ქუთაისელი ჟურნალისტები ყოველთვის საქმის კურსში არიან, რა მუშაობას ეწევა ფონდი „სოხუმი“. 23 მარტს სხვადასხვა მედიასაშუალების წარმომადგენლები ფონდის სააქტო დარბაზში მორიგ საინფორმაციო შეხვედრაზე შეიკრიბნენ.

შეხვედრის თემა იყო ქუთაისის გენდერული საკონსულტაციო საბჭოს წინადადებები ადგილობრივი თვითმმართველობის მიმართ ძალადობის პრევენციის კუთხით.

ჟურნალისტები  აქტუალურად მიიჩნევენ ქალთა მიმართ ძალადობის თემას და წლებია, ბევრს მუშაობენ ამ კუთხით. ისინი დაინტერესდნენ კონკრეტული საკითხებით და მიიღეს სათანადო პასუხები, რაც შემდგომში მათ მასალებში აისახება.

წყალტუბოს ქალთა მხარდაჭერის ცენტრმა ქალთა ადგილობრივი  საინიციატივო ჯგუფის შეხვედრას უმასპინძლა. ქალებმა კიდევ ერთხელ განაზოგადეს ფონდი „სოხუმის“ მიერ ჩატარებული კვლევის შედეგები, მოახდინეს ადგილობრივი  პრობლემების იდენტიფიცირება, გამოყვეს პრიორიტეტული პრობლემების ნაწილი და შემოგვთავაზეს მათი მოგვარების საკუთარი ხედვა.

ქალთა რეპროდუქტიული ჯანმრთელობის საკითხები და წყალტუბოს სამშობიარო სახლის საჭიროების სერიოზული არგუმენტაცია; ინკლუზიური ბავშვების დედების საჭიროებები; ქალთა ინფორმირების საკითხი, როგორც მათი საზოგადოებრივ- პოლიტიკური აქტივობის ხელისშემწყობი ფაქტორი - შეხვედრაზე დაისახა ადვოკატირების სამომავლო სტრატეგია. ამ სტრატეგიის ნაწილია თანამშრომლობის პერსპექტივა წყალტუბოს მუნიციპალიტეტის გენდერულ საბჭოსთან, რომელიც სულ ახლახან შეიქმნა და ადგილობრივი გენდერული პოლიტიკის გაუმჯობესებას ისახავს მიზნად.

შეხვედრას ესწრებოდნენ შვედეთის ქალთა ფონდ Kvinna till Kvinna-ს წარმომადგენლები, რომელთაც დიდი ინტერესი გამოხატეს აღნიშნული მუშაობის მიმართ.

21 მარტს, ქართული ჟურნალისტიკის დღეს, სენაკელი ჟურნალისტები გაზეთ „კოლხეთის“ რედაქციაში შეიკრიბნენ. საუბარი შეეხო მედიის აქტიურობას ადგილობრივი გენდერული პოლიტიკის ჩამოყალიბებაში.

შეხვედრაზე მოწვეული იყო ირაკლი კაჭარავა - სენაკის მუნიციპალიტეტის გამგეობის სპორტისა და ახალგაზრდობის სამსახურის ახალგაზრდობისა და გენდერული თანასწორობის განყოფილების უფროსი,  გენდერული საკონსულტაციო საბჭოს წევრი. მან შეკრებილებს უამბო ახალგაზრდებთან გენდერული თანასწორობისა და ძალადობის კუთხით ჩატარებული მუშაობის შესახებ. ამის შესახებ იყო მასალები ადგილობრივ მედიაში.  გაჩნდა სურვილი, გაგრძელდეს თანამშრომლობა, გაჩნდეს სპეციალური რუბრიკები და კიდევ უფრო აქტიურად გაშუქდეს გენდერული თემები.

საინფორმაციო შეხვედრას სენაკის საჯარო ბიბლიოთეკის თანამშრომლებთან ესწრებოდნენ საკრებულოს სოციალური კომისიის თავმჯდომარე, გენდერული  საკონსულტაციო საბჭოს თავმჯდომარე ნანა ალანია და საბჭოს წევრები ალექსი დემურია და დინა გიორგაძე.

შეხვედრაზე ქალბატონებმა მიიღეს ინფორმაცია ფონდი „სოხუმის“, გენდერული  საკონსულტაციო საბჭოს საქმიანობის და საკრებულოს სოციალური პროგრამების შესახებ.

განხილულ იქნა საჯარო ბიბლიოთეკაში არსებული პრობლემებიც. აქტიური ქალბატონები მოწვეულ იქნენ ამომრჩეველ ქალთა კლუბის სხდომაზე პრობლემების ადვოკატირებისა და მოგვარებისათვის.

სენაკის გენდერული საკონსულტაციო საბჭოს 24-ე სხდომა დაიწყო ახალგაზრდული საკრებულოს წევრების საინტერესო ინიციატივების წარდგენით. საბჭომ განიხილა ახალგაზრდული პროექტის შემუშავებისა და თანადაფინანსების საკითხი, რაც აქტიურ ახალგაზრდებს შესაძლებლობას მისცემს, დამოუკიდებლად განახორციელონ თავიანთი ინიციატივები მცირე გრანტების მეშვეობით. თავის მხრიდან, ახალგაზრდული საკრებულოს წარმომადგენლებმა გამოხატეს  მზადყოფნა, ჩაერთონ გენდერული საბჭოს პროექტებში.

ამას გარდა, სხდომაზე დეტალურად იმსჯელეს ახალგაზრდებისა და ქალთა როლის გაძლიერებაზე ოჯახში ძალადობის პრევენციის და სენაკის მუნიციპალიტეტის  სოფლებში სოციალური პრობლემების ადვოკატირების პროცესში. საბჭოს წევრები იმედოვნებენ, რომ ადგილობრივი თვითმმართველობა და ფონდი „სოხუმი“ მხარს დაუჭერენ მათ პროექტს.

სენაკის გენდერული საკონსულტაციო საბჭოს საქმიანობა მუნიციპალიტეტში გენდერული პოლიტიკის დანერგვის კუთხით; საკითხები, რომლებიც საბჭოს ინიცირებით აისახა ადგილობრივ ბიუჯეტში, თვითმმართველობასთან სამომავლო თანამშრომლობის პერსპექტივები -  ამ საკითხებს შეეხო რეგიონალურ მაუწყებელ „ეგრისში“ გასული ტელეგადაცემა.

გადაცემის დასაწყისში გასულმა სიუჟეტმა თვალსაჩინო გახადა ადგილობრივი ხელისუფლების მიერ საბჭოს საქმიანობის შეფასება და ის საკითხები, რომელთა გადასაჭრელად საბჭო მჭიდროდ თანამშრომლობს ადგილობრივ ხელისუფლებასთან.

როგორც აღინიშნა, ადგილობრივმა ხელისუფლებამ მხარი დაუჭირა სენაკის გენდერული საკონსულტაციო საბჭოს ინიციატივას და ბიუჯეტში ჩაიდო ერთჯერადი დახმარება ოჯახში ძალადობის მსხვერპლთათვის.

თვითმმართველობის წარმომადგენელთა განცხადებით, მიღწეულმა შედეგებმა  აჩვენა, რომ მსგავსი საქმიანობა უნდა გაიშალოს სოფლებშიც და ყველა თემში შეიქმნას გენდერული საბჭო, რომელიც იქნება ადგილობრივი სოციალური პოლიტიკის ავანგარდში.

„ეგრისის“ სტუდიაში გამართულ დიალოგში საბჭოს წევრებმა ისაუბრეს თვითმმართველობასთან თანამშრომლობით განხორციელებულ საქმიანობაზე და გამოკვეთეს საკითხები, საითკენაც უახლოეს მომავალში  იქნება მიმართული საბჭოს ძალისხმევა.

ქუთაისის ახალგაზრდული კლუბის ჯგუფმა ფონდ „სოხუმში“ ჩაატარა ღონისძიება  „ჩვენ არ ვითვლით ქრომოსომებს“. მოიწვიეს ბავშვები ამ დიაგნოზით, ფსიქოლოგი,  სოციალური რეაბილიტაციის ცენტრის მენეჯერი.

ღონისძიება მარი კურტანიძის ინიციატივით გაიმართა. სტუმრებმა ძალიან იხალისეს და მიიღეს  საჩუქრები.

ფონდი „სოხუმის“ ოფისში შეჯამდა „ქალთა სოლიდარობის კვირეულის“ ფარგლებში  გამართული კონკურსის შედეგები.

კონკურსში აქტიურად ჩაერთო 5 სკოლა - მათ ჩაატარეს საინფორმაციო შეხვედრები, ფორუმ-თეატრის ჩვენებები, ესეების კონკურსი, გამოფენები.

ყოველივე ამის შესახებ ისაუბრეს მოსწავლეებმა და პედაგოგებმა შემაჯამებელ შეხვედრაზე.

ჟიურის გადაწყვეტილებით, 1-ლ ადგილზე გავიდა ოტია იოსელიანის სახელობის №1 საჯარო სკოლა (წყალტუბო), მეორე ადგილი მოიპოვა ჟიული შარტავას სახელობის  №6 საჯარო სკოლამ (ქუთაისი), ხოლო მესამე - კოკის საჯარო სკოლამ (ზუგდიდი).

გამარჯვებულებმა და მონაწილეებმა მიიღეს დიპლომები და საჩუქრები.

ქალთა ადამიანური უსაფრთხოების საკითხები - რა საფრთხეები გამოიკვეთა ქალთა სხვადასხვა ასაკობრივი, სოციალური ჯგუფის მიერ დასავლეთ საქართველოში; სად გრძნობენ ქალები თავს შედარებით დაცულად და რომელ სფეროებში მიიჩნევენ საჭიროდ არსებით რეფორმებს; რა რეკომენდაციები დაიდო კვლევის შედეგად და როგორია კვლევის უკუკავშირი - რადიოკომპანია „რიონის“ ეთერში ფონდი „სოხუმის“ წარმომადგენლებმა ერთობლივი ქართულ-აფხაზური პროექტის ფარგლებში განხორციელებულ საქმიანობაზე და ქალთა საკითხების ადვოკატირების სამომავლო სტრატეგიაზე ისაუბრეს.

გადაცემაში წარმოდგენილ ინტერვიუებში გაჟღერდა ხონში, წყალტუბოში გაკეთებული შეფასებები, კიდევ ერთხელ დასახელდა რეგიონის ქალთა სპეციფიკური პრობლემები. ითქვა, რომ მათი ადვოკატირება  ქალთა აქტიურმა ჯგუფებმა უნდა დაიწყონ.

ბათუმის ამომრჩეველ ქალთა კლუბის წევრები მორიგი დღის წესრიგით შეიკრიბნენ. ადვოკატირების ჯგუფმა წარადგინა ჩატარებული საქმიანობის მოკლე ანგარიში და ჩაინიშნა ახალი საკითხებიც, რომლებიც კლუბის წინაშე დაისვა ქალთა ჯგუფების მიერ.    სხდომაზე მოწვეულმა ადგილობრივი ხელისუფლების წარმომადგენელმა აღნიშნა, რომ ამ საკითხებზე აუცილებლად მოხდება რეაგირება და მადლობა გადაუხადა მათ სამოქალაქო აქტივობისა და ადგილობრივ სოციალურ პოლიტიკაში მონაწილეობისათვის.

კლუბის წევრებმა ასევე გამოკვეთეს საკითხები, რომელთა ადვოკატირება უნდა მოხდეს ცენტრალურ სტრუქტურებთან, კერძოდ შრომის, ჯანმრთელობის  და სოციალური დაცვის სამინისტროსთან.

უკუკავშირმა გამოკვეთა კლუბის წევრების ხედვა სამომავლო საქმიანობასთან დაკავშირებით.