წყალტუბოში, ზუგდიდსა და სენაკში შექმნილი ქალთა ადვოკატირების ჯგუფების მიერ გამოვლენილი საჭიროებების ადვოკატირებისათვის სამოქალაქო ინიციატივების მხარდაჭერა მოხდა. კერძოდ: სენაკის დევნილთა დასახლებაში ბინებს არ ჰქონდათ აბრები ნომრების გამოსახულებით, რაც ხშირად პრობლემას ქმნიდა (მაგ., სასწრაფო სამედიცინო დახმარების გამოძახების დროს). სოფელ კოკის (ზუგდიდის მუნიციპალიტეტი) სკოლის ეზოში არ იყო ძელსკამები, რომლითაც მშობლები და ბავშვები ისარგებლებდნენ. წყალტუბოს დევნილთა ახალ დასახლებაში კი ქალებმა გამოავლინეს პრობლემა, რომ კორპუსებში არ იყო საინფორმაციო დაფები, სადაც განთავსდებოდა საჭირო ინფორმაცია (მაგ., ცხელი ხაზის შესახებ).
ამ ინიციატივების განხორციელება უზრუნველყოფს უსაფრთხო და ქალებისათვის ადაპტირებულ გარემოს.
პროექტი ხორციელდება გენდერული თანასწორობის ფონდის მხარდაჭერით (კანადა)
საერთაშორისო კამპანიის „16 აქტიური დღე ქალთა მიმართ ძალადობის წინააღმდეგ“ ფარგლებში ქალთა ფონდი „სოხუმის“ პარასპეციალიტების ჯგუფმა პროტესტი მინი-აქციით გამოხატა. ეს ჯგუფი შეიქმნა იმისთვის, რომ სხვადასხვა თემში იმუშაოს კონფლიქტური და რისკის ჯგუფის ოჯახების იდენტიფიცირებისთვის. პარასპეციალიტების საქმიანობა ძალადობის პრევენციას ისახავს მიზნად. ამიტომაც ჩაერთნენ ისინი აქტიურად 16-დღიან კამპანიაში.
პროექტი ხორციელდება გენდერული თანასწორობის ფონდის მხარდაჭერით (კანადა)
29-30 ნოემბერს ქუთაისში, სასტუმრო „გელათი რეზიდენსში“ გაიმართა ტრენინგი თემაზე „პარასპეციალისტების მომზადება სოციალური სამუშაოსთვის“. ტრენინგს ესწრებოდა 20 ქალი დასავლეთ საქართველოს ათი მუნიციპალიტეტიდან: ვანის, თერჯოლის, წყალტუბოს, ხონის, სამტრედიის, სენაკის, ხობის, ზუგდიდის, წალენჯიხის, ჩოხატაურის ქალთა მხარდაჭერის ცენტრების მობილიზატორები და აქტივისტი ქალები.
მონაწილეები გაეცნენ სოციალური მუშაობის არსს და მის მნიშვნელობას, მიიღეს ინფორმაციები ადგილობრივ და ცენტრალურ დონეზე არსებული მხარდაჭერის სერვისებსა და პროგრამებზე. მიღებული ინფორმაციები დაეხმარება მათ, ეფექტიანად იმუშაონ ადგილობრივ თემებში ძალადობის რისკ-ჯგუფებისა და მოწყვლადი ოჯახების იდენტიფიცირებისთვის. ასევე - დაეუფლონ პარასპეციალისტისთვის დამახასიათებელ უნარ-ჩვევებს, განამტკიცონ კონსულტაციების და დახმარების გაწევის პრაქტიკა არსებულ გამოწვევებზე დროული რეაგირებისთვის.
პროექტი ხორციელდება გენდერული თანასწორობის ფონდის მხარდაჭერით (კანადა)
ქალთა ადვოკატირების ჯგუფებმა ვანის, ხობის, თერჯოლის, სამტრედიის და წალენჯიხის მუნიციპალიტეტებში საჯარო სივრცეების მოვლა-პატრონობა დაისახეს მიზნად, კერძოდ: ვანში, სოფელ სალხინოში განახლდა სტადიონი და ორი სკვერი, თერჯოლაში - სოფელ ღვანკითის ერთ-ერთი უბანი, ხობში გამწვანდა სოფელი ნოჯიხევი და ხობის მოსწავლე-ახალგაზრდობის ცენტრის მიმდებარე ტერიტორია, სამტრედიაში კეთილმოეწყო სტადიონი და ორი სკვერი დიდ ჯიხაიშში, ახალსოფელში და „ნახალოვკის“ დასახლებაში, წალენჯიხის მუნიციპალიტეტის სოფელ საჩინოში კი ეკლესიის ეზოს და შემოგარენი.
ამ ინიციატივების განხორციელება უზრუნველყოფს უსაფრთხო და მოწესრიგებულ გარემოს აღნიშნული თემებში. ამასთან, ქალების მიერ ამ ადგილების მოვლაზე პასუხისმგებლობის აღება აძლიერებს სამოქალაქო პასუხისმგებლობის განცდას და განამტკიცებს თემის კეთილდღეობას.
პროექტი ხორციელდება გენდერული თანასწორობის ფონდის მხარდაჭერით (კანადა)
ჩვენს ვებგვერდზე „ძალადობაგამოვლილ ქალთა სერვისების ციფრული რესურსცენტრი“ აქტიურია კატეგორია „ოჯახში ძალადობის რისკების ინდიკატორების რუკა“ - https://sosfsokhumi.ge/map
რუკა მოიცავს ოფიციალურ და ქალთა ფონდი „სოხუმის“ სტატისტიკას რეგიონების და მუნიციპალიტეტების მიხედვით. რუკა მკითხველს აცნობს 2023 და 2024 წლების მონაცემებს: აქ განთავსებულია ოჯახში ძალადობის შესახებ მიმართვიანობის სტატისტიკა, დასაქმების თუ მიგრაციის დონე და სხვა მნიშვნელოვანი ინფორმაცია. მსურველებს შეუძლიათ ჩამოტვირთონ ჩვენი ორგანიზაციის მიერ ჩატარებული კვლევა „ქალთა მიმართ ოჯახში ძალადობის რისკების ინდიკატორები (ოფიციალური სტატისტიკის მიმოხილვა)“, რომელშიც წარმოდგენილია გამოწვევები და რეკომენდაციები.
პროექტი ხორციელდება გენდერული თანასწორობის ფონდის მხარდაჭერით (კანადა)
ხონის, ჩოხატაურის და წყალტუბოს მუნიციპალიტეტებში ჩამოყალიბებულ ქალთა ადვოკატირების ჯგუფებს საშუალება მიეცათ, განაცხადები შემოეტანათ „სამოქალაქო ინიციატივების“ კონკურსზე. საკონკურსო ბარიერის გადალახვის შემდეგ მათ განახორციელეს თავიანთი ინიციატივები: ხონის და წყალტუბოს დევნილთა დასახლებებში და ჩოხატაურის მუნიციპალიტეტის სოფელ გოგოლესუბანში განახლდა და გამწვანდა არსებული სკვერები. ეს ხელს შეუწყობს სასიამოვნო და უსაფრთხო გარემოს შექმნას თემებში, ასევე თემის წევრების სამოქალაქო აქტივიზმის ზრდას.
პროექტი ხორციელდება გენდერული თანასწორობის ფონდის მხარდაჭერით (კანადა)
ჩოხატაურში განსხვავებული ფორმატის შეხვედრა გამართეს ურთიერთდახმარების ჯგუფის წევრებმა - ეს იყო ყველის გამოფენა. ქალებმა გამოიტანეს თავიანთი ნაწარმი. განიხილეს ვებგვერდის შექმნა სახელწოდებით „გოგოლასუბნის ქალები“, რაც ხელს შეუწყობს მათი პროდუქციის გაყიდვას. წალენჯიხის ჯგუფი სამომავლო გეგმებში მოიაზრებს მოწყვლადი ჯგუფის ქალების ეკონომიკურ გაძლიერებას.
სამტრედიაში ახალი მონაწილეები შეიკრიბნენ, მათ შეავსეს ანკეტები, ისაუბრეს თავიანთ საჭიროებებზე. ახალი წევრები დაემატნენ წყალტუბოს ჯგუფსაც. შეხვედრა ონლაინ გაიმართა.
ურთიერთდახმარების ჯგუფების შეხვედრები ჩატარდა სხვა მუნიციპალიტეტებშიც (ხობი, ზუგდიდი, თერჯოლა, ქობულეთი, სენაკი). მოვიდნენ ახალი წევრები - საკუთარი პრობლემებით და მათი მოგვარების იმედით. ქალებთან აქტიურად მუშაობდა ქალთა ფონდი „სოხუმის“ ფსიქოლოგი.
პროექტი ხორციელდება გენდერული თანასწორობის ფონდის მხარდაჭერით (კანადა)
ქობულეთის ქალთა ურთიერთდახმარების ჯგუფში ახალი წევრები არიან. პირველ შეხვედრაზე მათ ისაუბრეს ქალების საჭიროებებსა და პრობლემებზე. ახალი წევრები არიან ვანშიც. თერჯოლაში კი ის ქალები შეიკრიბნენ, რომლებმაც ურთიერთდახმარების ჯგუფის მუშაობის შედეგად შეძლეს თავიანთი ცხოვრების შეცვლა.
10 მუნიციპალიტეტში შექმნილ ყველა ჯგუფში არიან ახალი წევრები და, შესაბამისად, გაჩნდა ახალი გამოწვევები. შეხვედრებზე ქალები მსჯელობენ ძალადობასთან დაკავშირებულ პრობლემებზე და ცდილობენ, ერთობლივად მოაგვარონ ისინი.
პროექტი ხორციელდება გენდერული თანასწორობის ფონდის მხარდაჭერით (კანადა)
30 მედიცინის მუშაკი შეიკრიბა წყალტუბოში ჩატარებულ ტრენინგზე (ქუთაისის, წყალტუბოს, სენაკის, ჩოხატაურის, თერჯოლის, სამტრედიის მუნიციპალიტეტებიდან).
ტრენინგის თემა იყო „სამედიცინო პერსონალის როლი ძალადობის პრევენციასა და მსხვერპლთა დაცვაში“. სხვადასხვა მეთოდების მეშვეობით მონაწილეებმა განიხილეს უამრავი საკითხი, მათ შორის: ქალთა და ბავშვთა მიმართ ძალადობა, სტამბოლის კონვენცია, რეფერირების მექანიზმები, მსხვერპლის იდენტიფიცირების ჯგუფები...
მათი აზრით, ეს მუშაობა აქტუალური და საჭიროა:
„ჩემთვის, როგორც ექიმისთვის, ტრენინგი იყო საინტერესო. გავამახვილებ ყურადღებას მიღებულ ინფორმაციებზე, საინტერესო მეთოდებზე და გარემოზე“...
„ტრენინგის ფორმატმა მოგვცა საშუალება, გვესაუბრა პრობლემის მიზეზებზე, როდის ვიქცევით სწორად და როდის არასწორად. აუცილებელია, რომ სამედიცინო პერსონალმა გაიაზროს თავისი პირდაპირი პასუხისმგებლობა“...
პროექტი ხორციელდება გენდერული თანასწორობის ფონდის მხარდაჭერით (კანადა)
სასტუმრო West Tower Kutaisi-ში ჩატარდა ტრენინგი პედაგოგებისათვის. გენდერი, გენდერული ძალადობა, ძალადობის იდენტიფიკაცია, ბავშვთან კომუნიკაცია და რეფერირების ეტაპები, სამართლებრივი მექანიზმები და პედაგოგების როლი ძალადობის პრევენციაში, საერთაშორისო დოკუმენტები - ეს საკითხები განიხილეს ტრენინგზე. მონაწილეები წარმოადგენდნენ 9 მუნიციპალიტეტს (სენაკი, თერჯოლა, სამტრედია, ქუთაისი, წყალტუბო, ხონი, ზუგდიდი, ხობი, ვანი).
მონაწილეები აქტიურად ჩაერთნენ სატრენინგო პროცესში, დისკუსიებში, ერთმანეთს უზიარებდნენ თავიანთ გამოცდილებას. მათ გადაეცათ პრაქტიკული სახელმძღვანელო, რომელიც შემუშავდა პედაგოგებისათვის - ხელმისაწვდომია ქალთა ფონდი „სოხუმის“ ვებგვერდზე: https://fsokhumi.ge/index.php/ka/publikacia/informatia-zaladobis-tsinaagmdeg/item/14732-2024-04-19-05-52-14
მონაწილეთა შეფასებით, ტრენინგი ხელს შეუწყობს გენდერული სტერეოტიპების მსხვრევას და ძალადობის პრევენციას ადრეული იდენტიფიცირების და ინტერვენციის მექანიზმებით. ისინი სკოლებში დანერგავენ გენდერულ მიდგომებს და აქტიურად ჩაერთვებიან ძალადობის შემთხვევების გამოვლენის პროცესში.
პროექტი ხორციელდება გენდერული თანასწორობის ფონდის მხარდაჭერით (კანადა)