ოჯახში ძალადობის პრობლემები, გენდერული ძალადობა, ნეგატიური შედეგები და პრევენციული მექანიზმები ძალადობის პრევენციისთვის - ამ და სხვა საკითხებზე გაიმართა საინფორმაციო შეხვედრები წყალტუბოს მე-4 და მენჯის საჯარო სკოლებში, ქუთაისის ბავშვთა სოფელში.

ახალგაზრდებმა საინტერესო მაგალითები მოიყვანეს, ისაუბრეს ტრადიციებზე, ქალის როლზე ქართულ ოჯახში, ძალადობის მიზეზებზე, თანაბარუფლებიან საზოგადოებაზე.

ხობის ამომრჩეველ ქალთა კლუბი აქტიურად ემზადება 16-დღიანი კამპანიისთვის ქალთა მიმართ ძალადობის წინააღმდეგ. ბოლო შეხვედრაზე იმსჯელეს ამ პრობლემაზე, გაჟღერდა ერთ-ერთი მსხვერპლის ისტორია, აღინიშნა ქალებისა და მამაკაცების ჯგუფებთან სპეციალური საუბრების გამართვის აუცილებლობა ძალადობასა და მსხვერპლის დაცვის მექანიზმებზე - განსაკუთრებით სოფლებში. 16-დღიანი კამპანიის ფარგლებში დაიგეგმა ქალთა ხელნაკეთი ნივთების გამოფენა-გაყიდვა, საინფორმაციო შეხვედრები საბავშვო ბაღებსა და სკოლებში.

სხდომას ესწრებოდა ხობის საკრებულოს თავმჯდომარის მოადგილე მამუკა ქარდავა, რომლემაც მხარდაჭერა გამოხატა კლუბის წევრი ქალების  ინიციატივების მიმართ.

პროექტი ხორციელდება აშშ საელჩოს მხარდაჭერით

ფონდი „სოხუმის“ ფორუმ-თეატრმა ქუთაისში, ბავშვთა სოფელში 5 სცენა წარმოადგინა. აქტიური დისკუსიის დროს ბავშვები ყვებოდნენ თავიანთი ოჯახების ისტორიებს. განსაკუთრებითგულახდილები იყვნენ ოჯახური ძალადობის სცენების ნახვის შემდეგ. არ იყო გასაკვირი, რომ ყველამ დაიცვა ქალის უფლებები.

ბავშვთა სოფელში მცხოვრები მოსწავლეები დიდი ინტერესით ჩაერთნენ სცენებში და ცდილობდნენ, ისე ეთამაშათ, რომ ძალადობა არ განვითარებულიყო და პრობლემა მოგვარებულიყო.

ეს დღე საინტერესო იყო ფორუმ-თეატრის მსახიობებისთვისაც და ბავშვთა  სოფლის პატარა მცხოვრებთათვისაც.

ქუთაისში, დევნილთა კომპაქტური ჩასახლების ადგილებში ოქტომბრის განმავლობაში  გაიმართა 12 ფსიქოლოგიური ჯგუფური და 3 ინდივიდუალური კონსულტაცია. შეხვედრებში მონაწილეობა მიიღო 82 ქალმა 20-დან 65 წლამდე. პირველად მონაწილეობდა 9 ქალი. საუბრის თემა იყო  - რატომაა ქალებისთვის აუცილებელი საკუთარი ღირსების განცდა.

ღირსებას რამდენიმე შემადგენელი აქვს: საკუთარი თავის მიმართ სიყვარული, თავდაჯერებულობა და საკუთარი თავის მიღება ისეთად, როგორიც ხარ. შეხვედრები გულახდილი, საინტერესო და პრაქტიკული გამოვიდა.

26 ოქტომბერს, დემოკრატიული ჩართულობის ცენტრში ჩატარდა ოზურგეთის ამომრჩეველ ქალთა კლუბის სხდომა. შეხვედრაზე შეჯამდა არჩევნების შედეგები. აღინიშნა - მარტო იმიტომ, რომ ქალია, ხმის მიცემა მართებული არ არის. საჭიროა კარგი, ღირსეული კანდიდატები წარადგინონ პარტიებმა, საზოგადოებისათვის ცნობილი, პატივსაცემი სახეები. ამისათვის აუცილებელია პარტიებთან აქტიური მუშაობა.

სხდომაზე განხილულ იქნა  წინა შეხვედრაზე დასმული პრობლემა - ქალბატონი სოციალურად დაუცველია, 3 მცირეწლოვანი შვილი ჰყავს. კლუბის წევრმა, სოციალური სამსახურის უფროსმა თამარ დუმბაძემ ერთ-ერთი ბავშვი კვების პროგრამაში ჩასვა. გაკეთდა სახლში დაბადებული ბავშვის დაბადების მოწმობა და ის ამიერიდან მიიღებს სამედიცინო მომსახურებას, რომელსაც საჭიროებს. კლუბმა გადაწყვიტა ქალბატონს დაეხმაროს საკვებით და ტანსაცმლით, რომლის შეგროვებასაც გაუკეთებენ ორგანიზებას.

პროექტი ხორციელდება აშშ საელჩოს მხარდაჭერით

ფონდ „სოხუმში“ ორი დღის განმავლობაში იმყოფებოდნენ  სტუმრები გერმანიიდან - ქალთა ფონდი „ფილიას“ წარმომადგენლები.

25 ოქტომბერს „ფილიას“ ახალგაზრდული საბჭოს წევრები შეხვდნენ ფორუმ-თეატრის მსახიობებს. ერთმანეთს გაუზიარეს შთაბეჭდილებები, გაეცნენ ფორუმ-თეატრის მუშაობის სპეციფიკას. ახალგაზრდებმა ადვილად გამონახეს საერთო ენა.

მეორე დღეს გაიმართა გაცნობითი შეხვედრა, რომელსაც ესწრებოდნენ ფონდი „სოხუმის“ და ზუგდიდის ორგანიზაცია „მერკურის“ წარმომადგენლები. ისაუბრეს შედეგებზე, მიღწევებზე, პრობლემებზე. დაისახა სამომავლო თანამშრომლობის პერსპექტივები.

ოქტომბერში ჩატარდა 12 შეხვედრა ქუთაისის კოლექტიურ ცენტრებში აფხაზეთიდან იძულებით გადაადგილებულ ქალბატონებთან. შეხვედრებს ესწრებოდა 82 ქალბატონი.

შეხვედრებზე მოხდა ქალების ინფორმირება ძალადობის წინააღმდეგ არსებული კანონის კონკრეტული პუნქტების მიხედვით, ასევე არჩევნებში ქალთა ჩართულობის მნიშვნელობაზე და ქალი-დეპუტატების აუცილებლობაზე პარლამენტში ქალთა უფლებების დაცვის კუთხით. გაიცა 2 ინდივიდუალური კონსულტაცია. ერთ-ერთი ბენეფიციარის 15 წლის შვილი გახდა ძალადობის მსხვერპლი ქმრისგან. კონსულტაციის შემდეგ ფონდი „სოხუმის“ იურისტმა ქალბატონი გადაამისამართა იურიდიულ ბიუროში, რათა ადვოკატმა დაიცვას მისი უფლებები სასამართლოში.

ამომრჩეველ ქალთა კლუბის შეხვედრა გაიმართა გაზეთ „ხობის მოამბის“ რედაქციაში.  კლუბის წევრებმა განიხილეს საპარლამენტო არჩევნების შედეგები. ხობის საარჩევნო კომისიის მდივანმა მოიყვანა ამომრჩევლების რაოდენობრივი მონაცემები. უნდა აღინიშნოს, რომ მამაკაცთა აქტიურობა მეტი იყო - მონაწილეობდა 14 132 მამაკაცი და 11 980 ქალი. ეს ფაქტი მიუთითებს იმაზე, რომ საჭიროა ადგილობრივი ქალების გააქტიურება, მათი ინფორმირების გაზრდა, თუმცა, უნდა ითქვას ისიც, რომ საარჩევნო კომისიებში ქალები 70%-ს წარმოადგენდნენ.

შეხვედრაზე მოწვეული იყო ხობის გამგებლის წარმომადგენელი სოფელ პირველ მაისში მარინე ლაგვილავა. მან შეკრებილებს უამბო, როგორ მოვიდა პოლიტიკაში და როგორ შეიცვალა სოფლის ცხოვრება მისი აქტიური საქმიანობისა და ძალისხმევის შედეგად.

სხდომაზე გაიმართა იმ ადგილობრივი პრობლემების განხილვა, რომელთა ადვოკატირებაცაა საჭირო, დაისახა მათი მოგვარების გზები და ასევე - საკითხები მომავალი სხდომისთვის.

პროექტი ხორციელდება აშშ საელჩოს მხარდაჭერით

სენაკის ამომრჩეველ ქალთა კლუბის მორიგ სხდომაზე გაიმართა საპარლამენტო არჩევნების შედეგების განხილვა. აღინიშნა ის ფაქტი, რომ არჩევნებზე წარმოდგენილი არ იყო არც ერთი ქალი-კანდიდატი. რაც შეეხება ამომრჩევლების აქტიურობას, აქ ქალთა პროცენტული მაჩვენებელი მეტია - მონაწილეობდა 52,09% ქალი (12 177) და 47,91% მამაკაცი (11 200).

ფონდი „სოხუმის“ და ფონდ „კარიტასის“ საქველმოქმედო აქციის ფარგლებში, ერთ-ერთ სოციალურად დაუცველ ოჯახს გადაეცა საჩუქრები - ჰიგიენის საშუალებები, საბავშვო სათამაშოები, სურსათი და ტანსაცმელი. ოჯახის წევრებმა დიდი მადლიერება გამოხატეს მხარდაჭერისთვის.

ქუთაისის, სენაკის, ხურჩის (ზუგდიდის მუნიციპალიტეტი) ქალთა მხარდაჭერის ცენტრებში ჩატარდა ფსიქოლოგიური ჯგუფური კონსულტაციები, სადაც მონაწილეობდა 23 ქალი 22-დან 65 წლამდე. ინდივიდუალური კონსულტაციები ორმა ქალმა. ამ შეხვედრებზე საუბრის ძირითადი თემა იყო  - რატომაა ქალებისთვის აუცილებელი საკუთარი ღირსების განცდა.

პასუხი ასეთია: ჯანსაღი ურთიერთობისთვის, საკუთარი პოტენციალის რეალიზებისათვის, რათა მიიღო და გასცე სიყვარული და არ გახდე ოჯახში ძალადობის მსხვერპლი.