შეხვედრები (646)
შეხვედრები – ამ კატეგორიაში განთავსებულია ცნობები საინფორმაციო შეხვედრების შესახებ ფონდი „სოხუმის“ პროექტების ფარგლებში - შეხვედრები ბენეფიციარებთან, სახელმწიფო სტრუქტურების, ადგილობრივი და საერთაშორისო არასამთავრობო ორგანიზაციების წარმომადგენლებთან.
ხონის საკრებულოში პროექტის „სოციალური დაცვის საკითხებზე მომუშავე არასამთავრობო ორგანიზაციების ჩართულობის გაძლიერება სტრატეგიულ დიალოგში საქართველოში“ ფარგლებში მრჩეველთა საბჭოს კიდევ ერთი გაფართოებული სხდომა გაიმართა.
ხონის სოციალური სამსახურის უფროსმა ლეილა კინწურაშვილმა სოციალურ სფეროში მიმდინარე სიახლეების და ცვლილებების პრეზენტაცია გააკეთა. მრჩეველთა საბჭოს წევრებს ხონის სოციალური ბიუჯეტის მონიტორინგის ანგარიშის შუალედური შედეგები გააცნო ფონდი „სოხუმის“ მხრიდან მონიტორინგზე პასუხისმგებელმა პირმა ემა კამკიამ. ინფორმაცია ორგანიზაცია PIN-ის მიერ დაფინანსებული პროექტების მიმდინარეობის შესახებ გააკეთეს პროექტების კოორდინატორებმა.
აღსანიშნავია, რომ საბჭოს სამი ახალი წევრი შეემატა, რომელთაც სხვა წევრებმა უპირობოდ გამოუცხადეს ნდობა და გამოთქვეს რწმენა, რომ მათი გამოცდილება დიდად წაადგება თავის საქმიანობაში მრჩეველთა საბჭოს.
მაისში, როგორც ყოველთვის, 33 საინფორმაციო-სამობილიზაციო შეხვედრა ჩაატარეს ფონდი „სოხუმის“ ქალთა მხარდაჭერის ცენტრების მობილიზატორებმა ქუთაისის, წყალტუბოს, ხონის, სენაკის, ფოთის და ზუგდიდის მუნიციპალიტეტებში.
სხვადასხვა აქტუალურ თემასთან ერთად, მონაწილეები გაეცნენ „ოჯახში ძალადობის აღკვეთის, ოჯახში ძალადობის მსხვერპლთა დაცვისა და დახმარების შესახებ" კანონის მონიტორინგის ფარგლებში ჩატარებული შეხვედრების ანგარიშს. ამასთანავე იმსჯელეს ინფრასტრუქტურულ საკითხებზე.
ქუთაისის ქალთა საინიციატივო ჯგუფმა საინტერესო საინფორმაციო შეხვედრა მოაწყო ქალაქის მე-17 ბიბლიოთეკაში. შეხვედრა მიზნად ისახავდა თანამშრომლობას ადგილობრივ ხელისუფლებასთან პრობლემათა ადვოკატირებისთვის.
შეხვედრაზე მოწვეულნი იყვნენ ქალაქ ქუთაისის მუნიციპალიტეტის მერიის საბინაო ინფრასტრუქტურის მართვის და განვითარების სამსახურის უფროსი - ვლადიმერ ნაკაშიძე და ამავე სამსახურის მთავარი სპეციალისტი ლევან ბათიაშვილი.
დისკუსია აქტიურად წარიმართა. მონაწილეებმა სხვადასხვა პრობლემა წამოჭრეს. მოისმინეს კომპეტენტური ინფორმაცია და იმ პროგრამებს გაეცნენ, რომელთაც ადგილობრივი ხელისუფლება ინფრასტრუქტურული მიმართულებით ახორციელებს.
23 მაისს წყალტუბოს მუნიციპალიტეტის სხდომათა დარბაზში ქალთა საინიციატივო ჯგუფის ორგანიზებით საინფორმაციო შეხვედრა გაიმართა. შეხვედრას ესწრებოდნენ სხვადასხვა კოლექტიური ცენტრის წარმომადგენლები, ფონდი „სოხუმის“ აქტივისტები.
შეხვედრაზე მოწვეული იყო წყალტუბოს მუნიციპალიტეტის გამგეობის ჯანმრთელობისა და სოციალური დაცვის სამსახურის მთავარი სპეციალისტი ნარგიზა აბესაძე, რომელმაც ადგილობრივ სოციალურ პროგრამებზე ისაუბრა.
მონაწილეთა მხრიდან არაერთი შეკითხვა დაისვა, როგორ იგეგმება ბიუჯეტში პროგრამები, რომელია პრიორიტეტული, როგორ ხდება მოქალაქეთა ინფორმირება ამ პროგრამებზე.
აღინიშნა, რომ მსგავსი ტიპის საინფორმაციო შეხვედრები მომდევნო თვეებშიც დაიგეგმოს, რაც გაზრდის კომუნიკაციის ხარისხს მოსახლეობასა და ადგილობრივ ხელისუფლებას შორის.
ამ ბოლო ხანებში დევნილთა შემწეობის რეფორმა განხილვის საგნად იქცა. სწორედ ამ თემას მიეძღვნა ფოკუს-ჯგუფი, რომელიც 17 მაისს ჩატარდა ხონში დევნილ ქალებთან. მონაწილეებმა გამოხატეს თავიანთი დამოკიდებულება რეფორმის მიმართ. აღნიშნეს, რომ რეფორმები ხელს უნდა უწყობდეს დევნილთა მეტ მხარდაჭერას, მათ განვითარებას და სოციალურ-ეკონომიკური პირობების გაუმჯობესებას და არა პირიქით.
შეხვედრა ჩატარდა ორგანიზაცია PIN-ის პროექტის „სოციალური დაცვის საკითხებზე მომუშავე არასამთავრობო ორგანიზაციების ჩართულობის გაძლიერება სტრატეგიულ დიალოგში საქართველოში“ ფარგლებში. დაფინანსებულია ევროკავშირის და ჩეხეთის საგარეო საქმეთა სამინისტროს მიერ.
ხონის მთავარ ბიბლიოთეკაში ქალთა საინიციატივო ჯგუფის ორგანიზებით საინფორმაციო შეხვედრა გაიმართა. შეხვედრას ესწრებოდნენ საზოგადოების სხვადასხვა სპექტრის წარმომადგენლები. მოწვეულნი იყვნენ ხონის მუნიციპალიტეტის გამგეობის წარმომადგენლები: ინფრასტრუქტურის სამსახურის განყოფილების უფროსი მაყვალა ბახტაძე და სოციალური სამსახურის უფროსი ლეილა კინწურაშვილი.
მონაწილეებმა მოისმინეს ინფორმაციები, რა პროგრამები არსებობს ხონის მუნიციპალიტეტში, რა სახის სამუშაოები შესრულდა და რა იგეგმება.
თვითმმართველობის წარმომადგენლებთან შეხვედრა მოსახლეობის ინფორმირებას ისახავდა მიზნად.
11 მაისს სენაკის მუნიციპალიტეტში, ფონდი „სოხუმის“ მიერ განხორციელებული ოჯახში ძალადობის კანონის მონიტორინგის ფარგლებში ჩატარდა ჩაღრმავებული ინტერვიუ გამგეობის სოციალური სამსახურის ხელმძღვანელთან და ფოკუს-ჯგუფი ადგილობრივი თვითმმართველობის წარმომადგენლებთან.
ხონის დევნილთა დასახლებაში ჩატარდა ფოკუს-ჯგუფი დევნილი ახალგაზრდების მონაწილეობით. შეხვედრის თემა იყო დევნილთა შემწეობის რეფორმა. მონაწილეებმა გამოხატეს თავიანთი დამოკიდებულება რეფორმის მიმართ, დააფიქსირეს რეფორმის უარყოფითი შედეგები და აღნიშნეს საჭიროებათა კვლევის აუცილებლობა.
პროექტი ხორციელდება ჩეხური ორგანიზაცია „ადამიანი გაჭირვებაში“ მხარდაჭერით
ოჯახში ძალადობის აღმოფხვრის, ოჯახში ძალადობის მსხვერპლთა დაცვისა და დახმარების შესახებ საქართველოს კანონის იმპლემენტაციის მონიტორინგის ჯგუფმა 3 მაისს ზუგდიდის მუნიციპალიტეტში ჩაატარა ფოკუს-ჯგუფი ქალაქის მერიის წარმომადგენლებთან და ჩაღრმავებული ინტერვიუ გამგეობის სოციალური სამსახურის ხელმძღვანელთან.
ამ შეხვედრების მიზანია თვითმმართველობის მუშაობის შედეგების გამოვლენა ძალადობის მსხვერპლთა დაცვის კუთხით. გამოიკვეთა ფაქტორებ, რომლებიც ხელს უშლის ძალადობის პრევენციის პროცესს.
ქალთა მხარდაჭერის ცენტრის მობილიზატორებმა თვის განმავლობაში ტრადიციული საინფორმაციო შეხვედრები ჩაატარეს ადგილობრივი თვითმმართველობის წარმომადგენლებთან ქუთაისის, ხონის, წყალტუბოს, სენაკის, ფოთის და ზუგდიდის მუნიციპალიტეტებში. ისინი ასევე შეხვდნენ სოფლის ტერიტორიული ერთეულების წარმომადგენლებს, ჯანდაცვის და სოციალური სამსახურის თანამშრომლებს. შეხვედრების მიზანია, სამთავრობო სტრუქტურების წარმომადგენლებმა გაიგონ სიახლეები ფონდის მუშაობაში და ერთმანეთთან თანამშრომლობის შედეგად მოგვარდეს ადგილობრივი პრობლემები.