ახალი წელი აქტიურად დაიწყეს ფონდი „სოხუმის“ იურისტებმა - წლის სტრატეგიის და თემატიკის დაგეგმვა, მუშაობა დაგროვებითი პენსიის შესახებ კანონის იმ ნაწილზე, რომლის თანახმადაც მოსახლეობას საშუალება აქვს, პენსიისთვის თავადაც შეინახოს თანხა.

ამას გარდა იყო ინდივიდუალური კონსულტაციები, ძალადობის მსხვერპლი ქალი ანკეტის დამუშავება და სხვა.

აქტუალურ თემაზე წარიმართა საინფორმაციო შეხვედრები ფონდი „სოხუმის“ ცხრა ახალგაზრდულ კლუბში. იანვარშიც ცხრა მუნიციპალიტეტის სკოლები მოხვდა საინფორმაციო არეალში: დიდი ნეძი (ზუგდიდის მუნიციპალიტეტი), ხაჯალია (ლანჩხუთის მუნიციპალიტეტი), თერჯოლის კერძო სკოლა „მზეკაბანი“, ანასეული  (ოზურგეთის მუნიციპალიტეტი), კუხი (ხონის მუნიციპალიტეტი), თეკლათი (სენაკის მუნიციპალიტეტი), ფოთის მე-11, წყალტუბოს მესამე და ქუთაისის 35-ე საჯარო სკოლა.

საინფორმაციო შეხვედრებზე განიხილეს ეთიკის და ესთეტიკის ნორმები, სქესობრივი აღზრდა და ჯანსაღი ცხოვრების წესი, როგორც ინსტრუმენტი ძალადობის პრევენციისთვის.

მნიშვნელოვანი იყო მონაწილეთა აქტიურობა, მათი ჩართულობა როლურ თამაშებში, ინიცირებული წარმოდგენები, გულახდილი საუბრები პრობლემებზე (მშობლების როლი, ნაადრევი ქორწინება, არაჯანსაღი ტრადიციები, მავნე ჩვევები). ზოგიერთმა მონაწილემ პროტესტი გამოხატა განსახილველი თემების მიმართ, მაგრამ საბოლოო ჯამში ყველა შეხვედრა წარიმართა დიალოგის, ინტერაქტივის ფორმატით. ერთ-ერთი  შედეგიც გამოიკვეთა: ქუთაისის კლუბი მზად არის, დამოუკიდებლად იმუშაოს   თანატოლებთან და სხვადასხვა სამიზნე ჯგუფთან.

იანვრიდან ქუთაისის ქალთა მხარდაჭერის ცენტრში ფსიქოთერაპიულ კონსულტირებას გადის ერთი ოჯახური წყვილი. მიმდინარეობს ინდივიდუალური კონსულტაციები 4 ბენეფიციართან - კრიზისული ოჯახების წარმომადგენელთან და მოზარდთან, რომელსაც დედასთან გართულებული ურთიერთობები აქვს.

მუშაობა ასევე წარიმართა ხონის, სენაკის, ფოთის, წყალტუბოს, ხურჩა/კოკის  (ზუგდიდის მუნიციპალიტეტი) ქალთა მხარდაჭერის ცენტრებში, სადაც ფსიქოთერაპიულ კონსულტაციებს იღებს 8 ოჯახური წყვილი და სამი კრიზისული ოჯახის წარმომადგენელი. ამას გარდა, ჩატარდა 6 ინდივიდუალური კონსულტაცია.

აქტიური ფსიქოლოგიური მუშაობა ხელს უწყობს ოჯახური კლიმატის გაუმჯობესებას.

ფორუმ-თეატრის პირველი ვიზიტი ყოველთვის განსაკუთრებულია. ასე იყო იანვრის ორივე შეხვედრის დროს - ხაჯალიას (ლანჩხუთის მუნიციპალიტეტი) და ანასეულის (ოზურგეთის მუნიციპალიტეტი) საჯარო სკოლებში.

წარმოდგენებმა (ოჯახური ძალადობის სცენა, ურთიერთობები მშობლებსა და შვილებს შორის) მოსწავლეებსა და მასწავლებლებში დიდი ვნებათაღელვა გამოიწვია. განსაკუთრებით ემოციური იყო სცენა - დედის დაბრუნება ათწლიანი ემიგრაციიდან და პრობლემა, შვილებმა რომ არ მიიღეს. განსაკუთრებით განიცადეს მათ, ვისი ახლობლებიც საზღვარგარეთ მუშაობენ.

შეხვედრებზე ყველაფერი იყო: გაოცება, ინტერესი, დისკუსია, აქტიური ჩართულობა, ტაში... ხაჯალიას სკოლის დირექტორმა  სურვილი გამოხატა, წარმოდგენები სოფლის კლუბში ჩატარდეს. ეს ფორუმ-თეატრის აქტუალური მუშაობის ერთ-ერთი მნიშვნელოვანი შედეგია.

ფონდი „სოხუმის“ ფორუმ-თეატრის მუშაობით დაინტერესდა საინფორმაციო პორტალი „ქუთაისიპოსტი“. ჟურნალისტები ახალგაზრდა მსახიობებთან ერთად სოფელ ხაჯალიაში გაემგზავრნენ, წარმოდგენები გადაიღეს, ინტერვიუები ჩაწერეს...

ფონდ „სოხუმში“ მრგვალი მაგიდა გაიმართა თემაზე „სამედიცინო პერსონალის როლის გაზრდა ძალადობის ფაქტების იდენტიფიკაციაში და რეფერალურ სუბიექტებს შორის თანამშრომლობის ხარისხის გაუმჯობესების პერსპექტივები.“

შეხვედრას ესწრებოდნენ სამედიცინო სფეროს, პროკურატურის, შსს საქალაქო სამმართველოს, მერიის, არასამთავრობო ორგანიზაციების წარმომადგენლები, სოციალური მუშაკები, იურისტები, პედაგოგები. რამდენად არის ჩართული სამედიცინო პერსონალი ძალადობის ფაქტების იდენტიფიცირებაში, რა ვალდებულებები აკისრია და რა გზებითაა შესაძლებელი აქტიური მონაწილეობა პრევენციასა და მსხვერპლის დახმარებაში - ძირითადი აქცენტი ამ საკითხებზე გაკეთდა. მონაწილეებმა ისაუბრეს ცალკეული სუბიექტების მუშაობის პროცესში არსებულ ხარვეზებზე. დაფიქსირდა წინადადებები სამედიცინო პერსონალის როლის გაზრდისა და რეფერირების სუბიექტებს შორის კოორდინაციის ხარისხის გაუმჯობესებისთვის.

ღონისძიება ჩატარდა პროექტის „სამედიცინო პერსონალის გაძლიერება ოჯახში ძალადობის მსხვერპლის დაცვისათვის“ ფარგლებში.

„ქალთა მიმართ ძალადობის ან/და ოჯახში ძალადობის აღკვეთის, ძალადობის მსხვერპლთა დაცვისა და დახმარების შესახებ“ კანონის მონიტორინგის ფარგლებში დასავლეთ საქართველოს 3 მუნიციპალიტეტში - ქუთაისი, წყალტუბოსა და ზუგდიდში ანკეტირება ჩატარდა სამედიცინო პერსონალთან. სულ გამოიკითხა სხვადასხვა პროფილის 100 ბენეფიციარი.

გარდა ანკეტირებისა, ჩაღრმავებული ინტერვიუს მეთოდით გამოიკითხა  ორი ექიმი ფოთსა და თერჯოლაში.

კვლევის მიზანია, გამოავლინოს, კანონის აღსრულების პროცესში, სამედიცინო პერსონალის, როგორც რეფერალური სუბიექტის მუშაობის ხარვეზები: როგორ შეიძლება გავზარდოთ ექიმების როლი ძალადობის პრობლემის იდენტიფიკაციისა და მსხვერპლთა დახმარების საქმეში.

21, 22, 23 და 24 იანვარს, ლანჩხუთის, თერჯოლის, წყალტუბოს და ხონის მუნიციპალიტეტის 4 სკოლაში ჩატარდა ვორკშოპები კონფლიქტის თემაზე.

მე-10 და მე-11 კლასების მოსწავლეებმა როლებში გაითამაშეს სწორი და არასწორი კომუნიკაციის, მოლაპარაკების გზით მოგვარებული პრობლემის სცენები. გააკეთეს კონფლიქტების ანალიზი და სამომავლო ინიციატივებზე იმუშავეს.

ახალგაზრდების თქმით, ასეთი შეხვედრების ჩატარება ხელს უწყობს მათ  ინფორმირებულობას და ლოკალური კონფლიქტების მოგვარებისთვის საჭირო უნარ-ჩვევების შეძენას.

- არაინფორმირებულობა ერთ-ერთი ძირითადი ფაქტორია, რომელიც ხელს უწყობს  კონფლიქტების განვითარებას საზოგადოებაში, - მიიჩნევენ საინიციატივო ჯგუფის  წევრები წყალტუბოში.

მათი მოსაზრებით, ამ მიმართულებით ჯგუფმა უნდა გააძლიეროს მუშაობა მომავალში. მოქალაქეებს უნდა ჰქონდეთ კომპეტენტური ინფორმაცია ადგილობრივ მუნიციპალურ პროგრამებზე, რათა მიეცეთ შესაძლებლობა, მოაგვარონ ინფრასტრუქტურულ, სოციალურ-ეკონომიკურ სფეროში არსებული პრობლემები და ადრეულ სტადიაში შეძლონ ამ მიზეზებით წარმოქმნილი კონფლიქტების დარეგულირება.

ქუთაისის ქალთა საინიციატივო ჯგუფის წევრებმა სამომავლო სტრატეგიაზე იმუშავეს: როგორ იმუშაოს საინიციატივო ჯგუფმა, რა პრობლემებია საზოგადოებაში აქტუალური, რა უნდა გაკეთდეს კონფლიქტური სიტუაციების ადრეული პრევენციის მიზნით.

პრობლემებზე მუშაობისას გამოიკვეთა, რომ სოციალურ-ეკონომიკურ სფეროში არსებული პრობლემები ხშირად იწვევს კონფლიქტების განვითარებას საზოგადოებაში, თუმცა მთავარ პრობლემად მაინც კონფლიქტების ადრეულ მოგვარებაზე მოსახლეობის არაინფორმირებულობას მიიჩნევენ.

18 იანვარს ზუგდიდის მუნიციპალიტეტის გენდერული თანასწორობის საბჭოს სხდომა შედგა. განხილულ იქნა გენდერული საბჭოს 2019-2020წ. სამუშაო გეგმა.  საბჭოს წევრებმა იმსჯელეს გაეროს უშიშროების საბჭოს რეზოლუცია 1325-ის ეროვნული სამოქმედო გეგმის ლოკალიზაციის მიზნით შემუშავებულ „საგზაო რუკაზეც“.

შეხვედრა გამოირჩეოდა მონაწილეთა აქტიურობით. საბჭოს წევრებმა დააფიქსირეს მზადყოფნა, ჩაერთონ „საგზაო რუკაში“ შესული ღონისძებების განხორციელების პროცესში. 

შეხვედრა გაიმართა პროექტის „გაეროს რეზოლუცია 1325-ის, ეროვნული სამოქმედო გეგმის ადგილობრივ დონეზე ლოკალიზების პროცესში ადგილობრივი და რეგიონალური ადმინისტრაციების პოტენციალის გაძლიერება და ამ პროცესში ქალთა, მათ შორის მარგინალური ჯგუფების ჩართვა და დიალოგის გააქტიურება“ ფარგლებში.

პროექტს ახორციელებს ქალთა არასამთავრობო ორგანიზაციების კოალიციური გაერთიანება - იძულებით გადაადგილებულ ქალთა ასოციაცია „თანხმობა“, ქალთა საინფორმაციო ცენტრი და კულტურულ-ჰუმანიტარული ფონდი „სოხუმი“.