22 აგვისტოს ჩატარდა იურიდიული საინფორმაციო-საკონსულტაციო შეხვედრა დევნილ 10 ქალბატონთან ქუთაისის ერთ-ერთ კოლექტიურ ცენტრში (ინვალიდთა საწარმო). დამსწრეებს მიეწოდა ინფორმაცია ქალთა უფლებებზე გენდერულ ჭრილში, ასევე გენდერულ საკითხებზე დასაქმებაში და გენდერულ თანასწორობაზე შრომის ბაზარზე. მონიტორინგის შედეგად გაირკვა, რომ გასულ თვეებში გაწეული კონსულტაცია  შედეგიანი იყო და ქუთაისის მერიის კეთილმოწყობის სამსახურმა მათ ეზოში დაამონტაჟა  გარე განათება.

19 აგვისტოს ჩატარდა ამომრჩეველ ქალთა კლუბის სხდომა სენაკის ქალთა მხარდაჭერის ცენტრში. ქალბატონებს მიეწოდათ ინფორმაცია პროექტის დასრულების შესახებ, ასევე ინფორმაცია, რომ ჩამოდის პროექტის შემფასებელი და მას სურს კლუბის აქტივისტებთან შევედრა.

შეკრებილებმა ისაუბრეს კლუბის ძლიერ და სუსტ მხარეებზე, გამოწვევებზე,  შესაძლებლობებზე და, რაც მთავარია, მიღწეულ შედეგებზე.

სასიამოვნო აღმოჩნდა მათთვის ინფორმაცია ახალი პროექტის ფარგლებში ამომრჩეველ ქალთა კლუბის საქმიანობის გაგრძელების შესახებ. 

ქალბატონებმა მწვავე პრობლემების ადვოკატირება დაისახეს მიზნად ადგილობრივ თვითმმართველობასთან და გენდერულ საკონსულტაციო საბჭოსთან აქტიური თანამშრომლობით.

ქუთაისის, სენაკის და ხურჩის (ზუგდიდის მუნიციპალიტეტი) ქალთა მხარდაჭერის ცენტრებში გაიმართა ფსიქოლოგიური ჯგუფური კონსულტაციები - მონაწილეობდა 36 ქალი 25-დან 67 წლამდე. შეხვედრების მთავარი სასაუბრო თემა იყო  მშობლებსა და შვილებს შორის ოჯახური კრიზისების მოგვარება, როგორც ძალადობის პრევენციის გზა.

ოჯახები, სადაც შვილებს პატივს სცემენ, უფრო კომფორტულად ცხოვრობენ. ოჯახი ვალდებულია, ჩამოაყალიბოს ფიზიკურად და ფსიქიკურად ჯანსაღი პიროვნება. ფსიქოლოგები ამტკიცებენ, რომ  ის ადამიანები, რომელთათვისაც მშობლები ზედმეტი ტვირთია, თვითონვე იქცევიან ხოლმე თავიანთი შვილებისთვის თავის ტკივილად. ხოლო ის, ვინც მშობლებს პატივისცემითა და სიყვარულით ექცევა, სიბერეში ბედნიერად ცხოვრობს, საყვარელი შვილებისა და შვილიშვილების გარემოცვაში.

ეთიკური ნორმების და პიროვნული კულტურის ფორმირება, როგორც იარაღი ძალადობის პრევენციისთვის - ამ თემაზე ჩატარდა ახალგაზრდული კლუბის შეხვედრები  ხონის და ხურჩა/კოკის ქალთა მხარდაჭერის ცენტრებში.

იყო საინტერესო ინტერაქტივი, საუბარი ეთიკაზე და ესთეტიკაზე. ერთ-ერთმა მონაწილე გოგონამ აღნიშნა: „ამ თემას ვერასოდეს დავაკავშირებდი ძალადობასთან და თურმე რამდენად მნიშვნელოვანია შინაგანი კულტურა და ეთიკა, როგორც იარაღი ძალადობის პრევენციისთვის.“

ფოთის ქალთა მხარდაჭერის ცენტრში შეხვედრის თემა იყო - ოჯახში ძალადობა, მიზეზები, ნეგატიური შედეგები და პრევენციული  მექანიზმები.

ახალგაზრდებმა ბევრი მაგალითი გაიხსენეს, ისაუბრეს ძალადობის მიზეზებსა და პრევენციულ ღონისძიებებზე, რომლებიც ასე საჭიროა საზოგადოებისთვის.

ქუთაისის ამომრჩეველ ქალთა კლუბის სხდომაზე შეკრებილი ქალბატონები ინტერესით გაეცნენ ჟურნალს „გენდერული საკონსულტაციო საბჭოები“, სადაც აღწერილია სამწლიანი პროექტის მუშაობის შედეგები და მიღწევები. 

შეხვედრის მონაწილეებმა გააანალიზეს კლუბის ძლიერი და სუსტი მხარეები, ისაუბრეს გამოწვევებსა და შესაძლებლობებზე.

პროექტი დასრულდა, მაგრამ კლუბი მუშაობას განაგრძობს ახალი პროექტის ფარგლებში, რომელიც მოიაზრებს თანამშრომლობას ადგილობრივ ხელისუფლებასთან და პოლიტიკურ პარტიებთან, ქალთა მხარდაჭერას არჩევნებში.

ქალბატონებმა არ უღალატეს ჩვეულებას - ისაუბრეს მოგვარებულ და მოსაგვარებელ პრობლემებზე. ზოგიერთი მათგანი უკვე შეარჩიეს ადვოკატირებისთვის.

ფორუმ-თეატრის წარმოდგენები ჩატარდა ფოთში, დევნილთა ახალ რაიონში. მაყურებელი, განსაკუთრებით ქალები, ძალიან გაააქტიურა ოჯახური კონფლიქტების და ძალადობის სცენებმა. იყო საინტერესო დისკუსია, საკუთარ შეცდომებზე გულახდილი საუბარი. ყოველივე ეს იძლევა შედეგს, რომ საზოგადოებამ სხვაგვარად აღიქვას ძალადობის პრობლემა.

ქუთაისში ქალთა საინიციატივო ჯგუფი ჩამოყალიბდა. მის შემადგენლობაში აქტიური, ლიდერული თვისებების მქონე შვიდი ქალი მოხვდა. მათ შორის ერთი ორგანიზატორია, რომელიც  ჯგუფის მუშაობას უხელმძღვანელებს.

ჯგუფის წევრები არიან ფონდი „სოხუმის“ აქტივისტები, რომლებიც სხვადასხვა ფორმატის ღონისძიებებში მონაწილეობდნენ. გავლილი აქვთ ასევე ვორკშოპები ადამიანური უსაფრთხოების საკითხებზე.

ჯგუფის წევრებს პრობლემების ადვოკატირების გამოცდილება გააჩნიათ, დიდი სურვილი აქვთ, მომავალში უფრო მეტად იაქტიურონ ამ მიმართულებით, დაეხმარონ საკუთარ თავს და სხვებსაც თემში არსებული პრობლემების მოგვარებაში.

დადგა პროექტის „ქალები იმპლემენტაციას უწევენ ინკლუზიურ მიდგომებს ადამიანური უსაფრთხოების სფეროში მდგრადი მშვიდობის დამყარებისათვის“ მომდევნო ეტაპი. უსაფრთხოების თემაზე ვორკშოპების ჩატარების შემდეგ წყალტუბოში, ქუთაისში, ხონში  ქალთა საინიციატივო ჯგუფები იქმნება.

წყალტუბოში საინიციატივო ჯგუფი 6 ქალისაგან შედგება. თითოეული მათგანი საგანგებოდ შედგენილი ანკეტებით შეირჩა. ერთ-ერთ პუნქტში, რატომ გსურთ გახდეთ საინიციატივო ჯგუფის წევრი, აქტივისტები წერენ, რომ მათ ირგვლივ ბევრი მოუგვარებელი პრობლემაა, რომელთა გადაჭრა შესაძლებელია ადგილობრივ დონეზე, ამიტომ სურთ აქტიურად ჩაერთონ პრობლემების ადვოკატირების პროცესში.

საინიციატივო ჯგუფის წევრები სპეციალურ ტრენინგს გაივლიან, რის შემდეგაც პრობლემათა ადვოკატირების პროცესებში ჩაერთვებიან.

მუნიციპალური ბიუჯეტის გენდერული ასპექტების ანალიზის ამოცანაა    განისაზღვროს და წინა პლანზე  წამოიწიოს არსებული სოციალური პრობლემები და ის, თუ რამდენად არის დაცული სოციალური სამართლიანობა და გენდერული თანასწორობა ადგილობრივ დონეზე, რამდენად არის უზრუნველყოფილი არსებული რესურსების ხელმისაწვდომობა საზოგადოების ყველა ჯგუფისათვის.

მოცემულ ანგარიშებში წარმოდგენილია ქუთაისის, სენაკის და ოზურგეთის  მუნიციპალიტეტების ბიუჯეტის და ადგილობრივი გენდერული პოლიტიკის  კვლევა/ანალიზი გენდერული პარამეტრების გათვალისწინებით.

ქუთაისი   ოზურგეთი   სენაკი

ივნის-ივლისში ქალთა მხარდაჭერის ცენტრებმა ფონდი „სოხუმის“ ფინანსური მხარდაჭერით დამოუკიდებელი პროექტები განახორციელეს. სწორედ ამ პროექტების არსი და მიღებული შედეგებია დაფიქსირებული საინფორმაციო ბიულეტენის მე-7  ნომერში. ამას გარდა მოთხრობილია საინფორმაციო-საკონსულტაციო შეხვედრებზე, ადვოკატირებულ პრობლემებზე, ძალადობის მსხვერპლთან მუშაობაზე - მოკლედ, ყველაფერზე, რაც ივლისში გაიმართა პროექტის „ქალთა უფლებების გაძლიერება დასავლეთ საქართველოში“ ფარგლებში.

გადმოწერა