ქუთაისის, წყალტუბოს და ხურჩის (ზუგდიდის მუნიციპალიტეტი) ქალთა საინიციატივო ჯგუფის წევრები ხვდებიან სხვადასხვა თემის წევრებს. სწორედ ამ შეხვედრებზე იკვეთება ის პრობლემები, რომლებიც პრიორიტეტულია თემში და კონფლიქტიურ სიტუაციებს ქმნის.

სამივე მუნიციპალიტეტში საინიციატივო ჯგუფები აქტიურად მუშაობენ კონფლიქტური სიტუაციების ადრეულ სტადიაში მოსაგვარებლად. თითოეული ჯგუფი მის მიერ შემუშავებული ადვოკატირების გეგმით მუშაობს. ამ პროცესში მნიშვნელოვანია სამოქალაქო აქტივისტების ჩართულობა და ადგილობრივ თვითმმართველობასთან თანამშრომლობა.  

ქუთაისის ქალთა საინიციატივო ჯგუფის წევრებმა განიხილეს, როგორი უნდა იყოს  ჯგუფის სამომავლო სტრატეგია, როგორ უნდა მოხდეს კონფლიქტების ადრეული რეაგირება გენდერული ნიშნით.

სამომავლო სტრატეგიით ჯგუფის წევრები განაგრძობენ საინფორმაციო შეხვედრებს  სხვადასხვა თემში. იგეგმება ანკეტური გამოკითხვა პრიორიტეტული პრობლემების იდენტიფიცირების მიზნით. 

პარალელურად გრძელდება შეხვედრები ადგილობრივი თვითმმართველობის წარმომადგენლებთან და ინფორმაციის გაცვლა, რათა მოხდეს ადრეული რეაგირება კონფლიქტებზე.

გამორჩეულად ბევრი ღონისძიება ჩატარდა ნოემბერში ხონის ქალთა მხარდაჭერის ცენტრის მცირე პროექტის „ახალგაზრდები ძალადობის წინაღმდეგ“ ფარგლებში: საინფორმაციო შეხვედრები კუხსა და მათხოჯში მერის წარმომადგენლებთან, კუხის საბავშვო ბაღის გამგესთან, მე-4 საჯარო სკოლის მოსწავლეებთან თემაზე „კონფლიქტები და ბულინგი“.

კუხის და მათხოჯის საბავშვო ბაღებში გაიმართა ფონდი „სოხუმის“ ჩრდილების თეატრის წარმოდგენა, ნაჩვენები იყო სპექტაკლი „თალგამი“. სოფელ ნახახულევში კი  პროექტის ახალგაზრდა მონაწილემ მოაწყო ფონდი „სოხუმის“ აქტივისტი გოგონების გადაღებული მოკლემეტრაჟიანი ფილმების „ვიწრო დერეფანი“, „ერთ ჩვეულებრივ დღეს“, „ჩემოდანი“, „სავარძელი“, „საფეხურები“ ჩვენება.

პროექტში სულ უფრო მეტი ადამიანი ერთვება და სწორედ ეს არის მისი მთავარი ამოცანა.

ქუთაისის, ხონის, წყალტუბოს, ლანჩხუთის, სენაკის, ოზურგეთის, ხურჩა/კოკის (ზუგდიდის მუნიციპალიტეტი) ქალთა მხარდაჭერის ცენტრების მობილიზატორები ქუთაისში, ფონდი „სოხუმის“ ოფისში შეიკრიბნენ.

შეხვედრაზე გაკეთდა ჩატარებული სამთვიანი მუშაობის მოკლე ანგარიში. მობილიზატორებმა ისაუბრეს პრობლემებზე და მომავალ გეგმებზე. უახლოესი გეგმაა - აქტიური ჩართვა საერთაშორისო კამპანიაში „16 აქტიური დღე ქალთა მიმართ ძალადობის წინააღმდეგ“.

- მოლაპარაკება არის ყოველდღიური პროცესი, რომლის გარეშეც შეუძლებელია ურთიერთობა.

- როცა საქმე კონფლიქტების მართვას ეხება, მოლაპარაკება მთავარი ელემენტია.

- ფასილიტაცია, მოლაპარაკება საუკეთესო გზაა კონფლიქტების დასარეგულირებლად.

ასეთი იყო ვორკშოპის მონაწილეთა შეფასება.

ახალგაზრდების აზრით, სწორედ საინფორმაციო შეხვედრებით, დისკუსიებით, პრაქტიკული სავარჯიშოებით უნდა მოხდეს საზოგადოების ცნობიერებაში არაძალადობრივი კულტურის დამკვიდრება.

დისკუსიები მომავალშიც გაგრძელდება, ვორკშოპის მონაწილეებს აქვთ ინიციატივა, სხვადასხვა კლასში გააგრძელონ თემის განხილვა.

შეხვედრები გაიმართა ოზურგეთში, ლანჩხუთში, ქუთაისში.

ბათუმში, არასამთავრობო ორგანიზაცია „ბათუმის განათლების, განვითარებისა და დასაქმების ცენტრის“ ოფისში შედგა მორიგი შეხვედრა კოალიციის „ქალი და მშვიდობა“ წევრებისა: კულტურულ-ჰუმანიტარული ფონდი „სოხუმი“ (ქუთაისი, იმერეთი), პედაგოგთა კავშირი „განათლება და სამყარო“ (ქუთაისი, იმერეთი), მეწარმე ქალთა ფონდი (ქუთაისი, იმერეთი), ქალთა კლუბი (ხონი, იმერეთი), ქალთა მოძრაობა „იმედი“ (ზუგდიდი, სამეგრელო), ასოცოაცია „მერკური“ (ზუგდიდი, სამეგრელო),  განათლებისა და განვითარების ცენტრი „თოლისკური“ (ხობი, სამეგრელო), ქალთა სამოქალაქო გაერთიანება (ოზურგეთი, გურია), განვითარებისა და თანასწორობის ცენტრი (ოზურგეთი, გურია), ბათუმის განათლების, განვითარებისა და დასაქმების ცენტრი (ბათუმი, აჭარა).

კოალიციის მთავარი მიზანია მშვიდობის კულტურის პროპაგანდა.

შეხვედრაზე განხილულ იქნა საორგანიზაციო საკითხები გეგმური აქტივობების, ფინანსური და ნარატიული ანგარიშების წარდგენის კუთხით. ყოველი ორგანიზაციისთვის შემუშავდა საზოგადოებასთან შეხვედრების ჩატარების კონკრეტული თემატიკა, სხვა საკითხები.

მიღებულია გადაწყვეტილება: კოალიციის ცნობადობის გაზრდისთვის შემუშავდეს სპეციალური ლოგო; ფეისბუქზე შეიქმნას „დახურული ჯგუფი“, აქტიურად განთავსდეს საინფორმაციო მასალები კოალიციის მუშაობაზე.

კოალიციის წევრების წინადადებების თანახმად, დამატებები იქნა შეტანილი კოალიცია „ქალი და მშვიდობის“ დებულებაში. განისაზღვრა კოალიციის წევრების მიერ თავიანთ თემებში საზოგადოებასთან საპროექტო შეხვედრების  ჩატარების კონკრეტული თემები და თარიღები.

გრძელდება წყალტუბოს ქალთა მხარდაჭერის ცენტრის მცირე პროექტი. მუნიციპალიტეტის ხუთი სოფლის წარმომადგენლის, გენდერული თანასწორობის საბჭოს წევრების და აქტივისტი ქალების მონაწილეობით გაიმართა ტრენინგი თემაზე „გენდერი, გენდერული ძალადობა და ოჯახში ძალადობის მსხვერპლთა დახმარება“.

ტერიტორიული ერთეულების ხელმძღვანელები გულისტკივილით აღნიშნავენ ძალადობის შემთხვევების სიხშირეს. მათი თქმით, საჭიროა ყველას ჰქონდეს ამომწურავი ინფორმაცია ძალადობისგან დაცვის მექანიზმებზე და იცოდნენ, ვისთან ითანამშრომლონ, ვის შეუძლია მათი დახმარება. აღინიშნა ისიც, რომ საჭიროა მეტი საშუალება იყოს მსხვერპლების რეალური დახმარების აღმოსაჩენად.

მორიგი შეხვედრები გაიმართა ვაჟებთან თერჯოლის, ზუგდიდისა და ფოთის მუნიციპალიტეტებში. შეხვედრების უდიდესი ნაწილები დაეთმო გენდერული საკითხების განხილვას. ბიჭები ყურადღებას ამახვილებდნენ საკუთარ როლზე  თანასწორობის მიღწევაში. პრობლემური საკითხების ანალიზის დროს ისინი აღიარებდნენ, რომ აუცილებელია მამაკაცების დამოკიდებულების შეცვლა ქალთა უფლებების მიმართ. გამოყენებული სავარჯიშოები ვაჟებისთვის საინტერესო იყო და ხელს უწყობდა მათი მოტივაციის ამაღლებას.

15 ნოემბერს სოფელ ლიაში (წალენჯიხის მუნიციპალიტეტი) გაიმართა შეხვედრა სამოქალაქო საზოგადოებასთან.  შეხვედრას ესწრებოდნენ  სოფლების - ლიას, ჩხოუშის, ფახულანის სკოლების ხელმძღვანელები და პედაგოგები, აგრეთვე აქტივისტი ქალები.ფონდი ,,სოხუმის“ წარმომადგენლებმა შეკრებილებს გააცნეს გაეროს უშიშროების საბჭოს რეზოლუცია 1325 და 2018-2020 წლების ეროვნული სამოქმედო გეგმა. სამუშაო შეხვედრის მიზანი იყო საზღვრისპირა სოფლებთან დაკავშირებული პრობლემების და მათი მოგვარების გზების გამოვლენა, რათა მოხდეს მათი ჩართვა გენდერული თანასწორობის სამოქმედო გეგმასა და მუნიციპალურ პროგრამებში.

შეხვედრა გაიმართა პროექტის „გაეროსრეზოლუცია 1325-ის, ეროვნული სამოქმედო გეგმის ადგილობრივ დონეზე ლოკალიზების პროცესში ადგილობრივი და რეგიონალური ადმინისტრაციების პოტენციალის გაძლიერება და ამ პროცესში ქალთა, მათ შორის მარგინალური ჯგუფების ჩართვა და დიალოგის გააქტიურება“ ფარგლებში.

პროექტს ახორციელებს ქალთა არასამთავრობო ორგანიზაციების კოალიციური გაერთიანება: იძულებით გადაადგილებულ ქალთა ასოციაცია „თანხმობა“ (თბილისი), ქალთა საინფორმაციო ცენტრი (თბილისი) და კულტურულ-ჰუმანიტარული ფონდი„სოხუმი“ (ქუთაისი).

ახალგაზრდების ჯგუფებთან ხონში, წყალტუბოსა და სენაკში ვორკშოპები გაიმართა თემაზე: მოლაპარაკება, ფასილიტაცია - როგორც კონფლიქტების მოგვარების ინსტრუმენტი.   

ვორკშოპებზე მიღებული ინფორმაცია ახალგაზრდებისთვის მნიშვნელოვანი აღმოჩნდა. დისკუსიისას დააფიქსირეს, რომ პრაქტიკაში ეფექტურად გამოიყენებენ ფასილიტაციის უნარ-ჩვევებს. ამ საკითხებზე ახალგაზრდების ინფორმირება შეამცირებს კონფლიქტების რიცხვს, რადგან მოლაპარაკებების შედეგად შესაძლებელია კონფლიქტების ადრეულ სტადიაზე გადაწყვეტა.