ფსიქოლოგის კონსულტაციები ჩატარდა 2, 6 და 7 აგვისტოს. წყალტუბოს და ფოთის ქალთა მხარდაჭერის ცენტრებში შეხვედრების თემა იყო: სტერეოტიპებით გამოწვეული სოციალური სტიგმა-დისკრიმინაცია.

ხონის მუნიციპალიტეტის სოფელ კუხის საკრებულოში პირველად გაიმართა ფონდი „სოხუმის“ ფსიქოლოგის შეხვედრა-კონსულტაცია. დამსწრეთა  შორის იყვნენ  როგორც თანამშრომლები, ასევე სოფელში მცხოვრები ქალბატონები. ფსიქოლოგმა მათ გააცნო ორგანიზაციის სამუშაო სპექტრი და სერვისები, შემდეგ კი ისაუბრეს ოჯახში ძალადობაზე, სტერეოტიპებსა და სოციალურ სტიგმაზე. შეხვედრამ მათი დიდი ინტერესი და საუბრის გაგრძელების სურვილი გამოიწვია. მაღალი იყო ქალთა აქტიურობა წყალტუბოსა და ფოთში ჩატარებულ შეხვედრებზეც.

 

            პროექტი ხორციელდება  ორგანიზაცია Brot für die Welt – Evangelischer

Entwicklunsdienst მხარდაჭერით (გერმანია)

 

რამდენად ვიცნობთ საკუთ თავს, რა ვიცით შინაგან, პიროვნულ კონფლიქტებზე, როგორ ვიქცევით, ან რა გავლენას ახდენს ჩვენი ნეგატიური ემოციები ოჯახური კონფლიქტების დინამიკაზე - ამ საკითხებზე იმსჯელეს ქალთა ჯგუფებმა წყალტუბოშო, სენაკში და ფოთში გამართულ ვორკშოპებზე.

-  ჩვენ განვსხვავდებით ერთმანეთისაგან. აქედან გამომდინარე, კონფლიქტურ სიტუაციებში სხვადასხვანაირად ვიქცევით.  ხშირად ვერ ვაცნობიერებთ, რომ არასწორი ქცევით ხელს ვუწყობთ კონფლიქტების გაღრმავება, - აღნიშნეს ვორკშოპის მონაწილეებმა.

მათი აზრით, საკუთარი თავის შესწავლა, პიროვნული კონფლიქტების გარჩევა დაგვეხმარება სწორი სტრატეგიის არჩევაშიდა კონფლიქტების მართვაში, რაც შეამცირებს ძალადობის რისკს ოჯახებში.

 

პროექტი ხორციელდება  ორგანიზაცია Brot für die Welt – Evangelischer

Entwicklunsdienst მხარდაჭერით (გერმანია)

 

სასიამოვნო სიახლით დახვდნენ ფონდი „სოხუმის“ იურისტს ქუთაისის ყოფილ მე-5 საჯარო სკოლაში განთავსებული დევნილები.

5 აგვისტოს ჩატარებულ საინფორმაციო შეხვედრაზე მათ აღნიშნეს, რომ წინა შეხვედრის შემდეგ დაწერეს კოლექტიური განცხადება გზის საფარის დაგებასთან დაკავშირებით - ადგილობრივი ხელისუფლების თანადაფინანსებით. მოსახლეობას უკვე აცნობეს, რომ ისინი ისარგებლებენ ამ პროგრამით. შეხვედრის მონაწილეებმა აღნიშნეს, რომ სექტემბრიდან დაიწყებენ ფასადისა და საბავშვო ატრაქციონების საკითხის ადვოკატირებას.

 

პროექტი ხორციელდება გაეროს  ქალთა  ორგანიზაციის

გენდერული  თანასწორობის ფონდის მხარდაჭერით

 

4 აგვისტოს სოფელ კოკში გაიმართა საინფორმაციო-საკონსულტაციო ჯგუფური შეხვედრა. ესწრებოდა 11 ქალი. ძალადობის მსხვერპლ ახალგაზრდა ქალბატონს კი ჩაუტარდა ინდივიდუალური კონსულტაცია -  მთელი ოჯახი მადლიერი დარჩა მორალური და ფსიქოლოგიურ-იურიდიული მხარდაჭერისთვის.

5 აგვისტოს სენაკის ქალთა მხარდაჭერის ცენტრში შეიკრიბნენ ქალები ფსიქოლოგიურ შეხვედრაზე და ინტერესით ჩაერთნენ დისკუსიაში, როგორ გათავისუფლდნენ ნეგატიური ემოციისგან.

შეხვედრის შემდეგ გაკეთდა დასკვნა: ადამიანები, რომლებიც ვერ ელევიან წარსულის ემოციებს, წარსულში ცხოვრობენ. იმისათვის, რომ ჩვენი განწყობა და თვისებები შევცვალოთ, უნდა გავარკვიოთ, როგორი ემოციები „ინახება“ ჩვენში, შევიგრძნოთ და გავუშვათ...

 

პროექტი ხორციელდება  ორგანიზაცია Brot für die Welt – Evangelischer

Entwicklunsdienst მხარდაჭერით (გერმანია)

  

4 აგვისტოს ფონდი „სოხუმის“ ოფისში ჩატარდა ამომრჩეველ ქალთა კლუბის მორიგი სხდომა. შეკრებილებმა ინტერესით მოისმინეს ინფორმაცია გენდერული საკონსულტაციო საბჭოს მუშაობის შესახებ.

შემდეგ, ტრადიციულად, დაისვა ქალაქში არსებული პრობლემები, რომელთა  ადვოკატირება დაისახეს მიზნად. გადაწყვიტეს წერილის გაგზავნა ჯანდაცვის მინისტრის სახელზე საყოველთაო დაზღვევასთან დაკავშირებული პრობლემების თაობაზე.

 

პროექტი ხორციელდება გაეროს  ქალთა  ორგანიზაციის

გენდერული  თანასწორობის ფონდის მხარდაჭერით

ტელეკომპანია „რიონის“ ეთერში გავიდა სიუჟეტი, რომელმაც მოგვითხრო  ფონდი „სოხუმისა“ და ქუთაისის მერიის დაფინანსებით ქობულეთში მოწყობილ ერთკვირიან საზაფხულო ბანაკზე - პროექტის „მოზარდთა ბანაკი - გენდერული განათლება ახალგაზრდა სპორტსმენებისათვის“ ფარგლებში.

ბანაკის ორგანიზებაში აქტიურად ჩაერთნენ ქუთაისის გენდერული საკონსულტაციო საბჭოს წევრები, რომლებმაც სპორტული ღონისძიებების პარალელურად მოზარდებს შემეცნებითი ხასიათის ვორკშოპები ჩაუტარეს გენდერულ თემაზე.

სიუჟეტში მაღალ შეფასებას აძლევენ პროექტს ქუთაისის თვითმმართველობის ხელმძღვანელები, რომლებიც სპეციალურად ჩავიდნენ ბანაკში და შეხვდნენ ახალგაზრდებს. ქალაქის მერი, საკრებულოს თავმჯდომარე მოზარდებში ჯანსაღი ფასეულობების ხელშეწყობისთვის მადლობას უხდიან საბჭოს წევრებს, რომლებმაც მოხალისეობრივად, საკუთარი წვლილი შეიტანეს პროექტის წარმატებაში.

პროექტზე ისაუბრეს საბჭოს  წევრებმაც. მათი თქმით, მოხდა კარგი პრეცედენტი, როცა სახელმწიფო და არასამთავრობო სექტორი თავის რესურსებს აერთიანებენ ახალგაზრდობის ფიზიკური და სულიერი განვითარებისათვის.

 

პროექტი ხორციელდება გაეროს  ქალთა  ორგანიზაციის

გენდერული  თანასწორობის ფონდის მხარდაჭერით

პროექტის ფარგლებში მომზადებული რადიოსიუჟეტი ოზურგეთის გენდერული საკონსულტაციო საბჭოს მიერ განხორციელებული საქმიანობის შედეგებზე მოვითხრობს. რა პრობლემები  გამოიკვეთა ადგილობრივი გენდერული საჭიროებების კვლევის შედეგად და როგორ აპირებს საბჭო უპასუხოს ამ გამოწვევებს; რა პროექტები განახორციელა საბჭომ და რა არის ამ საქმიანობის კონკრეტული შედეგი.

საბჭოს წევრების ინფორმაციით, ბევრი ღონისძიებაა განსახორციელებელი საინფორმაციო-საგანმანათლებლო კუთხით.

სიუჟეტში ითქვა, რომ საბჭოს პროექტი „კიბო განაჩენი არ არის“ ამ პრობლემის მქონე ადამიანების ფსიქო-სოციალურ რეაბილიტაციას ისახავს მიზნად, მაგრამ გარდა ამისა, ბევრი სხვა საკითხის ადვოკატირებაც ხდება: ოზურგეთს არა ჰყავს ონკოლოგი; არ არსებობს ამ დაავადების ადგილობრივი სტატისტიკა; არ არის განვითარებული დაავადებათა  პრევენციის კულტურა.

საბჭოს წევრები კმაყოფილებით აღნიშნავენ, რომ ყოველთვის გრძნობენ ადგილობრივი ხელისუფლების თანადგომას, რომელიც ოზურგეთის მწირი ბიუჯეტის ფარგლებშიც კი ახერხებს საბჭოს საინტერესო იდეების მხარდაჭერას. 

 

პროექტი ხორციელდება გაეროს  ქალთა  ორგანიზაციის

გენდერული  თანასწორობის ფონდის მხარდაჭერით

 

ფონდი „სოხუმის“ ფორუმ-თეატრი ახალი შემადგენლობით თამაშობს. აგვისტოს პირველი წარმოდგენა გაიმართა ხონში, დევნილთა კოლექტიური ცენტრის კლუბში. აქტიური დისკუსია მოყვა ოჯახური ძალადობის სცენას. დიდი ინტერესით განიხილეს შეყვარებული წყვილის მინი-ისტორია. როცა სცენიდან დედა-შვილის კონფლიქტი გამოჩნდა, მაყურებელი დაიძაბა. ერთი ახალგაზრდა კაცის თქმით, დედა ვალდებულია, მთელი ცხოვრება ემსახუროს შვილს.

მაყურებლის აზრით, ეს სცენები რეალობას ასახავს და ბევრ რამეზე აფიქრებს ადამიანს.

 

პროექტი ხორციელდება  ორგანიზაცია Brot für die Welt – Evangelischer

Entwicklunsdienst მხარდაჭერით (გერმანია)

  

დასრულდა ქუთაისის გსს მიერ მომზადებული პროექტი „მოზარდთა ბანაკი - გენდერული განათლება ახალგაზრდა სპორტსმენებისათვის“. რვადღიანი პროგრამის ფარგლებში მონაწილეებს ექვსი ვორკშოპი ჩაუტარდათ თემაზე „გენდერი, გენდერული თანასწორობა“. პროგრამა დატვირთული იყო საგანმანათლებლო, კულტურული და სპორტული ღონისძიებებით. ბანაკს ესტუმრნენ ქუთაისის მერი შოთა მურღულია, საკრებულოს თავმჯდომარე დავით დვალი, გენდერული საკონსულტაციო საბჭოს წევრები.

აღნიშნული პროგრამა დაეხმარება მოზარდებს იცხოვრონ  ჯანსაღი ცხოვრების წესით, უფრო მეტად დაინტერესდნენ გენდერული საკითხებით. ამ მიმართულებით გარკვეული შედეგები უკვე გამოიკვეთა. შეიქმნა აქტივისტთა  ჯგუფი, რომელთა ინიციატივით ქუთაისის საჯარო სკოლებში შეიქმნება სადისკუსიო კლუბები და გაგრძელდება დისკუსიები გენდერის თემაზე. უკვე ბანაკში ყოფნის პერიოდში გამოჩნდნენ გოგონები, რომლებიც დაინტერესდნენ ე.წ. „მამაკაცური“ სპორტით: ძიუდო, მკლავჭიდი, რაც ხელს შეუწყობს სტერეოტიპების მსხვრევას და სპორტის ყველა სახეობაში თანაბარი შესაძლებლობების დამკვიდრებას.

 

პროექტი ხორციელდება გაეროს  ქალთა  ორგანიზაციის

გენდერული  თანასწორობის ფონდის მხარდაჭერით

 

3 აგვისტოს ქუთაისის ქალთა მხარდაჭერის ცენტრის მობილიზატორმა, იურისტმა და ფსიქოლოგმა საინფორმაციო-საკონსულტაციო შეხვედრა გამართეს საჯარო ბიბლიოთეკაში. შეხვედრას ესწრებოდა ბიბლიოთეკის 20-ზე მეტი თანამშრომელი.

იურისტმა ისაუბრა ხელშეკრულების შეწყვეტის საფუძვლებზე. გაიცა კონსულტაცია დასაქმებულთა უფლებებსა და მოვალეობებზე, შრომითი ურთიერთობის სუბიექტებზე, პრობლემის მოგვარების გზებსა და ეტაპებზე, თუ როგორ უნდა დაიწყონ თავიანთი პრობლემის ადვოკატირება, ვის წინაშე არიან ანგარიშვალდებულნი და ვისგან შეუძლიათ მოითხოვონ სრული ინფორმაციის მიღება.

ფსიქოლოგმა ისაუბრა ქალთა სოლიდარობაზე, საზოგადოებაში არსებული აგრესიის მიზეზებსა და შედეგებზე. გაიცა საერთო სახის ფსიქოლოგიური რეკომენდაციები.

 

პროექტი ხორციელდება  ორგანიზაცია Brot für die Welt – Evangelischer

Entwicklunsdienst მხარდაჭერით (გერმანია)