დასრულდა პოლიმერულ თიხაზე მუშაობის გაკვეთილები ფონდი „სოხუმის“ დღის სარეაბილიტაციო ცენტრში. მონაწილეებმა წარმოადგინეს საპროექტო პერიოდში შექმნილი ნამუშევრები. მათ მოკლედ ისაუბრეს თავიანთ თავზე, იმ დადებით შედეგებსა და გამოცდილებაზე, რაც დაუგროვდათ მუშაობის პროცესში - როგორც პროფესიული განვითარების, ასევე პირადი ურთიერთობების კუთხით. პრეზენტაცია შთამბეჭდავი იყო და დიდი ინტერესი გამოიწვია ფონდი „სოხუმის“ თანამშრომლების მხრიდან.

ბაღდათის მუნიციპალიტეტის სამოქალაქო საზოგადოების ორგანიზაცია „თანასწორობა ახლა“ ატარებს საინფორმაციო შეხვედრებს სხვადასხვა ჯგუფთან. ეს არის აქტივობები მცირე პროექტის „მოსახლეობის მონაწილეობა ადგილობრივ დონეზე საჯარო მმართველობის რეფორმის დანერგვის პროცესში“ ფარგლებში. პროექტის მიხედვით ხდება მარტოხელა მშობლების, მრავალშვილიანი დედების და პენსიონერების ინფორმირება იმის თაობაზე, თუ რა გავლენას მოახდენს მათზე საჯარო მმართველობის რეფორმა. შეხვედრების მონაწილეები ინტერესით ეცნობიან სამოქალაქო ჩართულობის ფორმებს.

საპროექტო განაცხადი მომზადდა პროექტის „გურიის, იმერეთისა და რაჭა-ლეჩხუმის სამოქალაქო საზოგადოების ორგანიზაციების საერთო ფორუმი სახელმწიფო მმართველობის რეფორმის საგზაო რუკის მონიტორინგისთვის“ ფარგლებში.

პროექტი ხორციელდება ევროკავშირის მხარდაჭერით

  +

შფოთვა და განგაში იყო ივლისში ჯგუფური ფსიქოლოგიური შეხვედრების ძირითადი თემა, რადგან ეს ქალების ყოველდღიურობის ნაწილად იქცა. როგორ ავირიდოთ თავიდან მღელვარება, როგორ დავიმშვიდოთ თავი, რომ ოჯახშიც სიმშვიდემ დაისადგუროს – ამაზე საუბრობდნენ ქალთა მხარდაჭერის ცენტრების მიერ ორგანიზებულ ჯგუფურ შეხვედრებზე სენაკში, ქობულეთში, ლანჩხუთში, ფახულანში, ხურჩაში (ზუგდიდის მუნიციპალიტეტი), (წალენჯიხის მუნიციპალიტეტი). მონაწილეთა რაოდენობა ცოტა არ იყო – 42 ბენეფიციარი 16-დან 67 წლამდე.     

თვის განმავლობაში ფსიქოლოგმა დისტანციურადაც იმუშავა - მისი ტელეფონის ნომერზე შევიდა ზარები სხვადასხვა რეგიონიდან. ქალებმა მიიღეს ინდივიდუალური კონსულტაციები და მხარდაჭერა.

ფონდი „სოხუმის“ ორგანიზებით თერჯოლის მუნიციპალიტეტის საკრებულოში მრგვალი მაგიდა გაიმართა რეფერალური სუბიექტების მონაწილეობით. მონაწილეებმა იმსჯელეს იმაზე, რამდენად ეფექტიანია ძალადობის მსხვერპლთა დახმარების კუთხით არსებული სერვისები, რა მიმართულებით უნდა გაძლიერდეს რეფერირების სუბიექტების მუშაობა.

მონაწილეთა გამოსვლებში არაერთხელ გაჟღერდა, რომ დღემდე გამოწვევად რჩება თანამშრომლობის და კოორდინაციის დაბალი ხარისხი რეფერალურ სუბიექტებს შორის.
შეხვედრას ესწრებოდნენ რეფერირების ადგილობრივი სუბიექტები: ადგილობრივი თვითმმართველობის საკანონმდებლო და აღმასრულებელი ხელისუფლების პირველი პირები და სხვადასხვა სამსახურის წარმომადგენლები, კრიმინალური პოლიციის თანამშრომლები, სკოლის პედაგოგები და სამედიცინო სფეროს წარმომადგენლები.

ორგანიზაციამ „მოქალაქეთა აქტიურობა ეფექტიანი მმართველობისა და სამართლიანობისათვის“ ივნის-ივლისში ჩაატარა მოსამზადებელი სამუშაოები, მოხდა საინიციატივო ჯგუფის მობილიზება, გაიმართა ტრენინგი სამოქალაქო აქტივიზმის გაზრდის თემატიკაზე. ახლა მუშაობენ თემის პრობლემების ადვოკატირებაზე. აქტივისტებმა მიიღეს საჭირო ინფორმაცია, რათა აქტიურად ჩაერთონ პროექტში „ვანის მუნიციპალიტეტის სალომინაოს თემის ადმინისტრაციულ ერთეულში ახალგაზრდებისა და შშმ პირების საჭიროებები და მოთხოვნილებები, ინფორმირებულობა და გაწყვეტილების მიღების პროცესში ჩართვის ხელშეწყობა“.

საპროექტო განაცხადი მომზადდა პროექტის „გურიის, იმერეთისა და რაჭა-ლეჩხუმის სამოქალაქო საზოგადოების ორგანიზაციების საერთო ფორუმი სახელმწიფო მმართველობის რეფორმის საგზაო რუკის მონიტორინგისთვის“ ფარგლებში.

პროექტი ხორციელდება ევროკავშირის მხარდაჭერით

„განათლებისა და განვითარების ცენტრი ედელვაისის“ პროექტის პირველი აქტივობა ხონის ადგილობრივ თვითმმართველობაში გაიმართა. მუნიციპალიტეტის მერის, საკრებულოს თავმჯდომარის და სამოქალაქო მრჩეველთა საბჭოს წევრებისთვის გაკეთდა პროექტის „საზოგადოების ხმა თვითმმართველობაში“ პრეზენტაცია. ამჟამად მიმდინარეობს მუშაობა პროექტის გეგმის მიხედვით. პროექტის ბოლოს მუნიციპალიტეტში ამოქმედდება ცხელი ხაზი, რომელიც გაზრდის საზოგადოების ინფორმირებულობას ყველა საჯარო პროცესის შესახებ.

მცირე პროექტი მომზადდა პარტნიორული პროექტის „გურიის, იმერეთისა და რაჭა-ლეჩხუმის სამოქალაქო საზოგადოების ორგანიზაციების საერთო ფორუმი სახელმწიფო მმართველობის რეფორმის საგზაო რუკის მონიტორინგისთვის“ ფარგლებში, რომელსაც ახორციელებს სამი ორგანიზაცია: ფონდი „სოხუმი“, მეწარმე ქალთა ფონდი და იმერეთის მეცნიერთა კავშირი „სპექტრი“.

პროექტი ხორციელდება ევროკავშირის მხარდაჭერით

ფონდი „სოხუმის“ ფორუმ-თეატრი ზაფხულის ცხელ დღეებშიც აქტიურად აგრძელებს მუშაობას - იწერება ახალი სცენარები, ტარდება რეპეტიციები, ფეისბუქგვერდზე ხდება პერსონალური ვიდეოებისა და მონოლოგების განთავსება.

და კიდევ: დაიწყო ახალი რუბრიკა „პაემანი რიონთან“, რომელიც დამუშავების პროცესშია.

ფორუმ-თეატრი არის და რჩება ფონდი „სოხუმის“ ყველაზე ორიგინალურ აქტივობად.

ლანჩხუთის ქალთა მხარდაჭერის ცენტრი აგრძელებს პროექტის „ძალადობის პრევენცია - ჰარმონიული გარემო პატარებისთვის“ განხორციელებას. პროექტის ფარგლებში ლანჩხუთის  მუნიციპალიტეტის 22 საბავშვო ბაღის  აღმზრდელებსა და აღსაზრდელთა მშობლებს მიეწოდათ ინფორმაცია ძალადობისა და ბულინგის თემაზე, ჩატარდა შეხვედრები ადგილობრივი თვითმმართველობის წარმომადგენლებთან. ფონდი „სოხუმის“ ფსიქოლოგი და იურისტი შეხვდნენ შრომისუბნის ბაღის თანამშრომლებს. მონაწილეებს გააცნეს ინფორმაცია, როგორ უნდა გამოავლინონ ძალადობის რისკ-ფაქტორის ქვეშ მყოფი ბავშვები და რა კუთხით ევალებათ რეაგირება კანონის ფარგლებში.

„ქალის უფლება - თავის-უფლება“ - ასე ჰქვია მცირე პროექტს, რომელზეც ფოთის ქალთა მხარდაჭერის ცენტრი მუშაობს. „გალერეა 34-ში“ შედგა პროექტის პრეზენტაცია „ქალთა კლუბის“ წევრების ჩართულობით. შეხვედრაზე საუბარი შეეხო ადრეული ქორწინების და ოჯახში ძალადობის საკითხს. პრეზენტაციის შესახებ სიუჟეტი მოამზადა სამაუწყებლო კომპანია „მე-9 ტალღამ“. პროექტი ითვალისწინებს ფოთის მუნიციპალიტეტში მცხოვრები ეთნიკური უმცირესობების წარმომადგენლების ინფორმირებას ოჯახში ძალადობის თემაზე.

ხონის დევნილთა საინიციატივო ჯგუფის წარმომადგენლები შეხვდნენ მუნიციპალიტეტის მერს ლადო ჯურხაძეს და მიაწოდეს ინფორმაცია პროექტზე „მეტი ჩართულობის უზრუნველსაყოფად ხელმისაწვდომობის გაზრდა მოქალაქეებისთვის“. პროექტი ითვალისწინებს მუნიციპალიტეტის ვებგვერდის განახლებას, რათა  მოსახლეობამ აქტიურად ისარგებლოს თვითმმართველობის ელექტრონული პლატფორმით და მოაგვაროს თავისი პრობლემები.

მცირე პროექტი მომზადდა პარტნიორული პროექტის „გურიის, იმერეთისა და რაჭა-ლეჩხუმის სამოქალაქო საზოგადოების ორგანიზაციების საერთო ფორუმი სახელმწიფო მმართველობის რეფორმის საგზაო რუკის მონიტორინგისთვის“ ფარგლებში, რომელსაც ახორციელებს სამი ორგანიზაცია: ფონდი „სოხუმი“, მეწარმე ქალთა ფონდი და იმერეთის მეცნიერთა კავშირი „სპექტრი“.

პროექტი ხორციელდება ევროკავშირის მხარდაჭერით