რას ნიშნავს ეფექტური კომუნიკაცია და როგორ გამოვიყენოთ კონფლიქტების მართვის დროს - ამ თემით  ახალგაზრდები განსაკუთრებით  დაინტერესდნენ და ეს ინტერესი დისკუსიისას აქტიურად გამოხატეს ზუგდიდში, თერჯოლასა და ქუთაისში.

მონაწილეების მიერ ნაჩვენებ იმიტირებულ წარმოდგენებში გამოჩნდა, რომ  კონფლიქტები ოჯახში, სკოლაში, ქუჩაში, სამსახურში ხშირ შემთხვევაში გამოწვეულია არასწორი კომუნიკაციით.

- თუ გვეცოდინება კომუნიკაცია, კონფლიქტების მართვა ბევრად უფრო მარტივი გახდება, - აღნიშნეს ვორკშოპის მონაწილეებმა.  

პროექტის „სამედიცინო პერსონალის გაძლიერება ოჯახში ძალადობის მსხვერპლის დაცვისათვის“ ფარგლებში ფონდმა „სოხუმმა“ დაიწყო აქტიური თანამშრომლობა სამედიცინო პერსონალთან.

პროექტის თანახმად, გამოვიდა პუბლიკაცია „სამედიცინო პერსონალის როლი ძალადობის პრევენციაში“, რაც დაეხმარება სამედიცინო სფეროს მუშაკებს, მოახდინონ სათანადო რეაგირება ქალთა მიმართ/ოჯახში ძალადობის შემთხვევების დროს.

გადმოწერა

პროექტი ხორციელდება დიდი ბრიტანეთის საელჩოს მხარდაჭერით

გასულ თვეს ზუგდიდის, წალენჯიხის და წყალტუბოს მუნიციპალიტეტებში გაიმართა სამოქალაქო ფორუმები (პროექტის „გაეროს რეზოლუცია 1325-ის, ეროვნული სამოქმედო გეგმის ადგილობრივ დონეზე ლოკალიზების პროცესში ადგილობრივი და რეგიონალური ადმინისტრაციების პოტენციალის გაძლიერება და ამ პროცესში ქალთა, მათ შორის მარგინალური ჯგუფების ჩართვა და დიალოგის გააქტიურება“ ფარგლებში).  ფორუმის ბოლოს ყველგან შეიქმნა ათკაციანი სამუშაო ჯგუფები. სწორედ ამ ჯგუფებისთვის ფონდმა „სოხუმმა“ საირმეში ჩაატარა ტრენინგი თემაზე „რეზოლუცია 1325-ის ეროვნული სამოქმედო გეგმის ლოკალიზება ადგილობრივი მუნიციპალიტეტების დონეზე“.

ტრენინგზე მონაწილეებმა ჩამოაყალიბეს საკუთარი ხედვა 1325-ის ლოკალიზაციის მნიშვნელობაზე, იმ  ამოცანებზე და საჭირო ღონისძიებებზე, რომელთა დახმარებით მათ მუნიციპალიტეტებში განხორციელდება დევნილი ქალებისა და გოგონების, კონფლიქტით დაზარალებული სხვა ჯგუფების სოციალური დაცვა, ეკონომიკური გაძლიერება, და ყველაზე მთავარი - მათი უშუალო ჩართულობა ქალების, მშვიდობისა და უსაფრთხოების საკითხების ლოკალიზაციის პროცესში.

გაკეთდა „საგზაო რუკა“ თითოეული მუნიციპალიტეტის მიხედვით. განისაზღვრა  ღონისძიებები თვითმმართველობის, სხვა ადგილობრივი ჯგუფების ჩართვით. ტრენინგის მონაწილეთა აზრით, დაგეგმილი საქმიანობა ხელს შეუწყობს    კონფლიქტის შედეგად დაზარალებული/დევნილი ქალებისა და ახალგაზრდების ადამიანური უსაფრთხოების გაზრდას და მათი უფლებების რეალიზებას.

პროექტს ახორციელებს ქალთა არასამთავრობო ორგანიზაციების კოალიციური გაერთიანება: იძულებით გადაადგილებულ ქალთა ასოციაცია „თანხმობა“ (თბილისი), ქალთა საინფორმაციო ცენტრი (თბილისი) და კულტურულ-ჰუმანიტარული ფონდი ,,სოხუმი“ (ქუთაისი).

სოფელ ხურჩაში (ზუგდიდის მუნიციპალიტეტი) ფონდი „სოხუმის“ ქალთა საინიციატივო ჯგუფის წევრებისა და აქტივისტი ქალების შეხვედრა ძალადობის წინააღმდეგ მიმართული 16-დღიანი კამპანიის ფარგლებში ჩატარდა. მონაწილეებმა ძალადობის პრობლემის მასშტაბებზე ისაუბრეს.

- სოფელში საკმაოდ ხშირია ოჯახური კონფლიქტები, რომლებიც ხშირად ძალადობამდე მიდის, ამიტომ ასეთ კონფლიქტებზე  ადრეულ სტადიაში  რეაგირება მნიშვნელოვანია. ადრეული პრევენცია შეამცირებს პრობლემის მასშტაბებს, - ითქვა შეხვედრაზე.

მონაწილეებმა მოისმინეს ინფორმაცია სტამბულში ჩატარებული ტრენინგის შესახებ და იმსჯელეს, როგორი სტრატეგიით უნდა გააგრძელონ მუშაობა, რომ ყველა ასპექტში გენდერული აქცენტი გამოიკვეთოს.   

ტრენინგით დასრულდა წყალტუბოს ქალთა მხარდაჭერის ცენტრის მცირე პროექტი „ოჯახი ძალადობის გარეშე“.

ტრენინგი ჩატარდა საერთაშორისო კამპანიის „16 აქტიური დღე ქალთა მიმართ ძალადობის წინააღმდეგ“, ამიტომ საუბარი შეეხო კამპანიის მნიშვნელობას,  წლევანდელ სლოგანს: „შევაჩეროთ ძალადობა ქალთა მიმართ შრომის სამყაროში“.

ძალადობის შესახებ არსებული მითებისა და ფაქტების მეშვეობით კარგად გამოჩნდა სტერეოტიპული დამოკიდებულება პრობლემის მიმართ. ტრენინგის მონაწილეები მიიჩნევენ, რომ პრევენციულ ღონისძიებებში მათი აქტიური ჩართვა შედეგიანი იქნება. ისინი განსაკუთრებულ მნიშვნელობას ანიჭებენ თანამშრომლობას არასამთავრობო ორგანიზაციებთან, რომელთაც ამ კუთხით მუშაობის მეტი გამოცდილება აქვთ.

ფონდი „სოხუმის“ ქალთა საინიციატივო ჯგუფები ქუთაისში, წყალტუბოსა და ხურჩაში (ზუგდიდის მუნიციპალიტეტი) აქტიურად იყვნენ ჩართულნი 16-დღიან კამპანიაში ქალთა მიმართ ძალადობის წინააღმდეგ.

კამპანიის ფარგლებში ჩატარდა საინფორმაციო შეხვედრები სხვადასხვა თემში,  დევნილთა კოლექტიურ ცენტრებში. დარიგდა საინფორმაციო ფურცლები და კამპანიის ატრიბუტები. მოქალაქეებს მიეწოდათ ინფორმაცია, ძალადობის პრევენციის თვალსაზრისით რამდენად მნიშვნელოვანია საზოგადოების აქტიურობა და ჩართულობა.

შეხვედრებში როგორც ქალაქების, ასევე სოფლის თემებში მცხოვრები 30-ზე მეტი ადამიანი ჩაერთო. საინიციატივო ჯგუფის წევრები შეხვდნენ ადგილობრივი სახელისუფლებო სტრუქტურების წარმომადგენლებს, რომელთა მხრიდან დაფიქსირდა მზადყოფნა, აქტიური მონაწილეობა მიიღონ ძალადობის პრევენციაში.

„სიყ­ვა­რულს მოვ­ლა უნ­და, ქორ­წი­ნე­ბა ყო­ველ­დღი­უ­რად უნ­და განამტკი­ცო. გთა­ვა­ზობთ წე­სებს, რომ­ლე­ბიც და­გეხ­მა­რე­ბათ ამა­ში. იქ­ნებ, ეს არც ისე ად­ვი­ლი­ა, მაგ­რამ სცა­დეთ...“ - ნათქვამია ამ პატარა გამოცემის შესავალში.

ეს არის ფონდი „სოხუმის“ ფსიქოლოგის მანანა გოცირიძის მიერ მომზადებული რჩევები ქალებს: ურ­თი­ერ­თო­ბის 4 ოქ­როს წე­სი, 5 იდეა ოჯა­ხის სიმ­ყა­რის­თვის, ოჯა­ხუ­რი ბედ­ნი­ე­რე­ბის 9 სა­ი­დუმ­ლო, უკონ­ფლიქ­ტო ოჯა­ხის 10 მცნე­ბა.

გადმოწერა

ხონის ქალთა მხარდაჭერის ცენტრის მცირე პროექტის მიმდინარეობა დაემთხვა საინფორმაციო კამპანიას „16 აქტიური დღე ქალთა მიმართ ძალადობის წინააღმდეგ“, ამიტომაც შეხვედრების მონაწილეებს მიეწოდათ ინფორმაცია კამპანიის შესახებ.

სოფელ მათხოჯში პროექტის ახალგაზრდა მონაწილემ მაყურებელებს წარუდგინა ფონდი „სოხუმის“ აქტივისტი გოგონების გადაღებული მოკლემეტრაჟიანი ფილმები „ვიწრო დერეფანი“, „ერთ ჩვეულებრივ დღეს“, „ჩემოდანი“, „სავარძელი“, „საფეხურები“. შემდეგ გაიმართა მსჯელობა ფილმში დასმული პრობლემების შესახებ.

3 დეკემბერს კი საკრებულოს სხდომათა დარბაზში ჩატარდა მრგვალი მაგიდა, რომელშიც მონაწილეობა მიიღეს პროექტის აქტივობებში ჩართულმა ახალგაზრდებმა და თვითმმართველობის წარმომადგენლებმა. შეხვედრაზე ყურადღება გამახვილდა პროექტის ფარგლებში ჩატარებულ მუშაობასა და მიღებულ შედეგებზე.

1-4 დეკემბერს სტამბულში, შვედეთის კვლევით ცენტრში გაიმართა ტრენინგი ფონდი „სოხუმის“ ტრენერთათვის კონფლიქტების ადრეული პრევენციის თემაზე სისტემა GREWS-ის გამოყენებით. ტრენინგი დააფინანსა შვედეთის ქალთა ფონდმა Kvinna till Kvinna.

როგორ მოვიზიდოთ მოხალისეები კონფლიქტის ადრეული პრევენციის და ადრეული რეაგირების სისტემაში მონაწილეობისათვის, ცვლილებების თეორიასთან დაკავშირებული სისტემა GREWS-ის გრძელვადიანი  სტრატეგიის შემუშავება - ეს და სხვა მრავალი საკითხი იყო განხილული ოთხი დღის განმავლობაში ტრენინგზე.

ჯგუფი ესტუმრა სირიის არასამთავრობო ორგანიზაციას, რომელიც სტამბულში მუშაობს კონფლიქტების ადრეული პრევენციის საკითხებზე, აგრეთვე თურქეთში შვედეთის გენერალურ კონსულს, რომელმაც მოისმინა ინფორმაცია ჩვენს საქმიანობაზე და გაგვიზიარა გამოცდილება თურქ ქალებთან მუშაობის შესახებ.

ოთხი ნაყოფიერი, შემეცნებითი დღე დაძაბულ, მაგრამ სასარგებლო მუშაობაში გავიდა.

დასრულდა ფონდი ,,სოხუმის“ და სენაკის მუნიციპალიტეტის მერიის ერთობლივი პროექტი ,,ადგილობრივ თვითმმართველობასთან თანამშრომლობა - გენდერული თანასწორობისა და ოჯახში ძალადობის პრობლემის პრევენციისათვის“. პროექტის ფარგლებში ჩატარდა 4 ტრენინგი, მომზადდა და გამოიცა „ქალთა მიმართ და ოჯახში ძალადობის პრობლემის სიტუაციური ანალიზი სენაკის მუნიციპალიტეტში“.

3 დეკემბერს მუნიციპალიტეტის საკრებულოს სხდომათა დარბაზში გაიმართა პროექტის პრეზენტაცია.  შეხვედრის მონაწილეებმა ისაუბრეს პროექტის აქტივობებსა და შედეგებზე, რომელთაგან ერთ-ერთი სწორედ სიტუაციური ანალიზის გამოცემაა.

პროექტი ხელს შეუწყობს  ოჯახში ძალადობის პრევენციას, შემთხვევების იდენტიფიცირებისა და მართვის საკითხებში თვითმმართველობის ჩართვას და მისთვის კანონით განპირობებული უფლებამოსილების განხორციელებას.

შეხვედრის დასასრულს მომავალ თანამშრომლობაზეც გაამახვილეს ყურადღება და  მხარდაჭერა გამოუცხადეს საერთაშორისო კამპანიას ,,16 აქტიური დღე ქალთა მიმართ ძალადობის წინააღმდეგ“.