დასრულდა ფოთის ქალთა მხარდაჭერის ცენტრის მცირე პროექტი „ჰარმონიული გარემო პატარებისათვის“. მის ფარგლებში გაიმართა საინფორმაციო შეხვედრები და ორი ტრენინგი. 13 დეკემბერს საკრებულოს დარბაზში ჩატარდა მეორე ტრენინგი საბავშვო ბაღის მენეჯერებისა და აღმზრდელებისთვის თემაზე „გენდერის არსი, გენდერული ძალადობა, ოჯახში ძალადობის ტიპები, ნიშნები, რეფერირების გზები და მექანიზმები“.

ტრენინგზე აქცენტი გაკეთდა ბულინგის პრობლემაზე. მონაწილეების თქმით, აუცილებელია ყველა პედაგოგს ჰქონდეს ინფორმაცია ძალადობის ფორმების, კანონის, დამცავი მექანიზმების შესახებ.

12 დეკემბერი - განსაკუთრებული დღეა ფონდი „სოხუმისთვის“. ფონდი „სოხუმი“ - პირველი ქართული ორგანიზაციაა, რომელმაც განსაკუთრებული დამსახურებისთვის მიიღო საერთაშორისო პრიზი ადამიანის უფლებების სფეროში.

საფრანგეთის რესპუბლიკის ადამიანის უფლებების ეროვნული საკონსულტაციო კომისიის პრიზის გადაცემის ოფიციალურ ცერემონიაში მონაწილეობა მიიღეს ფონდი „სოხუმის“ თავმჯდომარემ ალლა გამახარიამ და თბილისის წარმომადგენლობის ხელმძღვანელმა ეკატერინე გამახარიამ. პრიზი გადასცა საფრანგეთის ელჩმა ბატონმა პასკალ მენიემ.

ცერემონია გაიმართა თბილისში საფრანგეთისა და ნიდერლანდების სამეფოს საელჩოს მიერ.   

10-12 დეკემბერს ფონდი „სოხუმის“ თავმჯდომარემ ალლა გამახარიამ მონაწილეობა მიიღო აღმოსავლეთ პარტნიორობის სამოქალაქო საზოგადოების ფორუმის მეათე ყოველწლიურ ასამბლეაში „დემოკრატიული ევროპული მომავლისკენ მიმავალი გზა“. ფონდი „სოხუმი“ ფორუმის დელეგატია. ღონისძიება გაიმართა საქართველოს პარლამენტში და სასტუმრო „რედისონ ბლუ ივერიაში“, თბილისში.

ყოველწლიურ ასამბლეაზე შედგა მსჯელობა პოლiტიკურ სიტუაციაზე აღმოსავლეთ პარტნიორობის ქვეყნებსა და ევროკავშირში. რეგიონის სამოქალაქო საზოგადოების ორგანიზაციების წარმომადგენლებმა ისაუბრეს წვლილზე, რომლის შეტანაც შეუძლიათ მდგრადი დემოკრატიული განვითარებისთვის და იმაზე, როგორ შეუძლია სამოქალაქო საზოგადოებას ურთიერთობა მოქალაქეებთან ავტორიტარული რეაქციის საწინააღმდეგოდ ევროპული კონტინენტის ზოგიერთ ნაწილში.

ასამბლეის მონაწილეებმა ხმა მისცეს აღმოსავლეთ პარტნიორობის სამოქალაქო საზოგადოების ფორუმის ქცევის ახალ კოდექსს და აირჩიეს საარბიტრაჟო ორგანო.

ფონდი „სოხუმის“ ახალგაზრდული კლუბები, ტრადიციულად, ჩაერთნენ საერთაშორისო კამპანიაში „16 აქტიური დღე ქალთა მიმართ ძალადობის წინააღმდეგ“. საინფორმაციო შეხვედრები გაიმართა სოფელ დიდი ნეძში (ზუგდიდის მუნიციპალიტეტი), თერჯოლასა და ქუთაისში. საინტერესო და აქტუალურმა თემამ „ტოლერანტული საზოგადოება და კავშირი ძალადობასთან“ გამოიწვია მონაწილეთა აქტიური დისკუსია. ბევრ რამეზე ისაუბრეს: საზოგადოების არატოლერანტულობაზე, უმცირესობების პრობლემებზე, თაობათა შორის ურთიერთობებზე. როლური თამაშებისთვის ახალგაზრდებმა დამოუკიდებლად აირჩიეს თემები, საინტერესოდ წარმოადგინეს, ანალიზიც გააკეთეს და დასკვნებიც გამოიტანეს.

ფონდი „სოხუმის“ ქალთა მხარდაჭერის ცენტრები გამოირჩეოდნენ საერთაშორისო კამპანიაში „16 აქტიური დღე ქალთა მიმართ ძალადობის წინააღმდეგ.“

ქუთაისის, ხონის, წყალტუბოს, თერჯოლის, სენაკის, ფოთის, ზუგდიდის, ლანჩხუთის და ოზურგეთის ქალთა მხარდაჭერის ცენტრების მობილიზატორებმა 25 ნოემბრიდან 10 დეკემბრამდე ჩაატარეს 30-მდე საინფორმაციო შეხვედრა ქალაქებსა და სოფლებში, სხვადასხვა ჯგუფში - ქალებთან, მამაკაცებთან, დევნილებთან, ახალგაზრდებთან, პედაგოგებთან.

საინფორმაციო შეხვედრებზე მოწვეულნი იყვნენ ადგილობრივი თვითმმართველობის წარმომადგენლები, რომელთაც ქალთა ჯგუფებს გააცნეს მუნიციპალიტეტების 2019 წლის ბიუჯეტის პროექტის სოციალური მიმართულება.

თერჯოლის ქალთა მხარდაჭერის ცენტრის მობილიზატორის ინიციატივით ჩატარდა სამდღიანი სემინარი მოზარდებთან და მათ მშობლებთან „თერჯოლა მედის“ მხარდაჭერით. ფსიქოლოგთან, ფსიქიატრთან ერთად სემინარზე განხილულ იქნა ძალადობის მიზეზები, მოზარდებისა და მშობლების ურთიერთობები.

შეხვედრებზე ყველა მონაწილე გაეცნო 16-დღიანი კამპანიის ისტორიას. მათ დაგმეს ძალადობა და სოლიდარობა გამოხატეს კამპანიის მიმართ.

9 მუნიციპალიტეტის ადგილობრივ თვითმმართველობში ჩაატარეს საინფორმაციო შეხვედრები ფონდი „სოხუმის“ ქალთა მხარდაჭერის ცენტრების მობილიზატორებმა. თვითმმართველობების წარმოადგენლებმა ისაუბრეს მსხვერპლთა დაცვის და დახმარების პროგრამების შესახებ.

შეხვედრების თემა საერთო იყო - საერთაშორისო კამპანია „16 აქტიური დღე ქალთა მიმართ ძალადობის წინააღმდეგ“. დარიგდა კამპანიისთვის მომზადებული საინფორმაციო ფურცლები, თეთრი ბაფთები.

დასრულდა საერთაშორისო კამპანია „16 აქტიური დღე ქალთა მიმართ ძალადობის წინააღმდეგ“, რომელშიც ფონდი სოხუმი ყოველწლიურად აქტიურად ერთვება. წელს კამპანია გაიმართა მოწოდებით „შევაჩეროთ ძალადობა ქალთა მიმართ შრომის სამყაროში“.

კამპანიის ფარგლებში 25 ნოემბრიდან 10 დეკემბრის ჩათვლით ჩატარდა 100 ზე მეტი ღონისძიება 1500 მეტი ადამიანის ჩართულობით დასავლეთ საქართველოს 9 მუნიპალიტეტში. კამპანია დაიწყო ფეისბუქაქციით. შემდეგ კი იყო საინფორმაციო შეხვედრები ქალებთან, ადგილობრივ თვითმმართველობებთან, ახალგაზრდებთან, პედაგოგებთან, ფსიქოლოგიური და იურიდიული კონსულტაციები, სპორტული ტურნირები, ტრენინგები მედიცინის მუშაკებისთვის. წარმოდგენები გამართა ფონდი „სოხუმის“ ფორუმ-თეატრმა. დაიბეჭდა და გავრცელდა საინფორმაციო ფურცლები, ფსიქოლოგის რჩევები ქალებს.

ყველა აქტივობა განთავსებულია ფონდი „სოხუმის“ ფეისბუქგვერდზე.

https://www.facebook.com/fsokhumi/

- პოსტრამვული სტრესის სინდრომის განსაზღვრა. მსხვერპლის იდენტიფიკაცია და შემდგომი ეტაპები. მონაცემების სისტემატიზაცია, - ამ საკითხების განხილვით დაიწყო ტრენინგის მესამე, ფინალური დღე სამედიცინო სფეროს წარმომადგენლებთან ფონდ „სოხუმში“.

მონაწილეებმა ჯგუფური სავარჯიშოების გამოყენებით იმსჯელეს, რა ბარიერები ახლავს ძალადობის მსხვერპლის იდენტიფიკაციის პროცესს. ისაუბრეს მოსალოდნელ რისკებზე. მათი განსაზღვრის შემდეგ კი უსაფრთხოების გეგმასა და მსხვერპლის დახმარებაზე  გაამახვილეს ყურადღება.

ექიმები მიიჩნევენ, რომ მსგავსი ტრენინგი ყველა კლინიკაში უნდა ჩატარდეს. მასშტაბების გაზრდა ხელს შეუწყობს სამედიცინო პერსონლის ინფორმირებას და ძალადობის მსხვერპლის ეფექტურ დახმარებას.

ტრენინგების ციკლი ჩატარდა პროექტის „სამედიცინო პერსონალის გაძლიერება ოჯახში ძალადობის მსხვერპლის დაცვისათვის“ ფარგლებში. ტრენინგის ბოლოს მონაწილეებს დაურიგდა პროექტის ფარგლებში გამოცემული მეთოდური დამხმარე სახელმძღვანელო „სამედიცინო პერსონალის როლი ძალადობის პრევენციაში“.

ფონდი „სოხუმის“ ორგანიზებით გაიმართა მრგვალი მაგიდა ლანჩხუთის მუნიციპალიტეტის მერიის სხდომათა დარბაზში თემაზე: „ქალთა მიმართ და ოჯახში ძალადობა - რეფერალური მექანიზმის მუშაობა: გამოწვევები, პრობლემები, დაძლევის გზები“.

შეხვედრას ესწრებოდნენ: ადგილობრივი თვითმმართველობის და პოლიციის, ამ მიმართულებით მომუშავე ადგილობრივი არასამთავრობო ორგანიზაციის წარმომადგენლები, ექიმები, საბავშვო ბაღის და სკოლის პედაგოგები, მეთოდისტები, ფსიქოლოგი,  აქტივისტი ქალბატონები.

მონაწილეებმა ისაუბრეს რეფერირების სისტემაზე, არსებულ გამოწვევებზე და პრობლემების მოგვარების რეალურ გზებზე, გენდერული თანასწორობის საბჭოს როლზე, ადგილობრივ პროგრამებზე ძალადობის პრევენციისა და მსხვერპლის დახმარების კუთხით.

- პროტესტი ქალთა მიმართ ძალადობას, ჩვენ გვინდა ვიცხოვროთ არაძალადობრივ გარემოში, - ასეთი იყო ფონდი „სოხუმის“ ახალგაზრდა აქტივისტების განწყობა, რომლებიც ჩაერთნენ კამპანიაში „16 აქტიური დღე ქალთა მიმართ ძალადობის წინააღმდეგ“.  

საინფორმაციო შეხვედრები, ვორკშოპები, აქციები, ფილმის ჩვენება და დისკუსიები - ახალგაზრდა ლიდერების ინიცირებით ამ ფორმატით დასავლეთ საქართველოს 9 მუნიციპალიტეტში გაიმართა შეხვედრები. აქტივობებში ჩართული იყვნენ: ქუთაისის  31-ე, სენაკის მე-3, ფოთის 21-ე, ხონის მე-2, ნიგვზიანის (ლანჩხუთის მუნიციპალიტეტი), დვაბზუს (ოზურგეთი მუნიციპალიტეტი), დიდი ნეძის (ზუგდიდის მუნიციპალიტეტი), გუმბრინის (წყალტუბოს მუნიციპალიტეტი), მეტლახის (თერჯოლის მუნიციპალიტეტი) საჯარო სკოლები.

ახალგაზრდები მზად არიან, ძალადობის თემაზე დისკუსიები სხვადასხვა ფორმატით მომავალშიც განაგრძონ.