ქუთაისში, ხონში, წყალტუბოში, სენაკში, ფოთში და ზუგდიდის მუნიციპალიტეტის სოფლებში - ხურჩასა და კოკში ჩატარდა სამობილიზაციო-საინფორმაციო შეხვედრები.

შეხვედრებზე განხილულ იქნა სხვადასხვა, დევნილი და ადგილობრივი ქალებისთვის საინტერესო და აქტულაური საკითხი. მაგრამ ერთ-ერთი უმთავრესი თემა იყო - მშვიდობის საერთაშორისო დღე. შეხვედრების მონაწილეებს მიაწოდეს ინფორმაცია ამ დღის მნიშვნელობაზე, დაიგეგმა ღონისძიებები, მათ შორის  მშვიდობის გაკვეთილები სკოლებში.

ფონდი „სოხუმის“ ორგანიზებით ქობულეთში, სასტუმრო „სანრაიზში“ სამდღიანი ტრენინგი გაიმართა. მასში მონაწილეობდნენ ქალთა საინიციატივო ჯგუფები ქუთაისიდან, ხონიდან, წყალტუბოდან. ტრენინგის დღის წესრიგით მონაწილეებმა იმუშავეს ადვოკატირების საკითხებზე: როგორ ხდება პრობლემათა იდენტიფიცირება, კამპანიის დაგეგმვა, სლოგანის დამუშავება, მესიჯ-ბოქსების შედგენა, სვოტ-ანალიზზე მუშაობა.

საინტერესო აღმოჩნდა მათთვის ადგილობრივი თვითმმართველობის უფლებამოსილების გაცნობა.  მინი-ლექციებს თან ახლდა პრაქტიკული სავარჯიშოები,  როლური თამაშები, ინტერაქტიული მუშაობა.

ბოლო დღეს ჯგუფებმა მუნიციპალიტეტების მიხედვით კონკრეტული პრობლემების ადვოკატირების სამოქმედო გეგმაზე იმუშავეს. გამოიკვეთა, რომ  მათ აქვთ სათანადო გამოცდილება, რაც მნიშვნელოვანია ადვოკატირებისას.

სამი დღის მანძილზე დიდი იყო მონაწილეთა ინტერესი, რაც უკუკავშირით დაფიქსირდა:  

-ჩემთვის ტრენინგი იყო საუკეთესო საშუალება საკუთარი რესურსების და შესაძლებლობების შესაფასებლად

-საინტერესო იყო სხვა მუნიციპალიტეტების  გამოცდილების მოსმენა, რაც მომავალში ჩვენს საქმიანობაშიც დაინერგება.

შემდეგ ეტაპზე საინიციატივო ჯგუფები სხვადასხვა პრობლემის ადვოკატირებას პრაქტიკულად შეეცდებიან.

წყალტუბოში ჩამოყალიბებული ამომრჩეველ ქალთა კლუბისთვის ჩატარდა ტრენინგი თემაზე „არჩევნები - როგორც დემოკრატიის საფუძველი, პოლიტიკური სისტემა და ქალთა როლი ამ პროცესებში“. არჩევნები აქტუალური თემაა და მონაწილეებმა ამომწურავი ინფორმაცია მიიღეს მწვრთნელებისგან.

ტრენინგი აქტიური დისკუსიის ფონზე მინდინარეობდა. მონაწილეებმა დააფიქსირეს, რომ თუ ქალები იქნებიან გადაწყვეტილების მიღების დონეზე, წინა პლანზე საჭირბოროტო საკითხები წამოიწევს. ამისათვის თავად ქალებმა უნდა შეუწყონ ხელი იმ აქტიური ქალბატონების წარმოჩენას, რომლებიც მათ თემში არიან.

პროექტი ხორციელდება აშშ საელჩოს მხარდაჭერით

წყალტუბოში, ქუთაისში და კოკში (ზუგიდიდის მუნიციპალიტეტი) ახალგაზრდული კლუბის საინფორმაციო შეხვედრების თემა იყო პრობლემების ადვოკატირება, მისი როლი და მნიშვნელობა.

შეხვედრების მონაწილე ახალგაზრდებმა აღნიშნეს, რომ განხილული თემა მათთვის მნიშვნელოვანია. ისინი თავიდანვე აქტიურად ჩაერთნენ დისკუსიაში, ისაუბრეს საკუთარი პრობლემების შესახებ და მათი გადაჭრის გზებზე.

მენტალიტეტი, პიროვნული ფასეულობები და მათი გავლენა ოჯახური კონფლიქტების განვითარებაზე - ამ თემაზე იმსჯელეს ფოთში, ქუთაისში და კოკში (ზუგდიდის მუნიციპალიტეტი) გამართულ კონფლიქტოლოგიის ვორკშოპზე.

მონაწილეები - ახალგაზრდები - როლური თამაშით შეეცადნენ თემის გაანალიზებას: წარმოდგენილი სცენარით ქმარს ხშირად ავიწყდება ქორწინების დღე, მით უმეტეს იცის, რომ ამ თარიღს მისი მეუღლე განსაკუთრებულ მნიშვნელობას ანიჭებს. დაპირისპირებაც სწორედ აქედან იწყება.

ახალგაზრდების აზრით, ადამიანებს განსხვავებული ფასეულობები გააჩნიათ, რაც ხშირად ხდება ოჯახში კონფლიქტების განვითარების მიზეზი. დისკუსიისას დაფიქსირდა, რომ ოჯახური ურთიერთობები ძირითადად ეფუძნება ურთიერთპატივისცემას, ამიტომ ის, რაც ერთი მხარისთვის უმნიშვნელო დეტალია, მეორისთვის შესაძლოა განსაკუთრებულად ღირებული იყოს. ამ თემაზე დისკუსია ეხმარება ახალგაზრდებს, სწორად იაზროვნონ და გაითვალისწინონ დეტალები, რომლებიც კონფლიქტების მართვას ხელს შეუწყობს პრაქტიკაში.

ბათუმში, „მეგობრობის სახლში“ ჩატარდა ამომრჩეველ ქალთა კლუბის სხდომა. შეხვედრაზე საუბარი შეეხო კლუბის განახლებულ მუშაობას და სამომავლო გეგმებს, ახალი პროექტის მიზნებსა და ამოცანებზე. იყო აზრთა და იდეათა გაზიარება ნაყოფიერი მუშაობისთვის. მათთვის მთავარია, არ განელდეს ის მუხტი, რაც კლუბის აქტივს გააჩნია და რაც ასე მნიშვნელოვანია ბათუმისათვის.

პროექტი ხორციელდება აშშ საელჩოს მხარდაჭერით

ზუგდიდში, დემოკრატიული ჩართულობის ცენტრში ჩატარდა ამომრჩეველ ქალთა კლუბის პირველი სხდომა. შეკრებილ ქალბატონებს მიეწოდათ ინფორმაცია, რომ ფონდი „სოხუმის“ ახალი პროექტის ფარგლებში კლუბები იმუშავებს დასავლეთ საქართველოს 8 ქალაქში. მათ ასევე მოისმინეს ინფორმაცია ფონდი „სოხუმის“ საქმიანობის შესახებ, განსაკუთრებით ადგილობრივი პოლიტიკის დანერგვის კუთხით.

ამომრჩეველ ქალთა კლუბის წევრებმა მოიწონეს ახალი პროექტი და აღნიშნეს, რომ მზად არიან თანამშრომლობისთვის. მათი აზრით, მუშაობა შედეგზე უნდა იყოს ორიენტირებული.

პროექტი ხორციელდება აშშ საელჩოს მხარდაჭერით

ქუთაისში ფსიქოლოგთან შეხვედრა გაიმართა შეზღუდული შესაძლებლობების მქონე ადამიანების დღის ცენტრში „ვალენტინი“, დანარჩენი ორი შეხვედრა კი ჩატარდა სენაკისა და ხურჩის (ზუგდიდის მუნიციპალიტეტი) ქალთა მხარდაჭერის ცენტრებში.

საუბრის თემა იყო - ასაკობრივი ფსიქოლოგიის გენდერული თავისებურებები, როგორც ოჯახში ძალადობის პრევენცია.

„აუცილებელია გავიგოთ და მივიღოთ კიდეც ის ფაქტი, რომ ძირითადი გენდერული განსხვავებები, რომლებიც მამაკაცსა და ქალს შორის არსებობს, რეალური და შეუცვლელია. თქვენ შეგიძლიათ ისწავლოთ ამ განსხვავებულობის გამოყენება, რათა გაუმჯობესდეს თქვენი ურთიერთობები“,- აღნიშნა ფსიქოლოგმა.

ქუთაისის ამომრჩეველ ქალთა კლუბის წევრი ლია გვენეტაძე პარლამენტის მაჟორიტარობის კანდიდატია. კლუბმა გაფართოებული სხდომა ჩაატარა და შეხვდა თავის კოლეგას. ქალბატონმა ლიამ შეკრებილებს მიაწოდა ინფორმაცია თავისი პროგრამის შესახებ, თუ რის გაკეთებას და შეცვლას აპირებს პარლამენტში მოსვლის შემთხვევაში. პროგრამის ბევრი პუნქტი კლუბზე დასმულ საკითხებს ეხმაურება. შეკრებილმა ქალბატონებმა საჭირბოროტო საკითხებზე ისაუბრეს და კანდიდატისაგან შესაბამისი პასუხებიც მიიღეს.

პროექტი ხორციელდება აშშ საელჩოს მხარდაჭერით

თემაზე - ტოლერანტობის აღქმა მოზარდებში ძალადობის პრევენციისთვის - ახალგაზრდული კლუბის საინფორმაციო შეხვედრები ჩატარდა ხონში, სენაკში და ფოთში.

მონაწილეებმა საინტერესოდ ისაუბრეს თემის გარშემო. ზოგიერთმა მათგანმა აღნიშნა, რომ ტოლერანტულობა, ძირითადად, არის მარტო სიტყვები, რადგანაც ისინი ხშირად გამოხატავენ აგრესიებს, ვერ ითვალისწინებენ სხვა ეროვნებისა თუ სარწმუნოების ადამიანების საჭიროებებს და პრობლემებს.

ერთ-ერთმა მონაწილემ აღნიშნა: „მე მომეწონა ამ საკითხის დაკავშირება ძალადობის პრევენციასთან. ნამდვილად აქტუალური და სადისკუსიო თემაა.“