ფონდ „სოხუმში“ კამპანიის დაწყებამდე გაიმართა შეხვედრა ჟურნალისტებთან. ქუთაისის მედიასაშუალებებმა მიიღეს ინფორმაცია 16-დღიანი კამპანიის და დაგეგმილი ღონისძიებების შესახებ. ამ თემაზე ინფორმაციები გავიდა რადიო და ტელეეთერით.

ტელეკომპანია „რიონის“ ინიციატივით  საღამოს პირდაპირ ეთერში გაიმართა დისკუსია, რომელშიც მონაწილეობდნენ საკრებულოს დეპუტატი, ფსიქოლოგი, იურისტი, სტუდენტები, ფონდი „სოხუმის“ წარმომადგენლები.

გაისმა მთავარი მესიჯი საზოგადოების თითოეული წევრის მიმართ: იგრძენი პასუხისმგებლობა - შეაჩერე ძალადობა!

ქუთაისის ქალთა მხარდაჭერის ცენტრმა გენდერული ძალადობის წინააღმდეგ მიმართულ კამპანიას მიუძღვნა პროექტი, რომლის ფარგლებშიც მოხდა ფილმი-სიუჟეტის გადაღება. ფილმში საუბარია ქალთა მხარდაჭერის ცენტრის მუშაობაზე, ძალადობის პრობლემაზე, გამოსავალზე.

პროექტის დასასრულს გაიმართა პრეზენტაცია, ნაჩვენები იქნა ფილმი-სიუჟეტი. შეხვედრაზე მოწვეულნი იყვნენ ქუთაისის გენდერული საკონსულტაციო საბჭოს წევრები, ფონდი „სოხუმის“ აქტივისტები, პარტნიორი არასამთავრობო ორგანიზაციების და მასმედიის წარმომადგენლები.

აქტიურმა დისკუსიამ ნათლად წარმოაჩინა პრობლემის აქტუალობა და თითოეული ადამიანის სურვილი, მეტი გააკეთოს ძალადობის პრევენციისათვის.

ოზურგეთის ამომრჩეველ ქალთა კლუბის მორიგი შეხვედრა დაეთმო კლუბისა და გენდერული საბჭოს წევრების აქტიურ ჩართულობის დაგეგმვას 16-დღიან კამპანიაში ქალთა მიმართ ძალადობის წინააღმდეგ. გადაწყდა, რომ საბჭოსა და კლუბის წევრები ერთობლივად ჩაატარებენ საინფორმაციო შეხვედრებს ადგილობრივი თვითმმართველობის წარმომადგენლებთან, ვორკშოპებს - ქალაქისა და მუნიციპალიტეტის სკოლებსა და ბაღებში, კოლეჯ „ჰორიზონტში“.

სხდომაზე აღინიშნა, რომ ქალაქ ოზურგეთის საკრებულოში აქტიურად მიდის მუშაობა გენდერული თანასწორობის საბჭოს ჩამოსაყალიბებლად.

პროექტი ხორციელდება აშშ საელჩოს მხარდაჭერით

ქალთა მხარდაჭერის ცენტრების მობილიზატორებმა სამობილიზაციო შეხვედრები  ჩაატარეს სხვადასხვა ჯგუფთან ქალაქებსა და სოფლებში ქუთაისში, ფოთში, აგრეთვე წყალტუბოს, სენაკის,  ხონის და ზუგდიდის მუნიციპალიტეტებში.

შეხვედრების თემა, ძირითადად, გენდერულ ძალადობას შეეხებოდა. მონაწილეებს მიეწოდათ ინფორმაცია 16-დღიანი კამპანიის შესახებ ქალთა მიმართ ძალადობის წინააღმდეგ. დაიგეგმა სხვადასხვა აქტივობა.

ქუთაისის ამომრჩეველ ქალთა კლუბის სხდომაზე კლუბის წევრებმა ისაუბრეს საპარლამენტო არჩევნების შედეგებზე. აღნიშნეს, რომ  წინა პარლამენტთან შედარებით წელს მეტი ქალია წარმოდგენილი. მათი აზრით, ეს წინგადადგმული ნაბიჯია, თუმცა  თვლიან, რომ მაინც არასაკმარისია და ემხრობიან კვოტირებას.

საუბარი შეეხო მზადებას საერთაშორისო კამპანიისთვის „16 აქტიური დღე ქალთა მიმართ ძალადობის წინააღმდეგ“. კლუბის წევრებმა გამოთქვეს სურვილი, ჩაატარონ საინფორმაციო შეხვედრები სკოლის მოსწავლეებთან, პოლიტიკური პარტიის წარმომადგენლებთან, ბაღის აღმზრდელებთან  და სხვა...

ყურადღების მიღმა არ დარჩენილა ადგილობრივი პრობლემების ადვოკატირებაც. სხდომაზე განიხილეს რიგი  საკითხები და მათგან შეარჩიეს განსაკუთრებით პრიორიტეტულები.

ხონის ქალთა მხარდაჭერის ცენტრი, ფოთის მე-7 და კოკის (ზუგდიდის მუნიციპალიტეტი) საჯარო სკოლები - კიდევ სამი საინფორმაციო შეხვედრა გაიმართა ახალგაზრდულ კლუბებში.

თემა აქტუალური და მნიშვნელოვანი: გენდერული ძალადობა, მიზეზები და მექანიზმები პრევენციისთვის.

შეხვედრების მონაწილეებმა იმსჯელეს ძალადობის მიზეზებზე, მენტალიტეტზე. ერთმა მონაწილემ, რომლის დედა საზღვარგარეთაა, აღნიშნა: „მე წინააღმდეგობას ვუწევ მამას, რომელიც არ მუშაობს და დედას თხოვს ფულს. ჩვენ ბევრჯერ შევთავაზეთ, თვითონ წასულიყო და დედა შინ დაბრუნებულიყო, მაგრამ ამაოდ. მე ყველაფერს გავაკეთებ, რომ ასეთი ცხოვრება არ მქონდეს. ჩემი ოჯახი დიდი გაკვეთილია ჩემთვის“.

საკრებულოს სხდომათა დარბაზში ხონის ქალთა საინიციატივო ჯგუფის წევრები შეიკრიბნენ. შეხვედრაზე მოწვეული იყო თვითმმართველობის შესაბამისი სამსახურის წარმომადგენელი, რომელმაც შეაფასა ადვოკატირების საკითხის გარშემო (მთავარი ბიბლიოთეკის ცენტრალური გათბობის მოწესრიგება) არსებული სიტუაცია და თვითმმართველობის პოზიცია გამოხატა.

როგორც აღინიშნა, საკითხი უკვე დგას ადგილობრივ დღის წესრიგში, მაგრამ თემის აქტუალობას ზრდის სამოქალაქო აქტიურობა, ხელმოწერები.

შეხვედრაზე  დაიგეგმა ადვოკატირების მომდევნო ეტაპები, რომელთა შორის ყველაზე მნიშვნელოვანია ადგილობრივი ბიუჯეტის განხილვაში მონაწილეობა, რაც საშუალებას იძლევა მომავალი წლის პროგრამებში მოხდეს სასურველი საკითხების გათვალისწინება.

ხონის საკრებულოში ჩატარდა ამომრჩეველ ქალთა კლუბის სხდომა. შეკრებილებმა ისაუბრეს 2016 წლის საპარლამენტო არჩევნების მეორე ტურის შედეგებზე, ქალთა მიმართ ძალადობის წინააღმდეგ 16-დღიანი კამპანიის ფარგლებში ღონისძიებების დაგეგმვაზე, ადგილობრივი პრობლემების გამოვლენასა და ადვოკატირებაზე.

აღინიშნა, რომ 25 ნოემბერს ძალადობის წინააღმდეგ მიმართულ აქციაში მონაწილეობა აუცილებელია - მოხდება პრობლემის აქტუალობის გააზრება საზოგადოების ფართო სპექტრში.

პროექტი ხორციელდება აშშ საელჩოს მხარდაჭერით

ბათუმის ამომრჩეველ ქალთა კლუბის სხდომაზე გაგრძელდა მსჯელობა  წინა თვეში დასმულ საკითხზე - ლერმონტოვის 107-ში გადახურვის და სარდაფის დაბინძურების პრობლემა. მოწვეულმა სტუმარმა - აიპი კორპუსების  წარმომადგენელმა ისაუბრა არსებულ პროგრამებზე და პრობლემის მოგვარების გზაზე.

შეხვედრაზე დაიგეგმა 16-დღიან კამპანიაში ქალთა მიმართ ძალადობის წინააღმდეგ კლუბის ჩართულობა. გაიწერა კონკრეტული ღონისძიებები.

შეხვედრას ესწრებოდა ქობულეთის საკრებულოს დეპუტატი ლია შაქარიშვილი, რომელმაც ამომრჩეველ ქალთა კლუბის წევრობის სურვილი გამოთქვა.ის დაინტერესებულია საკრებულოში გენდერული თანასწორობის საბჭოს შექმნით,ამასთან დაკავშირებით მან კონსულტაცია გაიარა ბათუმის გენდერული საკონსულტაციო საბჭოს წევრებთან, რომლებიც ამჟამად კლუბში არიან გაერთიანებულნი.

პროექტი ხორციელდება აშშ საელჩოს მხარდაჭერით

ხონის გამგეობაში მრჩეველთა საბჭოს გაფართოებული სხდომა გაიმართა, რომელზეც შეთანხმება მოხდა ადგილობრივი სოციალური ჩართულობის სტრატეგიის სამოქმედო გეგმის ძირითად  მიმართულებებზე. საბავშვო ბაღებში ახალი ჯგუფების დამატება და ყველაზე მეტი საჭიროების მქონე სკოლამდელი დაწესებულებების ინვენტარიზაცია; ხანდაზმულთა სოციალური ინკლუზია - სამრეცხაო „სათნოების სახლის“ ბინადართათვის; შშმ პირებისათვის ადაპტირებული ტრანსპორტის შეძენა - მონაწილეთა  ფოკუსში, ძირითადად,  ეს  საკითხები მოხვდა.  

შეხვედრის მონაწილეებმა - საბჭოს წევრებმა, თვითმმართველობის სხვადასხვა სამსახურის წარმომადგენლებმა - საფუძვლიანად განიხილეს პროგრამებისთვის საჭირო ხარჯი, ეფექტი და ადგილობრივი ბიუჯეტის რესურსი თანადაფინანსებისთვის.

როგორც აღინიშნა, ყველა მიმართულება მნიშვნელოვანია და ყველაზე მეტად მოწყვლადი ჯგუფების საჭიროებებს ასახავს.

უახლოეს პერიოდში იგეგმება ტრენინგი პროექტების შემოტანის მსურველთთვის. 

პროექტი ხორციელდება ჩეხური ორგანიზაცია „ადამიანი გაჭირვებაში“ PIN მხარდაჭერით