„მშობლები ჯანსაღი თაობისათვის“ - სენაკის ქალთა მხარდაჭერის ცენტრის ამ მცირე პროექტის ფარგლებში გაიმართა საინფორმაციო შეხვედრები თეკლათის გამგებელსა და სოფლის მაჟორიტარ დეპუტატთან, რომელთაც მიეწოდა ინფორმაცია პროექტის შესახებ. რადგან პროექტი საბავშვო ბაღებში მუშაობას ითვალისწინებს, გაცნობითი სახის შეხვედრა მოეწყო სენაკის მუნიციპალიტეტის საბავშვო ბაღების გაერთიანების უფროსის მოადგილესთან. შეხვედრების ყველა მონაწილემ აღნიშნა, რომ მაქსიმალურად ჩაერთვება პროექტის განხორციელებაში. 

• გენდერზე ორიენტირებული კონფლიქტების ადრეული გაფრთხილების სისტემა - როგორ ხდება ამ სისტემის დანერგვა პრაქტიკაში, რა მეთოდებით მუშაობს ფონდი „სოხუმის“ ჯგუფი, რა სირთულეებს აწყდებიან, რა შედეგები მიღწეული.

ამ საკითხების გასარკვევად ფონდ „სოხუმს“ ორი დღის განმავლობაში სტუმრობდა საერთაშორისო ექსპერტი ფელიპე დაზა. საკონსულტაციო შეხვედრაზე პროექტში ჩართულმა პირებმა ისაუბრეს, როგორ ხდება ინფორმაციის შეგროვება, მედია-მონიტორინგი, მონაცემთა სისტემატიზაცია, ანალიზი. კონსულტანტი გაეცნო მონაცემთა დათვლის ელექტრონულ პროგრამას და შესაბამისი კონსულტაციები გასცა.

Kvinna till Kvinna-ს კოორდინატორი საქართველოში ეთუნა ნოღაიდელი,  საერთაშორისო ექსპერტი ფელიპე დაზა და ფონდი „სოხუმის“ წარმომადგენლები კონფლიქტისპირა სოფლებში - ხურჩასა (ზუგდიდის მუნიციპალიტეტი) და ფახულანში (წალენჯიხის მუნიციპალიტეტი)  ჩავიდნენ.

- როგორ მუშაობენ საველე მონიტორები კონფლიქტის გამყოფ ხაზთან, რა სირთულეებია, როგორ ხდება ბენეფიციართა შერჩევა, მონაცემთა შეგროვების პროცესში რამდენად არის დაცული რესპონდენტთა კონფიდენციალობა, როგორ ხდება ინფორმაციის გაგზავნა - შეხვედრებზე, ძირითადად, ამ საკითხებზე გაკეთდა ფოკუსირება. 

სტუმრებმა ფახულანში მოქმედი გამშვები პუნქტი და ხურჩაში უკვე გაუქმებული პუნქტის ახლომდებარე ტერიტორიებიც დაათვალიერეს. მიღებული ინფორმაციები ორგანიზაციის ანგარიშებში ჰპოვებს ასახვას.

ბაღდათის, ზუგდიდისა და ვანის მუნიციპალიტეტებში ფოკუს-ჯგუფებისა და ჩაღრმავებული ინტერვიუს ფორმატით ინფორმაციები შეგროვდა შემდეგ საკითხებზე: ადგილობრივი თვითმმართველობის როლი ძალადობის პრევენციისა და მსხვერპლთა დახმარების საქმეში, გენდერული საბჭოს მუშაობის ეფექტურობა, რეფერირების სუბიექტებთან თანამშრომლობა და კოორდინაცია. მონიტორინგის მონაწილეებმა მიღწევებსა და  გამოწვევებზე ისაუბრეს.

შეხვედრები ჩატარდა კანონის „ქალთა მიმართ ძალადობის ან/და ოჯახში ძალადობის აღკვეთის, ძალადობის მსხვერპლთა დაცვისა და დახმარების შესახებ“ მონიტორინგის ფარგლებში.

ჩრდილების თეატრი ქუთაისის კერძო საბავშვო ბაღს ესტუმრა და ორი წარმოდგენა გამართა სხვადასხვა ჯგუფის ბავშვებისთვის. პატარებმა დიდი ინტერესით უყურეს მათთვის დადგმულ ზღაპარს „თალგამი“.

ბავშვები აქტიურად იყვნენ ჩართულები თალგამის „ამოღებაში“, მათ ძალიან მოეწონათ წარმოდგენა, ბაღის დირექტორმა კი საინტერესო წარმოდგენისთვის მადლობა გადაუხადა ახალგაზრდა მსახიობებსა და რეჟისორს.

წყალტუბოს ქალთა მხარდაჭერის ცენტრის მცირე პროექტის „ახალგაზრდები გენდერული ნიშნით ძალადობის წინააღმდეგ“ ფარგლებში ჩამოყალიბდა ახალგაზრდული საინიციატივო ჯგუფი. ჯგუფის წევრებთან ჩატარდა ტრენინგი თემაზე „პროექტის დიზაინი და მართვა“. ტრენინგის მონაწილეები განსაკუთრებით აქტიურობდნენ, რათა მათ პროექტის დასრულების შემდეგ დამოუკიდებლად შეძლონ გრანტების მოძიება. მათ მიეწოდა საჭირო თეორიული და პრაქტიკული მასალები. ტრენინგზე გაიწერა 4 საპროექტო იდეის დრაფტი.

„ძალადობის პრევენცია და ძალადობის მსხვერპლის დაცვა“ - ამ თემას მიეძღვნა მრგვალი მაგიდა სენაკის მუნიციპალიტეტის საკრებულოს სხდომათა დარბაზში.

დიალოგის მიზანი იყო სოციალური თანამშრომლობის გზების დასახვა. სწორედ ამ კუთხით იმუშავეს შეხვედრის მონაწილე რეფერირების სუბიექტებმა. ადგილობრივი თვითმმართველობის, პოლიციის, სოციალური მომსახურების სააგენტოს, საგანმანათლებლო და სამედიცინო დაწესებულებების წარმომადგენლებმა ჯგუფური  მუშაობის შედეგად დააფიქსირეს კოორდინაციის ხელისშემშლელი და ხელისშემწყობი ფაქტორები, ჩამოაყალიბეს თეზისები ძალადობის პრევენციის სტრატეგიისთვის - სახელმწიფო და საზოგადოებრივი ინსტიტუტების აქტიური ჩართულობით.

ქალთა მიმართ/ოჯახში ძალადობის მსხვერპლთა დაცვის კუთხით სახელმწიფოში არსებული მექანიზმები - ეს იყო ივლისში ქალთა მხარდაჭერის ცენტრებში ჩატარებული სამობილიზაციო შეხვედრების თემა. მონაწილეებს აინტერესებდათ კონკრეტული სერვისები და მიიღეს კიდეც პასუხი. განსაკუთრებული აქცენტი გაკეთდა იმაზე, რომ სახელმწიფომ უნდა შეიმუშავოს ხანგრძლივ შედეგზე ორიენტირებული პროგრამები ძალადობის მსხვერპლთათვის - პირველ რიგში დასაქმების კუთხით.

წყალტუბოს მუნიციპალიტის საკრებულოში ფონდი „სოხუმის“ ორგანიზებით გაიმართა მრგვალი მაგიდა თემაზე „ძალადობის პრევენცია და ძალადობის მსხვერპლის დაცვა“.

მრგვალ მაგიდასთან შეიკრიბენენ რეფერირების სუბიექტების ადგილობრივი წარმომადგენლები - ადგილობრივი თვითმმართველობის,  კრიმინალური და საპატრულო პოლიციის, სოციალური მომსახურების სააგენტოს, საგანმანათლებლო და სამედიცინო დაწესებულებების წარმომადგენლები.

ხაზგასმით აღინიშნა, რომ ძალადობის პრევენციის სტრატეგიაა - უპასუხოს გამოწვევებს სახელმწიფოსა და საზოგადოებრივი ინსტიტუტების თანამონაწილეობით.

ჯგუფური მუშაობის შედეგად განისაზღვრა ადგილობრივ დონეზე კოორდინაციის ხელისშემშლელი და ხელისშემწყობი ფაქტორები და გაუმჯობესების გზები.

- რამდენად მაღალია მოქალაქეების დაინტერესება აფხაზეთში მიმდინარე საარჩევნო პროცესების მიმართ, რა გავლენას ახდენს ქართულ მოსახლეობაზე, რამდენად მაღალია კონფლიქტის განვითარების რისკები, ინფორმაციის რა წყაროებს იყენებს მოსახლეობა და რამდენად ენდობა მედიასაშუალებებს, როგორია დევნილი, ადგილობრივი და კონფლიქტის გამყოფ ხაზთან მცხოვრები მოქალაქეების დამოკიდებულება ამ საკითხისადმი  - ინფორმაციები ყოველკვირეულად გროვდება საველე მონიტორების მიერ და  სისტემატიურად მიმდინარეობს ინფორმაციის შევსება და განახლება.

მიღებული მასალების სისტემატიზაციის შემდეგ მონაცემთა ანალიზი ხდება კონფლიქტების ადრეული გაფრთხილების გენდერზე ორიენტირებული სისტემის გამოყენებით.