შეხვედრები (646)
შეხვედრები – ამ კატეგორიაში განთავსებულია ცნობები საინფორმაციო შეხვედრების შესახებ ფონდი „სოხუმის“ პროექტების ფარგლებში - შეხვედრები ბენეფიციარებთან, სახელმწიფო სტრუქტურების, ადგილობრივი და საერთაშორისო არასამთავრობო ორგანიზაციების წარმომადგენლებთან.
ფონდი „სოხუმის“ წარმომადგენლებმა მონაწილეობა მიიღეს ძალადობისგან დაცვის ეროვნული ქსელის მიერ თბილისში ორგანიზებულ შეხვედრაზე.
ძალადობისგან დაცვის ეროვნულმა ქსელმა საქართველოს საკანონმდებლო და აღმასრულებელი ხელისუფლების წარმომადგენლებს ოჯახში ძალადობის აღმოსაფხვრელად კანონმდებლობაში შესატანი ცვლილებები წარუდგინა.
კანონპროექტების მიზანია ოჯახში ძალადობის წინააღმდეგ გასატარებელ ღონისძიებებში ადგილობრივი თვითმმართველობის ორგანოების ჩართულობა და საკითხის საკანონმდებლო მოწესრიგება.
აღინიშნა, რომ ოჯახური ძალადობის მსხვერპლთა დაცვა უმნიშვნელოვანესია და ეს სახელმწიფოს პრიორიტეტად არის გამოცხადებული. ამის შესაბამისად, ადგილებზე აუცილებელია თავშესაფრების და კრიზისული ცენტრების გახსნა.
11 ნოემბერს ხონის კოლექტიურ ცენტრში მცხოვრებ ერთ ოჯახს ბევრი სტუმარი ეწვია - ფონდი „სოხუმის“, ხონის დევნილთა საინიციატივო ჯგუფის და ორგანიზაცია „კარიტასის“ წარმომადგენლები.
ამ ოჯახის დიასახლისი ძალადობის მსხვერპლია, მაგრამ თავის ორ შვილთან ერთად უკვე უსაფრთხოდ იმყოფება დევნილთა კოლექტიურ ცენტრში.
ამ ოჯახის პრობლემები ხონის ქალთა მხარდაჭერის ცენტრის ინიციატივით დაადგილობრივ თვითმმართველობასთან აქტიური თანამშრომლობით თანდათან გვარდება. ამ დღეს მათ გადაეცათ პირველადი მოხმარების ნივთები, სურსათი, ტანსაცმელი.
ბავშვები უკვე ჩაერთნენ ფონდის ახალგაზრდულ აქტივობებში, ქალბატონი კი მიიღებს ფსიქოლოგიურ დახმარებას. მხარდაჭერა მომავალშიც გაგრძელდება.
პროექტი ხორციელდება ორგანიზაცია Brot für die Welt – Evangelischer
Entwicklunsdienst მხარდაჭერით (გერმანია)
გენდერული საკონსულტაციო საბჭოს რეკომენდაციების დიდი ნაწილი აისახება ქუთაისის ახალ ბიუჯეტში, ადგილობრივ თვითმმართველობაში უკვე დაინიშნა მრჩეველი გენდერულ საკითხებში - ამ და სხვა სიახლეებს გაეცნენ ფონდ „სოხუმში“ შეკრებილი ჟურნალისტები.
ქუთაისის მედიის წარმომადგენლებმა აღნიშნეს, რომ ფონდთან თანამშრომლობის შედეგად მათ სიუჟეტებსა და პუბლიკაციებში უფრო მეტად შუქდება გენდერული თემები, აქტუალური პრობლემები, წარმატებულ ქალთა ისტორიები. მათ ერთმანეთს გაუზიარეს თავიანთი გამოცდილება ამ კუთხით.
პროექტი ხორციელდება გაეროს ქალთა ორგანიზაციის
გენდერული თანასწორობის ფონდის მხარდაჭერით
შეხვედრის თარიღი: 2015 წლის 10-13 ნოემბერი
შეხვედრის ადგილი: თელ-ავივი, სასტუმრო „სინეთი“
შეხვედრის მონაწილეები: 7-7 ქალი ორივე მხრიდან
შეხვედრის მიზანი: ისრაელის ქალთა ორგანიზაციების გამოცდილების გაცნობა - როგორ შევცვალოთ კონფლიქტის თანამდევი რეალობა: სიძულვილი და მტრობა და შევქმნათ ალტერნატივა, რომელიც რეგიონში მშვიდობის დამყარების იმედს იძლევა.
გაიმართა შეხვედრა ისრაელის ქალ-აქტივისტებთან, რომლებიც გაერთიანდნენ ქალთა მოძრაობაში მშვიდობისა და კონფლიქტის პრევენციისათვის: ასია ისტოშინა, ესტერ რაპოპორტი და ლანა ზიბერმანი.
შეხვედრის მონაწილეები შეეხნენ შემდეგ საკითხებს: ძალადობა, დაუცველობის შეგრძნება, საომარი მოქმედებების განახლების და ტერაქტების შიში, მაგრამ ამავე დროს, მზადყოფნა - მთელი ძალისხმევა გააერთიანონ ოკუპაციის შეწყვეტისა და მდგრადი მშვიდობისათვის.
ჰაიფაში ქართულ-აფხაზური ჯგუფის წევრები შეხვდნენ აფხაზეთის ყოფილ მცხოვრებლებს. ეს იყო შესაძლებლობა, პრობლემისთვის მათი თვალით შეეხედათ.
შეხვედრა სასარგებლო იყო გამოცდილების მიღების კუთხით - ისრაელელ ქალთა მიდგომა, მეთოდები და მოტივაცია, გააერთიანონ სამოქალაქო საზოგადოება ყვეყნის მშვიდობიანი მომავლისათვის.
პროექტი ხორციელდება შვეიცარიის საგარეო საქმეთა ფედერალური დეპარტამენტის მხარდაჭერით
ჩეხეთის არასამთავრობო ორგანიზაცია „დამოუკიდებელი სოციალურ-ეკოლოგიური მოძრაობა“ ფონდი „სოხუმის“ საქმიანობის ერთ-ერთი აქტიური მხარდამჭერია. მისი დახმარებით ფონდმა არაერთი პროექტი განახორციელა. მოეწყო თანამშრომლების ვიზიტი ჩეხეთსა და ევროპის სხვა ქვეყნებში, სტაჟირების პროგრამები არასამთავრობო სექტორში.
ამ ორგანიზაციის მხარდაჭერით ახლახან დასრულდა პროექტი „ადგილობრივი ხელისუფლების პოლიტიკის შეცვლა გენდერულ ბიუჯეტირებასთან მიმართებაში“.
10 ნოემბერს ფონდ „სოხუმში“ ჩამობრძანდნენ ორგანიზაციის ხელმძღვანელები იარომირ ნემეცი, ირენა მარკოვა და მილან შტეფანეცი.
შეხვედრაზე შეჯამდა პროექტის ფარგლებში მიმდინარე აქტივობები. იყო საუბარი ადგილობრივ თვითმმართველობასთან თანამშრომლობაზე და სამომავლო გეგმებზე.
პროექტი ხორციელდება ჩეხეთის არასამთავრობო ორგანიზაცია
„დამოუკიდებელი სოციალურ-ეკოლოგიური მოძრაობის“ მხარდაჭერით
ბათუმის ხელოვნების სასწავლო უნივერსიტეტის საკონფერენციო დარბაზში საზოგადოებრივი განვითარების აკადემიამ გამართა პროექტის „სკოლამდელი განათლების სერვისის ხელშეწყობის“ პრეზენტაცია. პროექტი დაფინანსებულია ფონდი „სოხუმისა“ და ბათუმის მერიის მიერ და ემსახურება აღსაზრდელების მშობლებთან საბავშვო ბაღების თანამშრომელთა მუშაობის გაძლიერებას, ფსიქოლოგიური, სანიტარული და სხვა საკითხების გადაწყვეტას, აღსაზრდელთა შემოქმედებითი უნარების და გარემოსადმი ჯანსაღი დამოკიდებულების განვითარებას.
პროექტის ფარგლებში ჩატარდება ტრენინგები, სემინარები, საკონსულტაციო შეხვედრები. მოეწყობა „ეკო კუთხე“ და ფუნქციონირებას დაიწყებს მშობელთა კლუბი, რომელიც ხელს შეუწყობს მშობელთა მაქსიმალურ ჩართულობას სკოლამდელი განათლების პროცესში.
პრეზენტაციის ფარგლებში გაფორმდა სამმხრივი მემორანდუმი საზოგადოებრივი განვითარების აკადემიას, ბათუმის ბაღების გაერთიანებასა და ბათუმის გენდერულ საკონსულტაციო საბჭოს შორის, რომლის მიზანიცაა თანამშრომლობა განათლების სფეროში მიმდინარე რეფორმების წარმატებით განხორციელებაში, განსაკუთრებით, სკოლამდელი და არაფორმალური განათლების სფეროში.
პროექტს დადებითი შეფასება მისცეს ბათუმის სკოლამდელი დაწესებულებების ხელძღვანელებმა.
ფონდ „სოხუმში“ დაიწყო სამზადისი 16-დღიანი კამპანიისთვის ქალთა მიმართ ძალადობის წინააღმდეგ.
4 ნოემბერს გაიმართა გაფართოებული კრება, რომელსაც ესწრებოდნენ პროექტის „ქალთა უფლებების გაძლიერება დასავლეთ საქართველოში“ ხელმძღვანელები, ასისტენტები, იურისტები, ფსიქოლოგები და ქუთაისის, ხონის, წყალტუბოს, სენაკის, ფოთის, ხურჩა/კოკის (ზუგდიდის მუნიციპალიტეტი) ქალთა მხარდაჭერის ცენტრების მობილიზატორები.
შეკრებილებმა განიხილეს კამპანიის ჩატარების გეგმა, აქტივობები, შეიტანეს შესწორებები, გამოთქვეს იდეები და ინიციატივები.
გეგმის მიხედვით, გაწერილია 100-ზე მეტი ღონისძიება, რომელშიც მონაწილეობს ფონდი „სოხუმის“ ყველა რგოლი.
ერთიანი ძალისხმევით, დასავლეთ საქართველოს მასშტაბით კიდევ ერთხელ ჩატარდება მძლავრი საინფორმაციო კამპანია ძალადობის პრევენციისა და მსხვერპლის დაცვის მიზნით.
პროექტი ხორციელდება ორგანიზაცია Brot für die Welt – Evangelischer
Entwicklunsdienst მხარდაჭერით (გერმანია)
ქ. ბათუმის N2 სკოლაში პროექტის „ბათუმის ახალგაზრდები არაძალადობრივი საზოგადოებისათვის“ ფარგლებში გაიმართა ახალგაზრდული სამოქალაქო ფორუმი. პროექტს ახორციელებდა ბათუმის გენდერულ საკონსულტაციო საბჭოსთან არსებული გაერთიანება „სამოქალაქო ინიციატივების ჯგუფი“ ბათუმის მერიისა და ფონდი „სოხუმის“ მხარდაჭერით.
ფორუმს ესწრებოდნენ ბათუმის სკოლების მოსწავლეები, პედაგოგ-მასწავლებლები, თვითმმართველობის, გენდერული საბჭოს, ადგილობრივი საზოგადოების წარმომადგენლები. ბათუმის 6 სკოლაში დაფუძნებულმა ახალგაზრდულმა ფორუმ-თეატრებმა პრობლემაზე რეაგირებისათვის მაყურებელს შესთავაზეს ხელოვნების ინოვაციური მეთოდი, რომლითაც ხდება რიგითი მოქალაქეების, განსაკუთრებით ახალგაზრდების ჩართვა პრობლემის მიზეზების, მისი გადაწყვეტის გზების ძიებაში. სკოლების მიერ მომზადებული ფორუმ-თეატრის წარმოდგენების შემდეგ გაიმართა დისკუსია, ჩამოყალიბდა წინადადებები და რეკომენდაციები ძალადობის პრევენციის, ჯანსაღი ცხოვრების წესის ხელშეწყობის მიმართულებით. ჯგუფური სამუშაოების დროს ახალგაზრდებმა განსაკუთრებით ხაზი გაუსვეს სოციალური ტოლერანტობის და ბულინგის პრობლემას. ასევე აღინიშნა აჭარის მაღალმთიან სოფლებში ძალადობის პრობლემაზე ინფორმირების კუთხით მუშაობის აუცილებლობა.
პროექტი ხელს შეუწყობს ძალადობის პრობლემის სწორ გააზრებას, მის მიმართ შეურიგებლობას, საზოგადოების გაერთიანებას ძალადობის პრევენციისა და მსხვერპლის დახმარებისათვის.
სასტუმრო „ხვამლის“ კოლექტიურ ცენტრში დევნილები რთულ და გაურკვეველ მდგომარეობაში ცხოვრობენ. ფონდი „სოხუმის“ წარმომადგენლებთან ერთად ისინი ცდილობენ თავიანთი პრობლემების ადვოკატირებას. გააგზავნეს წერილი ლტოლვილთა და განსახლების სამინისტროში, მაგრამ პასუხი ჯერაც არ მიუღიათ.
3 ნოემბერს ჩატარებულ საინფორმაციო შეხვედრაზე განცხადება თავიდან დაიწერა. კოლექტიურ ცენტრში მცხოვრები ოჯახები განცხადებას ხელს მოაწერენ და სამინისტროსგან ოფიციალურ პასუხს დაელოდებიან.
პროექტი ხორციელდება გაეროს ქალთა ორგანიზაციის
გენდერული თანასწორობის ფონდის მხარდაჭერით
2 ნოემბერს ჰააგაში, ნიდერლანდებში, გაიმართა WAVE-ის (ევროპელი ქალები ქალთა მიმართ ძალადობის წინააღმდეგ) ქსელის მე-17 კონფერენცია - „ქალების ერთიანი ძალა - ძალადობის შესაჩერებლად!“
ქსელი შედგება 92 წევრისგან - ევროპის ქვეყნების ქალთა ორგანიზაციები და ქსელები. კონფერენციაში მონაწილეობდნენ ორგანიზაციები 50 ქვეყნიდან. საქართველოს წარმოადგენდა ფონდი „სოხუმი“.
გაეროს სპეციალური მომხსენებელი ქალთა მიმართ ძალადობასთან დაკავშირებულ საკითხებზე დუბრავკა სიმონოვიჩი შეეხო ძალადობის მიზეზებსა და შედეგებს, ქალების დაცვის საერთაშორისო მექანიზმებს, მათ შორის - კონვენციას ქალთა მიმართ ყველა ფორმის დისკრიმინაციის ლიკვიდაციის შესახებ და სტამბულის კონვენციას.
წარმოდგენილი იყო მოკლე პრეზენტაციები რამდენიმე ორგანიზაციის მუშაობის შესახებ. გაიმართა დისკუსიები და ვორკშოპები, რის შემდეგაც შემუშავდა რეკომენდაციები. კონფერენციის მეორე ნაწილი მიეძღვნა საერთო კრებას, ქსელი წარსდგა ფინანსური ანგარიშით და ჩატარდა გამგეობის არჩევნები მომდევნო ორი წლით. ამას გარდა, მოხდა კორინა სეიფის სახელობის ჯილდოს მინიჭება - ეს არის არაჩვეულებრივი ქალი, ფემინისტი, ქალთა მიმართ ძალადობისა და გენდერთან დაკავშირებული საკითხების მკვლევარი.