11 მაისს ჩატარდა შეხვედრა აფხაზეთიდან იძულებით გადაადგილებულ პირებთან კოლექტიურ ცენტრ „სათაფლიაში“.

შეხვედრის მონაწილეებს მიეწოდათ ინფორმაცია კანონზე ოჯახში ძალადობის შესახებ და დაცვის სამართლებრივ მექანიზმებზე. ასევე გაიცა ინდივიდუალური კონსულტაცია  ქონებრივ დავაზე და მის სამართლებრივ რეგულაციებზე. აღნიშნული ქეისის ადრესატი  ადვოკატირებისთვის გადამისამართდა საქართველოს იურისტთა ასოციაციაში.

5 მაისს სენაკის გენდერული საკონსულტაციო საბჭოს წევრები შეუდგნენ ვორკშოპების ციკლის ჩატარებას გენდერისა და ძალადობის თემაზე პროექტის „ოჯახში ძალადობის პრევენცია სენაკის მუნიციპალიტეტში“.

ვორკშოპები უკვე გაიმართა 6 სასოფლო თემში (ახალსოფელი, ნოქალაქევი, ეკი, ზანა, ნოსირი, გეჯეთი) იქ ჩამოყალიბებული გენდერული საინიციატივო ჯგუფებისთვის. მონაწილეთა რაოდენობამ 100-ს გადააჭარბა. პროექტი დაფინანსებულია სენაკის მუნიციპალიტეტის ადგილობრივი თვითმმართველობისა და ფონდი „სოხუმის“ მიერ. მასში აქტიურად არიან ჩართულები გამგებლის წარმომადგენელები სენაკის ყველა სასოფლო თემში და მაჟორიტარი დეპუტატები. მსგავსი ვორკშოპები კიდევ რვა თემში გაიმართება.

წყალტუბოს მუნიციპალიტეტის ააიპ ბაღების გაერთიანებასთან თანამშრომლობით ფონდმა „სოხუმმა“ ჩაატარა ვორკშოპი თემაზე „გენდერი და   გენდერული მიდგომა სკოლამდელი ასაკის ბავშვების  აღზრდისა და განათლების სფეროში“. 

ვორკშოპს ესწრებოდა 33 ადამიანი - 16 საბავშვო ბაღის მენეჯერები და პედაგოგები. განხილულ იქნა შემდეგი თემები: გენდერი,  გენდერული მიდგომა, გენდერული მიდგომის მაჩვენებლები, გენდერული მოდელები ბაღებსა და სკოლებში. მუშაობა წარიმართა სხვადასხვა მეთოდით, აქტიური  დისკუსიით.   

7 და 9 მაისს თერჯოლის ახალგაზრდულ სახლში ჩატარდა ტრენინგი „საბუღალტრო აღრიცხვის საფუძვლების“ თემაზე. ტრენინგში მონაწილეობა მიიღო 30-მა ახალგაზრდამ - მათგან 10-10 კომპიუტერული და საბუღალტრო სწავლების კურსდამთავრებულები არიან, ხოლო 10 - ახალი მონაწილეა.

ტრენინგის დასრულებისას მონაწილეებს საშუალება მიეცათ, საკუთარი იდეის შესაბამისად დაწერონ ბიზნეს-გეგმა და განსახილველად წარუდგინონ კომისიას. გამარჯვებული მონაწილე სამახსოვრო პრიზით დასაჩუქრდება.

პროექტი ხორციელდება ჩეხური ორგანიზაცია „ადამიანი გაჭირვებაში“ მხარდაჭერით (დონორი - მსოფლიო ბანკი)

წყალტუბოში დასრულდა ორთვიანი კომპიუტერის კურსი პროექტის „ახალგაზრდების პროფესიული ორიენტაციის განვითარების ხელშეწყობა წყალტუბოს რაიონში“  ფარგლებში. 

კურსი გაიარა 16 მონაწილემ. მათი მოტივაციის საფუძველზე პროგრამით გათვლილ მასალაზე მეტი იქნა მათთვის მიწოდებული. კურსდამთავრებულებს გადაეცათ სერთიფიკატები. აღნიშნულ იქნა, რომ მიღებული ცოდნა  მნიშვნელოვანია მათი დასაქმებისათვის.

პროექტი ხორციელდება ჩეხური ორგანიზაცია „ადამიანი გაჭირვებაში“ მხარდაჭერით (დონორი - მსოფლიო ბანკი)

6 მაისს წყალტუბოში, სანატორიუმ „მეგობრობის“ კოლექტიურ ცენტრში ჩატარდა ვორკშოპი დევნილთა უფლებებზე და ადვოკატირებაზე. 7 მაისს ამავე თემას მიეძღვნა  ვორკშოპი სანატორიუმ „მედეას“ კოლექტიურ ცენტრში.

შეხვედრას ატარებდნენ ახალგაზრდები, რომლებმაც შესაბამისი ტრენინგები გაიარეს და გამოიმუშავეს უნარ-ჩვევები, თუ როგორ ხდება ადვოკატირება და რა ეტაპები უნდა გაიარონ ადვოკატირებისათვის.

სანატორიუმ „მეგობრობაში“ შეხვედრის დროს დასახელდა შემდეგი პრობლემები: მოუწესრიგებელი გზა, ახლომდებარე ტერიტორიის დასუფთავება, განათების და  კანალიზაციის პრობლემა. აღინიშნა, რომ წყლის ონკანის მხოლოდ 1-ლ სართულზეა, აუცილებელია ქვეწარმავლების და მწერების სადეზინფექციო სამუშაოების ჩატარება.

სანატორიუმ „მედეას“ კოლექტიურ ცენტრში მონაწილეებმა დააფიქსირეს, რომ კორპუსი არის ნგრევადი და საცხოვრებლად საშიში, არის სახურავის და განათების პრობლემა, ხშირია სოციალურად დაუცველის სტატუსის მოხსნის ფაქტები, არის სკოლებსა და ბაღებში ბავშვების ტრანსპორტირების პრობლემა.

სენაკის გენდერული საკონსულტაციო საბჭოს წევრებმა ჩაატარეს ადგილობრივი გენდერული საჭიროებების კვლევა. კვლევის ფარგლებში გაიმართა 4 ფოკუს-ჯგუფი სკოლის და საბავშვო ბაღების პედაგოგებთან, ექიმებთან, ლიდერ ქალებთან, ახალგაზრდა მშობლებთან, შეზღუდულიშესაძლებლობების მქონე ადამიანებთან; 4 ჩაღრმავებული ინტერვიუ ექსპერტებთან ეკონომიკის, განათლების, ადგილობრივი თვითმმართველობის და ჯანდაცვის საკითხებზე. ანკეტური მეთოდით გამოკითხულ იქნა 200  ადამიანი - სოციალურად დაუცველი ქალები, დევნილები, მცირე მეწარმე ქალები და ახალგაზრდები.

კვლევის შედეგად დაფიქსირდა სამიზნე ჯგუფების ძირითადი საჭიროებები – სამუშაო ადგილების შექმნა, განათლების ხარისხის გაუმჯობესება, ხელფასის მომატება,ინფორმირებულობის გაზრდა ადგილობრივ ბიუჯეტსა და პროგრამებზე, ბიზნეს ტრენინგები და კონსულტაციები მცირე ბიზნესის გაფართოებისთვის, გრძელვადიანი საბანკო დაბალპროცენტიანი კრედიტები, შინმოვლის პროგრამები და მრავალი სხვა.

ეს არის მესამე კვლევა, რომელიც არსებობის სამი წლის მანძილზე ჩაატარა საბჭომ. შედეგების ანალიზის საფუძველზე შემუშავდება რეკომენდაციები და წარედგინება ადგილობრივ თვითმმართველობას 2017 წლის ბიუჯეტში გასათვალისწინებლად.

5 მაისს პროექტის „ახალგაზრდების განვითარება ახალ საფეხურზე“ ფარგლებში თერჯოლაში დასრულდა „საბუღალტრო აღრიცხვის საფუძვლების“ ორთვიანი კურსი (ჩეხური ორგანიზაცია „ადამიანი გაჭირვებაში“ მხარდაჭერით, დონორი - მსოფლიო ბანკი).

კურსის ბოლოს გაიმართა ტესტირება ნასწავლი მასალის მიხედვით. ტესტირებამ აჩვენა, რომ მონაწილეებმა წარმატებით დაასრულეს  სწავლების კურსი. ისინი მიღებულ ცოდნას მომავალში აუცილებლად გამოიყენებენ პრაქტიკაში.

ფონდ „სოხუმსა“ და აფხაზეთის ავტონომიური რესპუბლიკის უმაღლეს საბჭოს შორის ხელი მოეწერა  ურთიერთთანამშრომლობის მემორანდუმს.

მემორანდუმი განსაზღვრავს ჩარჩო-პირობებს, რომლის მიხედვითაც მხარეები იხელმძღვანელებენ ქალთა სოციალურ-ეკონომიკური მდგომარეობის გაუმჯობესების ხელშესაწყობად ერთობლივი ღონისძიებების ორგანიზებისას, იგპ-თა სრულფასოვანი ინტეგრაციისათვის ადგილობრივ საზოგადოებაში, დემოკრატიული ღირებულებების მხარდასაჭერად და გენდერული სამართლიანობის მისაღწევად.

მემორანდუმის ხელმოწერით მხარეები განსაზღვრავენ ერთობლივი საქმიანობის ძირითად მიმართულებებს და თავიანთ პასუხისმგებლობებს.

წყალტუბოს დევნილთა დასახლებაში ჩატარდა ფორუმ-თეატრის წარმოდგენა, მაყურებელთა რაოდენობა მცირე იყო. ზოგიერთი მათგანი აგრესიით განეწყო. განაცხადა, რომ  ეს წარმოდგენები ახალგაზრდებზე უარყოფითად მოქმედებს. თუმცა დისკუსიის შედეგად მათ შეეცვალათ შეხედულება. აღინიშნა, რომ ფორუმ-თეატრი ცვლის ადამიანის ცნობიერებას, ბევრ რამეზე დააფიქრებს და ეცდება, სხვანაირად მოიქცეს.