აპრილის თვის იურიდიული კონსულტაციები ქუთაისის, ხონის, ფოთის, სენაკის, წყალტუბოს და ხურჩის (ზუგდიდის მუნიციპალიტეტი) ქალთა მხარდაჭერის ცენტრებში მიეძღვნა სხვადასხვა თემას: ოჯახური კონფლიქტები, დევნილთა უფლებები, განსახლების ეტაპები, ნასყიდობის ხელშეკრულება...

ბენეფიციარებმა თავიანთი პრობლემების მოსაგვარებლად გამოიყენეს იურიდიული კონსულტაციები, რომლებიც შეეხებოდა ალიმენტის დანიშვნის პროცედურებს, განქორწინების ეტაპებს, მრავალშვილიანი დედის სტატუსის მინიჭებას და სხვ.

ქუთაისის ქალთა მხარდაჭერის ცენტრის ფსიქოლოგიური მუშაობა ინკლუზიურ ბენეფიციარებთან წარიმართა არტ-თერაპიითა და ასოციაციური ბარათებით.

სენაკისა და ხურჩის (ზუგდიდის მუნიციპალიტეტი) ქალთა მხარდაჭერის ცენტრებში კი გაიმართა ჯგუფური შეხვედრები და კონსულტაციები. შეხვედრების ძირითადი თემა იყო იმის გარკვევა, როგორ შევიცნოთ ფსიქოლოგიური პრესინგი და ძალადობა და არ გავხდეთ მსხვერპლი. ფსიქოლოგიური ძალადობის ერთ-ერთი მთავარი ნიშანია გამუდმებული კრიტიკა. როცა პარტნიორი მუდმივად აკრიტიკებს თქვენს გარეგნობას, ქცევებს, მანერებს, ხასიათს, ამის მიღმა რეალური კონფლიქტი იმალება. ჩუმი ძალადობა, ფიზიკური ძალის გამოყენების გარეშე, არ აძლევს მსხვერპლს  იმის შეგრძნებას, რომ რაღაც უნდა შეცვალოს... - სწორედ ამაზი იყო საუბარი შეხვედრებზე.

მონაწილეთათვის სასარგებლო შეხვედრა გაიმართა ქუთაისში კოლექტიურ ცენტრ „მთის ბროლში“ მცხოვრებ დევნილებთან.

იურისტმა მათ მიაწოდა ინფორმაცია ოჯახში ძალადობის შესახებ კანონისა და ოჯახში ქალთა უფლებების შესახებ. შეხვედრაზე გაიცა ინდივიდუალური კონსულტაცია მონაწილეთათვის საინტერესო კონკრეტულ საკითხებზე.

1, 4 და 5 აპრილს ხონის, წყალტუბოსა და ფოთის ქალთა მხარდაჭერის ცენტრებში ჩატარდა ფსიქოლოგის კონსულტაცია.

ხონსა და ფოთში კონსულტაციები წინასწარ დაგეგმილი თემით წარიმართა: გენდერული როლების ათვისება ოჯახში ქალთა მიმართ ძალადობის პრევენციისთვის. ბენეფიციარმა ქალებმა მიიღეს ინფორმაცია იმის შესახებ, თუ რა განსაზღვრავს გენდერულ როლებს, რა ასაკიდან ხდება მათი ჩამოყალიბება და რა უნდა შევცვალოთ იმისთვის, რომ ოჯახში დავაბალანსოთ გენდერული როლები.

წყალტუბოში აგრეთვე გაიმართა 2 ინდივიდუალური შეხვედრა-კონსულტაცია სხვადასხვა პრობლემასთან დაკავშირებით.