სოფლად მცხოვრებ ქალთა საერთაშორისო დღეს, 17 ოქტომბერს სოფელ კოკში (ზუგდიდის მუნიციპალიტეტი) ხურჩა/კოკის ქალთა მხარდაჭერის ცენტრმა გამართა შეხვედრა სოფლად მცხოვრებ ქალბატონებთან. შეხვედრის დროს ისაუბრეს სოფელში არსებულ სიტუაციაზე, ქალთა პრობლემებზე, ქალთა მხარდაჭერის ცენტრის მუშაობაზე.

შეხვედრაზე მიწვეული იყო სპეციალისტი ქუთაისიდან - გინეკოლოგ-რეპროდუქტოლოგი ლორიტა მიქავა. მან მონაწილეებს მიაწოდა ინფორმაცია სხვადასხვა ასაკის ქალთა პრობლემებზე და დაავადებებზე, ყოველწლიური გამოკვლევის მნიშვნელობაზე, არსებულ უფასო კვლევებზე.

მონაწილეებს  საშუალება ჰქონდათ, ინდივიდუალურად გასაუბრებოდნენ სპეციალისტს და მიეღოთ რჩევები.

სენაკის ქალთა მხარდაჭერის ცენტრმა დაიწყო მუშაობა ფონდი „სოხუმის“ დაფინანსებული პროექტში „ახალგაზრდები - ქალთა მიმართ ძალადობის წინააღმდეგ“. პროექტი ხორციელდება სენაკის მუნიციპალიტეტის  ორ სოფელში - ნოსირში და ძველ სენაკში.

პროექტის ფარგლებში ჩატარდა საინფორმაციო შეხვედრები გამგებლის წარმომადგენლებთან, განათლების რესურს-ცენტრში, სკოლის დირექტორებთან და ახალგაზრდებთან. მონაწილეებს მიეწოდათ ინფორმაცია პროექტის და დაგეგმილი ღონისძიებების შესახებ.

ზუგდიდის ამომრჩეველ ქალთა კლუბის სხდომაზე ქალბატონებმა ისაუბრეს 2016 წლის არჩევენების პირველი ტურის შედეგებზე და ქალთა პოლიტიკური მონაწილეობის გაზრდის აუცილებლობის შესახებ 2017 წლის ადგილობრივი თვითმმართველობის არჩევნებში.

საუბარი შეეხო გენდერულ კვოტირებას, პარტიების საარჩევნო პროგრამებში ქალთა თემის ასახვას. 

შეხვედრის მონაწილეებისგან  შეირჩა  ადვოკატირების ჯგუფი. კლუბის წევრებმა გადაწყვიტეს წერეთლის ქუჩაზე არსებულ საბავშვო ბაღის  კოლექტიურ ცენტრში მცხოვრები დევნილების პრობლემების შესწავლა და მოგვარება. 

პროექტი ხორციელდება აშშ საელჩოს მხარდაჭერით

ქუთაისის 30-ე, სოფელ მენჯის (სენაკის მუნიციპალიტეტი) და სოფელ კოკის (ზუგდიდის მუნიციპალიტეტი) საჯარო სკოლებში ჩატარდა ახალგაზრდული კლუბების საინფორმაციო შეხვედრები.

მონაწილეებმა ინტერესით იმსჯელეს ქართულ-აფხაზური კონფლიქტის თემაზე, ისაუბრეს კონფლიქტის მოგვარების გზებზე, თანატოლებთან დიალოგზე, სამშვიდობო პროექტების განხორციელებაზე.

განსაკუთრებით  აქტიურობდნენ კოკის სკოლის მოსწავლეები. მათი ნაწილი აფხაზეთიდან დევნილია, ხშირად გადადის მშობლიურ ადგილებში და რეალურად იცის, რა შედეგები მოაქვს კონფლიქტს.

დაისვა ბევრი საინტერესო შეკითხვა, რომლებზე პასუხების გაცემას ცდილობდნენ შეხვედრების დროს. შეხვედრებმა აჩვენა, რომ  აუცილებელია ამ თემების განხილვა ახალგაზრდებთან, რადგანაც ისინი ქმნიან  ქვეყნის მომავალს.

ქალთა მხარდაჭერის ცენტრების მობილიზატორებმა ჩაატარეს ტრადიციული ყოველთვიური სამობილიზაციო შეხვედრები ქუთაისში, წყალტუბოში, სენაკში, ფოთში, ხონში და ზუგდიდის მუნიციპალიტეტის სოფლებში - კოკსა და ხურჩაში.

ოქტომბერში აღინიშნება სოფლად მცხოვრებ ქალთა საერთაშორისო დღე - შეხვედრების თემა სწორედ ამ თარიღის შესაბამისად განისაზღვრა. შეხვედრებზე საუბარი იყო  ქალთა უფლებებზე, მათ პრობლემებზე და ამ პრობლემების მოგვარების გზებზე.

ქუთაისში, ფონდ „სოხუმში“ ხონის, ქუთაისის, წყალტუბოს ქალთა საინიციატივო ჯგუფების ლიდერების საკონსულტაციო შეხვედრა ჩატარდა. მონაწილეები გაეცნენ საკუთარ ფუნქციებს, უფლება-მოვალეობებს, ისაუბრეს სამომავლო გეგმებზე.

შეხვედრის მეორე ნაწილში სამივე ჯგუფის ლიდერმა იმ პრობლემებზე გააკეთა აქცენტი, რომელთა მოგვარება ადვოკატირებით შესაძლებელია. ჯგუფის ხელმძღვანელები შეთანხმდნენ, რამდენიმე დღეში წარმოადგინონ ადვოკატირების დეტალური გეგმა და გრაფიკი.

ადვოკატირების გეგმა განიხილება საინიციატივო ჯგუფის წევრებთან გამართულ შეხვედრაზე, რომელიც სამივე ქალაქში გაიმართება.

3 წყალტუბოს დევნილთა კოლექტიურ ცენტრ „მედეაში“, ხოლო 6 ოქტომბერს ფოთის ქალთა მხარდაჭერის ცენტრში ჩატარდა ფსიქოლოგის კონსულტაციები. შეხვედრებზე იმყოფებოდნენ ქალბატონები და გოგონები.

შეხვედრის თემას წარმოადგენდა: გენდერული მახასიათებლები ასაკობრივ ფსიქოლოგიაში ოჯახში ქალთა მიმართ ძალადობის პრევენციისთვის.

შეხვედრა მიზნად ისახავდა ქალების დახმარებას გენდერული თავისებურებების ცოდნის კუთხით, რათა ოჯახში შეიქმნას დადებითი კომუნიკაციები.

ბენეფიციარებმა აღნიშნეს, რომ შეხვედრებზე ისინი საჭირო და პრაქტიკულ ინფორმაციას ისმენენ, რასაც შემდგომ ყოველდღიურ ცხოვრებაში იყენებენ.

12 ოქტომბერს ხონის ქალთა მხარდაჭერის ცენტრში გაიმართა ინდივიდუალური კონსულტაციები. ქალებთან ერთად კონსულტაციას საჭიროებდნენ მცირეწლოვანი ბავშვები. დაიგეგმა მომდევნო შეხვედრა, სადაც უნდა განისაზღვროს ინდივიდუალური მიდგომისა და ფსიქოლოგიური დახმარების მეთოდები.

გოგონათა საერთაშორისო დღესთან დაკავშირებით ფონდ „სოხუმში“ ჩატარდა საინფორმაციო შეხვედრა, რომელიც წარმართეს „ინერ ჯორჯიას“ წარმომადგენლებმა.

შეხვედრას ესწრებოდა 13-დან 21 წლამდე 21 გოგონა. მათთვის ნაჩვენები იყო საინტერესო  ფილმი რეპროდუქციულ თემაზე. დისკუსია აქტიურად წარიმართა, იყო შეკითხვები და პასუხები, საუბარი ნაადრევი ქორწინების ნეგატიურ შედეგებზე.

გოგონებმა გამოთქვეს სურვილი, კიდევ შეიკრიბონ და იმსჯელონ აქტუალურ თემებზე.

ფონდი „სოხუმი“ საქველმოქმედო ფონდ „კარიტასთან“ ერთად ერთობლივ საქველმოქმედო აქციებს აწყობს ქალთა მხარდაჭერის ცენტრების ბენეფიციარებისთვის.

ამჯერად 5 ოჯახს გადაეცა ტანსაცმელი, სურსათი და ჰიგიენური საშუალებები. სენაკში საჩუქრები მიიღო 3 ოჯახმა, ხონში კი - ორმა მრავალშვილიანმა ოჯახმა: ერთ ოჯახში 5 ბავშვია, მეორეში - 9.

ბენეფიციარებმა მადლიერება გამოხატეს  აქციის ორგანიზატორების მიმართ.

თაობათა კონფლიქტები: მშობლები, შვილები და მათი ურთიერთობები - ამ საკითხებზე იმსჯელეს ახალგაზრდებმა ხონში, ფოთში, წყალტუბოში გამართულ ვორკშოპებზე. 

მათი მოსაზრებით, მარადიული თემაა თაობებს შორის კონფლიქტი, რასაც ხშირად განაპირობებს განსხვავებული შეხედულებები.

კონფლიქტის მოგვარების გზებში ახალგაზრდებმა დააფიქსირეს, რომ მშობლები განსაკუთრებით ფრთხილად უნდა მოქმედებდნენ შვილებთან ურთიერთობისას გარდატეხის ასაკში, უნდა გაითვალისწინონ, რომ ყველა ბავშვი ინდივიდუალურია და ის მეთოდი, რომელიც ვთქვათ, უფროს შვილთან გამოუყენებიათ, შესაძლოა მეორესთან ეფექტური არ გამოდგეს. 

გამოსავალზე საუბრისას ხაზგასმით აღინიშნა, რომ შვილებმა უნდა გააუმჯობესონ  კომუნიკაცია უფროს თაობასთან, მათ კარგად უნდა გააცნობიერონ, რომ მშობლები მათთვის ყველაზე ახლობელი ადამიანები არიან და მათგან წამოსულ წინააღმდეგობას პროტესტით არ უნდა ხვდებოდნენ.