დასახული აქტივობების გაცნობის და ერთობლივი მუშაობის დაგეგმვის მიზნით ფოთის ქალთა მხარდაჭერის ცენტრის მცირე პროექტის ხელმძღვანელი შეხვდა ბაღების გაერთიანების ფსიქოლოგს, საქალაქო სამმართველოს უბნის ინსპექტორს, სოციალური სააგენტოს იურისტს და სოციალურ მუშაკს, თვითმმართველობის წარმომადგენლებს. მათი მხრიდან დაფიქსირდა საპროექტო აქტივობებში ჩართვის მზადყოფნა. აღინიშნა, რომ მსგავსი შეხვედრები მნიშვნელოვანია კოორდინირებული მუშაობისთვის და ხელს შეუწყობს ძალადობის პრევენციას.

მარტში სამ კრიზისულ წყვილთან გაიმართა ფსიქოლოგისა და კონფლიქტოლოგის შეხვედრა/კონსულტაცია. კონფლიქტების გამომწვევი მიზეზები სხვადასხვაა: სოციალური საკითხები, ფსიქოლოგიური დაძაბულობა, შეუთანხმებლობა.

წყვილები ცდილობენ შექმნილი სიტუაციის გაანალიზებას, მოსალოდნელი რისკების განსაზღვრას და ფიქრობენ გამოსავალზე. კონსულტაციის შემდეგ მხარეებმა ინდივიდუალურად მიიღეს რჩევები კრიზისის დასაძლევად.

აქტიურ ეტაპზეა წყალტუბოს ქალთა მხარდაჭერის ცენტრის მცირე პროექტი „გენდერული ცნობიერება ახალგაზრდებში.“ მეორე საჯარო სკოლაში ჩატარდა ვორკშოპი ახალგაზრდებთან და საინფორმაციო შეხვედრა სკოლის დირექციასთან.

შეხვედრის თემა იყო - გენდერის არსი, გენდერული პოლიტიკის მნიშვნელობა. მუშობაში აქტიურად ჩაერთნენ წყალტუბოს გენდერული თანასწორობის საბჭოს მდივანი მზია კიკალიშვილი და გენდერულ საკითხებზე პასუხისმგებელი პირი ლელა ბერძენიშვილი.

მონაწილეთა დაინტერესება გამოიწვია მუნიციპალური გენდერული პოლიტიკის  კუთხით მიმდინარე ცვლილებებმა. ბავშვებმა და პედაგოგებმა აღნიშნეს, რომ გენდერული თემატიკა დღითიდღე აქტუალური ხდება. ასეთი სახის შეხვედრები ხელს უწყობს მოსწავლეების, პედაგოგებისა და მშობლების ურთიერთობების გამყარებას, რაც საზოგადოებაში ჯანსაღი კლიმატის ჩამოყალიბების ერთ-ერთი ფაქტორია.

„გაკვეთილი განსხვავებული და სახალისო იყო.“

„კონკრეტული მაგალითის განხილვით გავიგე ინფორმაციის ნაკლებობას ან დამახინჯებას როგორ შეუძლია გამოიწვიოს კონფლიქტი.“

„მიხარია, რომ მომავალ თვესაც შევხვდებით ერთმანეთს.“

აღნიშნეს მოსწავლეებმა ვორკშოპების ბოლოს. შეხვედრები კონფლიქტის წარმოშობის მიზეზების განხილვას მიეძღვნა. ორულუს (ზუგდიდის მუნიციპალიტეტი), ნიგვზიანის (ლანჩხუთის მუნიციპალიტეტი), კონტუათის (ხონის მუნიციპალიტეტი) საჯარო სკოლის მოსწავლეები დიდი ინტერესით ელოდებიან შემდეგ შეხვედრებს, რომ ისწავლონ, როგორ აიცილონ თავიდან კონფლიქტები.

15 მარტს სამხრეთ კავკასიაში ეუთოს სპეციალური წარმომადგენელი ბატონი რუდოლფ მიჩალკა და მისი თანმხლები პირები - ზიგფრიდ ვუბერი და პეტრო გვასიამაჩია ქუთაისში შეხვდნენ ადგილობრივ არასამთავრობო ორგანიზაციებს.

ფონდი „სოხუმის“ ოფისში გამართულ შეხვედრაში მონაწილეობა მიიღო ცამეტმა არასამთავრობო ორგანიზაციამ, რომლებიც მუშაობენ დევნილთა საკითხებზე იმერეთის რეგიონში.

ყველა მონაწილეს მიეცა საშუალება, გაეზიარებინა თავისი ხედვა დევნილთა პრობლემებზე, ასევე ესაუბრა სამშვიდობო პროცესების პოზიტიურ დინამიკასთან დაკავშირებული გამოწვევებისა და შესაძლებლობების შესახებ.

მონაწილეების აქტიური ჩართულობის ფონზე ჩაიარა ვორკშოპებმა თემაზე „სქესობრივი განათლების მნიშვნელობა მოზარდებში“. მონაწილეებმა აღნიშნეს, რომ ამ კუთხით არაფორმალური განათლების მიღებას ძალიან დიდი მნიშვნელობა აქვს. ვორკშოპების ბოლოს შეიქმნა ახალგაზრდული ჯგუფები, რომლებიც განაგრძობენ თანატოლთა ინფორმირებას.

მუშაობა ჩატარდა გოჩა ჯიხაიშისა და ნახახულევის სკოლებში ხონის ქალთა მხარდაჭერის მცირე პროექტის ფარგლებში.

ქუთაისის ქალთა საინიციატივო ჯგუფის საინფორმაციო შეხვედრაზე მონაწილებმა მოისმინეს ინფორმაცია პრობლემებზე, რომელთა ადვოკატირებაც მიმდინარეობს ადგილობრივი თვითმმართველობის ჩართულობით.

- კონფლიქტების უმრავლესობა სოციალური პრობლემების ფონზე ვითარდება. რამდენი პრობლემაც მოგვარდება, იმდენი მოგვარებული კონფლიქტი გვექნება, რაც ხელს შეუწყობს მშვიდობიანი საზოგადოების შექმნას, - აღინიშნა შეხვედრაზე.

რა ჩატარდა? რა გამოწვევებია? რისი გაკეთება შეიძლება სამომავლოდ?

ამ კითხვებზე გაიცა პასუხი კოალიციურ შეხვედრაზე ზუგდიდში, ასოციაცია „მერკურის“ ოფისში.

შეხვედრა გაიმართა კოალიციის „ქალი და მშვიდობა“ აქტივობების ფარგლებში. მშვიდობა“. კოალიციაში შევიდა დასავლეთ საქართველოს 4 რეგიონის (იმერეთი, სამეგრელო, გურია, აჭარა) ქალთა 10 არასამთავრობო ორგანიზაცია.

შარშან თითოეულმა ორგანიზაციამ  საინტერესო ღონისძიება ჩაატარა თავის ქალაქში: საინფორმაციო შეხვედრები, ტრენინგები, ვიდეორგოლები სამშვიდობო თემაზე. გაჩნდა თანამოაზრეთა ახალი წრეები, ახალი იდეები და ერთობლივი საქმიანობის გაგრძელების დიდი სურვილი.

სოფელ სიმონეთის (თერჯოლის მუნიციპალიტეტი) საჯარო სკოლაში ფორუმ-თეატრი პირველად ჩავიდა. ამიტომ თავიდან იყო წამყვანმა - ჯოკერმა აუდიტორიას გააცნო ფონდი „სოხუმის“ მუშაობა, ფორუმ-თეატრის სპეციფიკა. შემდეგ გათამაშდა 5 წარმოდგენა. დიდი ინტერესი გამოიწვია დედა-შვილის სცენამ. მაყურებელი აქტიურად ჩაერთო სცენებში და ცდილობდა, შეეცვალა ძალადობის ვექტორი. დისკუსიის საგანი გახდა მიგრაციის თემაზე შექმნილი წარმოდგენა.

დისკუსიები და ძალადობის მაგალითები - ყველაფერი ეს  შთამბეჭდავი იყო მაყურებლისთვის. 

წყალტუბოს ქალთა საინიციატივო ჯგუფმა მორიგი საინფორმაციო შეხვედრა გაიმართა. შეკრებილებმა იმსჯელეს საზოგადოებაში კონფლიქტის გამომწვევ მიზეზებზე. იმაზე, რამდენად ეხება ეს პრობლემები ქალებს და რა უნდა გაკეთდეს ადრეულ სტადიაში მათი მოგვარებისთვის.

პრობლემათა გენდერული კუთხით განხილვისას ხაზგასმით აღნიშნეს, რომ სოციალური და ინფრასტრუქტურული პრობლემები სწორედ ქალებს უქმნის ყველაზე მეტ დისკომფორტს. ამიტომ მათი მოგვარება გააუმჯობესებს ქალთა უსაფრთხოებას  და შეამცირებს კონფლიქტების განვითარების რისკს.