მონაწილეთათვის სასარგებლო შეხვედრა გაიმართა ქუთაისში კოლექტიურ ცენტრ „მთის ბროლში“ მცხოვრებ დევნილებთან.

იურისტმა მათ მიაწოდა ინფორმაცია ოჯახში ძალადობის შესახებ კანონისა და ოჯახში ქალთა უფლებების შესახებ. შეხვედრაზე გაიცა ინდივიდუალური კონსულტაცია მონაწილეთათვის საინტერესო კონკრეტულ საკითხებზე.

ქუთაისის ამომრჩეველ ქალთა კლუბის სხდომა განსხვავებული ფორმატით დაიწყო. რამდენიმეწლიანი თანამშრომლობის მქონე ქალბატონებს მიენიჭათ „კლუბის საპატიო წევრის“ წოდება და გადეცათ სიგელები.

ტელესიუჟეტისთვის მიცემულ ინტერვიუში ქალბატონებმა  აღნიშნეს, რომ კლუბში მათ ბევრი რამ ისწავლეს, განსაკუთრებით - პრიორიტეტების განსაზღვრა და პრობლემების ადვოკატირება.

სხდომაზე ქალბატონებმა განიხილეს ა(ა)იპი დასუთავების სამსახურის ხელმძღვანელის პასუხი წერილზე, რომლითაც წინა სხდომის შემდეგ მიმართეს.

შეხვედრა საინტერესო იყო იმითაც, რომ მოწვეული იყო მეან-გინეკოლოგი, რომელმაც შეკრებილების ყველა შეკითხვას გასცა პასუხი.

პროექტის „ახალგაზრდების პროფესიული ორიენტაციის განვითარების ხელშეწყობა წყალტუბოს რაიონში“ ფარგლებში ახალგაზრდებთან ჩატარდა ტრენინგი პროექტების წერის მეთოდოლოგიაზე.

ტრენინგის მიზანი იყო ახალგაზრდებში პროექტების წერის უნარ-ჩვევების განვითარება. ტრენინგი მონაწილეთა აქტიური ჩართულობის ფონზე მიმდინარეობდა. შედეგად - შემუშავდა სამი საპროექტო იდეა, რომელსაც ახალგაზრდები წარუდგენენ ადგილობრივ თვითმმართველობას და დონორ ორგანიზაციებს.

ტრენინგზე ახალგაზრდებს ესტუმრა წყალტუბოს გამგეობის კულტურისა და სპორტის განყოფილების ხელმძღვანელი, რომელმაც მათ მიაწოდა ინფორმაცია ადგილობრივი პროგრამების შესახებ.

ეთიკური ნორმები და პიროვნული კულტურის ფორმირება, როგორც ძალადობის პრევენციის ინსტრუმენტი - ამ აქტუალურ თემაზე ისაუბრეს ახალგაზრდული კლუბის წევრებმა ხონის მე-3 და სენაკის მე-4 სკოლაში და ქუთაისის  ქალთა მხარდაჭერის ცენტრში.

თემამ თავიდანვე გამოიწვია  ინტერესი. ცხოვრებისეულმა მაგალითებმა მეტი გულწრფელობა და გახსნილობა შემატა ახალგაზრდებს და ისინი აქტიურად ჩაერთნენ დისკუსიაში.

ახალგაზრდებმა აღნიშნეს:

„მსგავსი თემების განხილვა დადებითად მოქმედებს ჩვენს ცნობიერებაზე, დამოკიდებულებაზე სხვადასხვა საკითხის მიმართ“.

„მე მომწონს ეთიკის ნორმების დაცვა, რაც დაკავშირებულია ძალადობის  პრევენციასთან“.

„საინტერესო და მჭიდრო კავშირია ეთიკასა და ძალადობას შორის და კარგია, რომ ეს დავინახეთ“.

ახალგაზრდებთან ჩატარებულ ვორკშოპზე პიროვნული კონფლიქტების ანალიზი ფსიქოლოგიური ტესტით დაიწყო, რამაც საშუალება მისცა მონაწილეებს დაედგინათ, ხასიათის მიხედვით რომელ ტიპებს მიეკუთვნებიან და რა მახასიათებლებით გამოირჩევიან.

ამ დავალებას მოჰყვა ოჯახური სცენების იმიტაცია. მონაწილეებმა კარგად მოირგეს აგრესიული ქმრისა და მორჩილი ცოლის როლები, გაითვალისწინეს ხელშემწყობი გარემოებები და კონფლიქტების განვითარების დინამიკა ასახეს. წარმოდგენებში კარგად გამოჩნდა, რომ ოჯახში კონფლიქტების ესკალაცია ხშირად ადამიანის ხასიათზეა დამოკიდებული.

როგორ ვმართოთ კონფლიქტები, ისე რომ არ გავხდეთ არც მსხვერპლი და არც მოძალადე  - ამ საკითხზე ინტერაქტიული მუშაობა წარიმართა.

სხვადასხვა მოსაზრების დაფიქსირების შემდეგ საერთო შეფასებაც გაჩნდა: უნდა შეგვეძლოს კონფლიქტის ანალიზი, ემოციის მართვა, რათა სწორად ვიმოქმედოთ და სიტუაციის განეიტრალება შევძლოთ.

კოპიტნარის N8 საბავშვო ბაღში ამ დღეს ნამდვილი დღესასწაული იყო: მთლიანად შეიცვალა ინვენტარი - მაგიდები, სკამები, კარადები, შეივსო ბიბლიოთეკა ახალი წიგნებით.

აქცია ფონდმა „სოხუმმა“ განახორციელა პროექტის „გაუმჯობესებული პირობები დევნილთა თემისათვის“ ფარგლებში.

პროექტის თანახმად, ინვენტარი გადაეცა 3 საბავშვო ბაღს (წყალტუბოს N1, N2 და კოპიტნარის N8 საბავშვო ბაღები). ამ სკოლამდელი დაწესებულებების შერჩევა დევნილი ბავშვების რაოდენობის პრინციპით მოხდა. კოპიტნარის საბავშვო ბაღი 65 აღსაზრდელზეა გათვლილი, მათი უმეტესობა დევნილთა ოჯახიდანაა.

ღონისძიებას ესწრებოდნენ ადგილობრივი თვითმმართველობის წარმომადგენლები, საბავშვო ბაღების გაერთიანების ხელმძღვანელი პირები.

ქუთაისის ქალთა მხარდაჭერის ცენტრის ფსიქოლოგიური მუშაობა ინკლუზიურ ბენეფიციარებთან წარიმართა არტ-თერაპიითა და ასოციაციური ბარათებით.

სენაკისა და ხურჩის (ზუგდიდის მუნიციპალიტეტი) ქალთა მხარდაჭერის ცენტრებში კი გაიმართა ჯგუფური შეხვედრები და კონსულტაციები. შეხვედრების ძირითადი თემა იყო იმის გარკვევა, როგორ შევიცნოთ ფსიქოლოგიური პრესინგი და ძალადობა და არ გავხდეთ მსხვერპლი. ფსიქოლოგიური ძალადობის ერთ-ერთი მთავარი ნიშანია გამუდმებული კრიტიკა. როცა პარტნიორი მუდმივად აკრიტიკებს თქვენს გარეგნობას, ქცევებს, მანერებს, ხასიათს, ამის მიღმა რეალური კონფლიქტი იმალება. ჩუმი ძალადობა, ფიზიკური ძალის გამოყენების გარეშე, არ აძლევს მსხვერპლს  იმის შეგრძნებას, რომ რაღაც უნდა შეცვალოს... - სწორედ ამაზი იყო საუბარი შეხვედრებზე.

რა ტიპის საფრთხეები არსებობს საზოგადოებაში, რატომ არიან ქალები მაღალი რისკის ქვეშ, რა სახის პრევენციული ღონისძიებები შეიძლება გატარდეს  ადამიანური უსაფრთხოების ხარისხის ასამაღლებლად - ამ საკითხებზე გააკეთეს აქცენტი სტუმრებმა ტელეკომპანია „რიონის“ პირდაპირი ეთერში.

გადაცემას თან ახლდა სიუჟეტი, რესპონდენტები ხაზგასმით საუბრობენ, რომ მათთვის მნიშვნელოვანია უსაფრთხოების ხარისხთან დაკავშირებული ინფორმაციის გაგება.

ტელეგადაცემის მონაწილეებმა დააფიქსირეს, რომ უსაფრთხოების ხარისხის ამაღლება თითოეული ადამიანის თვითშეგნების ამაღლებით უნდა დაიწყოს და მას ადგილობრივი თვითმმართველობის პასუხისმგებლობა უნდა ერთვოდეს.  შესაბამისი ეფექტი მხოლოდ კოორდინირებული მუშაობით მიიღება. 

თერჯოლაში დასრულდა საბუღალტრო კურსის პირველი ეტაპი (დაფინანსებული ჩეხური ორგანიზაცია PIN-ის მიერ).

მონაწილეები დაეუფლნენ არსებული დოკუმენტების შენახვას და დაცვას, პირველადი საბუღალტრო დოკუმენტების შევსებას, წარმოებას და დამუშავებას.

კურსები ორ ჯგუფად ტარდება, თითო ჯგუფში 15 მონაწილეა. სწავლება თვის ბოლომდე გაგრძელდება.

წყალტუბოში აქტიურ ფაზაშია გადასული კომპიუტერისა და ჭრა-კერვის კურსები, რომელიც ხორციელდება პროექტის „ახალგაზრდების პროფესიული განვითარების ხელშეწყობა წყალტუბოში“ ფარგლებში.

პროექტის ამ კომპონენტს დიდი გამოხმაურება მოყვა ადგილობრივი მოსახლეობის მხრიდან, რადგან მსგავსი კურსები ფინანსური თვალსაზრისით ხელმისაწვდომი არ არის ყველასათვის. ამ ეტაპზე ჭრა-კერვის კურსზე ჩართულია 8 ახალგაზრდა ქალბატონი, ხოლო კომპიუტერულ კურსს 15 მსმენელი ჰყავს.