორიგი შეხვედრაც საინტერესოდ წარიმართა. ისაუბრეს ქალთა უფლებებზე, მუნიციპალურ სერვისებზე, ცვლილებებსა და სიახლეებზე. მუშაობაში ჩაერთო ფსიქოლოგი, რომელმაც ჯგუფური და ინდივიდუალური კონსულტაციები ჩაატარა.
მოსწონთ ქალებს შეხვედრები, სადაც მსჯელობენ პრობლემებზე და მათ მოგვარებაზე. ჯგუფის მუშაობამ ახალი ცოდნა და გამოცდილება შესძინა თითოეულ მათგანს. იმედი აქვთ, რომ ერთიანი ძალისხმევით მეტის გაკეთება შეუძლიათ.
პროექტი ხორციელდება თანასწორობის ფონდის მხარდაჭერით (კანადა)
ქალებისთვის შექმნილი ეს საინფორმაციო გზამკვლევი აერთიანებს პრაქტიკულ და საჭირო ინფორმაციას ძალადობის შემთხვევებში რეაგირების, ხელმისაწვდომი სერვისების, ცხელი ხაზების, თავშესაფრების, იურიდიული და ფსიქოსოციალური დახმარების შესახებ.
გზამკვლევის მიზანია ქალებმა, თემის ლიდერებმა და აქტიურმა მოქალაქეებმა სწრაფად მიიღონ სანდო ინფორმაცია დახმარების გზებსა და მხარდაჭერის მექანიზმებზე, ასევე გაეცნონ ეკონომიკური გაძლიერების შესაძლებლობებს.
პროექტი ხორციელდება თანასწორობის ფონდის მხარდაჭერით (კანადა)
სასტუმრო „გელათი რეზიდენსში“ გაიმართა შემაჯამებელი კონფერენცია თემაზე „ქალთა გაძლიერება და მდგრადი მხარდაჭერის მექანიზმები თემებში: გამოცდილება, შედეგები და ზეგავლენა“
შეხვედრამ გააერთიანა 50 მონაწილე ქალი სხვადასხვა მუნიციპალიტეტიდან: ურთიერთდახმარების ჯგუფების ლიდერები და წევრები, პარასპეციალისტები, სამოქალაქო ინიციატივების მონაწილეები და ფონდი „სოხუმის“ წარმომადგენლები.
ქალებმა საკუთარი გამოცდილება, მიღწეული ცვლილებები და გამოწვევები გააზიარეს ოთხ თემატურ პანელზე:
- ქალთა ურთიერთდახმარების ჯგუფები, როგორც უსაფრთხო სივრცე ქალთა სოციალური გაძლიერებისა და ციფრული უნარების განვითარებისათვის.
- ქალთა მიერ განხორციელებული სამოქალაქო ინიციატივები, რომლებიც რეალურ ცვლილებად იქცა მუნიციპალიტეტებში.
- პარასპეციალისტების მხარდაჭერა და შედეგები ქალთა ცხოვრებაში
- ძალადობაგამოვლილ ქალთა მხარდაჭერის სერვისებზე ინფორმაციის ციფრული პლატფორმები და სოციალური მედია ქალთა ინფორმირებისა და სერვისებზე ხელმისაწვდომობის გაზრდაში.
პროექტის შეფასებამ აჩვენა, რომ თემზე დაფუძნებული მხარდაჭერის მოდელები აძლიერებს სოციალურ და ეკონომიკურ ჩართულობას, იზრდება ციფრული უსაფრთხოების და ინფორმაციის ხელმისაწვდომობის მნიშვნელობა, ყალიბდება ურთიერთდახმარებისა და სოლიდარობის ქსელები თემებში.
ღონისძიების დასასრულს პროექტში აქტიურად ჩართული ქალები დაჯილდოვდნენ.
პროექტი ხორციელდება თანასწორობის ფონდის მხარდაჭერით (კანადა)
წყალტუბოს თვითდახმარების ჯგუფი აქტიურად მუშაობს პროექტის ფარგლებში. ჯგუფის წევრებს ამიტომაც არ გასჭირვებიათ გაწეული საქმიანობის შედეგების შეჯამება. შეფასებისთვის შემუშავდა ონლაინ ანკეტა, რომელზეც ჯგუფის წევრებმა ინდივიდუალურად გასცეს პასუხები.
შეხვედრაც ონლაინ ჩატარდა. ქალების პასუხებში კარგად გამოჩნდა, რას მიაღწიეს პროექტის მიმართულებით მუშაობისას, რა ცვლილებები განხორციელდა თითოეული მათგანის ცხოვრებასა და დევნილთა თემში.
ჯგუფის წევრებმა დააფიქსირეს, რომ ინიციატივები თემის საჭიროებების მიხედვით განხორციელდა და ერთწლიანი მუშაობა ნაყოფიერი იყო.
მაგალითად, ამ ფოტოებში კარგად ჩანს განსხვავება - როგორი დაზიანებული იყო კოპიტნარის დევნილთა დასახლებაში საბავშვო სპორტული მოედანი. რეაბილიტაციის შედეგად ბავშვებს და ახალგაზრდებს ექნებათ თანამედროვე სტანდარტების შესაბამისი სპორტული მოედანი.
პროექტს ახორციელებს არასამთავრობო ორგანიზაციების კოალიცია: იგპ ქალთა ასოციაცია „თანხმობა“, ქალთა საინფორმაციო ცენტრი და საქველმოქმედო ჰუმანიტარული ქალთა ფონდი „სოხუმი“.
ქუთაისის ქალთა თვითდახმარების ჯგუფის მორიგი შეხვედრის მიზანი იყო პროექტის განმავლობაში მიღწეული შედეგების დაფიქსირება.
შეხვედრის დროს განსაკუთრებული ემოციით გაიხსენეს სამოქალაქო ინიციატივების განხორციელების პროცესი, რამაც მნიშვნელოვანი როლი ითამაშა დევნილთა თემში ნდობისა და მადლიერების გარემოს შექმნაში.
ჯგუფის წევრები ხაზს უსვამენ, რომ, სასიხარულო ცვლილებების მიუხედავად, კიდევ ბევრი საჭიროებაა თემში და ამიტომ ცდილობენ ყველა შესაძლო რესურსის გამოყენებას და არსებული პრობლემების მოგვარებას.
პროექტს ახორციელებს არასამთავრობო ორგანიზაციების კოალიცია: იგპ ქალთა ასოციაცია „თანხმობა“, ქალთა საინფორმაციო ცენტრი და საქველმოქმედო ჰუმანიტარული ქალთა ფონდი „სოხუმი“.
რიტრითი გასვლითი სამუშაო შეხვედრაა, ფსიქოლოგიური და ფიზიკური რესტარტი, გადატვირთვა, რომელიც სასიამოვნოდ დაამახსოვრდება ყველას.
ფონდი „სოხუმის“ თანამშრომლებმა ოჯახის წევრებთან ერთად სამი დღე გაატარეს სასტუმრო „ბორჯომი პალასში“. (ძირითადად - შვილები იყვნენ - კარგები, ლამაზები, ნიჭიერები)...
იყო ექსკურსიები რაბათის ციხეში, სერაფიმ საროველის ტაძარში, სადგერის წმინდა გიორგის სახელობის ტაძარში, სეირნობა ბორჯომის პარკში, ქუჩებში...
ფსიქოლოგ ინა აირაპეტიანთან ერთად მუშაობის დროს მონაწილეები ეძებდნენ პასუხებს კითხვებზე: რა მდგომარეობაში ვართ? რა ფაქტორები მოქმედებს ჩვენზე ნეგატიურად? რაზე შეგვიძლია გავლენა? რის შეცვლას შევძლებთ? სად ვიპოვოთ ახალი ძალები და რესურსები?
რა თქმა უნდა, უამრავი შინაგანი რესურსი „აღმოვაჩინეთ“, ჩვენი საშინაო და საგარეო „ნიღბები“ შევქმენით და გავშიფრეთ, „თავდაცვის“ ახალი ტექნიკები ვისწავლეთ, ერთმანეთი უკეთ დავინახეთ, ჩავფიქრდით, ვიტირეთ, ვიცინეთ...
ბოლოს ბავშვებმა სიურპრიზი მოგვიწყვეს: ფორუმ-თეატრის სცენა წარმოადგინეს, იცეკვეს, ლექსები წაიკითხეს...
მივხვდით: რესურსები ჩვენშია, ჩვენი ოჯახებია და კიდევ: ბენეფიციარები, ვისთვისაც მუშაობს ეს ორგანიზაცია, ვის მხარდაჭერასაც ცდილობს, თითქმის 30 წელია...
პროექტი ხორციელდება ორგანიზაცია Brot für die Welt - Evangelischer
Entwicklungsdienst მხარდაჭერით (გერმანია)
სარეაბილიტაციო ცენტრში ქალები მოდიან მძიმე გამოცდილებით: გადაუმუშავებელი ტრავმებით, ხანგრძლივი სტრესით, უიმედობის განცდით, დაბალი თვითშეფასებით და რთული სოციალური მდგომარეობით. თუმცა ამ სირთულეების მიღმა მათში არის ბრძოლის უნარი და ბედნიერი მომავლის რწმენა.
სწორედ რწმენის გასაძლიერებლად ქალებს შევთავაზეთ პოლიმერული თიხის მასტერკლასი, რომელიც პედაგოგმა მაკა ჯიშკარიანმა ჩაატარა. შემოქმედებითი პროცესი მხოლოდ ხელსაქმე არ ყოფილა - ეს იყო თერაპიული გამოცდილება, საკუთარი შესაძლებლობების აღმოჩენა და შინაგანი რესურსების გააქტიურება.
მასტერკლასის მონაწილე ქალების სიხარულს საზღვარი არ ჰქონდა. თითოეულმა მათგანმა გამოავლინა ბუნებრივი ნიჭი და დიდი სურვილი, რომ ეს მიმართულება უფრო სიღრმისეულად შეისწავლოს.
მათ მიერ შექმნილ ნამუშევრებში იგრძნობოდა ფერი, ემოცია და სიახლის იმედი. ეს დღე კიდევ ერთი ნაბიჯი იყო ცვლილებისკენ.
პროექტი ხორციელდება ორგანიზაცია Brot für die Welt - Evangelischer
Entwicklungsdienst მხარდაჭერით (გერმანია)
ქალმა საკუთარი პრობლემები გარეთ არ უნდა გამოიტანოს, საჯაროდ არ უნდა ილაპარაკოს ოჯახურ კონფლიქტებზე...
ეს სტერეოტიპული დამოკიდებულებაა ძალადობის საკითხზე. ასეთ დროს საზოგადოება გულგრილი ხდება ქალის პრობლემების მიმართ.
ფორუმ-თეატრი ამ სტერეოტიპებს ამსხვრევს...
წარმოდგენები და აქტიური დისკუსიები კარგად აჩვენებს ყველას, რომ ქალთა მიმართ ძალადობა საერთო პრობლემაა და ქალს დაცვა სჭირდება და ძალადობას - აღმოფხვრა...
ფორუმ-თეატრის წარმოდგენები ჩატარდა ქუთაისის ახალგაზრდულ სივრცეში და ცენტრალურ პარკში. მაყურებლის აზრით, პრობლემის წარმოჩენის ამ ფორმას დიდი მნიშვნელობა აქვს და ძალადობის პრევენციას ემსახურება.
პროექტი ხორციელდება ორგანიზაცია Brot für die Welt - Evangelischer
Entwicklungsdienst მხარდაჭერით (გერმანია)
რამდენად აქტუალურია ოჯახში ძალადობის პრობლემა თემებში?
რამდენად არის ინფორმირებული საზოგადოება მსხვერპლთა დახმარების სერვისებზე?
როგორ რეაგირებენ ძალადობის შემთხვევებზე?
სად შეიძლება მოიპოვონ ინფორმაცია არსებულ სერვისებზე?
ამ თემებზე აქტიური დისკუსიები გაიმართა ქალთა მხარდაჭერის ცენტრების მიერ ინიცირებულ საინფორმაციო შეხვედრებზე ხურჩაში (ზუგდიდის მუნიციპალიტეტი), წყალტუბოში, წალენჯიხაში.
სოციალური მუშაობის გაძლიერებისთვის მობილიზატორებთან ერთად აქტიურად მუშაობენ პარასპეციალისტები. ქეისების იდენტიფიცირების პარალელურად, ხდება მათი მიზნობრივი გადამისამართება. ჩვენს სარეაბილიტაციო ცენტრში ფსიქოსოციალურ მხარდაჭერას სამი ქალი მიიღებს ბავშვებთან ერთად.
სოციალური მუშაობა ხელს უწყობს სერვისებზე ხელმისაწვდომობას, რაც განსაკუთრებით მნიშვნელოვანია რისკის მქონე ჯგუფის ქალებისთვის.
პროექტი ხორციელდება ორგანიზაცია Brot für die Welt - Evangelischer
Entwicklungsdienst მხარდაჭერით (გერმანია)