ფორუმ-თეატრის ჩვენებები ჩატარდა კოკის (ზუგდიდის მუნიციპალიტეტი) და მენჯის (სენაკის მუნიციპალიტეტი) სკოლებში. ნათამაშები იყო 10-ზე მეტი სცენა. დისკუსია აქტიურობით გამოირჩეოდა, პედაგოგებიც ჩაერთნენ. ახალგაზრდა მსახიობებმა განსაკუთრებით საინტერესოდ წარმოადგინეს დედა-შვილის ურთიერთობა, რამაც დიდი ინტერესი და აზრთა სხვადასხვაობა გამოიწვია.

ქუთაისში, ხურჩაში და სენაკში კონფლიქტოლოგიის ვორკშოპებს 30-დან 60 წლამდე ასაკის ქალები ესწრებოდნენ.

- როგორ გვზრდიდნენ ჩვენი მშობლები, რატომ ვუშვებთ იგივე შეცდომებს საკუთარ შვილებთან ურთიერთობისას, რატომ იქმნება კონფლიქტები თაობებს შორის - ამ საკითხებზე საინტერესო დისკუსიები გაიმართა.

- ჩვენ ხშირად გვესმოდა ჩვენი მშობლებისგან, რომ ამ თაობას არაფერი ესმის, ცუდად იქცევა და ასე შემდეგ. როცა ჩვენ გავხდით მშობლები, ამ ფრაზას უკვე  ჩვენ ვიმეორებთ.

-  ოჯახში განვითარებული კონფლიქტები, არასწორი აღზრდის ბრალია. ბიჭებს არ უნდა ვზრდიდეთ ოჯახის მმართველებად, გოგონებს არ უნდა ვასწავლიდეთ მუდმივ მორჩილებას.   

- ყოველთვის მეჩვენებოდა, რომ დედა ძალიან მკაცრი იყო, ხშირად ვკამათობდით ისეთ საკითხებზე, როგორიც იყო დაბადების დღეზე წასვლა, მეგობრებთან სეირნობა. ჩემს შვილთან ურთიერთობაში იგივე გავიმეორე, სამწუხაროდ, გვიან მივხვდი, რომ დედა ყოველთვის მართალი იყო. ალბათ, ჩემი შვილებიც გვიან მიხვდებიან. 

დისკუსიის ბოლოს მონაწილეებმა ფსიქოლოგის კომენტარები მოისმინეს და შესაბამისი რჩევებიც მიიღეს. 

2016 წლის სექტემბერში ფონდი „სოხუმის“ ხონის ქალთა მხარდაჭერის ცენტრმა  დევნილთა დასახლებაში მცირემასშტაბიანი კვლევა ჩაატარა, რომელმაც აქ მცხოვრები დევნილების სოციალური საჭიროებები გამოავლინა. საკითხთა ჩამონათვალში მოხვდა დასახლებაში ამბულატორიის გახსნა, საბავშვო ბაღებში ბაგის ასაკის ბავშვების  ჯგუფების დამატება,  კომუნალური სუბსიდირება, მედიკამენტების თანადაფინანსება,  შშმ ბავშვებისთვის დღის ცენტრის გახსნა, ხანდაზმულთა სოციალური დახმარების პროგრამების დანერგვა  და ა.შ.

კვლევა ჩატარდა, როგორც ორგანიზაციის წვლილი ხონის სოციალური ჩართულობის სტრატეგიის შემუშავებაში (ჩეხური არაკომერციული ორგანიზაცია „ადამიანი გაჭირვებაში“ (PIN) პროექტი - „სოციალური დაცვის საკითხებზე მომუშავე არასამთავრობო ორგანიზაციების ჩართულობის გაძლიერება სტრატეგიულ დიალოგში საქართველოში ფარგლებში“ ფარგლებში)

პროექტი ხორციელდება ჩეხური ორგანიზაცია „ადამიანი გაჭირვებაში“ PIN მხარდაჭერით 

21 ოქტომბერს გაიმართა ქუთაისის ამომრჩეველ ქალთა კლუბის სხდომა. პირველ საკითხად გატანილი იყო ინფორმაცია საპარლამენტო არჩევნების პირველი ტურის შესახებ.  სხდომას ესწრებოდა კლუბის წევრები, მაჟორიტარი-კანდიდატი ლია გვენეტაძე და ქალბატონები, რომლებიც აქტიურად იყვნენ ჩართულნი საარჩევნო კომისიების მუშაობაში. მათ თავიანთ საარჩევნო გამოცდილებაზე ისაუბრეს.

კლუბზე აღინიშნა, რომ ქალები ამჯერადაც სათანადოდ არ არიან წარმოდგენილნი პარლამენტში. ამიტომ,  მათი მოსაზრებით, მეტი მუშაობაა საჭირო 2017 წლის ადგილობრივი თვითმმართველობის არჩევნებისთვის, რომ მეტი ქალი მოხვდეს გადაწყვეტილების მიღების  დონეზე.

მეორე საკითხი იყო პრობლემების შერჩევა ადვოკატირებისთვის. კლუბს მრავალწლიანი გამოცდილება აქვს და იმედია, რომ ადვოკატირების პროცესი შედეგიანად დასრულდება.

პროექტი ხორციელდება აშშ საელჩოს მხარდაჭერით

შეხვედრა დაეთმო არჩევნების შედეგების განხილვას. სამწუხაროდ, წყალტუბოში ქალი-კანდიდატები არ იყვნენ წარდგენილი, რაც ხაზგასმულ იქნა კლუბის წევრთა მიერ.

სხდომის დიდი ნაწილი დაეთმო იმ პრობლემების დაფიქსირებას, რომელთა ადვოკატირებაზეც კლუბი იმუშავებს.

პირველ რიგში, გამოიყო დევნილ მოსწავლეთა და პედაგოგთა ტრანსპორტირების საკითხი. გადაწყდა, რომ მომზადდეს წერილი გამგეობის სახელზე და მომდევნო შეხვედრაზე მოიწვიონ ის ადამიანები, ვისაც ხელეწიფება ამ პრობლემის გადაჭრა.

ამომრჩეველ ქალთა კლუბმა გამოთქვა სურვილი, აქტიურად ჩაერთოს 16-დღიან კამპანიაში, რომელიც ქალთა მიმართ ძალადობის წინააღმდეგ არის მიმართული. დაიგეგმა კონკრეტული ღონისძიებები.

პროექტი ხორციელდება აშშ საელჩოს მხარდაჭერით

ქუთაისში, ხონში, წყალტუბოში ქალთა საინიციატივო ჯგუფების შეხვედრები მოეწყო. ჯგუფებმა ადვოკატირების გეგმები განიხილეს. მიიღეს კონსულტაციები. რა ეტაპები უნდა გაიარონ, ვის მიმართონ, როგორ მოიპოვონ მხარდამჭერები ცალკეულ პრობლემებზე მუშაობისას. ერთობლივად იმუშავეს ვადებზე, რა დროში უნდა მოხდეს ადვოკატირების პროცესის დასრულება. საინიციატივო ჯგუფის წევრებმა ასევე კონკრეტულად გაწერეს გრაფიკები, ადვოკატირების პროცესში რომელ წევრს რა ფუნქცია და პასუხისმგებლობები ეკისრება, იმუშავეს გზავნილის დამუშავებაზე. მონაწილეები აღნიშნავენ, რომ ტრენინგზე მიღებული ინფორმაციები დაეხმარება მათ, სწორად წარმართონ ადვოკატირების პროცესი.

20 სექტემბერს, წყალტუბოს სასტუმრო „პრომეთეში“, ფონდი „სოხუმის“ ჯგუფი დაესწრო გამოცდილების გაზიარების ვორკშოპს, რომელიც საერთაშორისო ორგანიზაცია PIN-მა გამართა პროექტის „სოციალური დაცვის საკითხებზე მომუშავე არასამთავრობო ორგანიზაციების ჩართულობის გაძლიერება სტრატეგიულ დიალოგში საქართველოში“ პარტნიორებისთვის.  

მოწვეული ექსპერტის დახმარებით შეხვედრის მონაწილეები გაეცნენ ჩეხეთის გამოცდილებას სოციალური ადვოკატირების კუთხით, ასევე ერთმანეთს გაუზიარეს, თუ რა საკითხების ადვოკატირებას ახორციელებენ ადგილობრივ და ცენტრალურ დონეზე,  რა გამოწვევებს აწყდებიან, როგორ ხედავენ სამომავლოდ მრჩეველთა საბჭოს სიცოცხლისუნარიანობის საკითხს.

პარტნიორი ორგანიზაციების წარმომადგენლებმა კიდევ ერთხელ გაუსვეს ხაზი გამოცდილების გაზიარების მნიშვნელობას და გამოთქვეს სურვილი, ასეთი ტიპის შეხვედრები მრჩეველთა საბჭოს სხვა წევრებისთვისაც გაიმართოს.

პროექტი ხორციელდება ჩეხური ორგანიზაცია „ადამიანი გაჭირვებაში“ PIN მხარდაჭერით 

ხონის ამომრჩეველ ქალთა კლუბის სხდომაზე მონაწილეებმა საპარლამენტო არჩევნების პირველი ტური შეაფასეს და სამომავლო პერსპექტივებზეც იმსჯელეს. გამოითქვა აზრი, რომ პარლამენტში ქალთა მეტ წარმომადგენლობას მეტი მუშაობა სჭირდება.

ამოტომაც აპირებენ გააქტიურებას იმისათვის, რომ მეტი ქალი იხილონ ადგილობრივი თვითმმართველობის არჩევნების შედეგად საკრებულოებში.

შეხვედრის ბოლოს კლუბის წევრებმა შეარჩიეს პრობლემები ადვოკატირებისათვის, შექმნეს ადვოკატირების ჯგუფი - ყოველ მათგანს აქვს დიდი ინტერესი და შემართება, რომ რაც შეიძლება მეტი პრობლემის მოგვარება შეძლონ.

ბათუმის ამომრჩეველ ქალთა კლუბმა ურეხის ქუჩის ერთ-ერთი მაცხოვრებლის პრობლემის ადვოკატირება დაიწყო. ოჯახს უკიდურესად უჭირს, სოციალური დახმარება მოეხსნა და ყველანაირად უყურადღებოდაა მიტოვებული. ოჯახში არის შშმ პირი, რომელიც სპეციალური მოვლას საჭიროებს. პირველად საჭიროებად დგას სახლის გადახურვა. შეხვედრაზე სპეციალურად იქნა მოწვეული ზაზა ხიმშიაშვილი - მერის წარმომადგენლის თანაშემწე. მან აღნიშნა, რომ დახმარებას გაუწევს პრობლემის გადაჭრაში.

შეხვედრას ესწრებოდა საქველმოქმედო ორგანიზაცია „იალქანის“ ხელმძღვანელი. მისი პროექტის ფარგლებში შესაძლებელი იქნება ამ ოჯახის უზრუნველყოფა ყოველდღიური კვებით.

კლუბზე ასევე განხილულ იქნა ჩართვის საკითხი 16-დღიან კამპანიაში ქალთა მიმართ ძალადობის წინააღმდეგ.

პროექტი ხორციელდება აშშ საელჩოს მხარდაჭერით

ზუგდიდში ჩატარდა ამომრჩეველ ქალთა კლუბის მორიგი სხდომა. განსახილველი საკითხები იყო: ქალები პოლიტიკაში - 2016 წლის საპარლამენტო არჩევენების შემდეგ, ადვოკატირების კამპანიის დაგეგმვა.

მონაწილეებმა მიიღეს ინფორმაცია საპარლამენტო არჩევნების გენდერულ ასპექტებზე, შეირჩა ადვოკატირების ჯგუფი და გამოიკვეთა პრობლემა ადვოკატირებისთვის.