25 იანვარს ქუთაისში ჩატარდა ამომრჩეველ ქალთა კლუბის სხდომა. მოწვეული იყო მერიის ადმინისტრაციის სამსახურის უფროსის მოადგილე ფიქრია ხაჭაპურიძე. სტუმარმა გააცნო კლუბის წევრებს ადგილობრივი თვითმმართველობის კანონში შეტანილი ცვლილებები, რომლებიც ითვალისწინებს ოჯახური ძალადობის მსხვერპლთა პრევენციას, მსხვერპლთა დაცვას და დახმარებას.

საუბარი შეეხო სოციალური საცხოვრისით დაკმაყოფილების კრიტერიუმებსაც. კლუბის წევრებმა თავიანთი წინადადებები წარმოადგინეს.

პროექტი ხორციელდება აშშ საელჩოს მხარდაჭერით

ამომრჩეველ ქალთა კლუბის მორიგი სხდომა გაიმართა ფონდი „სოხუმის“ სენაკის ქალთა მხარდაჭერის ცენტრში. დისკუსიის მთავარი თემა იყო 2017 წლის ადგილობრივი ბიუჯეტი, კერძოდ - მოქმედი სოციალური პროგრამები. დეტალური ინფორმაცია ამის თაობაზე წარმოადგინა გამგეობის სამსახურის მთავარმა სპეციალისტმა ჯანდაცვისა და სოციალური დაცვის საკითხებზე ხათუნა ლაშხიამ.

სხდომაზე აგრეთვე განიხილეს იმ საკითხების ადვოკატირება, რომლებიც ეხება შეზღუდული შესაძლებლობების მქონე ბავშვების ოჯახების დახმარების გაწევას.

შემდეგი სხდომა ჩატარდება სენაკის სათემო განათლების ცენტრის ბენეფიციარების მონაწილეობით.

პროექტი ხორციელდება აშშ საელჩოს მხარდაჭერით

კლუბის მორიგი შეხვედრა დაეთმო იმ ცვლილებების განხილვას, რომლებიც შევიდა ბათუმის 2017 წლის ბიუჯეტის სოციალურ პროგრამებში. ყურადღება გამახვილდა შეზღუდული შესაძლებლობის პირებისათვის გამოყოფილ თანხებზე.

შეხვედრას ესწრებოდა  საჯარო სკოლის სპეციალიზირებული პედაგოგი. მან კლუბს სთხოვა, ადვოკატირება გაეწია ამ კატეგორიის მოსწავლისთვის, რომელსაც არ ეძლევა დახმარება, რადგან არაინფორმირებულობის გამო მშობელმა დროულად არ მოამზადა საჭირო დოკუმენტები. შეხვედრაზე შემუშავდა პრობლემის ადვოკატირების გეგმა, შეიქმნა პასუხისმგებელი ჯგუფი.

ასევე გაიმართა შეხვედრა წამყვანი პარტიის წარმომადგენლობასთან. იგეგმება მემორანდუმის გაფორმება, რაც მიმართული იქნება პოლიტიკური პარტიების პროგრამებში ქალთა საჭიროების ასახვისა და პარტიულ სიებში ქალთა რაოდენობის გაზრდისკენ.

პროექტი ხორციელდება აშშ საელჩოს მხარდაჭერით

წყალტუბოში, ხონში, სენაკში ახალგაზრდების ჯგუფთან კონფლიქტოლოგიის ვორკშოპები გაიმართა. მონაწილეები გაეცნენ კონფლიქტის ანალიზის მეთოდებს: „ხახვი“, „კონფლიქტის ხე“. იმსჯელეს, რამდენად მნიშვნელოვანია იმ მიზეზების შესწავლა-გაანალიზება, რომლებიც კონფლიქტების განვითარებას უწყობს ხელს.

საინტერესო დისკუსია გაიმართა სოფელ ივანდიდში (ხონის მუნიციპალიტეტი). მსგავსი ფორმატის დისკუსიაში ახალგაზრდები პირველად მონაწილეობდნენ და განსაკუთრებული აქტიურობით გამოირჩეოდნენ.

მონაწილეები მიიჩნევენ, რომ  მიღებული ინფორმაციები დაეხმარება მათ, პრაქტიკაში გამოიყენონ ეს მეთოდები და შეძლონ კონფლიქტების მართვა.

ვორკშოპებზე ახალგაზრდების მხრიდან დაფიქსირდა ინიციატივები, დისკუსიები ამ თემაზე სკოლებშიც გააგრძელონ.

კიდევ სამი საინფორმაციო შეხვედრა გაიმართა ფონდი „სოხუმის“ ახალგაზრდულ კლუბებში. ქუთაისის კლუბმა შეხვედრა ჩაატარა კერძო სკოლაში „21-ე საუკუნე“, ხურჩა/კოკის კლუბმა - კოკის საჯარო სკოლაში, ხოლო სენაკის კლუბმა - მენჯის საჯარო სკოლაში.

საინფორმაციო შეხვედრები მიეძღვნა ტოლერანტობის თემას. ინფორმირებული ჯგუფები თავიდანვე აქტიურად ჩაერთნენ მუშაობაში. საუბრობდნენ ტოლერანტობის პრობლემაზე ახალგაზრდებში, ეროვნულ და სექსუალურ უმცირესობებზე, რელიგიურ საკითხებზე.

აღინიშნა, რომ განსხვავებული აზრის თუ ადამიანის მიმართ ტოლერანტული დამოკიდებულება საგრძნობლად ამცირებს ძალადობას და პრევენციის ერთ-ერთი ინსტრუმენტია. ამ შეხვედრებს სწორედ ეს მიზანი აქვთ, რაც კარგად აღიქვეს ახალგაზრდებმა.

იანვარში ფორუმ-თეატრის მეორე წარმოდგენა შედგა ქუთაისის კერძო სკოლაში  „21-ე საუკუნე“. მაყურებელმა ინტერესით მიიღო ყველა სცენა და შეიგრძნო ფორუმ-თეატრის მთავარი სათქმელი - არ შეურიგდეს ძალადობას!

ფონდი „სოხუმის“ ფორუმ-თეატრი საკმაოდ პოპულარული გახდა თავისი წარმოდგენებით. სწორედ ამიტომაც მიიწვიეს ახალგაზრდა მსახიობები 24 იანვარ ტელეკომპანია „რიონის“  გადაცემაში „შუადღე“. ახალგაზრდებმა ისაუბრეს ფორუმ-თეატრის სპეციფიკაზე, ძალადობის აქტუალობაზე და იმაზე, რომ თითოეულმა ადამიანმა უნდა შეძლოს კონფლიქტის მართვა ძალადობის განვითარებამდე და გააკეთოს თუნდაც მცირედი ძალადობის პრევენციისთვის.

ქუთაისის, ხონის, წყალტუბოს ქალთა საინიციატივო ჯგუფებმა საინფორმაციო შეხვედრები გამართეს მოსახლეობასთან ქალთა უსაფრთხოების საკითხებსა და ინკლუზიურ მიდგომებზე. 

შეხვედრებზე გამოიკვეთა სხვადასხვა ტიპის პრობლემები, რომლებიც საფრთხეს უქმნის ქალებს, მათ ოჯახებს. მოდერატორების სამოქმედო გეგმაში ეს პრობლემები უკვე გაიწერა და ადგილობრივ სტრუქტურებთან თანამშრომლობით დაიწყება ადვოკატირების პროცესი.

რას ნიშნავს კონფლიქტის ანალიზი და რამდენად მნიშვნელოვანია ის კონფლიქტების მართვაში - ამ საკითხებზე იმსჯელეს ფოთში, ქუთაისსა და კოკში (ზუგდიდის მუნიციპალიტეტი) ქალთა ჯგუფებთან  გამართულ ვორკშოპებზე.

მონაწილეებმა ანალიზი რეალური ისტორიების განხილვით დაიწყეს. გამოკვეთა შეცდომები, რომელთაც ადამიანები ხშირად უშვებენ ურთიერთობებში და ამით ხელს უწყობენ კონფლიქტების განვითარებას.

სოფელ კოკში ვორკშოპი პედაგოგების ჯგუფთან ჩატარდა. მონაწილეებმა აღნიშნეს, რომ  მიღებულ უნარ-ჩვევებს მოსწავლეებთან ურთიერთობებში გამოიყენებენ.

ხონის ამომრჩეველ ქალთა კლუბის სხდომას საკრებულოს თავმჯდომარე ვალერი ბახტაძე და მისი მოადგილე კობა კუბლაშვილი ესწრებოდნენ.

კლუბის წევრებმა მოწვეულ სტუმრებთან ერთად ხონის მუნიციპალიტეტის ბიუჯეტის პარამეტრები მიმოიხილეს, იმსჯელეს საკრებულოსთან გენდერული თანასწორობის საბჭოს შექმნის აუცილებლობის შესახებ. განიხილეს სხვა საკითხებიც - გარემოს დაბინძურების ფაქტები და პრევენციული ღონისძიებები.

ადგილობრივი თვითმმართველობის წარმომადგენლებმა თანამშრომლობის მზადყოფნა გამოხატეს.

პროექტი ხორციელდება აშშ საელჩოს მხარდაჭერით

ამომრჩეველ ქალთა კლუბის შეხვედრაზე დაისვა წყალტუბოს მუნიციპალიტეტის სკოლებთან ხეების გადაბელვის საკითხი. ეს აუცილებელია მოსწავლეთა უსაფრთხოებისათვის. შეხვედრაზე მოწვეულ იქნა კეთილმოწყობის სამუშაოთა წარმოების კოორდინატორი, რომელიც გაეცნო სიტუაციას და უსწრაფეს რეაგირებას დაპირდა კლუბის წევრებს.

კლუბის მოდერატორის ინიციატივით, 1-ლი საჯარო სკოლის სასწავლო პროგრამაში დაინერგა საპილოტე სწავლება პროფესორ რამაზ სურმანიძის დამხმარე სახელმძღვანელოს „ბავშვთა და მოზარდთა ასაკობრივ-სქესობრივი აღზრდის საფუძვლები“ მიხედვით (წიგნი შარშან გამოიცა ფონდი „სოხუმის“ მხარდაჭერით).

შეხვედრაზე დაიგეგმა პოლიტიკურ პარტიებთან მუშაობა, განხილულ იქნა  მათთან მემორანდუმის გაფორმების მიზანი.

პროექტი ხორციელდება აშშ საელჩოს მხარდაჭერით