ახალგაზრდული კლუბების საინფორმაციო შეხვედრები გაიმართა ხონის ქალთა მხარდაჭერის ცენტრში, ფოთის მე-7 საჯარო სკოლაში და წყალტუბოს 1-ლ საჯარო სკოლაში.

ქართულ-აფხაზური კონფლიქტის თემა საინტერესო აღმოჩნდა როგორც აფხაზეთიდან დევნილი, ისე ადგილობრივი ახალგაზრდებისთვის. ისინი ინტერესით ჩაერთნენ დისკუსიაში, გაიხსენეს რეალური ისტორიები, ისაუბრეს კონფლიქტის მოგვარებაზე, მოლაპარაკებებზე, ეკონომიკურ განვითარებაზე, ახალგაზრდა თაობასთან დიალოგზე.

„ასეთი შეხვედრების შემდეგ უფრო მეტი ინტერესი გვიჩნდება თემის მიმართ და დიდი სურვილიც, ჩავერთოთ დიალოგში. ჩვენ შეგვიძლია ახალი ფურცლიდან დავიწყოთ ურთიერთობა“, - აღნიშნეს შეხვედრების მონაწილე ახალგაზრდებმა.

ხონის, წყალტუბოს და ქუთაისის ქალთა საინიციატივო ჯგუფებმა აქცია მოაწყვეს პროექტის „ქალები იმპლემენტაციას უწევენ ინკლუზიურ მიდგომებს ადამიანური უსაფრთხოების სფეროში მყარი მშვიდობის დასამყარებლად“ ფარგლებში. მათ შეაგროვეს მეორადი მოხმარების ნივთები და გადასცეს წყალტუბოს ინკლუზიურ ცენტრს. ცენტრის ხელმძღვანელთან საუბრისას ფონდ „სოხუმთან“ სამომავლო თანამშრომლობის კონტურებიც გამოიკვეთა. ქალთა საინიციატივო ჯგუფები მსგავს აქციას მომავალშიც გეგმავენ.  

ფსიქიკური ჯანმრთელობის საერთაშორისო დღეს მიეძღვნა ფონდ „სოხუმში“ ქალთა მხარდაჭერის ცენტრის მობილიზატორებისათვის ჩატარებული ვორკშოპი თემაზე „კრიზისული ოჯახების იდენტიფიკაცია და შემდგომი ინტერვენცია“. ვორკშოპს უძღვებოდა ფონდი „სოხუმის“ ფსიქოლოგი. მობილიზატორებს მიეწოდათ ინფორმაცია, თუ როგორ მოახდინონ კრიზისული ოჯახების იდენტიფიკაცია, როგორ დაძლიონ შესაძლო სირთულეები, როგორ მოიქცნენ, თუ ქალი ან ბავშვი ძალადობის მსხვერპლია? მობილიზატორებისათვის სპეციალურად მომზადდა გზამკვლევი და რჩევები.

ქუთაისის, ხონის, წყალტუბოს, სენაკის, ფოთის და ხურჩა/კოკის (ზუგდიდის მუნიციპალიტეტის) ქალთა მხარდაჭერის ცენტრების მობილიზატორები ქუთაისში, ფონდი „სოხუმის“ ოფისში შეიკრიბნენ. გაკეთდა ჩატარებული მუშაობის მოკლე ანგარიში. კოორდინატორმა გააანალიზა მობილიზატორების მიერ ჩაბარებული ანგარიშები, აქცენტი გააკეთა ძირითად ნაკლოვანებებზე, განხილულ იქნა კარგი ანგარიშების მაგალითები.

მობილიზატორებმა ისაუბრეს პრობლემებზე და მომავალ გეგმებზე. ფონდის ხელმძღვანელმა მიაწოდა მათ ინფორმაცია მომავალი ეტაპის მცირე პროექტების დაფინანსების შესახებ. პროექტების ხანგრძლივობა - 1 თვე, ძირითადი მიმართულებები - ძალადობის პრევენცია და მსხვერპლთა დაცვა. ღონისძიებები უნდა ჩატარდეს კამპანიის „16 აქტიური დღე ქალთა მიმართ ძალადობის წინააღმდეგ“ ფარგლებში.

ხონის საკრებულოში, მრჩეველთა საბჭოს მორიგ სხდომაზე სოციალური ჩართულობის სტრატეგიის დოკუმენტის სამუშაო ვარიანტი განიხილეს. საბჭოს წევრები კიდევ ერთხელ  შეჩერდნენ მუნიციპალიტეტის სოციალური პოლიტიკის სტრატეგიულ მიზნებსა და ამოცანებზე, არსებულ გამოწვევებზე, რათა ყურადღების მიღმა არ დარჩეს მოქალაქეების ყველაზე მოწყვლადი ჯგუფების საჭიროებები.

კიდევ ერთხელ გამოიკვეთა შშმ პირებისადმი სოციალური ზრუნვის პოლიტიკის აუცილებლობა,  ხანდაზმულებისათვის პოზიტიური სოციალური გარემოს შექმნა, დევნილთა ჯგუფებისთვის მნიშვნელოვანი საკითხები (დასახლებაში ამბულატორიის გახსნა, საბავშვო ბაღებში ბაგის ასაკის ბავშვების ჯგუფის დაშვება და ა.შ.).

(PIN პროექტი „სოციალური დაცვის საკითხებზე მომუშავე არასამთავრობო ორგანიზაციების ჩართულობის გაძლიერება სტრატეგიულ დიალოგში საქართველოში ფარგლებში“ დაფინანსებულია ევროკავშირის და ჩეხეთის საგარეო საქმეთა სამინისტროს მიერ).

პროექტი ხორციელდება ჩეხური ორგანიზაცია „ადამიანი გაჭირვებაში“ PIN მხარდაჭერით 

წყალტუბო

8 ოქტომბერს საქართველოში საპარლამენტო არჩევნებია. ქალ-კანდიდატებს შორის წარმოდგენილია ბევრი ღირსეული და გამოცდილი ქალბატონი. მთავარია, ამომრჩეველმა მათზე გააკეთოს არჩევანი. სწორედ ქალი-კანდიდატების მხარდასაჭერად გამართეს აქცია 4 ოქტომბერს ფონდი „სოხუმის“ ამომრჩეველ ქალთა კლუბებმა.

მშვიდობიანი მდუმარე აქცია ერთდროულად მოეწყო დასავლეთ საქართველოს შვიდ ქალაქში - ქუთაისი, ხონი, წყალტუბო, სენაკი, ხობი, ზუგდიდი, ოზურგეთი, ბათუმი.

აქციაში მონაწილეობა მიიღეს ამომრჩეველ ქალთა კლუბის წევრებმა, ადგილობრივი არასამთავრობო ორგანიზაციების წარმომადგენლებმა. აქციები გაშუქდა მედიასაშუალებების მეშვეობით.

აქციის მონაწილეებმა სოლიდარობა გამოხატეს ქალი-კანდიდატების მიმართ, მათი მხარდაჭერისკენ მოუწოდეს საზოგადოებას და შეახსენეს, რომ თანასწორობა ქვეყნის სიძლიერეა, რომ მეტი ქალი პოლიტიკაში არის მშვიდობა, დემოკრატია, კეთილდღეობა!

სექტემბერში გაიმართა 12 შეხვედრა აფხაზეთიდან იძულებით გადაადგილებულ პირებთან. შეხვედრებს ესწრებოდა 82 ქალი. მათ მიეწოდათ ინფორმაცია შემდეგ საკითხზე: კონფლიქტის მოგვარება მედიაციის გზით. ასევე გაიცა ორი ინდივიდუალური კონსულტაცია - ერთ-ერთ მონაწილეს დეიდის გადაყვანა სურს მოხუცთა თავშესაფარში. მეორე კი ხელშეკრულების პირობების დარღვევით გამოწვეული ზიანის ანაზღაურებისათვის გადამისამართდა საიაში.

მონიტორინგის შედეგად გაირკვა, რომ უკვე დაკმაყოფილდა მოთხოვნა ერთ-ერთი ბენეფიციარისა, რომელსაც წინა თვეებში გაეწია კონსულტაცია.

სექტებერში ქუთაისის კომპაქტურ ჩასახლებებში გაიმართა 14 ჯგუფური და 3 ინდივიდუალური ფსიქოლოგიური შეხვედრა. შეხვედრებს ესწრებოდა 21-დან 67 წლამდე ასაკის 82 ქალბატონი, პირველად მონაწილეობდა 14 ადამიანი. საუბარი, ძირითადად, შეეხო თემას „ასაკობრივი ფსიქოლოგიის გენდერული თავისებურებები, როგორც ოჯახში ძალადობის პრევენცია“.

ტრადიციულად, სექტემბრის თვეშიც ჩატარდა იურიდიული საინფორმაციო-საკონსულტაციო შეხვედრები ქუთაისის, ხონის, წყალტუბოს, სენაკის, ფოთის და ხურჩის (ზუგდიდის მუნიციპალიტეტი) ქალთა მხარდაჭერის ცენტრებში. შეხვედრის მონაწილეები იყვნენ ქალებიც და მამაკაცებიც.

შეხვედრებზე დაისვა უამრავი მნიშვნელოვანი საკითხი - ოჯახში ძალადობა, ოჯახური კონფლიქტები და მათი გამომწვევი მიზეზები, პრობლემის მოგვარება მედიაციის გზით, განქორწინების პროცედურა.

განხილულ იქნა სხვადასხვა ქეისი. წინა შეხვედრებზე დასმული პრობლემები მოგვარდა ქუთაისსა და ხონში. სენაკში კი  კონსულტაცია გაიარა ძალადობის მსხვერპლმა და იურისტის დახმარებით გამოწერილ იქნა დამცავი ორდერი.

23 სექტემბერს, ბათუმში ჩატარდა ტრენინგი ამომრჩეველ ქალთა კლუბის წევრთათვის. ტრენინგის თემატიკამ მონაწილეები დააინტერესა, გამომდინარე იქედან, რომ მათთვის მნიშვნელოვანია გენდერის თემა და ქალთა აქტიურობა. გამოიკვეთა არჩევნებთან დაკავშირებული საკითხების მიმართ ინტერესიც, რადგან თავად მონაწილეები აქტიურად არიან ჩართულები ამ პროცესში. შეხვედრაზე ხაზგასმულ იქნა ქალი-კანდიდატების მხარდაჭერის აუცილებლობა.

პროექტი ხორციელდება აშშ საელჩოს მხარდაჭერით