პირველი შეხვედრა სენაკის გენდერული საკონსულტაციო საბჭოს პროექტის „ოჯახში ძალადობის პრევენცია სენაკის მუნიციპალიტეტში“ ფარგლებში გაიმართა მუნიციპალიტეტის სხდომათა დარბაზში. შეხვედრა მოეწყო გამგებლის წარმომადგენლებისა და სენაკის მუნიციპალიტეტის 14 ტერიტორიული ერთეულის მაჟორიტარი დეპუტატებისთვის. ღონისძიებას ესწრებოდა საკრებულოს თავმჯდომარე ჯუმბერ ლაშქარავა.

გენდერული საკონსულტაციო საბჭოს თავმჯდომარემ ნანა ალანიამ შეკრებილებს გააცნო პროექტის მიზნები და ამოცანები, დებულება გენდერული საინიციატივო ჯგუფებისა, რომლებიც შეიქმნება სოფლის თემებში. პროექტის ფარგლებში ეს ჯგუფები გაივლიან სპეციალურ ვორკშოპებს გენდერისა და ოჯახში ძალადობის საკითხებზე, რაც ხელს შეუწყობს სოფლის მოსახლეობის ინფორმირების დონის ამაღლებას.

მაჟორიტარმა დეპუტატებმა და გამგებლის წარმომადგენლებმა გამოხატეს მზადყოფნა, რომ ჩაერთვებიან პროექტში და ხელს შეუწყობენ ქალებისა და ახალგაზრდების როლის გაზრდას ოჯახში ძალადობის პრევენციის პროცესში.

აპრილის თვის სამობილიზაციო შეხვედრების თემა იყო ძალადობის გავლენა ახალგაზრდებზე. შეხვედრები ჩატარდა ქუთაისში, წყალტუბოში, ხონში, სენაკში, ფოთში და ზუგდიდის მუნიციპალიტეტის ორ სოფელში - ხურჩასა და კოკში.

შეხვედრების დროს ყურადღება გამახვილდა 6 აპრილზე - სპორტის საერთაშორისო დღეზე ახალგაზრდობისა და განვითარებისათვის. საუბარი შეეხო იმას, რატომაა მნიშვნელოვანი ჯანსაღი ცხოვრების წესი და მისი კავშირი ძალადობის პრევენციისთვის.

დევნილთა კოლექტიურ ცენტრებში კვლავ დასახელდა პრობლემები: არასახარბიელო  პირობები, სოციალური ფონი, უმუშევრობა, მიგრაცია, ახალგაზრდების დასაქმების პრობლემები.

აპრილის თვის იურიდიული კონსულტაციები ქუთაისის, ხონის, ფოთის, სენაკის, წყალტუბოს და ხურჩის (ზუგდიდის მუნიციპალიტეტი) ქალთა მხარდაჭერის ცენტრებში მიეძღვნა სხვადასხვა თემას: ოჯახური კონფლიქტები, დევნილთა უფლებები, განსახლების ეტაპები, ნასყიდობის ხელშეკრულება...

ბენეფიციარებმა თავიანთი პრობლემების მოსაგვარებლად გამოიყენეს იურიდიული კონსულტაციები, რომლებიც შეეხებოდა ალიმენტის დანიშვნის პროცედურებს, განქორწინების ეტაპებს, მრავალშვილიანი დედის სტატუსის მინიჭებას და სხვ.

როგორია ქვეყანაში არსებული ოფიციალური სტატისტიკა ქალთა პოლიტიკური მონაწილეობის კუთხით, რატომ არ არიან პასუხისმგებელ თანამდებობებზე ქალები, როგორ  უნდა მოხდეს მათი პოლიტიკური მონაწილეობის ხელშეწყობა -  გადაცემის სტუმრებმა, ოზურგეთის გენდერული საკონსულტაციო საბჭოს წევრებმა დეტალურად ისაუბრეს გავლილ პოლიტიკურ გზაზე, სირთულეებზე, დადებით მხარეებზე, საბჭოსა და ადგილობრივი თვითმმართველობის ნაყოფიერ თანამშრომლობაზე, განსაკუთრებით - ქალთა გააქტიურების კუთხით.   

საუბარი შეეხო ოზურგეთში გასამართ რიგგარეშე არჩევნებს. სოფელ ნასაკირალში კენჭს ქალი დეპუტატი იყრის „ქართული ოცნებიდან“.

გადაცემის სტუმრების პოზიციით, მაჟორიტარი კანდიდატობა ნამდვილად არ არის ადვილი, განსაკუთრებით ქალისთვის, მაგრამ ძალიან საინტერესოა და ქალების ჩართულობაც აუცილებელია. ქალები კონკრეტულ საკითხებს უფრო მეტ მნიშვნელობას ანიჭებენ, უფრო მგრძნობიარენი არიან სოციალურ თემებთან დაკავშირებით.

„თუ ჩვენ ვსაუბრობთ, რომ ქალები პოლიტიკაში უნდა გაძლიერდნენ, უნდა მივცეთ წარმოდგენილ  პედაგოგ  ქალს შანსი და დავამსხვრიოთ მითი, რომ მაჰმადიანი თემი ქალს არ აირჩევს დეპუტატად“, - აღინიშნა გადაცემაში.  

პროექტი ხორციელდება გაეროს  ქალთა  ორგანიზაციის

გენდერული  თანასწორობის ფონდის მხარდაჭერით

ქუთაისის გენდერულმა საბჭომ დაიწყო ახალი პროექტი „გენდერული ასპექტების გაძლიერება ადგილობრივი გენდერული პოლიტიკის ფორმირებაში აქტიური ჩართვისათვის“. პროექტი ხორციელდება ქუთაისის მერიისა და ფონდი „სოხუმის“ თანადაფინანსებით.

21 აპრილს პროექტის ფარგლებში „გრანდ პალასში“ რეგიონალური  კონფერენცია გაიმართა თემაზე „გენდერული კომპონენტები ადგილობრივ ბიუჯეტში - არსებული რეალობა, პოზიტიური ცვლილებები, მომავლის პერსპექტივები“.

კონფერენციაში მონაწილეობდნენ დასავლეთ საქართველოს 17 მუნიციპალიტეტის - ქუთაისის, ბათუმის, ოზურგეთის, სენაკის, ზუგდიდის, ფოთის, წყალტუბოს, ხონის, ვანის, სამტრედიის, ხარაგაულის, ზესტაფონის, თერჯოლის, ტყიბულის, ქობულეთის, ჩოხატაურის, ლანჩხუთის ადგილობრივი თვითმმართველობის წარმომადგენლები, გენდერული საკონსულტაციო საბჭოს წევრები, უნივერსიტეტების რექტორები, პროფესორები, სტუდენტები, არასამთავრობო ორგანიზაციების, მედიის წარმომადგენლები.

კონფერენციის პირველ ნაწილში ქუთაისის, ბათუმის, ოზურგეთის და სენაკის გენდერული საკონსულტაციო საბჭოების წარმომადგენლებმა ადგილობრივ თვითმმართველობებთან თანამშრომლობით გენდერული მიმართულებით მიღებულ შედეგებზე ისაუბრეს.

კონფერენციის მეორე ნაწილში მომხსენებლებმა თანასწორობის თემა სხვადასხვა კონტექსში განიხილეს. კონფერენცია დასრულდა მოხსენებით: სტუდენტთა  გენდერული საჭიროებები და მათი ჩართულობა ადგილობრივი ბიუჯეტის ფორმირებაში.

პროექტის პირველი ეტაპი დასრულდა. კონფერენციაზე განხილულ საკითხებზე დისკუსიები ქუთაისის უნივერსიტეტებში გაგრძელდება.   

პროექტი ხორციელდება გაეროს  ქალთა  ორგანიზაციის

40 ქალბატონი ესწრებოდა ამომრჩეველ ქალთა კლუბის სხდომას  ოზურგეთის დემოკრატიული ჩართულობის ცენტრში -  ადგილობრივი თვითმმართველობის, გენდერული საკონსულტაციო საბჭოს, სხვადასხვა სამსახურის წარმომადგენლები.

შეკრებილებმა ისაუბრეს ქალაქში არსებულ აქტუალურ პრობლემებზე და მათი ადვოკატირების გზებზე. დასახეს სამომავლო გეგმები.

მსგავსი შეხვედრები პროექტის „გენდერული საკონსულტაციო საბჭოები - ქალთა როლის ამაღლება რეგიონებში სოციალური ცვლილებებისათვის“ ფარგლებში მიმდინარე მუშაობის კოორდინირების კარგი საშუალებაა.

ოზურგეთის გენდერული საკონსულტაციო საბჭო ადგილობრივი გენდერული საჭიროებების კვლევას იწყებს. სხდომაზე შერჩეულ იქნა სამიზნე ჯგუფები ფოკუს-ჯგუფებისა და გამოკითხვისთვის, ასევე რესპონდენტები ჩაღრმავებული ინტერვიუსთვის.

ჯგუფის წევრებმა მაქსიმალურად მოიცვეს ყველა ჯგუფი, ვისი საჭიროებაც ნაკლებადაა ასახული ბიუჯეტში. გამოკითხვა ჩატარდება სოციალურად დაუცველ ქალბატონებთან, ახალგაზრდებთან, ეთნიკური უმცირესობების წარმომადგენლებთან და მცირე ბიზნესით დაკავებულ ქალებთან. ფოკუს-ჯგუფები დააფიქსირებს დევნილთა, პედაგოგთა და სამედიცინო სფეროს წარმომადგენელთა, მარტოხელა და მრავალშვილიან დედათა საჭიროებებს. ფოკუს-ჯგუფის ჩატარება გადაწყდა თემის ლიდერებთან, რათა უფრო მეტი პრობლემა გამოვლინდეს. ინტერვიუსთვის შეირჩა ექსპერტები ჯანდაცვის, განათლების, სოფლის მეურნეობის და შშმ პირთა საკითხებში.

ბათუმის საჯარო ბიბლიოთეკაში გაიმართა მწერლისა და საზოგადო მოღვაწის, პროფესორ რამაზ სურმანიძის წიგნის „ბავშვთა და მოზარდთა ასაკობრივ-სქესობრივი აღზრდის საფუძვლები“ წარდგენა. წიგნი ფონდი „სოხუმის“ ფინანსური მხარდაჭერით გამოიცა. ღონისძიება შესავალი სიტყვით გახსნა ბიბლიოთეკის დირექტორმა გენადი მახარაძემ და მიულოცა ბატონ რამაზს 71-ე წიგნის გამოცემა.

წიგნის შესახებ ისაუბრეს რედაქტორმა, პროფესორმა აკაკი ბერიძემ, რეცენზენტებმა პროფესორმა შორენა ვაშაძემ და განათლების დოქტორმა მარინე გურგენიძემ, ფონდი „სოხუმის“ წარმომადგენელმა ნათია კიკვაძემ, აჭარის არ უმაღლესი საბჭოს თავმჯდომარემ ავთანდილ ბერიძემ, ქალაქ ბათუმის საკრებულოს წევრმა ნატო ზოიძემ, პოეტმა ცისანა ანთაძემ, მწერალმა ანა დუნდუამ.

ბათუმის კულტურის ცენტრთან არსებულმა ქალთა ვოკალურმა ანსამბლმა „ბათუმმა“ შეასრულა სიმღერები.

დასასრულ, რამაზ სურმანიძემ უპასუხა დასმულ შეკითხვებს.

წყალტუბოში ჩატარდა ტრენინგი თემაზე „საკურორტო სერვისი და მომსახურების ეტიკეტი“. ტრენინგზე მონაწილეობას ღებულობდნენ წყალტუბოს სხვადასხვა სასტუმროს პერსონალი და პირები, რომლებიც დაინტერესებულნი არიან სასტუმროში დასაქმებით.

ტრენინგის მონაწილეებს მიეწოდათ ინფორმაცია იმ უნარ-ჩვევებზე, რომლებიც აუცილებელია იმისთვის, რომ სასტუმროს პერსონალი შესაბამისად ემსახურებოდეს კლიენტებს. შეხვედრა დაფუძნებული იყო მიღებული თეორიის პრაქტიკით გამყარებაზე. მონაწილეების თქმით, კარგი იქნება, თუ მსგავსი ტრენიგების ციკლი უფრო მაშტაბურად ჩატარდება.

სენაკის გენდერული საკონსულტაციო საბჭოს მორიგი სხდომა მიეძღვნა ადგილობრივი გენდერული საჭიროებების კვლევის სამიზნე ჯგუფების და  მეთოდების განსაზღვრას. კვლევა დასრულდება მაისში და მიღებული შედეგების გაანალიზებით, საბჭო შეიმუშავებს რეკომენდაციებს 2017 წლის ბიუჯეტისთვის.

სხდომაზე დაიგეგმა ღონისძიებები საბჭოს ახალი, ადგილობრივი თვითმმართველობისა და ფონდი „სოხუმის“ მიერ დაფინანსებული პროექტის ფარგლებში, რომელიც მიმართულია ოჯახში ძალადობის პრევენციისკენ სოფლებში.  პირველი საორგანიზაციო შეხვედრა გამგებლის წარმომადგენლებთან და მაჟორიტარ დეპუტატებთან გაიმართება 25 აპრილს, შემდეგ კი სენაკის მუნიციპალიტეტის 14 ტერიტორიულ ერთეულში ჩამოყალიბდება გენდერული საინიციატივო ჯგუფები. პროექტის ძირითადი მიზანია ქალებისა და ახალგაზრდების როლის გაძლიერება ოჯახში ძალადობის პრევენციის პროცესში.