ქუთაისის გენდერულმა საკონსულტაციო საბჭომ სხდომაზე განსახილველად იმ პროექტის სამუშაო ვარიანტი გაიტანა, რომელიც ადგილობრივ ხელისუფლებასთან თანადაფინანსებით უნდა განხორციელდეს. სხდომაზე მოწვეულნი იყვნენ  ადამიანები, რომლებიც მომავალი პროექტის  აქტივობებთან პირდაპირ კავშირში არიან: ფონდი „სოხუმის“ წარმომადგენლები, უნივერსიტეტის ლექტორები.

მუშაობისას დაფიქსირდა სხვადასხვა პოზიცია, რომელიც პროექტის ეტაპებს, სამიზნე ჯგუფებს და თემატიკას უკავშირდება. სხვადასხვა მოსაზრების დაფიქსირების შემდეგ შეიქმნა საინიციატივო ჯგუფი 6 კაცის შემადგენლობით, რომლებიც პროექტზე მუშაობას გააგრძელებენ.

შეხვედრის მეორე ნაწილში საბჭოს წევრებმა შეიმუშავეს იდეები ახალი პროექტის შესაქმნელად.

საინტერესო ისტორიების გაანალიზებით წარიმართა ვორშოპები ქალთა ჯუფებთან, თემაზე „ქალთა სოლიდარობა - ოჯახური კონფლიქტების მართვის ერთ-ერთი მექანიზმი“.  

- ძალადობის  პრევენცია, მსხვერპლის დახმარება ქალთა სოლიდარობის და მხარდაჭერის გარეშე შეუძლებელია, ოჯახური კონფლიქტების დროს ეს განსაკუთრებით კარგად ჩანს.  თუ შვილი ძალადობის მსხვერპლია, მან იცის, რომ პირველ რიგში დედისგან ვერ მიიღებს მხარდაჭერას, - მიიჩნევენ მონაწილეები.  დასახელდა რეალური ისტორია, როცა ქმრისგან ნაცემი გოგო ტვინის შერყევით საავადმყოფოში აღმოჩნდა, დედა ექიმებს „უსაბუთებდა“, რომ  მას კარადიდან გადმოვარდნილი ყუთი დაეცა.

შეხვედრის მონაწილე ქალებმა აღნიშნეს, რომ ბოლო პერიოდში ბევრი რამ უკეთესობისკენ შეიცვალა, მაგრამ ქალთა ერთიანობის, სოლიდარობის  დეფიციტი მაინც არსებობს და მსგავსი ღონისძიებები დაეხმარება ქალებს, მხარდაჭერა გამოხატონ მსხვერპლის მიმართ.   

ვორკშოპები ჩატარდა ხურჩაში, სენაკში, ქუთაისში.

ქუთაისში, დემოკრატიული ჩართულობის ცენტრში ჩატარდა იმერეთის რეგიონის გენდერული ქსელის შეხვედრა თემაზე „გენდერული თანასწორობა პოლიტიკურ პროცესებში“.

შეხვედრას ესწრებოდნენ ქუთაისის საკრებულოს დეპუტატი ქალბატონები, აფხაზეთის ავტონომიური რესპუბლიკის მთავრობის წარმომადგენლობის ხელმძღვანელი, სტუმრები რეგიონებიდან.

განხილული იყო რეგიონში არსებული მდგომარეობა გენდერული თვალსაზრისით. გაიმართა დისკუსია შემდეგ საკითხებზე: ქალთა პოლიტიკურად გაძლიერების მექანიზმები, მათი მონაწილეობის ხელშემწყობი პირობები საპარლამენტო არჩევნებში, კვოტირება.

შეხვედრა აქტიურად და საინტერესოდ ჩატარდა. მსგავსი შეხვედრები გაგრძელდება. 

მარტი ქალთა თვედ ითვლება, ამიტომაც ახალგაზრდული კლუბების საინფორმაციო შეხვედრებზე  მთავარ თემად იქცა ქალთა სოლიდარობა ძალადობის პრევენციაში.

ხონის მე-4 სკოლაში ჩატარებულ საინფორმაციო შეხვედრაზე მონაწილეებმა მოისმინეს ინფორმაცია ფონდი „სოხუმის“ შესახებ და იმსჯელეს ქალთა სოლიდარობის საკითხზე.

ფოთის მე-7 და კოკის საჯარო სკოლაში მონაწილეებმა თემის მიმართ დიდი ინტერესი  გამოხატეს და დისკუსიაშიც ჩაერთნენ.

წყალტუბოს 1-ლ საჯარო სკოლაში გოგონები აქტიურობდნენ, სენაკის მე-4 სკოლის მოსწავლეებს შორის კი განსაკუთრებით გამოირჩეოდნენ ბიჭები, რომლებიც გულახდილად ამბობდნენ, რომ ქალებს ყოველდღე უნდა მოუწყო დღესასწაული.

***

„სადა ხარ ჩემო სულიკო“, - ასე ჰქვია რეჟისორ ლია ჯაყელის დოკუმენტურ ფილმს, რომელიც გვიამბობს ვარინკა წერეთელზე - აკაკი წერეთლის „სულიკოს“ ტექსტზე შექმნილი პოპულარული ქართული სიმღერის ავტორზე.

ფილმი არის დავიწყებული საზოგადო მოღვაწე ქალის შესახებ, გადაღებულია 10 წლის წინ და ახლაც საკმაოდ აქტუალურია.

ქუთაისში დემოკრატიული ჩართულობის ცენტრში გამართულ ფილმის ჩვენებას ფონდი „სოხუმის“ ახალგაზრდული კლუბის 8 წევრი დაესწრო. მათ მონაწილეობა მიიღეს დისკუსიაშიც, რომელიც აქტიურად და საინტერესოდ წარიმართა.

ფონდმა „სოხუმმა“ თერჯოლაში დაიწყო მუშაობა ახალ პროექტზე „ახალგაზრდების განვითარება ახალ საფეხურზე“. პროექტის მონაწილე სოციალურად დაუცველი ახალგაზრდებისთვის ჩატარდება პროფესიული გადამზადების კურსები: ბუღალტერია, კომპიუტერული უნარ-ჩვევები, მცირე ბიზნესის მართვა.

15 მარტს ჩატარდა ბუღალტრული აღრიცხვის პირველი გაკვეთილი. კურსს გაივლის ორი 15-კაციანი ჯგუფი.

პროექტი ხორციელდება ჩეხური ორგანიზაცია „ადამიანი გაჭირვებაში“ მხარდაჭერით (დონორი - მსოფლიო ბანკი)

მარტის თვეში ჩატარდა 33 სამობილიზაციო შეხვედრა 5 ქალაქში (ქუთაისი, ხონი, წყალტუბო, ფოთი, სენაკი) და ზუგდიდის მუნიციპალიტეტის სოფლებში - ხურჩასა და კოკში.

შეხვედრების თემა იყო ქალთა სოლიდარობის კვირეული. შეხვედრების დროს დაფიქსირდა ქალთა პრობლემები, მათ შორის - ქალთა სიმცირე პოლიტიკაში, გადაწყვეტილების მიღების პროცესში. შეხვედრების მონაწილეებმა ისაუბრეს ფემიციდის გახშირებული შემთხვევების შესახებაც.

აღინიშნა, რომ ქალის მიმართ პატივისცემა მთელი წელი უნდა გამოიხატოს - მათი უფლებების პატივისცემით, პოლიტიკური გაძლიერებით და გააქტიურებით.

რამდენად მნიშვნელოვანია სოლიდარობა ქალთა უფლებების დასაცავად, ხშირად რატომ არ თანაუგრძნობენ ქალები  ძალადობის მსხვერპლს - ამ საკითხებზე გაიმართა დისკუსიები ახალგაზრდებთან წყალტუბოში, ფოთსა და ხონში ჩატარებულ ვორკშოპებზე.

გამოყენებული იყო იმიტირებული წარმოდგენები ოჯახური კონფლიქტების თემაზე, რამაც მონაწილეებს გაუადვილა ანალიზი განსახილველ საკითხზე.

- სოლიდარობის დეფიციტი ნამდვილად არსებობს. ძალიან ხშირად ოჯახური კონფლიქტების დროს ქალები არათუ გამოხატავენ მხარდაჭერას დაზარალებულის მიმართ - პირიქით, ნებისმიერ შემთხვევაში ქალში ეძებენ დამნაშავეს.

მიზეზებზე საუბრისას მონაწილეებმა აქცენტი ქართულ მენტალიტეტზე და არასწორ აღზრდაზე  გააკეთეს.  მათი თქმით, მეტი ინფორმაცია სჭირდება ქალებს, რათა კარგად დაინახონ ქალთა სოლიდარობის მნიშვნელობა ძალადობის პრევენციაში.

რადიო „ძველი ქალაქის“ პირდაპირი ეთერით გავიდა ფონდი „სოხუმის“ მიერ მომზადებული გადაცემა. მასში აისახა ბროშურის „ქალთა ადამიანური უსაფრთხოების ხარისხის შეფასება დასავლეთ საქართველოში“ პრეზენტაციის მასალები. სიუჟეტში გაჟღერდა ინტერვიუები, რას ფიქრობენ და რა ტიპის საფრთხეებს გრძნობენ ქალები ფოთსა და სოფელ ხურჩაში, რა უნდა გაკეთდეს აღნიშნული რისკების შესამცირებლად. გადაცემას ორი სტუმარი ყავდა -  ფონდი „სოხუმის“ პროექტის ასისტენტები, რომლებმაც ისაუბრეს პროექტის ფარგლებში ჩატარებულ აქტივობებზე და მიღწეულ შედეგებზე.  

ფონდმა „სოხუმმა“ გამოაცხადა კონკურსი „ქალთა სოლიდარობის კვირეულის“ ფარგლებში დასავლეთ საქართველოს  6 რეგიონის პარტნიორ სკოლებისთვის.

კონკურსში მონაწილეობენ ქუთაისის, წყალტუბოს, ფოთის და კოკის საჯარო სკოლები - ატარებენ აქციებს, საინფორმაციო შეხვედრებს, ფორუმ-თეატრის ჩვენებებს, გამოფენებს...

კონკურსის მთავარი პირობაა, ღონისძიებები პასუხობდეს თემას და მონაწილეობა მიიღოს არანაკლებ 100-მა ადამიანმა.

არჩეულია ჟიური. გამარჯვებულები მიიღებენ დიპლომებს და საჩუქრებს.

ქალთა სოლიდარობის კვირეულისადმი მიძღვნილი მრგვალი მაგიდა ჩატარდა სენაკის საკრებულოში. მონაწილეთა შორის იყვნენ საკრებულოს წევრები და აპარატის თანამშრომლები.

შეხვედრის მონაწილეებმა მიიღეს ინფორმაცია ქალთა სოლიდაობის კვირეულთან და სენაკის ქალთა მხარდაჭერის ცენტრის მუშაობასთან დაკავშირებით. გაიმართა დისკუსია ქალთა როლის შესახებ გადაწყვეტილების მიღების პროცესში და ასევე ქალთა მიმართ ძალადობის პრევენციის კუთხით.