გულახდილობა, სითამამე, პრეზენტაბელურობა - ეს არის ის ძირითადი უნარ- ჩვევები, რომლითაც გამოირჩევიან ახალგაზრდული კლუბის წევრები. 

გენდერული ძალადობასა და დაცვის მექანიზმებზე ჩატარდა ახალგაზრდული კლუბის საინფორმაციო შეხვედრები ხონში, წყალტუბოსა და სენაკში.

ცვლილებები მოხდა შეხვედრის ფორმატში - აქტივობებს დაემატა როლური თამაშები - იმიტირებული სცენები. მონაწილეებმა სხვადასხვა აქტუალური თემა აირჩიეს: ბულინგი, ოჯახში ძალადობა, დისკრიმინაცია. ეს ის პრობლემებია, რომლებიც მოზარდებს აწუხებთ და იციან, რომ მხოლოდ მათი ჩართულობითაა შესაძლებელი უკეთესი გარემოს შექმნა.

გრძელდება ფოთის ქალთა მხარდაჭერის ცენტრის მცირე პროექტი „ჰარმონიული გარემო პატარებისათვის“. ფოთის საკრებულოს დარბაზში საბავშვო ბაღის მენეჯერებისა და აღმზრდელთათვის ჩატარდა ტრენინგი თემაზე „გენდერის არსი, გენდერული ძალადობა, ოჯახში ძალადობის ტიპები, ნიშნები, რეფერირების გზები და მექანიზმები“.

ტრენინგი მონაწილეთა აქტიური ჩართულობის ფონზე მიმდინარეობდა. აღინიშნა, რომ მსგავსი ტრენინგები მნიშვნელოვანია ბაღების პედაგოგებისათვის, რადგანაც ახალ ინსტრუქციებში მითითებულია ამ კუთხით ჩართულობა. ტრენინგზე დიდი აქცენტი გაკეთდა ბულინგის თემაზე. მონაწილეთათვის საინტერესო აღმოჩნდა ბულინგის ფაქტების გამოკვეთის მეთოდები.

ბოლოს დაისახა სამომავლო მუშაობის გეგმები.

მონაწილეებმა განაცხადეს:

„მნიშვნელოვანია, ეს ინფორმაცია მაქსიმალურად მივიტანოთ ყველა პედაგოგთან და აღმზრდელთან“.

„საინფორმაციო შეხვედრას ჩავატარებ მშობლებთან და აღმზრდელებთან. მივხვდი, რომ აუცილებელია, მშობელმა იცოდეს, ჩვენ რაზე გვევალება რეაგირება, რომ მისთვის უცხო არ იყოს“.

წყალტუბოს ქალთა საინიციატივო ჯგუფის წევრებმა მორიგ შეხვედრაზე იმსჯელეს იმაზე, თუ როგორ გააგრძელონ მუშაობა, რა ცვლილებებია შესატანი სამომავლო სტრატეგიაში.

საინიციატივო ჯგუფის ერთმა ნაწილმა მონაწილეობა მიიღო ტრენინგზე, რომლის თემა იყო „კონფლიქტების ადრეული პრევენცია გენდერული ასპექტების  გათვალისწინებით.“

ჯგუფის წევრებმა გააანალიზეს ტრენინგიდან მიღებული ინფორმაციები: რას ნიშნავს კონფლიქტებზე ადრეული რეაგირების სისტემა, როგორ ხდება ინფორმაციის შეგროვება, გაახლება, ინდიკატორების განსაზღვრა, კონფლიქტების რისკებზე მუშაობა და სხვა.

ქალთასაინიციატივო ჯგუფის მიერ შექმნილი სტრატეგიის მონახაზში ადგილობრივ თვითმმართველობებთან სისტემატიური თანამშრომლობის აუცილებლობა იკვეთება.

აფხაზეთის ავტონომიური რესპუბლიკის ჟიული შარტავას სახელობის მეექვსე საჯარო სკოლაში (ქუთაისი) ბოლო თვეების განმავლობაში 10 გაკვეთილი ჩატარდა სახელმძღვანელოს „კონფლიქტების მართვის სწავლება სკოლაში“ მიხედვით.
ეს იყო ფონდი „სოხუმის“ პროექტი „ძალადობის გარეშე ნაბიჯ-ნაბიჯ მშვიდობის შენებისთვის“, რომელიც განხორციელდა სომხეთის არასამთავრობო ორგანიზაციასთან „ქალები განვითარებისთვის“ თანამშრომლობით.

12 ნოემბერს სკოლაში ფინალური ღონისძიება გაიმართა, სკოლასა და ფონდ „სოხუმს“ შორის გაფორმდა თანამშრომლობის მემორანდუმი. სკოლას გადაეცა 5 ცალი სახელმძღვანელო, პროექტის მონაწილეებს კი - სერტიფიკატები, საჩუქრები.

ამ მოსწავლეების ბაზაზე სკოლაში შეიქმნა „მშვიდობის კლუბი.“ კლუბის წევრები თავად ჩაატარებენ გაკვეთილებს სკოლის მოსწავლეებთან კონფლიქტების მართვის და მშვიდობის თემაზე.

პროექტი ხორციელდება  არასამთავრობო ორგანიზაციის „ქალები განვითარებისთვის“ მხარდაჭერით (სომხეთი)

ფონდი „სოხუმის“ ჩრდილების თეატრი ნოემბერში ხონის მუნიციპალიტეტს ესტუმრა და პატარები გაახარა.

თეატრის წარმოდგენა „თალგამი“ ჩატარდა ორ სოფლის - კუხის და ნახახულევის საბავშვო ბაღებში. პედაგოგებმა კმაყოფილება გამოხატეს, რადგანაც არ არიან განებივრებულები უფასო საბავშვო სპექტაკლებით.

ბავშვები კიდევ უფრო კმაყოფილები იყვნენ. კუხში 34 მაყურებელი იყო, დარბაზში კი სამარისებური სიჩუმე იდგა. პატარები ყურადღებით ადევნებდნენ თვალს - მსგავსი რამ იშვიათია, რადგან ბავშვების რაოდენობა ყოველთვის იწვევს ხმაურს.

ამ წარმოდგენებით ბავშვებმა გაიგეს, რომ ყველა თანასწორია და პრობლემა ერთად, მეგობრულად უნდა მოაგვარონ. სწორედ ეს არის სპექტაკლის მიზანი.

9 ნოემბერს კიდევ ერთი გაკვეთილი-ტრენინგი გაიმართა ფონდი „სოხუმის“ პროექტის „ძალადობის გარეშე ნაბიჯ-ნაბიჯ მშვიდობის შენებისთვის“ ფარგლებში.

გაკვეთილის თემა იყო „კონფლიქტის მშვიდობიანად მოგვარების უნარები“. მოსწავლეები გაეცნენ კონფლიქტის ესკალაციის თავიდან აცილების პრინციპებს და რჩევებს სწორი ქცევის შესახებ. მუშაობა ჩატარდა აფხაზეთის ავტონომიური რესპუბლიკის ჟიული შარტავას სახელობის მეექვსე საჯარო სკოლაში (ქუთაისი). როგორც წინა 9 გაკვეთილი, მე-10 გაკვეთილიც მოეწონათ მონაწილეებს - ეს იყო საინტერესოდ, გონივრულად გატარებული დრო, ბევრის შეძენა.

კიდევ ერთი სამოქალაქო ფორუმი გაიმართა პროექტის „გაეროს რეზოლუცია 1325-ის, ეროვნული სამოქმედო გეგმის ადგილობრივ დონეზე ლოკალიზების პროცესში ადგილობრივი და რეგიონალური ადმინისტრაციების პოტენციალის გაძლიერება და ამ პროცესში ქალთა, მათ შორის მარგინალური ჯგუფების ჩართვა და დიალოგის გააქტიურება“ ფარგლებში.

ამჯერად ფონდი „სოხუმის“ ორგანიზებით წალენჯიხის მუნიციპალიტეტის მერიის სხდომათა დარბაზში შეიკრიბნენ სამეგრელო-ზემო სვანეთის გუბერნიის, მუნიციპალიტეტის მერიის, საკრებულოს, საინფორმაციო სფეროს წარმომადგენლები, სამოქალაქო საზოგადოების აქტივისტები, საზღვრისპირა სოფლებში მცხოვრები ქალები და გოგონები.

მონაწილეებმა მოისმინეს მოხსენებები გაეროს უშიშროების საბჭოს რეზოლუცია 1325-ის და გაეროს რეზოლუციების განხორციელების 2018–2020 წლების ეროვნული სამოქმედო გეგმის შესახებ. შემდეგ კი ჯგუფებში იმუშავეს იმაზე, თუ რა საჭიროებები აქვთ კონფლიქტის შედეგად დაზარალებულ  და საზღვრისპირა სოფლებში მცხოვრებ ქალებს და გოგონებს წალენჯიხის მუნიციპალიტეტში, როგორ უნდა აისახოს ეს საჭიროებები ადგილობრივ პროგრამებში.

პროექტს ახორციელებს ქალთა არასამთავრობო ორგანიზაციების კოალიციური გაერთიანება - იძულებით გადაადგილებულ ქალთა ასოციაცია „თანხმობა“, ქალთა საინფორმაციო ცენტრი და კულტურულ-ჰუმანიტარული ფონდი „სოხუმი“.

ფოთის საჯარო სკოლაში, თერჯოლის კერძო სკოლასა და დიდი ნეძის (ზუგდიდის მუნიციპალიტეტი) საჯარო სკოლაში ჩატარდა ახალგაზრდული კლუბების საინფორმაციო შეხვედრები.

გენდერული ძალადობა, ფორმები და დაცვის მექანიზმები ძალადობის პრევენციისთვის -  ასეთი იყო შეხვედრების თემა.

ძირითადი თემის განხილვის შემდეგ იყო ჯგუფური თამაშები, ძალადობის სცენების წარმოდგენა: ძალადობა ოჯახში, სკოლაში, ცოლ-ქმრული კონფლიქტები. მოზარდებმა  დამოუკიდებლად იმუშავეს, ბევრი პირველად მონაწილეობდა მსგავს აქტივობაში. მათ კარგად დაინახეს ძალადობის ფორმები და ნეგატიური შედეგები. ისიც გაიგეს, როგორ უნდა დაიცვას ადამიანმა თავი ძალადობისგან.

მე-9 გაკვეთილი-ტრენინგი ჩატარდა აფხაზეთის ავტონომიური რესპუბლიკის ჟიული შარტავას სახელობის მეექვსე საჯარო სკოლაში (ქუთაისი). გაკვეთილის თემა იყო: „ქცევის სტილი კონფლიქტურ სიტუაციებში“. მოსწავლეებმა შეისწავლეს ქცევის სტილები, განსხვავებები მათ შორის. ასევე გაეცნენ, რომელ სიტუაციაში რომელი ქცევის სტილია მისაღები. გაკვეთილი ჩატარდა ხალისიანად, თითოეული მონაწილის აქტიური ჩართვით.

მუშაობა განხორციელდა ფონდი „სოხუმის“ პროექტის „ძალადობის გარეშე ნაბიჯ-ნაბიჯ მშვიდობის შენებისთვის“ ფარგლებში.

წყალტუბოს მუნიციპალიტეტის საკანონმდებლო და აღმასრულებელი ხელისუფლების, აფხაზეთის ავტონომიური რესპუბლიკის სამთავრობო სტრუქტურის, მასმედიის, არასამთავრობო სექტორის წარმომადგენლები და სამოქალაქო საზოგადოების აქტივისტები შეიკრიბნენ სამოქალაქო ფორუმზე საკრებულოს სხდომათა დარბაზში.

შეხვედრა გაიმართა პროექტის „გაეროს რეზოლუცია 1325-ის, ეროვნული სამოქმედო გეგმის ადგილობრივ დონეზე ლოკალიზების პროცესში ადგილობრივი და რეგიონალური ადმინისტრაციების პოტენციალის გაძლიერება, დაამპროცესში ქალთა, მათ შორის მარგინალური ჯგუფების ჩართვა და დიალოგის გააქტიურების“, ფარგლებში.

არასამთავრობო სექტორისა და ადგილობრივი ხელისუფლების თანამშრომლობის მნიშვნელობასა და გენდერული მიმართულებით მუშაობის გაძლიერების აუცილებლობაზე ისაუბრა წყალტუბოს მუნიციპალიტეტის საკრებულოს თავმჯდომარემ გრიგოლ ივანეიშვილმა. 

ჯგუფური მუშაობისას ფორუმის მონაწილეებმა დააფიქსირეს, როგორ უნდა მოხდეს ადგილობრივ დონეზე გაეროს რეზოლუცია 1325-ის მესამე, 2018-2020 წლების ეროვნული სამოქმედო გეგმის რეალიზება მუნიციპალიტეტის გენდერული თანასწორობის გეგმაში.

პროექტს ახორციელებს კოალიციური გაერთიანება: იძულებით გადაადგილებულ ქალთა ასოციაცია „თანხმობა“ (თბილისი), ქალთა საინფორმაციო ცენტრი (თბილისი) და კულტურულ-ჰუმანიტარული ფონდი ,,სოხუმი“ (ქუთაისი).

პროექტი ხორციელდება აშშ სახელმწიფო დეპარტამენტის და გაეროს ქალთა ორგანიზაციის მხარდაჭერით