ეს ფოთის თვითდახმარების ჯგუფია - „ერთიანობის ხაზინა“. ჯგუფის მაღალი აქტიურობისა და თანმიმდევრული მუშაობის შედეგად დევნილთა დასახლებაში განხორციელდა თვალსაჩინო ცვლილებები:
- გაუმჯობესდა სადარბაზოების კოსმეტიკურ-ჰიგიენური მდგომარეობა.
- მოგვარდა სარდაფებში წყლის დაგროვების პრობლემა, რომელიც რეალურ საფრთხეს უქმნიდა შენობების საძირკველს - ჯგუფმა სამოქალაქო ინიციატივის ფარგლებში შეიძინა წყლის ამოსატუმბი მოწყობილობა.
- ქუჩების შემოსასვლელებთან განთავსდა აბრები, რის შედეგადაც გაგრისა და აფხაზეთის ქუჩების მოძიება გამარტივდა.
- საერთო სივრცეებში დაიდგა ძელსკამები.
- მოეწყო შეხვედრების ადგილი, რაც კომუნიკაციისა დამატებით შესაძლებლობად იქცა.
თანდათან გაიზარდა თემის კმაყოფილების და მადლიერების განცდა. პროექტის შეფასების პროცესში მონაწილეებმა ხაზგასმით აღნიშნეს როგორც პიროვნული გაძლიერება, ისე თემის პოზიტიური ტრანსფორმაცია. მუშაობამ კიდევ უფრო მეტ ქალს გაუჩინა ჩართულობის მოტივაცია და იქცა ერთიანობის, გააქტიურებისა და ახალი უნარ-ჩვევების განვითარების მნიშვნელოვან პლატფორმად.
თვითდახმარების ჯგუფის წევრები გულღიად საუბრობენ პროექტის ფარგლებში განვლილ გზაზე და გამოთქვამენ იმედს, რომ მხარდაჭერა მომავალშიც გაგრძელდება, რადგან დევნილთა თემში არსებობს საჭიროება - გააქტიურდეს მეტი ქალი და უფრო მეტ ადამიანს მიეცეს სამოქალაქო პასუხისმგებლობის ზრდ- განვითარების შესაძლებლობა.
პროექტს ახორციელებს არასამთავრობო ორგანიზაციების კოალიცია: იგპ ქალთა ასოციაცია „თანხმობა“, ქალთა საინფორმაციო ცენტრი და საქველმოქმედო ჰუმანიტარული ქალთა ფონდი „სოხუმი“.
ზუმის პლატფორმაზე შეიკრიბნენ ქალები 10 მუნიციპალიტეტიდან. მათთვის მოეწყო შეხვედრააქტუალურ თემებზე.
პირველ ნაწილში მიგრაციის საერთაშორისო ორგანიზაციის (IOM) ქუთაისის ფილიალის წარმომადგენელმა ნათია ახალაიამ ისაუბრა ლეგალურ და არალეგალურ მიგრაციაზე, სტატისტიკაზე, საქართველოში დაბრუნებისას ინდივიდუალურ მომსახურებაზე, დაბრუნებული მიგრანტების მხარდაჭერაზე, საგრანტო პროექტებზე...
მეორე ნაწილში პრეზენტაციით წარსდგა ლინდა ჩიხლაძე - ტრენერი ციფრული უსაფრთხოების საკითხებში. მან შეხვედრის მონაწილეებს გააცნო ციფრული უსაფრთხოების მნიშვნელოვანი ასპექტები, გავრცელებული საფრთხეები, საუკეთესო პრაქტიკები და დაცვის ინსტრუმენტები.
შეკრებილებს ორივე თემასთან დაკავშირებით ჰქონდათ შეკითხვები და მიიღეს კომპეტენტური პასუხები.
პროექტი ხორციელდება ორგანიზაცია Brot für die Welt - Evangelischer
Entwicklungsdienst მხარდაჭერით (გერმანია)
ხელსაქმეს უძველესი ტრადიცია აქვს საქართველოში. ქალებმა იცოდნენ კერვა, ქსოვა, ქარგვა და მზითევსაც თვითონ იმზადებდნენ. დღესაც საკმაოდ ბევრს აინტერესებს ხელსაქმე.
ჩვენმა ორგანიზაციამ ქალების თხოვნით რამდენიმე მუნიციპალიტეტში გახსნა ჭრა-კერვის კურსები, არაერთმა ქალმა დახვეწა თავისი უნარები და საკუთარი მცირე ბიზნესიც კი წამოიწყო.
ახლა ხურჩის (ზუგდიდის მუნიციპალიტეტი) ქალთა მხარდაჭერის ცენტრის ჯერი დადგა. უკვე ჩავიტანეთ საკერავი მანქანები, კერვისთვის საჭირო მასალები. ორი თვის განმავლობაში ქალები ბევრ რამეს ისწავლიან პედაგოგთან ერთად, რომელიც მონდომებით შეუდგა საქმეს.
პროექტი ხორციელდება ორგანიზაცია Brot für die Welt - Evangelischer
Entwicklungsdienst მხარდაჭერით (გერმანია)
მიგრაცია სერიოზული და საკმაოდ აქტუალური თემაა. განსაკუთრებით ემოციურია საზღვარგარეთ წასული მშობლების და შინ დარჩენილი შვილების ურთიერთობა.
ეს საკითხები არავის ტოვებს გულგრილს: უამრავი მაგალითია, საკუთარი ოჯახის თუ ახლობელ-მეზობლების.
ასე იყო კოპიტნარის დევნილთა დასახლებაში ქალებთან და გოგონებთან ჩატარებულ შეხვედრაზეც. მით უმეტეს, რომ შეხვედრაზე იმყოფებოდა ჩვენი ორგანიზაციის ფსიქოლოგი. იყო ბევრი შეკითხვა, სხვადასხვა ისტორიის გახსენება, ფსიქოლოგის რჩევები...
პროექტი ხორციელდება ორგანიზაცია Brot für die Welt - Evangelischer
Entwicklungsdienst მხარდაჭერით (გერმანია)
ქალთა მხარდაჭერის ცენტრებში აქტიურად გრძელდება საინფორმაციო შეხვედრები, რომელთა მიზანია: საზოგადოების ცნობიერების ამაღლება, ინფორმირებული მოქალაქეების რიცხვის ზრდა, ოჯახში ძალადობის პრევენციას და ძალადობის მსხვერპლთა მხარდაჭერა და დაცვა.
შეხვედრებში მონაწილეობენ საბავშვო ბაღების პედაგოგები, სკოლის მასწავლებლები, მშობლები და თემის აქტიური წარმომადგენლები. ეს მრავალფეროვანი ჩართულობა ხელს უწყობს გამოცდილების გაზიარებას და შემთხვევათა იდენტიფიცირების პროცესს.
მონაწილეების თქმით, ოჯახში ძალადობა სერიოზულ სოციალურ გამოწვევად რჩება. აღინიშნა, რომ გაჩნდა ახალი საფრთხე, რომელიც ონლაინტექნოლოგების გამოყენებით ხორციელდება ქალებზე. მათი შეფასებით, განსაკუთრებით მნიშვნელოვანია ინფორმაციის ხელმისაწვდომობა იმ სერვისებსა და პროგრამებზე, რომლებიც ძალადობის მსხვერპლთა დახმარებას და დაცვას უზრუნველყოფს.
ქალთა მხარდაჭერის ცენტრები მომავალშიც გააგრძელებენ მსგავს საინფორმაციო აქტივობებს, რათა ყველას მოქალაქეს ჰქონდეს ცოდნა, მხარდაჭერა და უსაფრთხოების განცდა.
მონაწილეთა განწყობა უკუკავშირში აისახა:
„ოჯახში ძალადობა ახალი ფორმებით ვლინდება, ახალი საფრხეები გაჩნდა. ამიტომ ადრეულად, სანამ შეიძლება პრობლემის მართვა, უნდა დავეხმაროთ ქალებს.“
პროექტი ხორციელდება ორგანიზაცია Brot für die Welt - Evangelischer
Entwicklungsdienst მხარდაჭერით (გერმანია)
ხონში გამართულ საინფორმაციო შეხვედრაზე მონაწილეებმა ფსიქოლოგთან ერთად იმსჯელეს თვითშეფასების ამაღლების, სტრესის მართვისა და საკუთარ თავზე მუშაობის მნიშვნელობაზე. შეხვედრა ინტერაქტიულ ფორმატში წარიმართა და მოიცავდა როგორც თეორიულ ნაწილს, ისე პრაქტიკულ სავარჯიშოებს. სავარჯიშოებმა ხელი შეუწყო საკუთარი ძლიერი მხარეების აღმოჩენას და პირადი რესურსების გააზრებას.
„ასეთი ტიპის ტესტები და პრაქტიკული დავალებები გვეხმარება, უფრო ნათლად დავინახოთ ჩვენი შესაძლებლობები და გავაანალიზოთ, როგორ შეგვიძლია პრობლემებთან გამკლავება.“
„სტრესის მართვის ტექნიკები, რომლებიც შევისწავლეთ, რეალურად გამოსადეგია ყოველდღიურ ცხოვრებაში. მნიშვნელოვანია, ვიცოდეთ როგორ ვიზრუნოთ საკუთარ ემოციურ მდგომარეობაზე.“
საინფორმაციო შეხვედრები გაიმართა ასევე ზუგდიდის, ჩოხატაურის, ხობის ქალთა მხარდაჭერის ცენტრებში. შეხვედრების ერთ-ერთ მთავარ თემას ძალადობის ფორმების განხილვა წარმოადგენდა. განსაკუთრებული ინტერესი გამოიწვია ციფრული ძალადობის საკითხმა.
მონაწილეთა შეფასებით, „დღეს ძალადობის ფორმები უფრო მრავალფეროვანი გახდა, რადგან ონლაინ სივრცე ახალ რისკებს ქმნის.“ მათ აღნიშნეს, რომ მნიშვნელოვანია საზოგადოების ინფორმირებულობის ზრდა და ციფრულ გარემოში უსაფრთხოების წესების ცოდნა.
ქალთა მხარდაჭერის ცენტრებში მსგავსი საინფორმაციო შეხვედრები მიზნად ისახავს ქალთა გაძლიერებას, მათი ცნობიერების ამაღლებას და პრაქტიკული ინსტრუმენტების მიწოდებას, რაც ხელს შეუწყობს ყოველდღიურ ცხოვრებაში ძალადობის რისკების შემცირებას.
პროექტი ხორციელდება ორგანიზაცია Brot für die Welt - Evangelischer
Entwicklungsdienst მხარდაჭერით (გერმანია)
ქალთა ფონდი „სოხუმის“ ორგანიზებით Zoom პლატფორმის საშუალებით ჩატარდა ონლაინ ვორქშოპი ჩოხატაურისა და ვანის მუნიციპალიტეტების ახალგაზრდულ ჯგუფთან.
შეხვედრა მიეძღვნა ტექნოლოგიებით ჩადენილ ძალადობასა და ციფრულ უსაფრთხოებას. მონაწილეებმა მიიღეს პრაქტიკული ცოდნა პირადი მონაცემების დაცვაზე, ანგარიშების უსაფრთხოებაზე, კიბერჰიგიენასა და ონლაინ ძალადობის ამოცნობასა და რეაგირებაზე.
ვორქშოპს უძღვებოდნენ ფონდი „სოხუმის“ წარმომადგენლები ნინო ჭაბუკიანი და ლალი შენგელია. შეხვედრამ კიდევ ერთხელ გამოკვეთა, რომ ციფრული უსაფრთხოების ცოდნა და ღია დიალოგი ძალადობის პრევენციის მნიშვნელოვანი საფუძველია ახალგაზრდებში.
პროექტი ხორციელდება WAVE Network-ის მხარდაჭერით
2026 წლის 12 თებერვალს ქალთა ფონდი „სოხუმის“ ორგანიზებით, Zoom პლატფორმის საშუალებით, ონლაინ შეხვედრა ჩატარდა ხონისა და სენაკის მუნიციპალიტეტების ქალთა ჯგუფებთან.
შეხვედრის მთავარი თემა იყო ტექნოლოგიების გამოყენებით ჩადენილი ძალადობა და ციფრულ სივრცეში კონტროლისა და ზეწოლის ფორმები პარტნიორულ ურთიერთობებში. მონაწილეებმა ისაუბრეს ონლაინ გარემოში არსებულ გამოწვევებზე და იმ ზიანზე, რომელიც ხშირად შეუმჩნეველი რჩება.
განსაკუთრებული ყურადღება დაეთმო პრაქტიკულ საკითხებს — პირადი მონაცემების დაცვას, ანგარიშების უსაფრთხოებას, მტკიცებულებების შენახვას და საჭიროების შემთხვევაში დახმარების მიღების შესაძლებლობებს.
შეხვედრაზე მონაწილეებმა ხაზი გაუსვეს პრობლემის ამოცნობისა და ღიად საუბრის მნიშვნელობას, რაც ძალადობის პრევენციისა და უსაფრთხო გარემოს შექმნის მნიშვნელოვანი წინაპირობაა.
პროექტი ხორციელდება WAVE ქსელის მხარდაჭერით
ქალთა ფონდი „სოხუმის“ თანამშრომლებისთვის გაიმართა სამდღიანი ტრენინგი თემაზე — „ძალადობა, ტრავმაზე რეაგირება და ტრავმაზე ორიენტირებული პრაქტიკები“, რომელსაც უძღვებოდა პარტნიორი ორგანიზაციის, Danner-ის ტრენერი - კარენ ბოსენი. ტრენინგის მიზანი იყო ქალებთან მუშაობის კიდევ უფრო მგრძნობიარე, უსაფრთხო და პროფესიულ სტანდარტებზე დაფუძნებული მიდგომების განვითარება.
მონაწილეებმა განიხილეს გენდერული ნორმები და სტერეოტიპები, ძალადობის მრავალშრიანი ბუნება და სოციალური-ეკოლოგიური მოდელი. განსაკუთრებული ყურადღება დაეთმო ძალადობის სხვადასხვა ტიპის გააზრებას, იძულებითი კონტროლის მექანიზმებსა და იმ უხილავ ზიანს, რომელიც ფიზიკური კვალის გარეშეც აზიანებს ქალის უსაფრთხოებასა და თავისუფლებას.
ტრენინგის ფარგლებში დეტალურად განიხილეს ტრავმაზე რეაგირების ოთხი ძირითადი ფორმა - შებრძოლება, გაქცევა, გაყინვა და მაამებლობა - როგორც გადარჩენის ბუნებრივი მექანიზმები. ხაზი გაესვა იმას, რომ მხარდაჭერა უნდა ეფუძნებოდეს უსაფრთხოებას, ნდობასა და ქალის არჩევანის პატივისცემას, რათა დახმარება ახალი ტკივილის წყაროდ არ იქცეს.
მესამე დღე დაეთმო პრაქტიკულ ინსტრუმენტებსა და თვითზრუნვის მნიშვნელობას. მონაწილეებმა იმსჯელეს, როგორ მოუსმინონ ძალადობაგამოვლილ ქალებს განსჯის გარეშე, როგორ შეინარჩუნონ პროფესიული სიფრთხილე და ამავე დროს დაიცვან საკუთარი ემოციური რესურსი პროფესიული გადაწვისგან.
ტრენინგის დასრულებისას მონაწილეებს სერტიფიკატები გადაეცათ. მიღებული ცოდნა და უნარები დაეხმარება ფონდი „სოხუმის“ გუნდს, ქალების მხარდაჭერა კიდევ უფრო ტრავმაზე ორიენტირებული, თანაგრძნობაზე დაფუძნებული და უსაფრთხო გახადოს.
ფონდი „სოხუმი“ მადლობას უხდის პარტნიორ ორგანიზაცია Danner-სა და ტრენერ კარენ ბოსენს მნიშვნელოვანი გამოცდილებისა და მხარდაჭერისთვის.
პროექტი ხორციელდება CISU-ის მხარდაჭერით
ახალი შემართებით დაიწყეს ახალი წელი ქალთა ურთიერთდახმარების ჯგუფებმა ათივე მუნიციპალიტეტში. წლის პირველ შეხვედრებზე, ძირითადად, მუნიციპალურ სერვისებზე, ცვლილებებსა და სიახლეებზე ისაუბრეს.
ჯგუფის წევრები ყურადღებით უსმენენ ფსიქოლოგს, რომლის რჩევები და ინდივიდუალური კონსულტაციები განსაკუთრებით სასარგებლოა.
მათთვის მნიშვნელოვანია ციფრული წიგნიერების ნაწილი - სოციალურ ქსელთან მუშაობა, ფონდი „სოხუმის“ ვებგვერდის https://sosfsokhumi.ge/ გაცნობა და საჭირო ინფორმაციის მოძიების სწავლება.
ხობში ახალგაზრდებზე გაკეთდა აქცენტი, წყალტუბოში - ციფრული განათლების მნიშვნელობაზე. სენაკში ახალ წევრებს ერთად მიღწეული შედეგები გააცნეს. განსაკუთრებით საინტერესო იყო შეხვედრა ჩოხატაურში - ჯგუფში არიან გოგოლესუბნის ფოლკლორული ანსამბლ „თაობის“ წევრები და მათ ცეკვა-სიმღერით გაალამაზეს ერთადყოფნის დრო.
ჯგუფების უმეტესობაში მატებაა - ეს ეფექტიანი მუშაობის და წარმატებების მაჩვენებელია.
პროექტი ხორციელდება თანასწორობის ფონდის მხარდაჭერით (კანადა)