ფონდი „სოხუმის“ ქალთა მხარდაჭერის ცენტრები შეუერთდნენ ქალთა სოლიდარობის საერთაშორისო დღესთან დაკავშირებულ საყოველთაო კამპანიას. ჩატარდა საინფორმაციო შეხვედრები ადგილობრივი თვითმმართველობის წარმომადგენლებთან და აქტიურ ქალბატონებთან. შეხვედრებზე საუბარი იყო ქალთა უფლებების დაცვაზე, მათი სტატუსის გაზრდაზე ოჯახსა და საზოგადოებაში, ადგილობრივ პროგრამებზე, ეკონომიკურ ხელშეწყობაზე.  

წყალტუბოს, სენაკის, თერჯოლის და ზუგდიდის მუნიციპალიტეტების საჯარო სკოლებში ჩატარდა ახალგაზრდული კლუბის საინფორმაციო შეხვედრები.

ეს იყო ახალი გარემო, ახალი ჯგუფები, რომლებიც იწყებენ ხუთთვიანი სწავლების კურსს. აქტიურ, მოტივირებულ ახალგაზრდებს მოეწონათ თავისუფალი გარემო, როლური თამაშები, დისკუსია. მონაწილეებმა საინტერესო ისტორიები გაიხსენეს, გულწრფელად ისაუბრეს პრობლემებზე.

დიდი იყო დირექტორების და სამოქალაქო გაკვეთილის პედაგოგების ინტერესი და თანამშრომლობის სურვილი. გაჩნდა იმედი, რომ შეიქმნება აქტიური ჯგუფი, რომელიც სკოლის სავიზიტო ბარათი გახდება.

სოფელ ხურჩაში (ზუგდიდის მუნიციპალიტეტი) ფონდი „სოხუმის“ ქალთა საინიციატივო ჯგუფის წევრები შეიკრიბნენ. ჯგუფის მიერ იდენტიფიცირებულია ორი პრობლემა, რომლებიც კონფლიქტების განვითარების საფრთხეს შეიცავს.

მონაწილეებმა იმსჯელეს, თუ როგორ უნდა მოხდეს ამ პრობლემების მოგვარება და შემცირდეს რისკები. მათ აღნიშნეს:

- ადგილობრივი ხელისუფლება უნდა იყოს ამ პროცესების მონაწილე,  უნდა გავაჟღეროთ ამ პრობლემების შესახებ შესაბამის სტრუქტურებში, რათა გამოინახოს გზები მათ მოსაგვარებლად.

ჯგუფის წევრები უკვე პრობლემის მოგვარების კონკრეტულ გეგმაზე მუშაობენ.

მარტში ვაჟების ახალ ჯგუფებთან დაიწყო მუშაობა. შეხვედრები გაიმართა წყალტუბოს (4 მარტი), თერჯოლის (5 მარტი) და სენაკის (6 მარტი) მუნიციპალიტეტებში. შეხვედრების პირველი ნაწილი უმეტესწილად გაცნობით ხასიათს ატარებდა. მონაწილეები გაეცნენ ფონდი „სოხუმის“ საქმიანობას, ხუთთვიანი შეხვედრების გეგმას.

შემდეგ ძალადობის თემის განხილვა დაიწყო. ბიჭებმა ჯერ თავიანთი აზრი გამოხატეს. აღმოჩნდა, რომ ჯგუფებში ლიდერი ბიჭებიც იყვნენ, რომელთაც შედარებით მეტი რამ იცოდნენ. ბოლოს ყველაფერი შეჯამდა, დაფიქსირდა  ძალადობის ფორმები და მათი მოგვარების გზები. გამოვლინდა ბიჭების მოტივაცია, ერთმანეთს აზრები გაუზიარონ და კიდევ უფრო მეტი გაიგონ.

კონფლიქტის წარმოშობის მიზეზებზე იმსჯელეს სოფელ გვიშტიბის (წყალტუბოს მუნიციპალიტეტი), ქვედა სიმონეთის (თერჯოლის მუნიციპალიტეტი) I საჯარო სკოლების და სენაკის კერძო სკოლა-ლიცეუმის მოსწავლეებმა ფონდი „სოხუმის“ წარმომადგენელთან ერთად. მათი თქმით, ასეთი შეხვედრები საინტერესო და საჭიროა, რათა ისწავლონ კონფლიქტების თავიდან აცილება:

„მე ამ შეხვედრიდან გავიგე კონფლიქტის წარმოშობის მიზეზები.“ „კარგი იქნება, თუ გაგრძელდება ასეთი შეხვედრები.“ „ამ თემაზე საუბარი მეტად მნიშვნელოვანია, რადგან კონფლიქტი ყველას გვქონია.“ - ასე აფასებენ მოსწავლეები კონფლიქტის თემაზე ჩატარებულ ვორკშოპებს.

ფონდმა „სოხუმმა“ მრგვალი მაგიდა ჩაატარა ქუთაისის მეოთხე პოლიკლინიკაში.  ძალადობის აღკვეთის სამართლებრივი ასპექტები, დასავლეთ საქართველოს ცხრა მუნიციპალიტეტში სამედიცინო პერსონალთან ჩატარებული კვლევის შედეგები, პუბლიკაცია „სამედიცინო პერსონალის როლი ძალადობის პრევენციაში“ - ამ საკითხებზე ისაუბრეს ფონდის წარმომადგენლებმა.

მრგვალი მაგიდის მონაწილე ექიმებმა თავიანთი პრობლემები გაახმოვანეს - დროის ნაკლებობა პაციენტთან ურთიერთობისას, კანონებში არსებული ხარვეზები, მედპერსონალის უსაფრთხოება და მრავალი სხვა. რა თქმა უნდა, ფონდთან თანამშრომლობის სურვილიც გამოითქვა ძალადობის პრევენციის და მსხვერპლის დახმარების კუთხით. ამ მიზნით სამედიცინო დაწესებულებასა და ფონდ „სოხუმს“ შორის  მემორანდუმსაც მოეწერა ხელი.

5 მარტს, შპს „უნიქალმედის“ ოფისში ფონდი „სოხუმის“ ორგანიზებით კლინიკის სამედიცინო პერსონალთან მრგვალი მაგიდა გაიმართა. მონაწილეებს მიეწოდათ ინფორმაცია ძალადობის აღკვეთის საკანონმდებლო მექანიზმებზე, სამედიცინო  დაწესებულებების პერსონალისთვის კანონით დაკისრებულ უფლებამოსილებებსა და ვალდებულებზე. ისინი ინტერესით გაეცნენ ფონდი „სოხუმის“ მიერ მედიცინის მუშაკებთან ჩატარებული კვლევის შედეგებს; ორგანიზაციის მიერ გამოცემულ ბროშურას, რომელიც  დარგის სპეციალისტებს აწოდებს პირველად ინფორმაციას, როგორ მოხდეს ძალადობის შემთხვევების იდენტიფიკაცია, სკრინინგი, ვისთან უნდა ჰქონდეს კოორდინაცია მედპერსონალს, რათა მოახდინოს ეფექტური რეაგირება პრობლემაზე.

საინტერესო დისკუსიებმა კიდევ ერთხელ გამოკვეთა, რა აფერხებს ეფექტურ რეაგირებას პრობლემაზე: პაციენტების მხრიდან ძალადობის ფაქტების გაუმჟღავნებლობა; ინფორმირების დეფიციტი; ექიმის ფიზიკური და ფსიქოლოგიური უსაფრთხოების საკითხი; პოლიციის მხრიდან საკუთარი ვალდებულებების იგნორირება და ა.შ.

საუბარი შეეხო პრობლემის გადაჭრის გზებს. გაჟღერდა არაერთი წინადადება: პერსონალის განათლება, რეფერირების სუბიექტებთან კოორდინაციის გაუმჯობესება, კვალიფიკაციური ფსიქოლოგის კადრის დანერგვა კლინიკებში.

წყალტუბოს მუნიციპალიტეტში პროექტის „გაეროს რეზოლუცია 13/25-ის, ეროვნული სამოქმედო გეგმის ადგილობრივ დონეზე ლოკალიზების პროცესში ადგილობრივი და რეგიონალური ადმინისტრაციების პოტენციალის გაძლიერება და ამ პროცესში ქალთა, მათ შორის მარგინალური ჯგუფების ჩართვა და დიალოგის გააქტიურება“ ფარგლებში ჩატარებული მუშაობის შესახებ ინფორმაცია მიეწოდა საზოგადოების ფართო სპექტრს. შეხვედრას ესწრებოდნენ პარლამენტის დეპუტატები ცოტნე ზურაბიანი და გენადი მარგველაშვილი, ადგილობრივი თვითმმართველობის წარმომადგენლები, ადგილობრივი და დევნილი ქალბატონები, ახალგაზრდები. შეხვედრაზე აღინიშნა არასამთავრობო სექტორის დიდი როლი საკითხის აქტუალიზაციაში. გამოიკვეთა მოსაზრება, რომ ადგილზე „საგზაო რუკის“ იმპლემენტაციის შემთხვევაში ადგილობრივი თვითმმართველობა გაითვალისწინებს დევნილ ქალთა და გოგონათა საჭიროებებს.

მხოლოდ ქუთაისში ხორციელდება ფონდი „სოხუმის“ პროექტი „სამედიცინო პერსონალის გაძლიერება ოჯახში ძალადობის მსხვერპლის დაცვისათვის“. მის ფარგლებში მომზადდა გამოცემა „სამედიცინო პერსონალის როლი ძალადობის პრევენციაში.“ პუბლიკაციამ დიდი ინტერესი გამოიწვია პროექტის მონაწილეებს შორის, ამიტომაც გადაწყდა მისი გავრცელება იმ რეგიონებშიც, სადაც ფონდი „სოხუმი“ მუშაობს. იანვარსა და თებერვალში ბროშურები დაურიგდა ჯანდაცვის დაწესებულებების სამედიცინო პერსონალს დასავლეთ საქართველოს ცხრა მუნიციპალიტეტში (ქუთაისი, წყალტუბო, ხონი, თერჯოლა, სენაკი, ფოთი, ზუგდიდი,  ლანჩხუთი, ოზურგეთი).

პუბლიკაციის მიზანია, დაეხმაროს სამედიცინო სფეროს მუშაკებს ძალადობის შემთხვევებში სათანადო რეაგირების კუთხით.

ფონდ „სოხუმში“ საინფორმაციო შეხვედრა გაიმართა სხვადასხვა თემის წარმომადგენლებთან. მოწვეულნი იყვნენ ადგილობრივი ხელისუფლების წარმომადგენლები. შეკრებილებმა მოისმინეს ინფორმაცია მუნიციპალურ ინფრასტრუქტურულ პროგრამებზე.

მონაწილეებმა განიხილეს სამი პრობლემა, რომელიც შეიცავს კონფლიქტების განვითარების საფრთხეს და გენდერული კუთხით სენსიტიურია.

პრობლემათა განხილვის პროცესში აქტიურად ჩაერთნენ სახელისუფლებო სტრუქტურის წარმომადგენლები, გამოიკვეთა პრობლემათა მოგვარების გზები.  
ფონდი „სოხუმის“ საინიციატივო ჯგუფის წევრები გააგრძელებენ თანამშრომლობას ხელისუფლებასთან  შეხვედრაზე განხილული პრობლემების მოსაგვარებლად, რაც კონფლიქტების ადრეული პრევენციის მიზნით მნიშვნელოვანია. 

შეხვედრას დაესწრო შვედეთის ქალთა ფონდის Kvinna till Kvinna წარმომადგენელი საქართველოში ეთუნა ნოღაიდელი.